ARALIN 1

I. KURSO: BEM 105 - Pagtuturo ng Filipino sa Elementarya 1 (Estruktura at Gamit ng Wikang Filipino)
II. MGA PAKSANG-ARALIN:

Time - Frame
Aralin 1-Filipino sa Kurikulum ng Elementarya
(6 na oras)

III.INAASAHANG MATAMO SA KURSO:

1. Nakapagpapamalas ng kaalaman sa mga batayang kaalaman sa kurikulum at estruktura ng
Wikang Filipino
2. Naipaliliwanag ang mga layunin sa pagtuturo ng Filipino sa elementarya.
3. Nakapagpapaliwanag sa batayang teorya sa Contructivism at ang Pagtuturo ng Filipino.

IV. PAKIKIPAGPALIHAN
Panuto: Basahin ang sumusunod na batayang kaalaman sa kurikulum ng Filipino.
Kurikulum ang itinuturing na pinakapuso sa Sistema ng edukasyon. Batayan ito sa pagpaplano ng
anumang prosesong pampagtuturo. Nakapaloob dito ang mga pamantayan, kasanayan, at layuning
dapat matutuhan ng mga mag-aaral sa bawat aralin sa loob ng isang tukoy na takdang panahon.
Samakatuwid, mahalagang may ganap pagkaunawa sa kurikulum at malalim na kabatiran sa asignatura
ang isang gurong magkasakatuparan sa mga nilalaman at layunin ng kurkulum.
Unang Bahagi: Filipino Bilang Aralin
Kapag tinatanong ang mga mag-aaral kung ano ang kanilang paboritong asignatura, madalas ay
ayaw o iilan lamang sa kanila ang pipili ng Filipino bilang pinakapaborito nilang asignatura. Bakit kaya
iilan lamang ang pumipili ng Filipino? Ano-ano kaya ang nakakaapekto sa kanilang pagpili? Isang
tinuturong dahilan ay ang kanilang guro sa Filipino ay nakakaantok at ang mga aralin daw ay

nakakabagot. Sa mga pampribadong paaralan, mas nahihirapan ang mga mag-aaral sa Filipino dahil na
rin sa kadalasang English zone ang kanilang mga paaralan. Kung kaya napapalaki ng gagampanan mo
bilang guro ng asignaturang ito. Ikaw ang magbibigay-buhay at sigla sa mga mag-aaral para mahalin at
tangkilikin nila ang asignaturang Filipino.
Ang pagiging isang guro sa elementarya ay may espesyal na kakayahang dapat taglayin sa
pagtuturo sa mga nasa murang edad pa lamang. Ito ang magiging matibay na pundasyon ng mga mag-
aaral sa kaniyang tatahaking landas. Kinakailangan ding may giliw o galak ka sa pagtuturo para matuto
ang mga mag-aaral nang may sigla lalo na sa Filipino. Sa araling ito, maipaliliwanag mo kung ano ang
Filipino bilang isang aralin.
Nakasaad sa Artikulo XIV Seksiyon 6 na: “ Ang Wikang Pambansa ng Pilipinas ay Filipino.
Samantalang nalilinang, ito ay dapat payabungin at pagyamanin pa salig sa umiiral na wika sa Pilipinas at
sa iba pang mga wika.” Ito ay nagpapatunay na kinakailangan payabungin ang wikang Filipino. Sa
pamamagitan ng pagtuturo ng asignaturang Filipino gamit ang wikang Filipino, mapapaunlad at
mapayayabong natin ito. Sa ating paggamit sa wikang Filipino, napalalalim din an gating wika at kultura.
Nililinang sa araling Filipino ang limang makrong kasanayan:
pagsasalita,pagbasa,pagsulat,pakikinig, at panonood. Sinisimulan ang pagtuturo ng Filipino sa ikalawang
markahan ng unang baitang hanggang senior high school.
Ang Kagawaran ng Edukasyon ay may inilabas na bagong kurikulum na may iba’t-ibang
pamantayan sa programa ( Core Learning Area Standards), bawat yugto (Key Stage Standards), at bilang
( Grade level Standards) na inaasahang kayang ipamalas sa bawat yugto at baitang ng isang mag-aaral ng
Filipino.
Nakasulat sa ibaba ang mga pamantayan sa programa, bawat yugto, at bawat baitang na
nakaloob sa kurikulum na pang-elementarya.
A. Pamantayan sa Programa ( Core Learning Area Standards):
Pamantayan ng Programa ng Baitang 1-6 Nagagamit ang wikang Filipino upang
madaliang maunawaan at maipaliwanag ang
mga kaalaman sa araling pangnilalaman,
magamit ang angkop at wastong salita sa
pagpapahayag ng sariling kaisipan ,
damdamin, o karanasan nang may lubos na
paggalang sa kultura ng nagbibigay at
tumatanggap ng mensahe.

