MIDANG HRIATTHIAM TUM RAWH

Vawikhat chu thingtlang lama awm tlangval kum 24 mi tawh hi a pa nen relah an
chuang dun a. An chuanna rel pindanah chuan nupa hi an chuang ve bawk a. Chu
tlangval chu rel tukverh bulah ṭhuin phur leh hlim deuhin pawn lam chu a thlir a.
Nakinah chuan, “En teh ka pa, sawng thing te saw hnung zawngin an tawlh vel a nia,”
tiin hlim leh phur tak hian a pa chu a hrilh a. A pa chuan hlim deuha lo nuihlet chung
hian engmah a sawi lem lo a.

Chutia an tlangval chuanpui hlim leh phur tak maia naupang chhia ang maia au chul
an han hmuh chuan an chuanpui nupa te chuan makti deuh tak hian an en a. A kum
phu lohin a nungchang chu naupang chhia hlein an hre nghe nghe a.

A hnu deuh lawkah chuan chu tlangval chu rawn auchhuak lehin, “Ka pa en teh,
chhum te khi kan rualin an lo thlawk delh delh nia!” tiin nui hawk hawk chungin a pa
chu a hrilh leh a. A pa chuan engtin maha chhang chuang lem loin lawm tih hriat tak
hian a fapa chu a en leh ringawt a.

An bula ṭhu, an chuanpui nupa te erawh chuan chutia tlangval pui ni tawh naupang
chhia ang maia han khawsak chu rilru lam kim lo leh harsatna nei niin an ngai ta a. An
pafa lah chuan thingtlang lam chhuak nia an lan bawk avangin thil chinchang hre vak
lo turah an ngai a. Chubakah a pa chuan a fapa chu rilru lam doctor hnena inentir
tura hruai na- chang hre lo turah an ngai mai bawk a.

An chuanpui nupa te chuan a pa hnenah, “Ka pu, i fapa hi doctor thiam tak hnenah
kalpui mai a tha lo maw? Hetiang te chu tunlai thiamna hmangin harsa lo takin an
tidam thei ngei ang,” tiin thurawn an pe ta hial a.

A pa chu tawi te hian a han nuih sak phawt a. Chutah, “Ka kalpui zo chiah alawm.
Tunah hian damdawi in aṭangin in lam panin kan haw mek a ni. Ka fapa hi mitdel sa-a
rawn piangchhuak a ni a, vawiin hian damdawi inah a mit zaiin mit thar an vuah a,
khua a hmu thei ve ta chauh a nih hi. A nungchang danglam deuh hlek anga lang
pawh kha a la hmuh ngai loh hlir a hmuh avangin a tan chuan a mak hlawm em a, a
hlim leh lawm vang a nih zawk kha,” a ti ta a.

Mitin hian mahni tawk ṭheuhah kan thil tawn azirin mizia lanchhuahtir dan kan nei
ṭheuh a. An awm dan aṭang ringawt chuan mi reng reng hi i duh leh beisei anga awm
turin ngai nghal ringawt suh. An dinhmun zirchian tum hmasa phawt ṭhin rawh.