Ang pagbasa ay isang magandang gawain kung kaya’t maraming
naidudulot na magandang bagay sa isang tao. Ito ay ang tuwid na instrumento upang makuha at makilala ng lubusan ang mga ideya, kaisipan at damdamin ng isang tao sa mga sagisag o titik na nakalimbag sa mga pahina upang maibigkas ito sa pamamagitan ng pasalita. Mahalaga ang pagbasa sa buhay ng bawat tao sapagkat ito ang nagsisilbing pangunahing kasangkapan sa pagtuklas ng karunungan, kung baga ito ang gintong susi na magbubukas ng pinto sa daigdig ng karunungan at kasiyahan. Ang pagbasa rin ay isang makrong kasanayan na dapat paunlarin ng bawat isa upang sa pagharap nila sa mundo, matuto at makaunawa sila ng mga bagong bagay. Nakakatulong din ito sa pagpapalawak ng bokabularyo at kaalaman ng isang tao. Idagdag pa riyan na ang pagbasa ay nakatutulong sa paghasa ng ating kaisipan, nakapag-aalis ng bagot o pagkainip, at mas napalalawak nito ang pananaw ng tao ukol sa buhay.