PANANALIKSIK

Pananaliksik - isang sistematikong pag-iimbestiga at pag-aaral upang makapagpaliwanag at

makapaglatag ng katotohanan gamit ang iba’t ibang batis ng kaalaman.

❖ Isinasagawa ang pananaliksik bilang isang lohikal at organisadong batayan ng mga

karagdagang kaalaman ukol sa tungkol sa tao, kultura at lipunan.

❖ Ginagamit bunsod ng pangangailangang palawakin o palalimin ang kaalaman sa isang

larangan lalo na ang mga institusyong pang-akademiko.

❖ Ang paghahanap pangangalap, pagtatasa o pagtataya at pagiging kritikal ay mga kasanayang

nalilinang sa pagsasagawa ng pananaliksik.

❖ Ayon kina Clarke at Clarke ang pananaliksik ay maingat, masistematiko at obhetibong

imbestigasyon na isinasagawa upang makakuha ng mga balidong kongklusyon at makalikha ng
mga simulaing kaugnay ng tinukoy na suliranin sa ilang larangan ng karunungan.

❖ Binigyang kahulugan nina Nuncio et al (2013) ang pananaliksik bilang isang lohikal na
proseso ng paghahanap ng sagot sa mga tanong ng mananaliksik na nakabatay sa problema at
metodo ng pag-aaral tungo sa produksiyon ng maraming kaalaman at kasanayan upang
makatugon sa pangangailangan ng tao at lipunan.

❖ Nagsisimula ang pananaliksik sa pamamagitan ng mga tanong sa pananaliksik (research

question). Sinasaklaw ng mga tanong na ito ang pinakabuod o sentro ng pananaliksik.
Tinutukoy nito ang uri at layunin ng pananaliksik at nagsisilbi rin itong patnubay kung anong
proseso ang angkop na gamitin

❖ Nag-uumpisa sa pagbuo ng mga tanong sa pananaliksik ang tutugunang suliranin ng

pananaliksik. (paksa, usapin, o pangyayari na nais siyasatin at kailangang alamin, mga
kondisyong dapat baguhin o mga hamon na dapat bigyan ng solusyon ng isang manaliksik). Ang
pagsagot sa suliraning tutugunan ng pananaliksik ay sinusundan ng pagbuo ng kuro-kuro
(hypothesis)
Paano bumuo ng isang maayos na tanong sa pananaliksik?
Ayon kay DUKE WRITING STUDIO, kailangang gawin ang sumusunod:
1. Pumili ng paksang kinawiwilihan at magbasa ng mga kaugnay na pag-aaral na naisagawa
tungkol dito. Makatutulong ito na makabuo ng mga pangunahing tanong mula sa paksa.
2. Isaalang-alang ang iyong mambabasa. Para kanino ang iyong isasagawang pananaliksik?
Sino ang iyong target na mambabasa? Subukang bumuo ng mga tanong na sino, ano,
paano, saan, bakit, at kailan ukol sa paksang kinawiwilihan. Subukin ding bumuo nga
mga posibleng sagot sa mga tanong na ito.
Katangian ng Magandang tanong sa Pananaliksik
1. Tiyak, espesipiko at maliwanag ang paggamit ng mga termino.
2. Tumatalakay sa mahalaga at makabuluhang isyu.
3. Hindi pa naisasagawa ngunit posibleng maisakatuparan
4. Nagtataglay ng malinaw na layunin at kahalagahan.

Mga Layunin ng Pananaliksik

1. Makasumpong ng sagot sa suliranin
2. Makabuo ng batayang pagpapasiya sa kalakalan at iba pa
 3. Makapagbigay kasiyahan sa kuryosidad
4. Mapatunayan ang umiiral na kaalaman
5. Makatuklas ng bagong kaalaman

3 Pamamaraan o Metodo sa Pananaliksik

❖ Ang bahaging ito ay nagpapaliwanag ng disenyo ng pananaliksik partikular na ang paraan ng

pananaliksik na ginamit, paano pipiliin ang mga respondent/tagasagot, ang instrumentong
gagamitin at ang balidasyon nito.

