inaasahang; • Naipaliliwanag ang konsepto ng kontemporaryong isyu Mahahalagang Tanong: ● Ano ang kontemporaryong isyu? ● Ano-anong aspekto ng pamumuhay ang nasasaklaw ng kontemporaryong isyu? ● Ano ang mahahalagang alituntunin sa pag- aaral ng kontemporaryong isyu. Ang salitang kontemporaryo ay nangangahulugang “makabago” o “napapanahon.” Konsepto ng Kontemporaryong Isyu Ang kontemporaryong isyu ay: • maaaring tumukoy sa anumang napapanahong pangyayari, ideya, opinyon, o paksa na tahasang nakaaapekto sa pamumuhay ng mga tao. • anumang isyu o usapin na may mga implikasyon, aplikasyon, kaugnayan, katuturan, kabuluhan, epekto, at materyal na presensya sa kasalukuyang panahon. • anumang pangyayari sa kasalukuyan na nangangailangan ng agarang pansin at solusyon, kadalasan ay pulitikal o sosyal na isyu na nakaaapekto sa sangkatauhan. Ang mga kontemporaryong isyu ay maaaring sumaklaw sa sumusunod na usapin: • Panlipunan: globalisasyon, regional integration, terorismo, kahirapan, paglaganap ng paggamit ng ipinagbabawal na gamot • Pangkalusugan: paglobo ng populasyon, mga bagong natuklasang sakit • Pangkapaligiran: global warming, pagkasira ng ozone layer • Panteknolohiya: hacking, social media, social networking sites Ang kontemporaryong isyu ay hindi lamang tungkol sa mga problema ng ating lipunan o mundo, kung hindi sa kahit anong usapin na masasabi nating makabago at napapanahon. Ilan sa mga tiyak na halimbawa ng kontemporaryong isyu na kinahaharap ng mundo ay: • Pananakit at hindi pantay na pagtrato ng mga pulis sa mga black American sa Estados Unidos; • Malayang kalakalang ipinatutupad ng Tsina na nakaaapekto sa ekonomiya ng ibang bansa; • Paglaganap ng mga huwad na balita sa social media sa Pilipinas na nagiging dahilan ng pagkaligaw sa katotohanan at pagkakabahagi ng mga mamamayan; • Batas na nauukol sa diborsiyo at paano ito pumapanig sa kababaihan; at marami pa. Mahahalagang Alituntunin sa Pag-aaral ng Kontemporaryong Isyu Sa ating pagtalakay ng iba’t ibang kontemporaryong isyu, mahalagang matandaan ang sumusunod na maaaring magsilbing gabay: 1. Maging bukas ang kaisipan. Ang ating mga narinig noon ay maaaring totoo at maaaring mali. Dapat tayo ay handang matuto, kuwestiyunin, at siyasatin ang tungkol sa mga ito. 2. Matutong magtanong. Mas maraming puwedeng matuklasan ang kaisipang patuloy na naghahanap ng kasagutan sa mga bagay. Huwag matatakot na alamin ang mga bagay at magtanong sa guro at mga eksperto. 3. Gamitin ang kaalaman para sa kabutihan. Ang ating mga matututunan sa pag-aaral ng kontemporaryong isyu ay makatutulong upang tayo ay makapag-isip ng mga paraan upang maiangat ang antas ng ating pamumuhay. Tandaan natin na ang ating edukasyon ay hindi lamang titigil sa apat na sulok ng ating silid-aralan Mga Kontemporaryong Isyu at Suliranin ng Pilipinas bunga ng mga Pagbabago sa Mundo Tuwiran man o hindi, ang Pilipinas ay naaapektuhan ng mga pangyayari sa mundo, bunga ng mga pagbabago sa mga aspektong pulitikal, ekonomikal, at sosyal. Ang ilan sa isyung kinahaharap ng Pilipinas ay ang lumalaking populasyon, pagkasira ng kalikasan, paglabag sa karapatang pantao, katiwalian sa pamahalaan, banta ng terorismo, at iba pa. 1.Lumalaking Populasyon- Isang malaking isyu at problema sa Pilipinas ang patuloy na paglobo ng populasyon nito. Tinatayang nasa 2.05% ang bilis ng pagdami ng Pilipno noong nakaraang taon. Hanggang sa kasalukuyan, isa ang Pilipinas sa pinakamataong bansa sa buong mundo. Ang isyung ito ay nagdudulot ng kahirapan sa bansa. 