“Ang Pagmulat sa Isipan at Mata sa Kasaysayan ng ating Bansa”
Ikaw at ako, oo ikaw na nakakapanood o nakakarinig sa mga
salitang nanggagaling sa aking bibig. Pakinggang mong mabuti ang aking mga sasambitin na galing mismo sa aking puso’t isipan.
Wikang katutubo’y magkakaiba, ngunit nagsasama-sama
tungo sa isa pang umagang puno ng pagasa. Wikang katutubo’y ating mahalin at payamanin, hindi dapat abandonahin sapagkat ito’y nagbibigay pananaw sa ating bayang magiliw. May sari-sarili mang wika, kultura, at pagkakaiba sa ating mga lahi, pagkakaisa ang laging isaisip, Ito’y galing sa ating mga kababayan na naging parte ng ating makulay na kasaysayan.
Tayo’y mga Pilipino na dapat suportado sa pamana ng ating
mga ninuno at sa ating mga wikang katutubo. Agosto ang buwan na gustong-gusto ipagdiriwang ng mamayang Pilipino, dahil ito ang araw kung saan ang tao ay sumisigaw na ang ating bansa ay “Malaya na”, malaya na sa kamay o pagkakahawak ng mga banyagang napadpad sa ating bansa. Madaming lengguwaheng binabanggit ngunit isa lamang ang gustong bigyang pansin o ihatid na ating mahalin, ingatan, paunlarin, at tangkilikin ang sariling atin. Laging tandaan ang ating karunungan o nalalaman sa tama ay gamitin, para sa wika na ating ipinagmamalaki ay muling makilala at igalang ng iba.
Sa panahon na ito ako’y samahan na patunayan na hindi
lamang ang kabataan ang pag-asa ng bayan, kundi ang bawat mamayan na patuloy na pinahahalagahan, ipinaglalaban, at di pinababayaan ang sariling wika natin. Tayo’y maraming gustong gawin, hangarin, at layunin sa ating bayan, ngunit tayo’y patuloy magtutulungan, upang umarangkada kasabay ng umaalon na karagatan at sabay- sabay tuklasin at alamin ang landas na dapat ay tatahakin.
Wikang ginagamit sa bawat oras, sa bawat dako ng Pilipinas
na sumisimbolo sa pagiging Pilipino natin. Kaya halina’t muling buksan at buhayin ang lumiliyab na apoy sa ating damdamin upang muling masinagan at mailawan ang ating dumidilim na bayan. Taas noo nating banggitin “Ako ay Pilipino at isang karangalan, parangalan ang bansang Pilipinas.”