#12 DE LOS SANTOS, Jack Allain A.

BSN 1-B 05 Nov 2019

Replektibong Reaksiyon 1: Wika ng Internet at Midya

Aking napagtanto na sa mundo ng internet at midya makikita kung gaano kalawak at

dinamiko ang wikang Filipino. Sa paglipas ng panahon, nagbabago ang takbo ng
teknolohiya, gamit ng midya, at ang mga bagay na nagaganap sa internet. Kasabay na
rin dito ay ang mga bagong salitang nagawa, nabibigyang kahulugan, natutunan, at sa
kalauna'y natatanggap na rin bilang bahagi ng ating wikang Filipino. Kadalasan sa mga
salitang nasa larangan ng internet ay baguhan pa lamang at marami sa mga salitang ito
ay nagiging pamilyar na rin dahil tayo’y nakatutok at nakasubaybay sa social media. Ang
mga salita, linya, larawan, istilo, at gawaing napapauso ng mga naging viral o/at ng mga
taong iniidolo ay natutunghayan at nagagaya rin ng netizens kaya nama’y mabilis ang
ating pagkatuto sa mga salitang bahagi ng wika ng Internet.
Ang pag-unlad ng makabagong teknolohiya ay isa sa mga dahilan sa paglaganap ng wika
ng internet. Nakakatuwa ring isipin na maraming mga salita sa larangan ng midya at
internet na ating naisasalin sa wikang Filipino. Kagaya na lamang ng headphones na
ngayon ko pa lang nalaman na “pang-ulong hatinig” pala ang salin nito sa Filipino. Akin
nga ring ikinagulat at ikinatuwa na pati ang mga salitang selfie at groufie ay may salin sa
wikang Filipino at isiningit din ng aming guro na “kuharili” at “kuharami” pala ang mga ito
sa Filipino. Sadyang dinamiko talaga ang ating wika at sa pagyabong nito, nakakagawa
tayo ng mga bagong salita sa paglipas ng oras at sa makabagong panahon. Disinuwebe
anyos pa lang ako, mayroon at nakatutok sa social media accounts, napapadalas ang
paggamit ng midya at internet, ngunit maraming bagay pa ang hindi ko alam at nais ko
pang malaman tungkol sa wika ng internet kahit bahagi at lumaki na ako sa henerasyong
napalaganap ang gamit ng midya. Talagang malawak ang mundo ng wika sapagkat
naisip ko na habang dumadami ang aking kaalaman, napagtanto ko na kaunti pa lamang
ang aking mga natutunan. May kasabihan nga tayong “Change is the only constant in the
world.” at habambuhay akong maging bukas sa posibilidad ng pagbabago at sa
pagkakatuto. Sa aking pagkakatuto ay ang akin ring pakikisabay sa uso ngunit hindi
naman aabot sa punto na umiikot na ang mundo ko sa internet at sa lahat ng nagiging
uso kahit hindi na kailangan, nararapat, at tama. Sabay sa uso na kung saan, may sapat
akong kaalaman at kamalayan sa mga bagay na nangyayari sa aking kapaligiran. Sabay
sa uso na kung saan magagamit ko ang aking kaalaman at kalamangan sa paggamit ng
makabagong teknolohiya sa paghasa sa aking sarili, abilidad, at kakayahan. Sabay sa
uso na kung saan mas mapapadali ang ating mga gawain at maihasa ang
pagkakaintindihan at komunikasyon sa isa’t isa. Sabay sa uso na kung saan aking
maibabahagi ang aking kaalaman sa iba at sa mabuting paraan. Para sa aki’y
nakakatuwa ang pagkakatuto natin sa wika ng internet sapagkat ito rin ay nagpapakita
na tayo’y umaangkop at yumayakap sa mabubuting epekto ng pagbabago ng ating
mundo at wika.
12 DE LOS SANTOS, Jack Allain A. BSN 1-B 05 Nov 2019