B. Pangunahing Pamantayan ng Bawat Yugto ( Key Stage Standards)

K-3 Sa dulo ng baitang 3, nakakaya ng mga mag-aaral na ipakita ang kasanayan sa pag-
unawa at pag-iisip sa mga narinig at nabasang teksto at ipahayag nang mabisa ang mga
ibig sabihin at nadarama.
 4-6 Sa dulo ng baitang 6, naipakikita ng mga mag-aaral ang sigla sa pagtuklas at
pagdama sa pagbigkas at pasulat na mga teksto at naipapahayag nang mabisa ang mga
ibig sabihin at naradama.
C. Pamantayan sa Bawat Baitang (Grade Level Standards):
Baitang Pamantayan sa Bawat Baitang
K Naipamamalas ng mga mag-aaral ang kakayahan sa pagpapahayag ng iniisip at damdamin
sa wikang Katutubo at ang kahandaan sa pagbasa at pagsulat upang makilala ang sarili at
matutong makisalamuha sa kapwa.
1 Pagkatapos ng unang baitang, inaasahang nauunawaan na ng mga mag-aaral ang mga
pasalita at di-pasalitang paraan ng pagpapahayag at nakatutugon nang naaayon.
Nakakamit ang mga kasanayan sa mabuting pagbasa at pagsulat upang maipahayag at
maiugnay ang sariling ideya,damdamin, at karanasan sa mga narinig at nabasang mga
teksto ayon sa kanilang antas o lebel at kaugnay ng kanilang kultura.
2 Pagkatapos ng ikalawang baitang, inaasahang nasasabi na ng mga mag-aaral ang
pangunahing diwa ng tekstong binasa o napakinggan, nagagamit ang mga kaalaman sa
wika, nakababasa nang may wastong paglilipon ng mga salita at maayos na nakasusulat
upang maipahayag at maiugnay ang sariling ideya,damdamin, at karanasan sa mga narinig
at nabasang mga teksto ayon sa kanilang antas o lebel at kaugnay ng kanilang kultura.