❖ Isasaalang-alang din ang eskema ng pagsusuri sa mga datos na gagamitin ng istadistika.

❖ Ang dahilan kung bakit ang isang partikular na paraan ang gagamitin ay dapat bigyan ng
katarungan.

Tatlong Disenyo ng Pananaliksik

1. Pananaliksik na Palarawan- Ito ay isang disenyo na itinatala ang mga pangyayari o sitwasyon,
inilalarawan ang pagdiskubre ng mga datos, pagpapahayag ng mga natuklasan, pagkakasuri at
paghahambing ng mga ginamit na baryabol.
2. Pananaliksik na Pangkasaysayan- Ito ang disenyo kung saan ang mga nakaraang panahon ay
sinusuri at pinag-aaralan ganoon din ang kaugnay na mga dahilan at kinalabasan nito sa
kasalukuyan o sa hinaharap.
3. Pananaliksik na Eksperimental- Ito ang disenyo ng pananaliksik na nagsasaad ng dahilan o
pinagmulan at epekto ng kaugnayan ng baryabol na dinidetermina para sa hinaharap.
Napakaraming disenyo sa eksperimental na pananaliksik ang mapagpipilian.

✓ Sa pananaliksik ay may iba’t ibang layunin ang ginagamit ayon sa hangarin ng paksang
sasaliksikin. Kailangang bigyang konsiderasyon din ang metodo o disenyong gagamitin sa
pananaliksik upang matiyak ang mga kasangkot sa pananaliksik, paano, bakit sila magiging
bahagi, sa paanong paraan ang pangangalap ng mga datos, paano susuriin at maging dahilan
ng nasabing pananaliksik.

Gamit ng Pananaliksik
1. Isinasagawa ang pananaliksik upang tumuklas ng mga bagong kaalaman at impormasyon na
magiging kapaki-pakinabang sa mga tao. Isang halimbawa ang bagong lumabas na datos na
malaki ang tsansang maging malilimutin ang isang tao batay sa dalas ng kaniyang paggamit ng
smartphone at Internet. Ayon sa pag-aaral ni Dr. Lee Hadlington, may direktang kaugnayan ang
pagbababad sa Internet at paggamit ng smartphone sa unti-unting paghina ng isip at memorya
ng isang tao.
2. Maaaring gamitin ang pananaliksik upang bigyan ng bagong interpretasyon ang lumang
impormasyon. Maaaring sa paglipas ng panahon ay magkaroon ng panibagong imbensiyon na
may kaugnayan sa dating pananaliksik. Halimbawa noong una ay pinupuri ang pagkatuklas ng
paraan upang mapabuti ang produksiyon ng ilang uri ng pagkain sa pamamagitan ng genetically
modified oirganism o GMO. Ngunit, ngayon, iniuugnay sa ilang sakit ang pagkonsumo ng mga
pagkaing sumailalim sa modipikasyon o GMO.
3. Nagagamit ang pananaliksik upang linawin ang isang pinagtatalunang isyu. Halimbawa ang
mga bagong tuklas na benepisyo ng marijuana upang malunasan ang ilang karamdaman. Sa
kabila nito, marami pa rin ang hindi sumasang-ayon na gawing legal ang paggamit ng
marijuana.
4. Nagsasagawa ng karagdagang pananaliksik upang patunayan ang bisa ng katotohanan ng
isang datos o ideya. Maaaring kompirmahin ng bagong pag-aaral ang isang umiiral na
katotohanan.

Bilang isang gawaing akademya, kailangang taglayin ng mabuting pananaliksik ang

sumusunod na katangian:
1. Gumagamit ng mga ebidensyang hango sa isinagawang eksperimentasyon.
2. Sistematiko
3. Kontrolado
4. Gumamit ng matalinong kuro-kuro (hypothesis)
5. Masusing nagsusuri at gumagamit ng angkop na proseso.
6. Makatwiran at walang kinikilingan
7. Gumagamit ng dulog estatistika
8. Orihinal
9. Maingat na gumagamit ng mga pamamaraan sa pangangalap ng mapatitiwalaang datos
10. Hindi minadali