Replektibong Reaksiyon 2: Wika ng Negosyo

Bilang mga konsumidor na natural na mayroong mga pangangailangan, tayo’y natututo

sa pagpipili at pagbibili para sa ating mga sarili at pamilya. Kaagapay na rin dito ay ang
pagtatrabaho upang may kikitain na siyang gagamitin para sa bilihin ng ating mga
pangangailangan. Kahit ang isa tao’y estudyante pa lamang o naghahanapbuhay na
ngunit hindi naman nagmamay-ari ng negosyo, naisip ko na mahalaga ang ating
kaalaman at pagkakatuto sa wika ng negosyo sapagkat dito rin umiikot ang ating mga
pinansiyal na balak at desisyon at pera para sa mga gastusin at iipunin sa buhay. Sa
mundong halos pera at diskarte na ang nagpapatakbo upang umasenso, ang kaalaman
ng tao tungkol sa wika ng negosyo ay makakatulong sa pagdedesisyon sa mga pinansiyal
na bagay. Naalala ko tuloy ang impormal na salitang adulting, na tumutukoy sa mga
responsibilidad ng mga nakakatanda at sa pagsagawa sa mga ito, kagaya na lamang ng
pagtatrabaho, pagbabayad ng buwis at mga bayarin at gastusin sa bahay, pamimili sa
palengke o supermarket, at pagtitipid para mas makaipon. Ang mga nakasanayang
gawain na aking nabanggit at marami pang iba ay umiikot sa mundo at wika ng negosyo.
Nabanggit ko kanina na kahit ang isang tao’y estudyante pa lamang, mahalagang may
wastong kaalaman tayo tungkol sa wika ng negosyo sapagkat dadating din ang panahon
na ako’y hahawak at gagamit sa sarili kong pera. Kahit estudyante pa lang, nagiging
konsumidor na tayo sapagkat gumagastos tayo para sa ating mga sarili. Ngunit darating
din ang araw na kikita na ako ng sarili kong pera at hindi na kailangang tustusan pa ako
ng aking mga magulang. At kapag dadating na ang panahon ‘yon, nasa akin na ang
buong kontrol at desisyon sa paggastos ng pera. Mabuti nang sa edad kong ‘to, marami
rami ang dapat kong malaman sa wika ng negosyo upang ako’y mas maging mabuting
konsumidor sa ngayon at sa aking pagtatrabaho balang araw. Aking ikinagalak na
natutunan ko ang mga bagong salita sa wika ng negosyo sapagkat mas naiintindihan ko
ang mga bagay tungkol sa pera, epektib na pamimili at transaksiyon, at iba pa. Naisali at
naisingit din sa pag-uulat ang totoong istorya ng diskwento, sale, promo, at mga bagay
bagay na nanghihikayat na “nakakatipid” daw at para sa aki’y mabuti na ring matuto ako
na hindi lahat ng sinasabing nakakamura ay mabuti. Minsa nga’y naloloko lang ang
karamihan sa mga ganyan dahil sa halip na makatipid ay nakagastos na pala ng mas
mahal o hindi maganda ang uri o kalidad ng produkto. Sa mundo na mahalaga ang
paghahanapbuhay, transaksiyon, at pera upang mapabuti ang kalidad ng buhay, aking
napagtanto na ang kaalaman at pag-iintindi sa wika ng negosyo ay dapat nating
matutunan upang tayo’y mas maging wais at mabuting konsumidor at manggagawa. Sa
mura kong edad, ako’y masaya na may kaalaman ako tungkol sa wika ng negosyo
sapagkat mas naiintindihan ko ang proseso, istilo, at ang mga nagaganap sa larangan
ng negosyo. Mabuti na ring may alam tayo para ating mapakinabangan ang pera natin
nang maayos.
12 DE LOS SANTOS, Jack Allain A. BSN 1-B 07 Nov 2019