3 Pagkatapos ng ikatlong baitang, inaasahang nasasabi na ng mga mag-aaral ang

pangunahing diwa ng tekstong binasa o napakinggan at nakapagbibigay ng kaugnay o
katumbas na teksto, nagagamit ang mga kaalaman sa wika, nakababasa nang may wastong
paglilipon ng mga salita at maayos na nakasulat gamit ang iba;t-ibang bahagi ng pananalita
upang maipahayag at maiuugnay ang sariling ideya, damdamin, at karanasan sa mga
narinig at nabasang mga teksto ayon sa kanilang antas o lebel at kaugnay ng kanilang
kultura.
4 Pagkatapos ng ikaapat na baitang, naipamamalas na ng mga mag-aaral ang kakayahan sa
pagbasa,pagsulat at pakikipagtalastasan nang wasto upang maipahayag ang kaalaman,
ideya at damdaming angkop sa kaniyang edad at sa kulturang kinabibilangan at nakikilahok
sa pagpapaunlad ng pamayanan.
5 Pagkatapos ng ikalimang baitang, naipamalas na ng mga mag-aaral ang kakayahan sa
pagbasa, pagsulat, at pakikipagtalastasan , mapanuring pag-iisip, at pagpapahalaga sa
panitikan at kultura sa pamamagitan ng iba’t-ibang teksto/ babasahing lokal at pambansa.
6 Pagkatapos ng ikaanim na baitang, naipamamalas na ng mga mag-aaral ang kakayahan sa
 pakikipagtalastasan, mapanuring pag-iisip, at pagpapahalaga sa wika, panitikan , at kultura
upang makaambag sap ag-unlad ng bansa.
Itinuturo ang asignaturang Filipino sa loob ng 30 minuto mula ikalawang markahan hanggang
ikaapat na markahan ng unang baitang. Samantalang, 50 minuto naman itong itinuturo sa ikalawa
hanggang ikaanim na baitang.
Ang pagtuturo ng Filipino ay isang daan o tsanel na makatutulong upang mahasa ang pag-iisip ng
isang mag-aaral patungo sap ag-unlad ng iba’t-ibang kasanayan tulad ng pagbasa, pagsulat,pakikinig,
pagsasalita, at panonood. Kung kaya itinuturing na ang paaralan ang maaasahang katuwang para
mapabilis ang pagkatuto ng mga mag-aaral sa paggamit ng Filipino. Ang asignaturang ito ay tutulong din
para madali nilang maunawaan at maipaliwanag ang iba’t-ibang konseptong hinahangad na matutuhan
sa pamantayang pangnilalaman.
Tulungan mo ang iyong sariling mahalin ang wikang Filipino sa pamamagitan ng pagtuturo ng
asignaturang Filipino sa mga itinuturing nap ag-asa ng bayan- ang mga kabataan. Kayang-kaya mong
gawin itong isa sa pinakamasayang klase. Ikaw ang magiging tagapangalaga ng wikang ating
pinahahalagahan at magsisilbing susi para masimulan ang kanilang pagmamahal sa wika at baying
kanilang kinabibilangan.

Ikalawang Bahagi: Layunin sa Pagtuturo ng Filipino

Ang isang guro ay kinakailangang may layunin sa buhay. Alam niya ang kaniyang gustong
tunguhin kaya gagawin ang lahat ng makakaya para marating ito. Kabilang sa araw-araw na buhay ng
guro ang pagkakaroon ng banghay-aralin. Sa banghay-aralin ay nasusulat ang iyong layunin kung ano ang
iyong ituturo sa bawat asignatura. Kinakailangang may layunin ka ring mapaangkin sa mga mag-aaral,
ang kaalaman at kakayahan sa mga nasusulat na kasanayang pampagkatuto. Layunin mong makahubog
ng isang mag-aaral na hindi lamang marunong sa nilalaman bagkus marunong gamitin ang mga
natutuhan. Sa araling ito, lubos mong mauunawaan ang pangkalahatan at tiyak na layunin ng pagtuturo
ng Filipino.

