TAYO ANG ATIMONAN
ni CYRUS RENIEL L. SANTANDER
Sabayang Pagbigkas na ang insipirasyon ay ang Paksa ng Atimonan Day 2019:
“Makabagong Atimonan: Batay sa Nakaraan, Produkto ng Kasalukuyan
at Tinatanaw ang Maunlad na Kinabukasan”
Balita! Balitang Balita!
Barilan sa Atimonan, Shoot out o Rub out!
20 Patay; 54 Sugatan sa Karambola
Nakuryenteng Construction Worker, patay!
Patay!Lagi na lang patay!
Aksidente…
Salpukan ng mga sasakyan
Pati mga bangkay natagpuan…
Ito ang mga kalunos-lunos na mga balita…
Balitang gumulantang sa ating lahat…
Balitang bumandera sa mga dyaryo, radyo at telebisyon
Mga balitang mabilis na kumalat sa social media.
Sa ngayon, ito na ba ang larawan ng Atimonan?
Tapos noon, dito daw naninirahan ang mga aswang?
Bayan ng Atimonan… bayan ko… bayan mo…. bayan
natin…
Paano na tayo sa hinaharap?
Walang anumang nakaririmarim na balita
Ang sa ati’y magpapabagsak…
Hindi tayo manghihina at manlulupaypay
Dahil ang diwa natin ay positibo
Nanalig tayo na sa kabila ng ulan…
Ang bahaghari ay sisikat mandin…
“HUWAG KAYONG MATAKOT!”
Iyan ang mensahe sa atin ni Ate Monang
Huwag tayong mangamba… lakasan natin ang ating
loob…
Bilang isang bayan …. nananalaytay sa ugat natin
Ang dugo ni Iskong Bantay na siyang namuno
upang magupo natin ang mga piratang Moro.
Ikaw… ako… sila …tayo ang Atimonan
Tayo ang mismong bayan…
Kaya kung ano ako at ano ka…
Pareho lang tayo…
Kaya kung ano ang gawi mo…
Iyan ang repleksyon ng ating bayan…
Ang panahon ay mapanghamon ngayon
Harapin natin ang anumang pagsubok
Bilang tayo ang kumakatawan sa ating bayan
Sama-sama nating bakahin ang anumang mga balakid
Tayo ang magtataguyod sa magandang pangalan ng
bayan
Kaya kung tayo ay may suliranin
Huwag tayong duwag… PANATILIHIN ANG
KATATAGAN
Huwag na natin idaan sa social media
Dahil tayo mismo ang sumisira sa imahe ng ating bayan.
TAYO AY MAPALAD
Kaya maging masaya na lamang tayo
Lalo na kung may mga kababayan tayong nagtagumpay
Iwasan na nating maging mapait at mainggit
Ang mga biyayang natanggap ay pansinin natin
Hindi ba’t kahit anumang bagyo o delubyo ang sumapit
hindi tayo malubhang naapektuhan?
Tayo ay pinagpapala ng Poong Maykapal
Sa tulong ng ating Patrona – Reyna ng mga Anghel!
ATIMONANIN… HINULMA TAYO NG KAHAPON
KAGITINGAN… Panatilihin natin…
Sa mga manlulupig, hindi tayo nagpadaig…
Walang pagsubok ang hindi natin malalampasan…
Kumilos na tayo at simulan na natin ang pagbabago…
OO, TAYO MISMO ANG PAGBABAGO!
Simulan natin ito sa ating mga sarili
Sapagkat kung anuman ang hangad natin…
Matutupad ito kung tayo magkakabigkis
ABOT TANAW NA!
ATIMONAN AY UUNLAD!
Sa dadakuhing panahon, ito’y magiging siyudad
Sapagkat PINAPANDAY TAYO NG
KASALUKUYAN
Kaya sa hinaharap, wala ng tambay sa Atimonan!
Wala ng batang hindi makapag-aaral
Wala ng pamilya na walang tahanan
Wala ng magugutom sa bayang ito.
Bawat mamamayan… aahon…
Magsisikap… magpupursige…
Kikilos upang bayang Atimonan
Mas makikilala sa buong mundo
Sa taglay nitong kaunlaran at pagsulong
Bawat mamamayan ay nagtutulong-tulong
Sapagkat ikaw… ako.. tayo..
TAYO MISMO ANG ATIMONAN!