Si Daedalus, isang sikat na arkitekto, imbentor at kahanga-hangang dalubhasa
ng kasanayan ay kilala sa mga naimbento niyang mga bagay. Siya ay may isang anak na si Ikarus. Kasama sa maraming imbensyon ni Daedalus ay ang kahoy na baka na ginawa niya para kay reynang Pasiphae, at ang labirint ng Minotaur sa Knossos sa isla ng Creta. Noong si Daedalus ay naninirahan pa sa Athens, nagkaroon siya ng aprentis na si Perdix (may mga nagsasabi din na si Talos), ngunit sa takot na mas mahuhusayan pa siya ng aprentis niya, tinulak niya ito sa isang bundok ng Acropolis, subalit nailigtas ni Athena si Perdix. Si Daedalus ay pinalayas sa Athens dahil sa ginawa niya at siya ay lumipat sa isla ng Creta. Nagsimula magtrabaho si Daedalus kay haring Minos at reynang Pasiphae sa isang palasyo sa Knossos. Ang reyna ay nagpagawa ng kahoy na baka kay Daedalus na gagamitin upang maakit niya ang isang toro. Nang malaman ni haring Minos ang pangyayari, nagpagawa siya ng isang labirint kay Daedalus upang magsilbing kulungan para sa kalahating tao at kalahating toro na si Minotaur. Ngunit dumating ang isang bayani na si Theseus upang patayin ang nilalang na si Minotaur sa tulong ni Daedalus at siya’y naging matagumpay sa kanyang layunin. Nagtanan si Theseus kasama si Ariadne, ang anak ni Minos at Pasiphae. Ang hari ay nagalit dahil sa pagkawala ng kanyang anak kaya’t ipinakulong niya si Daedalus sa labirint kasama ang anak na si Ikarus. Upang makatakas, si Daedalus ay bumuo ng dalawang pares ng pakpak mula sa mga balahibo ng ibon at waks mula sa kandila. Sinabihan niya si Ikarus na huwag lumipad ng malapit sa araw dahil matutunaw ang waks sa pakpak at huwag naman lumipad malapit sa tubig dahil mababasa ng pakpak at bibigat. Sila ay lumipad mula sa labirint at dahil sa lubos na katuwaan ni Ikarus sa paglipad, siya ay tumaas ng tumaas at napalapit sa araw kaya’t ang waks sa kanyang pakpak ay lumambot at natunaw na naging sanhi ng kanyang pagkahulog at pagkamatay. Si Daedalus ay nalungkot sa pangyayari at nagkaron ng lubos na pagsisisi sa kanyang nagawa.