Malinaw na ang pangkalahatang layunin ng kurikulum ng K to 12 ang makalinang ng isang buo at ganap
na Pilipinong may kapaki-pakinabang na kaalaman. Buhay at mayabong ang Filipino sa batayang
edukasyon. Sa katunayan, malaki ang ginagampanang tungkulin ng wika at asignaturang ito sa pagtamo
ng kabuuang layunin ng kurikulum ng K to 12 na makahubog ng ganap na Filipino na may kasanayang
akma sa ika-21 siglo. Nililinang sa Filipino ang limang makrong kasanaya:
pagsasalita,pagbasa,pagsulat,pakikinig, at panonood. Layunin din ng pagtuturo ng Filipino ang paglinang
sa repleksibong pag-iisip,pagpapahalagang pampanitikan, at kakayahang komunikatibo ng mga mag-
aaral. Higit sa lahat, binibigyang-diin sa asignaturang ito, sa pamamagitan ng pagtalakay at pagdalumat
sa kulturang Filipino ( kasama na ang ating pilosopiya at pagpapahalaga) na nagbubunga ng kultural na
kaalaman at matibay na pambansang pagkakakilanlan.
Unang Baitang:
Ang pagtuturo ng Filipino ay may sinusunod na direksiyon o tunguhin. Ang tunguhin ng
pagtuturo ng Filipino sa unang baitang ay makikita sa Pamantayang Pangnilalaman ( Content Standards),
ito ang mga dapat malaman, matutuhan, at maunawaan sa paksa ng mag-aaral. Layunin ng pagtuturo ng
Filipino sa unang baitang ang sumusunod:
1. Naipapamalas ang kakayahan sa mapanuring pakikinig at pag-unawa sa napakinggan;
2. Naipamamalas ang kakayahan at tatas sa pagsasalita at pagpapahayag ng sariling ideya,
kaisipan,karanasan, at damdamin.
3. Nauunawaan ang ugnayan ng simbolo at ng mga tunog;
4. Naisasagawa ang mapanuring pagbasa upang mapalawak ang talasalitaan;
5. Naipamamalas ang iba;t-ibang kasanayan upang makilala at mabasa ang mga pamilyar at di-
pamilyar na salita.
6. Naipamamalas ang kamalayan sa mga bahagi ng aklat at sa ugnayan ng simbolo at wika;
7. Nagkakaroon ng papaunlad na kasanayan sa wasto at maayos na pagsulat;
8. Nauunawaan na may iba’t-ibang dahilan ng pagsulat; at
9. Naipamamalas ang iba’t-ibang kasanayan upang maunawaan ang iba’t-ibang teksto
Ikalawa at Ikatlong Baitang
1. Naipamamalas ang kakayahan sa mapanuring pakikinig at pag-unawa sa napakinggan;
2. Naipamamalas ang kakayahan at tatas sa pagsasalita at pagpapahayag ng sriling ideya, kaisipan,
karanasan at damdamin.
3. Nauunawaan ang ugnayan ng simbolo at ng mga tunog;
4. Naipamamalas ang kamalayan sa mga bahagi ng aklat ang kungb paano ang ugnayan ng simbolo
at wika.
5. Naipamamalas ang iba;t-ibang kasanayan upang makilala at mabasa ang mga pamilyar at di-
pamilyar na salita;
6. Naisasagawa ang mapanuring pagbasa upang mapalawak ang talasalitaan;
7. Nagkakaroon ng papaunlad na kasanayan sa wasto at maayos na pagsulat;
 8. Nauunawaan na may iba’t-ibang dahilan ng pagsulat;
9. Naipamamalas ang iba’t-ibang kasanayan upang maunawaan ang iba’t-ibang teksto; at
10. Naipamamalas ang pagpapahalaga at kasanayan sa paggamit ng wika sa komunikasyon at
pagbasa ng iba’t-ibang uri ng panitikan.
Ikaapat hanggang ikaanim na Baitang
1. Naipamamalas ang kakayahan sa mapanuring pakikinig at pag-unawa sa napakinggan;
2. Naipamamalas ang kakayahan at tatas sa pagsasalita at pagpapahayag ng sariling ideya,
kaisipan, karanasan, at damdamin.
3. Naisasagawa ang mapanuring pagbasa sa iba’t-ibang uri ng teksto at napalalawak ang
talasalitaan.
4. Naipamamalas ang iba’t-ibang kasanayan sap ag-unawa ng iba’t-ibang teksto;
5. Napauunlad ang kasanayan sa pagsulat ng iba’t-ibang uri ng sulatin.
6. Naipamamalas ang kakayahan sa mapanuring panonood ng iba’-ibang uri ng media tulad ng
patalastas at maikling pelikula; at
7. Naipamamalas ang pagpapahalaga at kasanayan sa paggamit n g wika sa komunikasyon at
pagbasa ng iba’t-ibang uri ng panitikan.

Makikita rin ito sa mga pamantayan sa pagganap. Dito nakapaloob kung ano ang dapat
maipakita o maipamalas ng mag-aaral bilang patunay ng pag-unawa gamit ang produkto (tangible
output) o pagpapamalas ng mga kasanayan ( demonstration of skills). Ilan lang sa mga pamantayan sa
pagganap ang sumusunod:
1. Natatalakay ang paksa o isyung napakinggan;
2. Nakabibigkas ng tula at iba’t-ibang pahayag nang may damdamin, wastong tono, at entonasyon;
3. Naisasalaysay muli ang nabasang kuwento o teksto nang may tamang pagkakasunod-sunod at
nakagagawa ng poster tungkol sa binasang teksto;
4. Nagagamit ang diksyunaryo at nakagagawa ng balangkas sa pagkalap at pag-unawa ng mga
impormasyon;
5. Nakasusulat ngbtalatang pasalaysay;
6. Nakapagsasalaysay tungkol sa pinanood; at
7. Nakasasali sa mga usapan at talakayan , pagkukuwento, pagtula, pagsulat ng sariling tula at
kuwento.
 Itinuturing na bibliya ng mga guro ang banghay-aralin. Dito nakapaloob ang mga layunin mo sa
pagtuturo sa tiyak na araw na kailangang matutuhan ng isang mag-aaral. Habang ikaw ay nag-aaral pa at
naghahanda sa pagiging ganap na guro, nararapat lamang na angkinin mo ang mga layunin ng
kagawaran para sap ag-aaral ng Filipino.