Replektibong Reaksiyon 3: Wika ng Nursing

Sa mundo ng nursing, mapapagtanto ng tao na kaagapay na nito ang pag-aalaga,

kalusugan, at ang pag-aaral sa iba't ibang sangay ng siyensiya upang magkaroon ng
kaalaman sa pag-aalaga at pagtulong na mapabuti at mapabilis ang paggaling ng tao.
Hanggang ngayon, maraming tao pa rin na mababa ang tingin sa mga nars at hanggang
"yaya" ng mga doktor lang ang tingin nila. Ang hindi nila alam, napakaraming pinag-aralan
at pinaghirapan ng mga nars at ng mga mag-aaral ng nursing bago makamit ang
minimithing ambisyon. Minamaliit at inaakala ng karamihan na madali ang pag-aaral at
ang pagtatrabaho sa nursing. Ngunit kung papasukin ng tao ang mundo nito, tiyak na
magbabago ang isip nila. Sa wika pa lamang nito, siguradong mawiwindang sila. Baka
nga pamilyar sila sa ilang mga salita ngunit napakalawak ng wika ng nursing at
nangangailangan ito ng matinding pag-unawa upang ito'y maiintindihan at magagamit
nang tama at maayos sa aplikasyon ng mga ito sa totoong sitwasyon
Bilang mag-aaral ng nursing, napagtanto ko na marami pa akong dapat pag-aralan at
matutunan para pagbutihin at husayin ang aking sarili. Kung tutuusin, napakalayo ko pa
sa aking pangarap -- nagsisimula pa lamang ako. Isa sa mga hakbang na kailangan kong
tahakin upang ako'y maging mahusay na nars balang araw ay ang pag-aaral sa wika ng
nursing. Naisip ko na dapat kong maintindihan at maaalala ang mga salita nito nang sa
gano'y ako'y makapasa sa aking mga pangunahing asignatura, makapagtrabaho nang
maayos sa gaganaping duty, at maging epektibo at magaling na praktisyoner kapag ako'y
magiging rehistradong nars na. Akin ring napagtanto na hindi ko lang dapat isaulo ang
mga salitang ito para lang sa mga pagsusulit at kakalimutan lang din pagkatapos. Dapat
akong maging pamilyar at may sapat na kaalaman upang ako'y maging mabuting nars
sa aking pagtatrabaho balang araw. Sa tulong ng wika ng nursing, mas mapapabuti ko
ang aking sarili at mapapalawak ang aking kaalaman. Nagdadalawang-isip man at araw-
araw pinagduduhan ang talino, kakayahan, at abilidad, buo pa rin ang pag-asa at
determinasyon kong matuto sa mga asignatura, aplikasyon, konsepto, at wika ng nursing
upang ako'y gumaling. Isang malaking pagsubok ang pag-aaral nito ngunit kung ito ang
kailangan upang ako'y gagaling, buong puso kong hinahamon ang pag-aaral at
pagkakatuto sa wika nito.
12 DE LOS SANTOS, Jack Allain A. BSN 1-B 07 Nov 2019

