“CARU”- მიმყავს, ვაკეთებ, გიბრუნებ

ავტორი: თამთა მარიდაშვილი

გაზიარებული ეკონომიკა იგივე “Sharing Economy” 21-ე საუკუნის მსოფლიოში სულ უფრო
და უფრო მეტ პოპულარობას იძენს. თანამედროვე ტექნოლოგიებმა სრულიად თავდაყირა
დააყენა მსოფლიო ეკონომიკური მოწყობა: კომუნიკაციების განვითარებამ კაპიტალის
ფლობა ნაკლებ მნიშვნელოვანი გახადა ბიზენსის დასაწყებად. მთავარია იდეა, საქმისადმი
თავდადება და მცირედი კაპიტალი, რომ საკომუნიკაციო და საკოორდინაციო არხები
გამართო.

ნიკა აბაშიძემ სამივე კომპონენტი დააკმაყოფილა და კომპანია „CARU”-ს დამფუძნებლად

2018 წლის აგვისტოდან მოგვევლინა „მიმყავს, ვაკეთებ, გიბრუნებ“ - აი ასე მარტივად
ჩამოაყალიბა საკუთარი ბიზნეს კონცეფცია და დღემდე, თბილისის მასშტაბით, უკვე 2000-ზე
მეტ ავტომობილის მფლობელს მოემსახურა. თავად არ ფლობს ავტოსერვისს, არც
შემკეთებლები ჰყავს დაქირავებული. ბიზნეს-მოდელი Uber-ის და Airbnb-ის მსგავსია.

გაზიარებული ეკონომიკა - ხშირად მოიხსენიება, როგორც Peer to Peer (P2P)ეკონომიკა, რაც

თავის მხრივ გულისხმობს იმას, რომ მომხმარებლები პროდუქტსა თუ სერვისს პირდაპირ
მწარმოებელი ფიზიკური პირებისაგან ყიდულობენ და არა კომპანიისაგან.

როგორ და სად გაჩნდა იდეა? როგორც ფსიქოლოგები ამბობენ, საუკეთესო აზრები მაშინ
მოგდით, როდესაც მოდუნებული და ოდნავ გაფანტული ხართ. ნიკას შხაპის მიღების დროს
არა, მაგრამ სარბენ ბილიკზე გაუნათდა გონება და სახლისაკენ გაემართა. „ძალიან მარტივად
ვუდგები ზოგადად ყველაფერს. რაღაც იდეა რომ მომდის, ეგრევე ვდგები და ვაკეთებ“.
გაგონილი ჰქონდა, რომ პლატფორმა wix.com-ზე შეეძლო უფასოდ ვებ-გვერდის აწყობა. არც
მეტი, არც ნაკლები, ზუსტად სამ დღეში შეიქმნა ბრენდი თავისი ვებ-გვერდით. კომპანიას
„CARU“ უწოდა - მანქანის ინგლისური შესატყვისიდან („Car“) გამომდინარე. ლოგო ფავერ
ფოინთში ააწყო და მხოლოდ ამის შემეგ გააცნო იდეა ახლობლებს. პირველად ბიძას უთხრა,
რომელიც თავიდან ძალიან სკეპტიკურად განეწყო, დღეს კი ნიკას კომპანიაში მუშაობს.

ბიზნეს-მოდელი

„მანქანა ჩემი გატაცებაა. პირველი ავტობლოგერი ვარ საქართველოში, ადრე ორი

ავტოსერვისის კომპანია მქონდა და როცა მეგობრებს რაიმე პრობლემა ექმნებოდათ,
ყოველთვის მე მირეკავდნენ“.

როგორც ნიკა ამბობს, მანქანა რთული მექანიზმია და შესაბამისად არსებობენ ადამიანები,

რომლებიც მასში კარგად ერკვევიან და პირიქით, ვერ ერკვევიან. და როდის რჩება ორივე
მხარე მოგებული? როდესაც ეს ადამიანები უკავშირდებიან ერთამანეთს და ცვლიან
მომსახურებასა და ფულს. იდეაც ამაში მდგომარეობს. ნიკამ გადაწყვიტა შეექმნა პლატფორმა,
რომლის საშუალებითაც ამ ორ მხარეს დააკავშირებდა. თუმცა, ბენეფიტი მხოლოდ ეს არ
უნდა ყოფილიყო.

