1. Paano pinatunayan ni Dr. Jose Rizal na mas mabisa ang panulat kaysa espada? KASAGUTAN: Hindi kailanman gumamit ng karahasan si Dr. Jose Rizal sa paglaban sa mga Espanyol, upang maisiwalat ang karahasan ng mga Espanyol at mag-kaisa ang bawat Pilipino. Ang mga aksyon at akda ni Dr. Jose Rizal ay nagpakita at nagpatunay na “mas mabisa ang panulat kaysa espada”. Ginising niya ang natutulog na nasyonalismo sa mga Pilipino na humawi ng landas para sa Rebolusyon ng Pilipinas. Alam ni Rizal na sa bawat akda at aksyon na tumutuligsa sa Espanyol na kaniyang ginagawa ay nanganganib ang kanyang buhay ngunit sa kabila nito ay pinili niyang lumaban sa paraang mag-iiwan ng kabuluhan at ideya ng kalayaan sa bawat Pilipino. Nakapaloob sa bawat letra ng tinta na kanyang isinulat ang nagsilbing kanyang sandata laban sa mga mananakop. Bawat salita ay may talim na tumutumbok sa karahasan at kasakiman ng mga Espanyol. Hindi lamang ginamit ni Rizal ang panulat upang labanan ang ating mga kolonisador ngunit siya mismo ang naging panulat, na nagsisilbing boses ng mga Pilipino sa kanyang panahon. Ang akdang Noli Me Tangere na bumuo ng kontobesiya at ang El Filibusterismo na isinulat niya bilang pag-alala sa tatlong paring martir ay nobelang pampolitika na nagpapadama, nagpapahiwatig at nagpapagising pang lalo sa maalab na hangaring makapagtamo ng tunay na kalayaan at karapatan ng bayan. Makikita kung paano nagulo ng kanyang ideya ang Imperyo ng Espanyol na dahilan upang siya’y hatulan ng kamatayan. Namatay si Dr. Jose Rizal ng payapa at kalmado — walang bahid ng takot sa harap ng kamatayan. Ang kaniyang mga ideya, kaisipan at kamatayan ang naging pundasyon ng isang bansang malaya. Isang dakilang bayani na minsang nagsabi na “hindi karahasan ang sagot para magtagumpay tayo sa isang laban”. Nakakalungkot isipin na hindi man lamangng nasilayan ng ilang bayani ang inaasam nilang kalayaan ng Pilipinas laban sa mga Espanyol.