Replektibong Reaksiyon 4: Wika ng Kalusugan

Sa dami ba namang ganap natin sa ating mga buhay, mapa-responsibilidad man natin,
ambisyon, problema, o iba pa, tila nakakalimutan na nating alagaan ang ating mga sarili
at napapabayaan na natin ang ating kalusugan. Habang binabasa at pinapakinggan ang
mga salitang angkop sa wika ng kalusugan, naisip at naalala ko, may mga bagay nga
pala ako na hindi ko na nagagawa nang maayos at nalilimutan ko, katulad na lamang ng
aking pagbasa sa salitang nutrisyon. Marami raming araw na rin ang nakalipas na hindi
na naging masustansiya ang aking mga kinakain o hindi na talaga ako kumakain ng
almusal. Isang halimbawa rin ang salitang bitamina, na minsa'y nakakalimutan kong
inumin sa umaga. Ilan lamang 'yan sa aking mga naalala. Napaisip ako, naging pabaya
na yata ako sa sarili ko at baka nga'y ito'y isang dahilan kung bakit hanggang ngayon,
payat pa rin ang aking pangangatawan. Pagkatapos ng pag-uulat sa wika ng kalusugan,
napagtanto ko na may mga bagay sa aspeto ng kalusugan na aking napapabayaan. Dito
ko rin napagtanto na napakahalaga nga pala ng kalusugan natin sapagkat ito ang ating
ginagawang instrumento, sandigan, at pundasyon sa pang araw-araw na gawain. Aanhin
ang ating mga pinaghihirapan kung bagsak at susuko na ang ating pangangatawan at
kalusugan? Mahalagang pag-aralan ang tungkol sa kalusugan at ang wika nito, hindi
lamang para sa mga taong nasa larangan ng kalusugan at medisina, kundi para sa lahat
sapagkat dapat nating bantayan at alagaan ang ating mga sarili at kalusugan upang
malusog at malakas ang ating resistensiya sa maaaring mangyayaring masasama sa
ating katawan.
Sa pag-uulat sa wika ng kalusugan, naalala ko rin at hindi ko na ikinagulat pa na mai-
uugnay ang mga salita nito sa wika ng nursing sapagkat, mithiin ng nursing ang pag-
aalaga at pagpapanitili, pagpapagaling, at pagdebelop sa kalusugan ng tao. Ngunit kahit
hindi ko na i-uugnay ang wika ng kalusugan sa nursing, tila namulat ang aking pag-iisip
at pag-alala sa aking kalusugan at napagtanto ko rin ang kahalagan ng wika ng
kalusugan, hindi lang para sa akin, kundi para sa lahat. Nakakalungkot isipin na hindi na
natin ito nabibigyan ng pansin at oras na pag-aralan o alamin man lang ang mga simpleng
detalye at kaunting kaalaman tungkol sa wika nito dahil nagiging abala na rin tayo sa
kanya kanya nating mga responsibilidad. Ngunit nang dahil dito, para bang ako'y
nagkaroon ng maraming balak na nabuo sa aking isipan tungkol sa pag-aalaga sa'king
sarili. Ginawa kong hudyat ang pag-uulat sa wika ng kalusugan at ang pakikinig ko dito
na oras na balikan at ipagpatuloy ko ang mga dapat kong gawin para mapanatiling mabuti
ang aking kalusugan.
12 DE LOS SANTOS, Jack Allain A. BSN 1-B 12 Nov 2019

Replektibong Reaksiyon 5: Wika ng Agham at Matematika

Sa makabagong panahon, henerasyon, at mundo nating ito, hindi natin maipagkakaila na

napakalaki nang nai-ambag ng iba't ibang sangay ng matematika at agham. Maging sa dating
panahon pa, na ilang libong taon na rin ang nakalipas; matematika at agham ang siyang
naging tulay sa pagbabago at pagdiskubre ng bagong pag-aaral, pananaliksik, at imbensiyon.
Pamilyar na sa akin ang iba't ibang mga salita, asignatura, at terminilohiya na parte ng pag-
uulat sapagkat napag-aralan ko na ang mga ito mula elementarya hanggang sa pagtungtong
ko ng kolehiyo ngunit labis kong ikinagulat ang mga salin ng mga salitang ito sa wikang
Filipino. Akala ko'y pananatilihin lamang ang orihinal na salita nito o makukunan ko pa rin ng
konting ideya ang salin nito sa Filipino ngunit ibang iba talaga ang mga salitang ito at parang
niisa sa kanila ay hindi ko pa nadaanan o narinig man lang dati. Hindi ko na malayong
pakinggan ang mga salin nito sa Filipino mula sa salitang Ingles. Kagaya na lamang ng
Mathematics na tinatawag nating Matematika sa Filipino ngunit Sipnayan pala ang totoong
salin nito at napakalayo talaga sa salitang Mathematics. Ni-salitang ugat o kaunting ideya ay
hindi ko maiisip. Ang salitang Physics na akala ko'y Pisika ay Liknayan pala, Statistics na
Palautatan pala, at Biology na Haynayan ang salin sa Filipino. Aaminin kong lahat ng mga
salitang isinalin ay bago para sa akin at nakakatuwang isipin na bagong karagdagan ito sa
kaalaman ko. Hindi rin kasi ginagamit ang mga ito sa lectures at diskusyon sa silid-aralan
kaya't maiintindihan talaga na baguhan pa lamang ang mga ito para sa akin, maging sa aking
mga kaklase. Medyo hirap ako sa pag-intindi tungkol dito. Kung hindi dahil sa paglagay ng
Ingles na salita katabi ng salin sa wikang Filipino, baka hindi ko talaga maiintindihan ang mga
salitang ukol sa Agham at Matematika.
Dito rin natin makikita kung gaano kalawak at dinamiko ang ating wikang Filipino. Sa
kagustuhan ba naman nating isalin lahat o halos lahat ng mga salita ng Ingles sa wikang
Filipino, pati ba nama'y terminolohiya ng agham at Matenatika ay may salin na rin. Kung
tutuusin nga'y maraming mga Pilipino ang hindi alam o pamilyar man lang sa mga salin ng
mga salitang ito, maging ang mga Tagalog o iba pang taga-Luzon. Akin ring naipagtanto na
hindi dapat minamaliit o sinasabing madali lang ang wikang Filipino. Porke't sinasalita natin
ang wikang Filipino ay hindi ibig sabihin madali na itong pag-aralan dahil may kaalaman na
tayo tungkol dito ngunit ang hindi natin alam, marami pa pala tayong dapat matutunan pa at
ang pagkakatuto ay panghabambuhay at maaaring pabago-bago. Ang ating kaalaman
ngayon ay maaaring maikling porsiyento lamang sa totoong sakop at patuloy pang lumalawak
at yumayabong ang ating wika. Hindi nga lang tayo pamilyar sa mga salitang ito sapagkat
Ingles na ang ating ginagamit at nakasanayan sa pag-aaral at pananaliksik at kung iisipin
natin ngayon ang ating mga lecture at diskusyon tungkol sa Agham at Matematika na
nakasalin sa wikang Filipino, sadyang mahihirapan tayong intindihin ang mga ito.
Nakakalungkot mang isipin na nahihirapan tayong intindhin ang ating wika sa mga aspetong
ito dahil Ingles na ang nakasanayan, mabuti na ring may kaalaman na tayo tungkol sa mga
salin nito.
12 DE LOS SANTOS, Jack Allain A. BSN 1-B 14 Nov 2019

