Miagao, nagaganyat sang madamo nga negosyo

Ventar & Namocatcat

Nangin sentro sang atraksiyon ang Miagao sa mga gusto magpatindog sang negosyo sang
padayon nga nagadamo ang mga negosyante nga nagapakighangop sa munisipalidad.

Suno kay Mayor Macario Napulan, dalagko kag kilala nga mga establisimiyento kag mga
negosyante ang nagapakighangop nga magpatindog sang ila negosyo. Lakip na diri ang mga
malls pareho sang Robinsons, Savemore kag City Mall, mga apartelles or hostels, mini grocery
pareho sang 7/11 kag iMart, kag inland resort.

“We are expecting new construction sang mga dalagko nga mga businesses. Robinsons
had made some arrangements in Maninila area. Then, ang Savemore naga-negotiate pakadto sa
Central School. I heard man sa Kirayan Sur, naga-negotiate ang Injap. Mapatindog daw sila city
mall. Within next month naman ang 7/11 and also ang Imart, “ dugang pa niya.

Masugod ang konstruksiyon sang gasoline station, inland resort, apartelles or hostels, kag
mini groceries nga maga-akupar sang isa ka ektarya nga propriedad sa crossing Maninila pakadto
sa Igbaras sa Pebrero.

Isa sa mga rason kun ngaa nagadamo ang negosyo sang Miagao amo ang nagadako nga
populasyon tungod sa duha ka Unibersidad, ang University of the Philippines Visayas kag ang
Iloilo Science and Technology University.

Tungod sa mga negosyo nga ipatindog sa munisipalidad, ginalauman nga magataas ang
employment rate kag economic activities sang Miagao.

Suno kay License Inspector l, Stephen Intal, gina-promote bilang isa ka business-friendly
ang Miagao. Ginaganyat man nga mag-invest ang Miagaoanons sa ila banwa.

Ginpahayag ni Market Supervisor, Jon Mark Muyong nga dako ang mabulig sang mga
negosyo sa mga negosyante kag pumuluyo.

“Kay damo ang mga businesses nga ginapatindog buot singganon, progresibo ang aton
banwa. Bangod sang mga businesses nga nagabayad sang tax, naga-help ina sa mga projects sang
banwa,” suno kay Muyong.

Base sa 2015 Accomplishment Report sang Licensing Unit, nagtaas ang numero sang
mga bag-o nga ginpatindog nga negosyo. Halin 107 ka mga establisimiyento sang tuig 2014,
nagsaka na ini sa 119. Ang total nga renewed business permits ang nagalab-ot sa 719.

Masugod ang tax mapping sa Abril kag Mayo agud mausisa ang mga establisimiyento
kun nakompleto nila ang mga requirements.