2.Pagkasira ng Kalikasan- Walang duda na ang Pilipinas ay isa sa mga pinakamayamang bansa kung biyaya ng kalikasan ang pinag-uusapan. Biniyayaan ang Pilipinas ng mga yamang lupa, yamang tubig, yamang mineral, yamang gubat, at yamang tao. Subalit dahil sa kapabayaan at pagsasamantala ng mga tao, idagdag pa ang globalisasyon, lumalala ang pagkasira at tuluyang pagkaubos ng mga likas na yaman ng bansa. 3.Malawakang Kahirapan- Laganap ang kahirapan sa buong mundo lalo na sa Aprika at Asya. Sa Pilipinas, higit na naaapektuhan ang mga magsasaka, mangingisda, maliit na negosyante, kababaihan, walang mataas na pinag-aralan, at iba pang sektor ng lipunan. 3.Paglabag sa Karapatang Pantao- Malaking isyu rin sa Pilipinas ang paglabag sa karapatang pantao lalo na sa kababaihan. Nakaugat ito sa kulturang patriyarkal ng bansa. Halimbawa nito ang pagpigil sa karapatan ng mga kababaihan na magplano at magpasiya tungkol sa kaniyang reproductive na kalusugan. Sa kabila ng pagpasa ng Reproductive Health Law, mayroong mga mambabatas na nagpasiyang hindi bigyan ng badyet ang pagpapatupad ng batas na ito. Maliban sa usaping internal, may epekto rin sa isyung ito ang eksternal na usapin kagaya ng laganap na prostitusyon dahil sa pagdagsa ng mga dayuhan sa bansa. Hindi rin ligtas ang mga katutubo sa suliraning ito. Nagiging biktima sila ng paglabag sa karapatang pantao kagaya ng pangangamkam ng kanilang mga minanang lupain. 4.Katiwalian sa Pamahalaan- Ayon sa survey ng Transparency Index, ang Pilipinas ay ay nasa halos pinakamababang puwesto o ranggo. Ibig sabihin, malala o matindi ang isyu ng katiwalian sa Pilipinas. Sa katunayan, talagang laganap ang katiwalian sa iba’t ibang sangay ng pamahalaan kagaya ng pag-aareglo, palakasan, nepotismo, suhulan, at iba pa. 5.Banta ng Terorismo-Sa patuloy na paglaganap ng terorismo sa buong mundo, hindi makaiiwas ang Pilipinas sa isyung ito. Malaki ang panganib na dala-dala ng terorismo sa mga Pilipino dahil wala itong pinipiling bibiktimahin. Ilan sa aktibong grupong terorista ang Jemaah Islamiyah, Al- Qaeda, at Hezbollah. Usap-usapan sa iba’t ibang panig ng mundo ang pambobomba ng mga nasabing grupo. Sa Pilipinas, ilang pagsabog na rin ang naranasan sa Metro Manila at ilang panig ng bansa. Isulat sa patlang ang tinutukoy na kontemporaryong isyu: LUMALAKING POPULASYON, PAGKASIRA NG KALIKASAN, MALAWAKANG KAHIRAPAN, PAGLABAG SA KARAPATANG PANTAO, KATIWALIAN SA PAMAHALAAN, o BANTA NG TERORISMO. ____________________ 1. Naglaan ang pamahalaan ng malaking pondo para sa pagpapalakas ng Sandatahang Lakas ng Pilipinas. ____________________ 2. Isang reyalidad na ang isyu at suliraning ito ay nakaugat na sa sistema at kinikilalang bahagi ng burokratikong proseso. ____________________ 3. Malaking hamon sa mga Pilipino kung paano makababangon o makababayad ng pamanbansang utang nito mula sa mga dayuhang pinagkakautangan. ____________________ 4. Kinukondena ng pamahalaan ang paggamit ng mga rebeldeng pangkat ng mga bata upang magsilbi bilang sundalo nila laban sa pamahalaan. ____________________ 5. Isinusulong nito ang impormasyon at paggamit ng modernong pamamaraan ng pagpaplano ng pamilya. ____________________ 6. Nalalason ang mga ilog dahil sa mine tailing. ____________________ 7. Sinisisi ang mga base-militar ng Estados Unidos dahil sa dala nitong nakalalasong kemikal na nakaaapekto sa kapaligiran. ____________________ 8. Sa pagdami ng mga tao sa Asya, nangangamba ang Estados Unidos na maging kaagaw nila ang mga Asyano sa mga likas na yaman nito. ____________________ 9. Halos isa sa tatlong Asyano ay mahirap, ayon sa isang pag-aaral. ___________________ 10. Sa Pilipinas, dalawang pangulo ang pinatalsik ng taumbayan