Replektibong Reaksiyon 6: Wika ng Sining at Humanidades

Bahagi na rin ng ating pag-aaral at pananaliksik ang sining at humanidades. Ilang taon
na ring naging bahagi ng curriculum ang iba’t ibang aspeto ng sining at humanidades
kagaya na lamang ng kasaysayan at tradisyonal na sining. Sa pag-uulat na ito, pamilyar
na sa akin ang ibang mga salitang mai-uugay ko rito sapagkat natalakay na rin ang iba
nito dati sapagkat natalakay na rin ang iba nito dati, noong ako’y nasa elementarya at
high school pa. Pero kung tutuusin, ang aking kaalaman tungkol ditto ay kaunti pa lamang
at bukas pa ang aking isipan na malaman ang mga bagay bagay tungkol dito. Dito sa
wika ng sining at humanidades, aking napagtanto na hindi lamang umiikot ang mundo sa
aspeto ng agham, matematika, at teknolohiya. Ang sining at humanidades din ang
humuhulma sa ating tradisyon, pagkatao, at kultura. Kung iisipin at pag-aaralan ang mga
salita at wikang sangkot nito, tayong lahat ay bahagi sa pagtuklas, pagpapalawak, at
pagyabong ng mga ito. Sa mga aspetong ito tayo gumagawa ng basehan para sa ating
mga sarili, kultura, at pagkakakilanlan.
Nang dahil dito’y mas namulat ako sa impormasyon at kahalagahang dala ng sining at
humanidades , hindi lang para sa ikaunlad at pagkakakilanlan ng ating bayan, ngunit para
sa ating mga sarili, pang araw-araw na gawain, at paghasa sa ating galing at abilidad.
Aking naisip na sadyang mahalagang pag-aralan ang mga larangang ito sapagkat ito ang
pundasyon ng ating mga sarili, edukasyon, tradisyon, at kultura. Ngunit habang
pinapakinggan ang pag-uulat tungkol sa sining, naalala ko rin na nakakapanlumong isipin
na mababa anfg tingin ng karamihan sa larangan ng sining at hindi malawak ang
bokabularyo tungkol dito. Kadalasan kasi sa mga tao ngayon, maging ang mga magulang
man o mga mag-aaral na naghahangad na magiging matagumpay na propesyonal balang
araw, ay iniisip na mababa raw ang kikitain ng mga nasa larangan ng sining, Iniisip talaga
ng karamihan na sadyang nakakaangat, mas nirerespeto, at mas nakakataas ang mga
doctor, abogado, inhinyero, mga nagmamay-ari ng kumpanya, at iba pa. Idagdag pa natin
ang mga taong inaakalang madali lamang ang mga gawain ng mga manlilikha dahil
magaling na raw ang mga ito sa mga larangan nila kaya kadalasa’y nagpapagawa ang
mga tao ng libreng gawa o tumatawad para sa mababang halaga. Kung mababa na nga
ang tingin ng karamihan sa mga taong nasa larangan ng sining, inaakalang madali
lamang ang trabaho nila, at sinasabing dapat libre o mura lamang ang kanilang mga
gawa, paano uunlad ang mga taong nasa larangang ito kung mismo kapwa Pilipino na
ang talagang mapanghusga at hindi sumusuporta? Nagagandahan nga tayo,
sumasaludo sa mga manlilikha ngunit hindi naman naibibigay ang suportang nararapat
para sa kanila. Nakakalungkot pero totoo. Nakapapanlumo pero hindi ako nawawalan ng
pag-asa na balang araw, mas mapapaunlad natin ang sining ng ating kapwa Pilipino, mas
mabibiggyang pansin at halaga, at titingalain ng lahat.
12 DE LOS SANTOS, Jack Allain A. BSN 1-B 14 Nov 2019