Ikatlong Bahagi: Nilalaman ng Filipino sa Kurikulum ng Elementarya

Ang Kurikulum ang puso ng edukasyon. Nakasalalay ang lahat ng mga teknik o estratehiya sa
kurikulum ng isang mag-aaral. Makikita sa ibaba ang batayang konseptuwal ng kurikulum ng Filipino.

Maliwanag na makikita sa itaas na tunguhin ng pagtuturo ng asignaturang Filipino

ang buo
at ganap na Pilipinong may kapaki-pakinabang na kaalaman. Ang isang gabay pangkurikulum (curriculum
guide) ay nagsisilbing kompas ng mga guro sa kanilang pagtuturo ng Filipino. Makikita sa kasanayang
pampagkatuto ang konseptuwal na balangkas, pagpapaliwanag sa balangkas, pamantayan sa programa,
pamantayan sa bawat yugto, pamantayan sa bawat bilang, pamantayang nilalaman, pamantayan sa
pagganap, domain, kasanayang pampagkatuto, at code nito na nagdidikta kung anong markahan at ilang
lingo ituturo, at listahan ng learning materials na maaaring gamitin sa isang tiyak na kasanayang
pampagkatuto.
 Mula sa kurikulum, naipaliwanag na isinaalang-alang sa pagbuo ng kurikulum ang
pangangailangang panlipunan, lokal at global na pamayanan, maging ang kalikasan, at pangangailangan
ng mga mag-aaral. Pinagbatayan din ang mga legal na batas pang-edukasyon at mga teoryang
pilosopikal ng edukasyon at wika nina Jean Piaget (Developmental Stages of Learning), Leo Vygotsky
(Cooperative Learning), Jerome Bruner
( Discovery Learning), Robert Gagne (Hierarchical Learning), David Ausubel (Interactive/Integrated
Learning),Cummins (Basic Interpersonal Communication Skills –BICS) at ( Cognitive Academic Language
Proficiency Skills- CALPS), at ng ating pambansang bayaning si Dr. Jose P. Rizal na nagsabing “nasa
kabataan ang pag-asa ng bayan.” Dahil ang Filipino ay nasa disiplina ng wika,pinagbatayan ang mga
teorya sa kalikasan at pagkatuto ng wika, mga teorya/simulain sa pagsusuring pangkaalaman at mga
pagdulog sa pagtuturo ng wika (W1, W2, W3), at pagtuturo ng mga akdang pampanitikan at tekstong
paglalahad.
Sa ikatatamo ng mithiing ito, kailangan ng mga kagamitang panturo ng mga guro bilang
suporta sa kurikulum na magmumula sa administrasyon, ahensiyang panlipunan, pribado at
publiko,pamahalaang lokal, media, tahanann, at iba pang sector ng lipunan.
Samantalang, ang bawat baitang ay may iba’t-ibang domain na nakapaloob sa limang makrong
kasanayan na lilinangin.
Para sa Baitang I-III:
1. Pakikinig ( Pag-unawa sa Napakinggan)
2. Pagsasalita
a. Wikang Binibigkas
b. Gramatika (Kayarian ng Wika)
3. Pagbasa
a. Kamalayang Ponolohiya
b. Pag-unlad ng Talasalitaan
c. Palabigkasan at Pagkilala sa salita
d. Kaalaman sa aklat at limbag
e. Pag-unawa sa Binasa
4. Pagsulat
a. Pagsulat at Pagbaybay
b. Komposisyon
5. Estratehiya sa Pag-aaral
 6. Pagpapahalaga sa Wika at Panitikan
Para sa Baitang IV
1. Pakikinig ( Pag-unawa sa Napakinggan)
2. Pagsasalita
a. Wikang Binibigkas
b. Gramatika (Kayarian ng Wika)
3. Pagbasa
a. Pag-unlad ng Talasalitaan
b. Pag-unawa sa Binasa
4. Pagsulat ( Komposisyon)
5. Panonood
6. Estratehiya sa Pag-aaral
7. Pagpapahalaga sa Wika at Panitikan
Para sa Baitang V-VI
1. Pakikinig ( Pag-unawa sa Napakinggan)
2. Pagsasalita
a. Wikang Binibigkas
b. Gramatika (Kayarian ng Wika)
3. Pagbasa
a. Pag-unlad ng Talasalitaan
b. Pag-unawa sa Binasa
4. Pagsulat
5. Panonood
6. Estratehiya sa Pag-aaral
7. Pagpapahalaga sa Wika at Panitikan