“CARU”-ს შუამავლობით ე.წ. ავტოასისტენტს მანქანა მიჰყავს, აკეთებს და აბრუნებს, ისე რომ
მანქანის მფლობელს ხელის განძრევა არ უწევს. ავტოასისტენტი არ არის დაქირავებული,
არამედ თავად სარგებლობს „CARU”-ს მომსახურებით, რისთვისაც საკომისიოს იხდის. მას
შეუძლია მანქანა წაიყვანოს ნებისმიერ შემკეთებელთან, მთავარია მომხმარებელი დარჩეს
კმაყოფილი. ხოლო ის, რომ მომსახურე პერსონალი (ავტოასისტენტი და შემკეთებელი)
ფიზიკური პირები არიან და არა იურიდიული, ავტომატურად ნიშნავს, რომ კაპიტალის
მფლობელის რგოლი გამოირიცხება, რასაც მომსახურების ნაკლებ ფასამდე მივყავართ. „შენი
გადახდილი ფულიდან ბევრი ადამიანი როცა ხეირობს, ძვირი ჯდება. პირდაპირ უნდა მისცე
ფული იმას, ვინც საქმეს აკეთებს“. შედეგად “CARU” -ს შუამავლობით მანქანის შეკეთება 70%-
ით ნაკლები ღირს, ვიდრე ავტოსერვისის მომწოდებელ კომპანიებთან.

დაბალი ფასი იმითაც მიიღწევა, რომ ავტოასისტენტმა, მანქანის მფლობელთან შედარებით,

უკეთ იცის, რა ჯდება ამა თუ იმ პრობლემასთან გამკლავება. „მაღაზიაში რომ შედიხარ და
პური გინდა, იცი რომ 80 თეთრი ან ლარი ღირს, მაგრამ შემკეთებელი რამდენად სწორ ფასს
გთავაზობს, რთულია მიხვდე, მით უმეტეს, მაშინ როცა პრობლემა არ არის განმეორებითი“.

კლიენტის ინტერესების დამცველად “CARU” გვევლინება. ლოგიკურიცაა. რაც უფრო მეტი

მომხმარებელი ისარგებლებს მისი საშუამავლო მომსახურებით, მით მეტ საკომისიო
შემოსავალს მიიღებს. მაღალი შემოსავლის მიღება მაღალი ფასის დაწესებითაც არის
შესაძლებელი. თუმცა ამით კონკურენტული უპირატესობა იკარგება. შესაბამისად, “CARU“-ს
რაოდენობაზე აქვს სწორება.

ასისტენტები მომხმარებლების რეკომენდაციებით ფასდებიან. ”CARU” ყოველ კლიენტს

მიმართავს, მასზე მიმაგრებული ასისტენტი შეაფასოს. ვისაც უფრო მაღალი რეიტინგი აქვს,
მით უფრო მეტი კლიენტით ჯილდოვდება. იმ შემთხვევაში თუ რაიმე პრობლემა აქვს
მომხარებელს, მაგალითად ფიქრობს, რომ კარგად ვერ გაუკეთეს მანქანა, მესამე პირი, CARU-
ს პრობლემური შემთხვევების ოფიცერი, ნიკას ბიძა ერევა. ეს უკანასკნელი ადგენს,
რამდენად მართებულია საჩივარი. თუ ასეა, მაშინ ასისტენტი ვალდებულია გამოასწოროს
შეცდომა. შესაბამისად ასისტენტის ინტერესშიცაა, რომ მანქანის შესაკეთებლად წაყვანა
ხელმეორედ არ მოუწიოს.