Replektibong Reaksiyon 7: Wika ng Pangingisda at Pagsasaka

Sa larangan ng pangingisda at pagsasaka, aaminin kong medyo malayo ito sa buhay na

aking kinagisnan at istilo ng aking buhay ngayon sapagkat sa syudad ako lumaki na kung
saan malayo ang sibilisasyon sa mga lugar kung saan pinaggawa ang pangingisda at
pagsasaka. Siguro nama’y lahat tayo ay may ideya at alam kahit kakaunti lamang tungkol
sa wika ng larangang ito ngunit hindi alam ng karamihan ang buong proseso, mga
kagamitan, at iba pang mga bagay na mai-uugnay sa paggawa ng mga ito. Sa
ginagawang pag-uulat tungkol sa wika ng pangingisda at pagsasaka, aaminin kong hindi
ako pamilyar sa mga wika nito, lalo na sa mga kagamitang inilahad ng mga tagapag-ulat.
Yung tipong unang tingin ko pa lang, hindi ko masasabi o mahuhulaan kung ano ito at
paano ito ginagamit. Dito ko naipagtanto na sa likod ng hirap at tiyaga sa pangingisda at
pagsasaka, marami pa pala akong hindi nalalaman at natutunan. Habang dumadami ang
mga bagong salitang aking nakakasalubong, tila’y nanliit ang tingin ko sa aking
bokabularyo tungkol sa larangang ito at para sa aki’y, wala namang problema kung tila’y
nanliit ang bokabularyo ko at mas mabuti pa ngang meron akong bagong natutunan.
Kadalasan sa mga salitang bahagi ng pag-uulat ay may mga bagay na ginagamit sa
pangingisda at pagsasaka. Nakakatuwang marami akong natutunang bagong bagay
ngunit aaminin kong mahirap ring pag-aralan ang mga ito sapagkat hindi ako sanay sa
mga ito at parang hindi ko pa nagamit, nahawakan, o nakita man lang ang mga bagay na
ito. Nakakalito ring intindihin ang mga ito kapag hindi ka pa sanay at hindi mo mailalagay
sa imahinasyon mo kung paano ito gagamitin. Naisip at napagtanto ko na ang mga bagay
na ginagamit nila sa pangingisda at pagsasaka ay sumisimbolo rin sa sikap at tiyaga ng
ating mga manggagawang ito. Para sa akin ay na-iintriga at na-iinteresado rin kasi ako
pagdating sa mga magsasaka at mangingisda , lalo na sa tiyaga nila mula sa pagbungkal
ng lupa at paghintay magdamag na makahuli ng isda. Sa wikang ito ay napagtanto ko rin
na kahit kalian ay hindi naging madali ang pangingisda at pagsasaka, kahit gaano pa
man kagaling o kasanay ang mga manggagawnag ito. Sa wikang ito, naimulat ang aking
mga mata at isipan na ang mga magsasaka at mangingisda ay dapat tinitingala para sa
matinding dedikasyon at hirap nila, hindi dapat minamaliit porke’t maliit lang ang kinikita
na hindi naman tama at nararapat para sa kanila.
12 DE LOS SANTOS, Jack Allain A. BSN 1-B 21 Nov 2019