Nasa ibaba ang halimbawang gabay pangkurikulum sa ikaapat na baitang.

 Ganito ang pagbasa ng code sa bawat kasanayang pampagkatuto na nagsisilbing
gabay ng mga guro kung kalian dapat ituturo ang isang kasanayang pampagkatuto.

Ikaapat na Bahagi: Teorya sa Constructivism at ang Pagtuturo ng Filipino

 Isang saligan sa bagong kurikulum ng kagawaran ang paniniwala sa teorya ng constructivism.
Ang mga mag-aaral ang siyang tagabuo ng kahulugan sa tulong ng kaniyang dating kaalaman at
karanasan. Sa cognitive development ni Jean Piaget, pinaniniwalaan na ang isang tao ay nakabubuo ng
kahulugan kung may ugnayan at interaksiyon ito sa pagitan ng kaniyang karanasan at ideya. Ito ay
nakapokus sa development ng tao na may kakayahang iugnay ang mga pangyayari sa kaniyang buhay sa
tulong o impluwensiya ng ibang tao para makabuo ng kahulugan.
Samantalang kay Lev Vygotsky naman ay pinahalagahan ang sociocultural learning,mahalaga
kung paano nakikipag-ugnayan sa mga nakatatanda at sa mga kaibigan para makabuo ng kahulugan sa
pamamagitan
ng zone of proximal development. Pinakawak pa ni Jerome Bruner at iba pang sikolohista sa
pamamagitan ng pagbuo ng instructional scaffolding kung saan napapahalagahan ang kaalamang
pangkapaligiran para makabuo ng kahulugan.
Sa pagtuturo ng Filipino, isinasaalang-alang ang constructivism. Ang mga mag-aaral ay
nakikipag-ugnayan sa isa’t-isa ibinabahagi ang kanilang nauunawaan, nararamdaman at karanasan para
makabuo ng bagong kaalaman. Hinihimok ang mga mag-aaral na makipag-ugnayan, magpalitan ng kuro-
kuro,karanasan , at makabuo ng bagong kahulugan at kaalaman na batay sa kanilang pangangailangan sa
tulong ng interbisyong ibibigay ng guro.
Kinakailangan din ang pagkakaroon ng kritikal nap ag-iisip para makabuo ng sariling
pagpapakahulugan. Ang mga ang sentro ng pagkatuto. Ayon nga kay Brader-Araje at Jones (2002), ang
(constructivism) ay ang pagbuo ng isang kaalaman batay sap ag-unawa at nangangailangan ng aktibong
pakikilahok sa pagbuo ng kahulugan.
Ang contructivism ay nagsasabi na sa pagkatuto ng isang tao, ang mag-aaral ang tagabuo ng
impormasyon. Siya ay aktibong nakikilahok at bumubuo ng bagong ideya. Ang bagong kahulugan naman
ay nabubuo sa pamamagitan ng ugnayan ng dating kaalaman at bagong kaalaman. Sa pamamagitan nito,
aktibong nakalalahok ang mga mag-aaral sa proseso ng kanilang pagkatuto.
Layunin din ng programang K to 12 na malinang ang ika-21 siglong kasanayan. Ang bawat
kasanayang pampagkatuto ay napapabilang sa mga kasanayang ito na tunguhing ihanda ang mga mag-
aaral para maging buo at ganap na Pilipino na may kapaki-pakinabang na kaalaman.