Ang kalayaan ay maituturing na isang napakahalagang karapatan ng tao maging
ng isang bansa. Malaki ang epekto ng kalayaan sa buhay ng tao. Kung mawawala ang kalayaan nito, maihahambing ang sitwasyon sa isang taong nakagapos na walang kakayahang gumawa ng iba pang bagay na ninanais niya. Maaaring makalikha ng sariling kaligayahan kung mayroong kalayaan. Walang pumipigil sa bawat ninanais. Ang pagkakaroon ng kalayaan ng isang lahi o bansa ay katumbas ng isang katangian ng pagiging makapangyarihan. Nagkakaroon ng kalayaan ang isang bansa na maitaguyod ang kanilang lipunan ng walang pangamba. Ang bansang malaya ay hindi nangangailangan sundin ang iba pang teritoryong nasa paligid nito. Kalayaan ang ipinaglaban ng mga sinaunang Pilipino noon laban sa mga dayuhang sumubok manakop sa bansang Pilipinas. Sa pamamagitan ng paghayag o pagkilala para sa ating kasarinlan bilang mga Pilipino dapat gunitain natin ang paghihirap, pag-ibig at pagbuwis ng buhay ng mga bayaning Pilipino na lumaban para sa kalayaan ng Pilipinas. Sa pagdiriwang ng ating kalayaan laban sa mga mapang-api at mapang-abusong pamumuno ng mga Kastila at iba pang bansang mananakop ay pag-alabin natin ang nasyonalismo o pagka-makabansa. Sariwain ang mga kaganapan na naging hudyat ng paglaya ng Pilipinas at kilalanin ang mga bayaning Pilipino na nagbigay daan para sa kalayaan ng ating bansa.