✓ Paano ba natin malalaman ang halaga ng isang bagay? Madali lamang sa pamamagitan ng
gamit nito. Tulad ng pananaliksik na maraming gamit at kailangan matiyak na ang bawat gamit
ay mayroong kapakinabangan sa sangkatauhan. May ibang gamit ang pananaliksik na tulad ng:
magbigay patunay sa umiiral na mga pag-aaral; nagbibigay ng tamang direksyon o kalinawan sa
mga isyu; magbigay ng interpretasyon sa mga luma ng impormasyon; at gayundin ang
makadiskubre ng mga bagay o impormasyon na wala pa sa kasalukuyan na makatutulong sa
bawat mamamayan.

Iba’t ibang Dimensiyon ng Pananaliksik

1. Tumuklas ng mga bagong kaalaman at magpatunay ng mga umiiral na kaalaman.
a. Ang pananaliksik na naglalayong tumuklas ng makabagong kaalaman ay
nagsasagawa ng imbestigasyon at pagsusuri tungkol sa mga bagay o ideya na hindi
ganap na nauunawaan o hindi pa saklaw ng kaalaman.
b. Pananaliksik na naglalayong magpatunay ng mga umiiral na teorya ay batay sa mga
nakuhang datos.
2. Nagtataya o nagsusuma ng mga datos at Nag-uuri ng mga datos
a. Pananaliksik na nagtataya o nagsusuma ng mga datos ay gumagamit ng numero o
estatistika upang masukat ang mga elemento.
b. Pananaliksik na nag-uuri ay nakabatay sa direktang obserbasyon o bunga ng mga
panayam mula sa iba’t ibang batis. Ang pananaliksik na ito ay naglalarawan ng mga
katangian ng paksang sinasaliksik.
Etika sa Pananaliksik

❖ Sa pananaliksik ay may sinusunod na etika. Katulad ito ng anomang disiplina na may

istriktong code of ethics na ipinapatupad. Sa etika ng pananaliksik, itinuturing na napakalaking
kasalanan ang plagyarismo. Dahil sa kabigatan ng kasalanang ito, napatalsik ang isang dekano
sa isang unibersidad, natanggalan ng digri ang isang nagtapos na ng doktorado, nawalan ng
kredibilidad ang isang tanyag na iskolar, hinabla sa korte ang prodyuser ng isang programa sa
telebisyon (Atienza et al, 1996).

❖ Bahagi ng etika ang tinatawag na isyu ng plagiarism

❖ Ang plagyarismo ay pangongopya ng datos, mga ideya, mga pangungusap, buod at balangkas
ng isang akda, programa, himig at iba pa, na hindi kinikilala ang pinagmulan o pinagkopyahan.
Ito ay isang uri ng pagnanakaw at pagsisinungaling dahil inaangkin mo ang hindi iyo (Atienza,
et al., 1996).
Pagpapahalaga sa gawa ng iba ay isang magandang kaasalan na dapat ipagpatuloy at
ikintal sa isipan ng bawat mananaliksik. Kailangang bigyang konsiderasyon na ang etika sa
pananaliksik ay bahagi o kasama na sa mga katangiang dapat taglayin ng mananaliksik.
Malaki ang gampanin nito sa katagumpayan ng pananaliksik sapagkat ang gawa ng iba ay
tapat na kinikilala, gayundin ang pagbibigay respeto sa sarili upang matamo ang
katagumpayan ng pag-aaral na isinasagawa, hindi upang manira at magnakaw ng gawa ng
ibang tao.

