Zofate leh Hnam Sakhua-Kristianna

Hnam Sakhua chungchang hi ṭhenkhat chuan kan tuipui lem loh avangin hnial vak ngaiah
pawh kan ruat awm lo ve; Kristian ve lo leh Bible pawm lotute nen chuan inhnial vak ngaihna
pawh a awm lovang. Mahse Zofate sakhuana chungchangah mimal ngaihdan tarlanna
remchangah ka’n hmang teh ang; a boruakin a zir em mai.

Zofate sakhua sawi dawn chuan pipute biak Sakhua leh tunlaia sakhua kan tih hi a inang
chiah lo deuh a, eng ang pawhin sawi ila Misualho chuan kan hrethiam tho ang. Kan pipute khan
Sakhua an be ṭhin a, chu chu hnam leh chhungkaw vengtu a ni a. Mimal thlâ vengtu chu khaltu a
ni. Sakhua hi hnam leh chhungkaw thil a nih vangin hnam leh chhungkua anga biak a ni ṭhin a.
Tunlaia Pathian bia ka tih ang erawh chu a ni lo. Chhungkua an lo retheih luata tihngaihna dang
an hriat tawh loh chuan hnamdang sakhua an phun ṭhin. Entirnan Lusei pain Ralte sakhua a phun
chuan lusei ni lovin Ralte a ni tawh ṭhin. Hmeichhiate te erawh chu an pasalte sakhua an phun
mai ṭhin a, ‘hmeichhiain sakhua an nei lo’an ti ṭhin; hei hi hmeichhe hmuhsitna lam a ni lo.

Chhungkuain sakhua an biak chuan vawk an talh ṭhin a, sakhaw biakna indawt chho
zawhzote hian khuangchawiin thang an chhuah a, tlanghraitu, mi rethei khaichhuaktu, pialral kal
turte an ni. Ram lamah pawh thangchhuah theih a ni tho bawk. Pathian an hria a,
Khuanu/khuavâng ti pawhin an sawi ṭhin âwm e. Luseiho hian Sakhua an biakin Pathian an
biakna tur vawkte an talh tel ṭhin niin an sawi. Pathian hi biak phak loh, hla taka awm, pa ṭha tak,
mangan tawpa mihringte ṭanpuituah an ngai niin a lang; an ṭawngchhan ber a ni. Mahse tihlawm
tum emaw, a tana thil tih emaw an nei ngai meuh lo. Kawngpui siam leh fano dawite hi
khawtlangin Khua an biakna a ni ang.

Hetiang hian vengtu leh enkawltu hre bawk mahse hlauh an ngah hle. Ramhuai an hlau a,
an inthawi fo ṭhin. An nun pawh a ralmuang lova, hmuh theih leh hmuh theih loh hlauin hun an
hmang a ni ber. Chutianga an awm lai chuan Darphawka’n inlarna a hmu a, a zawlin tuipui ral
aṭanga mingo pahnih lo kal tur thu leh an thu awih tur an nih thu a hrilh ni.

Kristianna a lo lût ta ngei a, kan Pathian chanchin chu chiang zawkin min hrilh ta a, a
chhandamna hnathawh dante min hrilh a. Kan mamawh tak a nih vangin kan tan pawm a nuam
a, kan hriatsa Pathian chanchin leh a duhdan nundan zirtir kan nih avangin hnam pum deuhthawa
Kristian nih pawh kan harsat lo. Pipute khan Pathian hriatna engemaw chen chu an nei ngei mai,
mahse a famkim lo a, kan mamawh a phuhruk zo hek lo. Pathian, hmasanga thlahtute hnena
bung tam tak leh kawng tinrenga Zawlneitea thu lo sawitu khan, heng ni tawpah hian keimahni
hnenah a Fapaah chuan thu a sawi ta (Heb 1:1,2) hi Zosapte hmangin kan chungah pawh a
thleng dik ve ta a ni.
Pipute nuna a ṭhate chu vawiin thlengin ka chhawm zel a, a ṭha lote erawh chu ka paih a.
Kan biak Pathian thlâk chuang lovin kan biak dan kan tihmasawn a. Keimahnia a ṭha lalte
chhawmin hnamdang Pathian nung betute tihdan ka la lût bawk a. Chuvangin Vawiina Mizo
Kristiante hian hnamdang sakhua leh Pathian kan be lo va, min thlahtute Pathian, kan hnam min
hruaitu hi kan be zawk a ni. Mizo pipu sakhua chu Kristiannaah tihfamkimin a awm a,
Kristiannaah a inher lut kan tithei ang.
Kristianna pawh Mizo takin, kan mamawh leh kan tana ṭha ang zelin kan kalpui a,
khawvel hmun danga Kristiante nen chuan kan danglam hle. Presbyterian ṭheuh ṭheuh pawh
Mizo leh Khasi chu hringtu pakhat ni mahse kan in ang lo a, Baptist pawh Naga ho nen chuan
danglam tak an ni. Kohhran pawl hrangah awm mah ila, Mizo Kristian kan ni vek mai.
Kristianna hmanga Sakhua kan biak hian kan hnam leh chhungkaw tinte tan malsawmna
a nihzia - ei leh bar, nunphung, khawsakna, finna leh thiamnaah te a tam hle; kan sawi seng
lovang. Mimal nunah pawh Nitinin ṭhatnain min khal, Chhandamtu mak tak a ni (KHB 166:4)
kan ti a; min khaltu hian min khal hneh khawp mai.
Hemi piah lama Pipute sakhua ni chiah si lo, Kristianna hrula Hnam Sakhua sawitute
hian Kristianna hi Mizote awmna atan Khuanu ruat, min ven leh hruaina vanga awm kan nih hi
pawm thei se a duhawm hle. Chutiang ni lova kal chu Bible aṭanga thlir phei chuan hlauhawm
tak a ni (Heb 10:26). Heng kan unaute hi a châng chuan an kal vung viau ṭhin a, khaw thar satin
Chhanchhuahna Khawpui an din a, mahse tunah chuan he khuaa awmte hi Kristian an ni leh
deuh vek tawh; “‘Pastor Chhawna inlarnaa tuihna tling thei lo-pipu tuikhur chawi tum’, a tihte
kha kan lo ni reng a lawm maw le” tiin testimony ngaihnawm tak an sawi ṭhin.