Replektibong Reaksiyon 8: Wika ng Edukasyon

Karangalan ng isang tao ang pagiging edukado at ang pagsagawa at paggamit ng

kanyang kaalaman at mga natutunan sa tama at mabuting paraan. Hindi lamang sa
pagkalap at pagsaisip ng kaalaman nagtatapos ang proseso sapagkat ang kaalamang
hindi nagagamit sa aplikasyon sa totoong buhay ay maninitilinf impormasyon lamang.
Karamihan sa atin ay tinitingnan ang pag-aaral bilang paghasa sa ating mga sarili at
nagsisilbing preparasyon para sa pagtatrabaho balang araw. Kung tutuusin, mapalad ang
isang tao nakakapag-aral, anuman o saanman ang kanyang paaralan sapagkat siya’y
hinahasa, tinuturuan, at tinutulungang tuklasin ang kanyang sarili at ang mga bagay
tungkol sa kanya na hindi pa niya nalalaman. Sa wika ng edukasyon, ditto natin mai-
uugnay ang mga salita, gawain, at istilo ng ating mga guro at propesor. Natutunan din
nating dito ang basehan ng ating mga guro sa kaalamang natutunan natin, kakayahan at
pagiging malikhain natin sa mga gawaing ipinapagawa, at abilidad nating gamitin ang
kaalaman sa aplikasyon sa totoong buhay. Bilang estudyanteng nakatungtong na sa
kolehiyo, na maraming karanasan at natutunan sa loob ng maraming taon, at
kasalukuyang nag-aaral at naghahangad pa ng mas maraming kaalaman at karanasan,
nakakatulong ang pag-intindi sa wika ng edukasyon sapagkat hindi lang kahulugan ng
mga salita sa wikang ito ang natutunan kundi, mayroon ding mga paraang nagpapabuti
sa sarili at pag-aaral. Naiintindihan din dito ang ating mga guro, kanilang istilo sa
pagtuturo at pamamaraan sa pagsukat sa mga narutunan ng mga mag-aaral.
Kasalukuyan nga akong nakatanggap ng edukasyon, nag-aaral nang mabuti, at
naghahangad na mapabuti ang sarili. Marami na akong natutunan sa loob ng ilang taon
ng aking buhay-eskwela ngunit mas marami pa ang dapat kong matutunan lalo na ngayon
na nasa kolehiyo na tila siyang magdedesiyon para sa aking kinabukasan. Nagbalik-
tanaw ako sa mga dati kong karanasan, pamamaraan sa pag-aaral, at pag-intindi ng
impormasyon. Marami pa pala akong dapat pag-aralan at dapat pang malaman. Habang
ginagawa ang aming pag-uulat tungkol sa wika ng edukasyon, naisip ko na baka pamilyar
na siguro ako sa mga salitang bahagi nito sapagkat edukado ako at ilang taon na rin kaya
akong nag-aral ngunit nagkamali ako. Ang wika ng edukasyon ay hindi lang pala umiikot
sa mga asignatura, diskusyon, at talakayan. Bahagi rin nito ang iba’t ibang istilo ng
pagturo ng mga guro, pamamaraan ng pag-aaral ng mga estudyante, at pamamaraan sa
pagsukat sa natutunan. Umiikot ang wika ng edukasyon sa ating pagkakatuto at
pagpapabuti sa sarili. Sa relasyon at komunikasyon ng mga estudyante at guro, nagiging
dinamiko ang pagkakatuto ay pagtuturo na siyang nagiging dahilan ng pagkakabuo at
pag-unlad ng wika ng edukasyon. Nakakatuwang isipin na hindi lang impormasyon ang
nakukuha natin dito kundi pamamaraan at aplikasyon na rin sa ating mga natutunan.
Pakiramdma ko’y mapalad ako na nakatanggap ng edukasyon at natuto sa wika nito