Etikang isinasaalang-alang sa pananaliksik

Dahil ang pananaliksik ay bunga ng matiyagang pagbabasa at pagsusuri ng mga nauna nang
pananaliksik, mahalagang malinang sa bawat mag-aaral ang mga etika sa pananaliksik. Ito ang
mga bagay na kailangang isaalang-alang bago bumuo ng sulating akademiko. Malalantad ang
mga mag-aaral. Dahil dito, mahalagang iwasan ang sumusunod:

a. Paggamit ng teksto ng ibang manunulat o mananaliksik (Plagiarism)

-ang paggamit ng mga salitang hinango mula sa ibang teksto at inangkin nang buong-buo
nang hindi binabanggit ang orihinal na pinagkunan. Upang maiwasan ito, kailangang
banggitin ang librong pinaghanguan ng ideya at ang pangalan ng may-akda.
Ayon sa www.plagiarism.org (nasa Atanacio, et.al., 2013) may iba’t ibang anyo o paraan ang
plagiarism:
1. Pag-angkin sa gawa ng iba
2. Pangongopya ng mga salita o ideya nang hindi kinikilala ang orihinal na sumulat
3. Hindi paglalagay ng panipi sa mga siniping pahayag
4. Pagbibigay ng maling impormasyon tungkol sa pinagmulan ng siniping pahayag
5. Pagpapalit ng mga salita ngunit pareho lamang ang estruktura ng pahayag.
b. Pagreresiklo ng mga material (Recycling)
- ang muling paggamit ng mga nailathalang material o mga papel na naipasa na sa ibang
kurso.
c. Agarang pagbibigay ng kongklusyon nang walang sapat na batayan
-Ito ay pagbuo ng akademikong papel nang hindi pinagtuunan ng masusing pag-aaral ang
mga datos at mabilisang nagbigay ng kongklusyon o rekomendasyon para matapos lamang
ang sulatin.
Ilan pang halimbawa ng Plagyarismo:

 Pagsusumite ng papel o anomang produkto na gawa ng iba o kaya ay sabay na

pagsusumite ng iisang papel sa magkaibang kurso,
 Redundant Publication kung saan nagpapasa ang isang mananaliksik ng iisang pag-aaral
sa dalawang magkaibang refereed journal para sa publikasyon,
 Self-plagiarism kung saan ang bahagi ng isang pananaliksik ay inuulit sa isa pang
pananaliksik nang walang sapat na pagbanggit kahit pa sarili ring ideya ang pinagmulan
nito,
 Maging ang gawain ng ilang mananaliksik na pagpaparami ng listahan ng sanggunian
kahit na hindi naman personal na nabasa at ginamit, bagkus ay nakita lamang na
binanggit sa aklat ng iba, ay mga porma rin ng plagiarism.
Ang etika sa pananaliksik ay nagtataglay ng iba’t ibang kaparaanan na dapat bigyang
konsiderasyon ng isang mananaliksik. Nariyan ang pagkilala sa orihinal na may-akda,
pagtatala sa pinagkunan ng mga ito, paglalagay ng panipi sa mga tuwirang pahayag,
pagtatala ng mga wastong impormasyon at marami pang iba. Lahat ng konsepto at
impormasyong ito ay dapat tandaan at isabuhay ng mananaliksik upang sa bandang
huli ay walang kaparusahang maipapataw at matagumpay na maisagawa ang pag-
aaral.

Dahilan ng Plagyarismo
 Kamangmangan o kawalan ng ideya,
 May kamalayan sa mga panuntunan ngunit sadya o hindi sadyang binabalewala ang mga
ito,
 Labis na pagmamadaling makatapos sa pananaliksik o kaya ay hindi pagbibigay ng sapat
na panahon na nagreresulta sa kawalan ng sinop at pag-iingat ng mananaliksik,
 Sa bahagi naman ng guro, karaniwang hindi nabibigyan ng sapat na pagtatalakay ang
usaping plagyarismo.

Maaaring Ipataw sa Plagyarista:

-pinakamagaang na parusa na para sa mga mag-aaral na mabigyan ng 5.0 (lagpak na marka)
para sa kurso/asignatura
-kung mapapatunayan na matindi ang pagnanakaw na ginawa, maaaring patalsikin ang mag-
aaral sa paaralang pinapasukan
-kahit nakagradweyt na ang mag-aaral at ilang taon na ang nakalipas, ngunit natuklasan na
ang kanyang pananaliksik ay kinopya, maaari siyang tanggalan ng digri o
-maaari ring ihabla ang sinumang nangongopya batay sa Intellectual Property Law at maaaring
sentensyahan ng multa o pagkabilanggo.