News: Naratibong Ulat sa Seminar sa Angono Cultural Heritage,

Paglulunsad ng Aklat-Tula ng Angono 3/7 Poetry Society, at Artist Talk sa Mga

Kasapi ng KATAGA Writers Group na Ginanap sa Atelier Restoran/ Nemiranda
Art Haus,Barangay San Roque, Angono, Rizal noong Sabado, Marso 5, 2016

Tatlong bahagi ang seminar na ito – ang lecture para sa mga guro mula sa iba’t ibang eskwelahan hinggil
sa cultural heritage, ang paglulunsad ng aklat-tula ng mga makata ng Angono at lalawigan ng Rizal, at
ang kwentuhan/interakson ng mga makata/artists ng Angono sa mga makata/artist mula sa Maynila at
Quezon City.

Naging mga panauhing tagapagsalita sina Nemesio ‘Nemi’ Miranda Jr., Richard R. Gappi, Prof. Ligaya
Tiamson-Rubin, Sir Albert delos Santos, Philip Anorico, Prof. Ferdinand Jarin, Mark Angeles at Glen Sales.

Halos umabot sa 70 ang mga dumalo. Kabilang dito ang 30 guro mula sa 12 eskwelahan, at ang iba pa ay
mga manunulat, artists at cultural workers.

Alas-9:30 ng umaga nagsimula ang seminar. Unang nagsalita si Angono artist Nemesio ‘Nemi’ Miranda
Jr. Nagbigay siya ng bating pagtanggap sa mga kalahok sa seminar. Pagkatapos nito ay ikwinento niya
ang diwa ng Angono bilang ‘Pambansang Kapital ng mga Sining.’ Iniugnay niya ito kung paano
nakakatulong sa art tourism at creative industry ng bayan. Pinuri din G. Miranda ang lokal na
pamahalaan sa pangunguna ni Mayor Gerry Calderon dahil sa seminar sa cultural heritage na
naglalayong i-institutionalize ang pananaliksik, pag-iingat, at promosyon ng tradisyon, kultura, sining at
kasaysayan ng bayan.

Sumunod na nagsalita ay ang inyong lingkod, G. Richard R. Gappi, ang Information Officer I ng munisipyo
at tagapangasiwa ng secretariat ng Angono Municipal Cultural Heritage Committee. Ibinigay ni G. Gappi
ang overview at daloy ng seminar. Binanggit niya ang pagkabuo ng nasabing komite – sa pamamagitan
ng executive order ni Mayor Gerry Calderon – at ang layunin at gagawin nito.

Sa kanya namang lecture, binanggit ni UP emeritus professor Ligaya Tiamson-Rubin na nasisiyahan siya
na mga kapwa guro niya ang dumalo sa seminar. Binaybay ni Ma’am Rubin ang kasaysayan ng panitikan
sa Angono. Binigyang diin niya na ang panitikan ay ‘pagsusulat at pagdodokumento’ sa sining, tradisyon,
kasaysayan, kultura, at kasalukuyang kinalalagyan at sitwasyon ng bayan. Dagdag pa niya, ang
‘pagdodokumento’ na ito ay kailangang maipasa sa bata at bagong henerasyon upang mabuhay at
magpatuloy, kung kaya hamon niya sa mga guro, ito ang dapat ituro at ipagawa sa mga mag-aaral.

Sumunod namang nagsalita si Sir Albert delos Santos at paksa niya ang kasaysayan ng Musika at mga
banda sa Angono. Nag-lecture din siya sa mga guro kung paano epektibo at masayang ituturo sa klase
ang Musika. Ayon kay Sir Albert, mayroon nang walong (8) marching bands sa Angono. Mayroon na rin
sa Angono na mga wind ensemble tulad ng Angono Chamber Orchestra, Angono Wind Ensemble, APHS
Wind Ensemble at Angono Methodist Wind Ensemble.

Paksa naman ng lecture ni G. Philip Anorico ang kasaysayan ng sining biswal sa Angono. Si G. Anorico ay
nagtapos at nag-aral ng Master of Arts sa UP Diliman, dating supervisor ng Human Resource Office ng
ABE College sa Cainta, makata, at kasapi ng Anggono Tres-Siete (3/7) Poetry Society at Neo-Angono
Artists Collective. Binaybay ni G. Anorico ang mga artworks at artists sa Angono mula sa Angono
Petroglyphs, sina Juan Senson at Pedro Piñon noong panahon ng mga Kastila, sina Carlos ‘Botong’
Francisco at Moises Villaluz noong unang hati ng 20th century, at ang iba’t ibang artist groups tulad ng
Angono Ateliers Association, Angono Artists Association, Neo-Angono Artists Collective, S-16, at
Kickstart Art group.

Pagkatapos ng lecture ni G. Anorico ay nagkaroon ng lunch break.

Ala-1:30 naman nagsimula ang session sa hapon. Naging tagapagsalita dito si Prof. Ferdinand Jarin ng
Philippine Normal University. Si Professor Jarin na katatapos lang ng kanyang Master of Arts ay may
anim nang gawang aklat ng sanaysay at maikling kwento, na ang isa dito ay ginawaran ng National Book
Award. Tinalakay ni Professor Jarin ang tungkol sa sanaysay o essay at ang Constructivist Theory na
 pagkuha ng kaalaman para sa mga bata, at kung paanong ang sanaysay ay maaaring materyal na
makakatulong sa pagtuturo sa loob ng klase. Itinuro din ni Professor Jarin ang mga elemento ng
Sanaysay at kung paano ito isulat.

Sumunod na nagsalita si G. Mark Angeles, isang multi-awarded na makata at writer mula sa Polytechnic
University of the Philippines. Hinimay niya ang mga elemento kung paano gumawa ng Maikling Kwento,
at kung paano ito susuriin at gagamitin bilang materyal panturo ng mga guro sa loob ng klase.

Ang huling tagapagsalita ay si G. Glen Sales, makata, artist at guro sa Taytay United Methodist School.
Tula ang kanyang paksa, ang mga elemento nito, at kung paano ito ituturo nang masaya at epektibo sa
loob ng klase.

Pagkatapos ng seminar ay nagkaroon ng paglulunsad ng aklat-tulang MGA APAK SA DAGAT, ang

ikalawang aklat ng Angono Tres-Siete (3/7) Poetry Society na tampok ang mga tula ni Bb. Elliz Marie E.
Alog. Ang mga unang kopya ng aklat – bilang token – ay tinanggap ng mga guro mula sa iba’t ibang
eskwelahan sa Angono para sa kani-kanilang silid-aklatan. Tumanggap din ang mga guro ng kanilang
Katibayan ng Paglahok.

Pagkatapos ng paglulunsad aklat ay nag-interaksyon ang mga makata, artists at cultural workers ng
Angono sa kanilang counterpart na mga taga-Maynila at Quezon City. Naging usapan ang tungkol sa mga
proyekto at kasaysayan ng grupo, ang creative at artistic process, at ang programang pangsining at
pangkultura ng mga artist groups, at ng pamahalaang bayan ng Angono, partikular ang pagkabuo ng
Angono Municipal Cultural Heritage Committee, na anila’y magandang hakbang sa pagtitipon at
pagpapayabong ng sining, tradisyon, kultura at kasaysayan ng bayan.

*****
Year V. Issue 46. March 6-13, 2016. ISSN 2244-3851. DTI Registration No. 01987812. Editor: Richard R.
Gappi. aRNO: Exponent of Community Journalism.