"Laro ng Konsensya"

Langit, lupa, impiyerno

Saksi ang tagpo, bulag na puso
Sino ang may itinatago
Sinong huwad ang pagkatao

Langit, lupa, impiyerno

Laban ng puso at sentido
Sa pagitan ng dangal at prinsipyo
Ikinubli ang tama, mali ay isinuko

Langit, lupa, impiyerno

Sinaksak ang pulso, luha ay tumulo
Pagbilang kong tatlo, budhi ay itago
Isa, dalawa, tatlo, totoy takbo!

Langit, lupa, impiyerno

Ingatan ang moral, laban sa baligho
Hindi ka dalisay, hindi ka santo
Ano ang tama sa maling mapanudyo

Langit, lupa, impiyerno

Hukom ang mata at prinsipyo
Hindi ka mulala upang hindi matanto
Sundan ang puso kung saan patungo

Langit, lupa, impiyerno

Hindi matahimik, sa nakaraa'y nanlumo
Sa bangungot na mga tagpo
Konsensyang tumatangis ng dugo

Langit, lupa, impiyerno

Sa taliwas na paniniwala at mundo
Waring Kagaw na sisira tungo sa pagkatalo
Sa manhid mong pusong mapang-abuso

Langit, lupa, impiyerno

Sa pagitan ng kasinungalingan at totoo
Dalisay na pagkatao ay mabubuo
Sa pagsulong ng maling iwinasto
 Langit, lupa, impiyerno
Hindi sagot ang dasal maging ang rosaryo
Tila mga patay sa sementeryo
Ang konsensyang nagmumulto

Langit, lupa, impiyerno

Sa pagbukas ng panibagong yugto
Ikaw ang lubid sa 'yong papagayo
Panghawakan mo ang iniingatang prinsipyo.