KULTURANG PILIPINO: SALAMIN NG KASAYSAYAN NG BANSA

Ang ating bansa ay may iba’t- ibang sining, teknolohiya, wika, kultura, paniniwala

at mga tradisyon. Ngunit ano-ano nga ba ang ating mga kultura, tradisyon, at mga

paniniwala bilang isang Pilipino? Saan kaya natin ito nakuha at namana? Ito ba ay ating

napapahalagahan hanggang sa kasalukuyan?

Ang pagkakaroon ng mga iba’t-ibang kultura ay namana natin sa mga sinaunang

Pilipino. Mula noon hanggang sa kasalukuyan ay hindi maiitangging marami tayong

namana sa ating mga ninuno na mga kaugalian. Isa na rito ang paggalang sa mga

nakakatanda sa pamamagitan ng pagsabi ng “po” at “opo” at pagmamano sa kanila.

Ang isa pang halimbawa ay ang pagbabayanihan ng mga Pilipino. Ang pagbabayanihan

ay ang sama-samang pagtutulungan ng bawat isa lalo na sa panahon ng mga

kalamidad. Ito ay isa sa mga hindi matatawarang kaugalian ng mga Pilipino. Kung pag-

ibig naman ang pag-uusapan, ay may proseso din sa panliligaw ang mga kalalakihan.

Ito ay sa pamamagitan ng paghaharana sa mga kababaihan. Pero ang pinaka patok sa

lahat ay ang pagdiriwang ng “pista” o “fiesta”. Kung saan tayo’y nagdidiwang taon-taon.

Talagang mabubusog ka sa sarap ng mga inihandang pagkain sa hapagkainan. Higit sa

lahat, mawiwili ang iyong mga mata at maaaliw pa sa buong pangyayari tuwing

pagdiriwang ng fiesta.

Sa larangan naman ng sining at teknolohiya ay may iba’t-ibang

naimbentong gamit ang mga sinaunang Pilipino. Isa na rito ang sasakyang pandagat na

“karakoa“. Ito ay isa sa pinakamalaking sasakyang pandagat at pandigma ng mga

sinaunang Pilipino.
 Sa larangan naman ng mga paniniwala ay hindi mawawala ang mga kakaiba at

nakakakilabot na mga paniniwala. Isa na rito ang pagsamba ng mga sinaunang Pilipino

sa mga “anito”. Ang anito ay isang diyos na pinapaniwalaan ng mga sinaunang Pilipino

bago dumating ang mga Kastila. Maari itong tumukoy sa mga diwata, espiritu at mga

diyos na pinaghuhugutan ng ulan, proteksiyon at patnubay. Nagpupugay ang mga tao

sa mga anito sa pagbibigay ng alay katulad ng mga ani, mga hayop at iba pa.

Dinadasalan din nila ito para magkaroon ng himala katulad ng pag-ulan sa kalagitnaan

ng tag-tuyot at proteksiyon sa gitna ng laban ng mga tribo. Ang pagsasalita ng “tabi-

tabi” po ay isang paggalang sa mga kaluluwa. At ang paniniwala nila tungkol sa “tao-

tao” ay isa rin dito. Ang “tao-tao” ay ang mga maliliit na pigura na nilalagay ng mga

bisaya sa kanilang bahay para magbantay sa kanila.

Sa larangan naman ng tradisyon ay hindi mawawala ang tradisyon tuwing pasko,

bagong taon at higit sa lahat ay sa tuwing Semana Santa. May iba’t-ibang tradisyon ang

mga Pilipino tuwing Semana Santa ngunit may sariling paniniwala at tradisyon ang mga

Katolikong Pilipino. Kabilang na rito ang pagpapako sa krus sa lugar ng Brgy. San

Pedro Cutud, Pampanga. Pagtitinda ng mga palaspas at pagbasa o pag-awit ng pasyon

ay ilan lamang sa mga tradisyon ng mga Katolikong Pilipino. May iba’t-iba man tayong

paniniwala, kultura at mga tradisyon sa bansa ngunit hindi ito hadlang para hindi tayo

magkakaunwaan sa isa’t-isa.

Ang kultura ay salamin ng kasaysayan ng isang bansa. Isa rin ito sa kanyang

pagkakakilanlan. Mahalaga ang mga paniniwala, kultura at tradisyon mula sa nakalipas

sapagkat ito’y daan para magkaroon ng kasaysayan sa kasalukuyan.

 Sanggunian

KULTURANG PILIPINO: SALAMIN NG KASAYSAYAN NG BANSA. (2016).

lazygeen.wordpress.com. Nakuha mula sa

https://lazygeen.wordpress.com/2016/08/22/kulturang-pilipino-salamin-ng-

kasaysayan-ng-bansa/

Ang tekstong ito ay isang sanaysay. Makikitang inilahad ng may akda ang mga

pinagmulan at kahalagahan ng iba’t ibang sining, teknolohiya, wika, kultura, paniniwala

at mga tradisyon ng mga Pilipino. Nilalayon ng may akda na magbigay ng mga

impormasyong nagbibigay buhay sa nakaraan at nagbibigay paalala na mahalin,

ipagmalaki at pahalagahan ang mayamang kultura ng Pilipinas. Matutunghayang

gumamit ang may akda ng mga tanong tungkol sa kultura ng mga Pilipino sa unang

talata at sinagot ito sa ikalawang talata. Pagkatapos ay inisa-isang iprinisinta ang mga

impormasyon tungkol sa iba’t ibang sining, teknolohiya, wika, kultura, paniniwala at mga

tradisyon ng mga Pilipino.

Epektibo ang wikang ginamit ng may akda sa kanyang teksto sa paghahatid ng

impormasyon sa mga mambabasa. Umayon ang wikang ginamit sa mga kabataang

mambabasa. Madaling intindihin at unawain ang teksto dahil sa pamamaraang ginamit

ng may akda. Ang mensaheng nais ipahatid ng may akda na ang kultura ay bahagi na

ng buhay natin bilang mga Pilipino. Naipamana na ito ng mga ninuno natin batay sa

nakaraaang ginagawa nila. Ito ay napakahalagang bagay na dapat isapuso dahil

nagsisilbi itong simbolo ng ating pagka Pilipino. Kailangang pahalagahan ang nakaraan

para sa susunod pang henerasyon.

Samakatuwid, layunin ng tekstong “Kulturang Pilipino: Salamin ng Kasaysayan

ng Bansa” ang magpahayag ng mga impormasyon tungkol sa iba’t ibang sining,

teknolohiya, wika, kultura, paniniwala at mga tradisyon ng mga Pilipino. Ipagpatuloy

itong alalahanin dahil ito ay nagsisilbing repleksyon ng ating mga ninuno at bahagi na

rin ito ng ating kasaysayan.