ასისტენტების შერჩევა ტესტირებითა ხდება. წარმატებული კანდიდატები ერთი თვის

განმავლობაში სტაჟირებას გადიან. თითოეულ სტაჟიორს თავისი მენტორი ჰყავს, რომელიც
ასწავლის და აფასებს მას. მას შემდეგ, რაც CARU დარწმუნდება, რომ სტაჟიორი კარგად
ართმევს თავს მოვალეობებს, დამოუკიდებლად მუშაობის უფლებას აძლევს.
“CARU”-ს მომსახურებით ამჟამად 30 ავტოასისტენტი სარგებლობს. ხოლო “CARU”- ს ოფისში
ნიკასა და მისი ბიძის გარდა, კიდევ 3 ადამიანი მუშაობს: ნიკას დამხმარე, შეკვეთების
მენეჯერი, და ხარისხის მენეჯერი, რომელიც ფასებს ამოწმებს, რა ფასებში შეძლეს
ასისტენტებმა შეეკეთებინათ ავტომობილი.

სამიზნე აუდიტორია

ნიკა სამიზნე აუდიტორიის განსასაზღვრად საკუთარი მეგობრების უკეთ გაანალიზებას

შეუდგა, რის შემდეგაც გადაწყვიტა, რომ თავდაპირველად დეველოპერებზე უნდა
გაეკეთებინა აქცენტი. მისი აზრით, დეველოპერები ყველაზე ზარმაცი ხალხია. მიზეზ-
შედეგობრიობაზე თუ მიდგება საქმე, სავარაუდოდ, ეს ადამიანები დეველოპერები იმიტომ
გახდნენ, რომ ზარმაცები იყვნენ.

შემდეგი ნაბიჯი დეველოპრების ინტერესების სფეროების განსაზღვრა იყო. ნიკა მეგობრების

დაკითხვის შემდეგ სამ ძირითად კატეგორიაზე ჩამოყალიბდა: როკ-მუსიკის მოყვარულები,
გურმანები, და ონლაინ შოპინგით გატაცებულები. ეს სამი კატეგორია ფეისბუქ
ტარგეტირებისათვის გამოიყენა. შედეგმა გაამართლა: პირველი მომხმარებლების
აბსოლუტური უმრავლესობა მართლაც დეველოპერები და სხვა IT პროფესიების
წარმომადგენლები აღმოჩნდნენ.

მიუხედავად პირველი წარმატებისა, მომხმარებლების მოზიდვა თავიდან მაინც გაჭირდა,

რადგან სერვისი სიახლე იყო ბაზრისთვის. ვითარება მას შემდეგ შიეცვალა, რაც
გაუმართლათ და შემთხვევით რამდენიმე ინფლუენსერს მოემსახურნენ. მათ შორის იყო
დოდი ხარხელიც.

ინფლუენსერი - გავლენიანი პიროვნება, რომლის დახმარებითც შესაძლებელია კომპანიის

იმიჯის შექმნა და მოხმარებლების მოზიდვა.

მომხმარებლებათან ურთიერთობისას თანდათან აღმოაჩინეს, რომ მათთვის ფასზე

მნიშვნელოვანი დროის დაზოგვა იყო. ერთ-ერთი კლიენტის კითხვაზე, თუ რას სთავაზობდა
“CARU’ , ნიკამ შემდეგი პასუხი გასცა: „მანქანა მიგვყავს, ვაკეთებთ და გიბრუნებთ“. მერე
გადაწყვიტა, რომ ეს ფრაზა ლოზუნგადაც გამოდგებოდა.

კომპანია დღემდე მოგების რეინვესტირებას მიმართავს. თანხის ძირითადი ნაწილი

მომხარებლების მოზიდვასა და ნდობის გამომუშავებაში იხარჯება.მომხმარებლების
კმაყოფილება და ნდობა გუნდისთვის ყველაზე მნიშვნელოვანია. შედეგად კომპანია150
პროცენტით იზრდება ყოველთვიურად.

ახალახანს “CARU”-ს საქართველოს ტექნოლოგიებისა და ინოვაციების სააგენტოს

თანადაფინანსების გრანტების პროგრამის ფარგლებში 100 000 ლარი გადაეცა. ნიკა ფიქრობს,
რომ გამარჯვება ბიზნესის ინოვაციურობამ და სწრაფმა ზრდამ განაპირობა. ასევე, როგორც
პროგრამის მენტორისგან შეიტყო, ჟიურისათვის მნიშვნელოვანი ფაქტორი გუნდის
ენთუზიაზმი, საქმის სიყვარული და თავდადება იყო.