HANSUANG HONNA LEH LUNGDAMTHU GENNA

(Nu Niingzaman leh Tangval Langbiaklian)

Amun : Tangnuam, Hanmual

Ahun : 12:00 Noon Ani: February 9, 2008

Hunkem : Ginkhopao, Thusa

Mipi lasakna :
Haan honna : Pastor V. Jamkhanthang, Bial Pastor
Inteek hun :
Pute hun :
Pak piakna :
Thugenna hun : Ut omleh
Annkuang latna: Pastor T. Paukhanmang

Tanchin tomkim:
Niingzaman (60):
Nu Niingzaman kum 1946 in a piang a, Pa Luankam leh Nu Chiinchiang tanu thumna ahi. Hong
tagah baih uh ahihman in, a paneu uh Pa Suankhozam in a ta bang in na kemtou hi. Hong khang
lian tou ua pasal a hong nei uhi. Pa Awnzanang leh Nu Enkhoning tapa lina Kaimung toh May 8,
1971 in Saptuam dan in Tangnuam BCM Pastor D H Thang in a gawm hi. Amau Pasian vualzawlna
tapa nga leh tanu khat a nei uhi. A nungak lai in taksa hatlo leh damtheihlo himahleh pasal a hong
neih chiang in Zi leh Nu mohpuakna teng semthei ding in chidamna hoihzaw a hong nei hi.
Nu Ningzaman ahihleh mi nunnem, kuhkal leh chitak mahmah ahi. A tekpu, Awnzanang’ lungtunna
mahmah mou hi a, nasep lunglut leh Pasian lau mi, thungetna nei masa lo in mapang ngeilo hi.
Anntangpham bang ginomtak a pham in Saptuam ah pe hoih pen a chiamteh bang ana kai hi.
Kiniamkhiat leh paupeeng mikhat ahi. Khuazakna lam tasam mahleh chiamnuih leh limchiin siam
in a lawm leh gualte a limsak zo mahmah zel hi. A hinkhua ah mi huat leh hehna ding gen ngeilo in
Nu dohzotak ahi. A nung leh a manohlam te hoihna ding zong a panla mi hi a, a inn leh louma a
piangkhe te tanau, veng-le-pam mite deihsak leh phaltak in a pe zel hi. Innsung gentheitak himah
leh maban lametna lianpi nei in a pasal in, sep-le-bawl ah panpih zokei mah leh, ama’ makaihna toh
a tate pantah in - a haute hau denlo a, a zawngte zawng den lo hi - chi in a theihtop in a tate
hasuan in Nu ettontaak khat ana hi hi. Amah laisimkha lo himaleh suutlam (thil hisap) siam mi ahi.
A tapa upa pen kum 2004 in zi a neihsak zoh in tupa khat mel a muman hi. A tapa nihna zi neih ding
kilawptak in Itanagar apat in December 16, 2006 in a hong pai uhi. Vangsiathuai tak in, a it
innkuante nusia in a tapa Langbiaklian leh Dimhauniang toh Piphema, Nagaland ah gari accident
tuak in hongna mualliam san uhi. Huchin, amau luang December 22, 2006 in Tangnuam hanmual ah
vuiliam ana hi ta. Tate adia a lungsim ngaihsutna khempeuh leh a thate a na zangtou hi. Tate piching
ta, tawldam theita leh lungsim nuamtak a om dia a kisak laitak in a hunloutak in a hong beisanta hi.

Langbiaklian (26):
Tangval Langbiaklian June 15, 1980 in Tangnuam khua ah ana piang hi. 2005 in B.A. Bissau
College, Shillong apan in zo hi. Amah mipautamlo leh zaidam lawm kholsiam tak ahi. Amah
ganvulh leh huanhai bawl lunglut mi ahi. Biak in B.A. a zoh in Itanagar ah a U Kamzalian kiang ah
om in ‘Arunachal Arts and Craft Centre’ ah Accountant nna sem hi. Tua banga a sepkom in laite sim
in competition exam tuamtuam a dingin kisakhol hi. Biakna liimsak tangval hi a, EBCC Itanagar ah
ahihtheihna zahzah toh Mission Committee Chairman hihna a len hi. Tangnuam ah a omlai in
Naupang Pawl leh Tuailai Pawl ah Sinsaktu leh Committee member leng ana hi hi.
*********************************
A tate lungzuanna la:

Zingkhual zingzin tuun nem aw

Tuang nong tun ding haibang ngaklah in
Na von teng galkhua dak ung
Tuangtung ding lambang pak a sang’bang nouh ding
Lunglai ka gel uh tuun ngaih aw nun in nuam
Lunglai i gel piandang huihkhi honglang veh
Lawmgual ngaih leh na von teng zinbang liing ung
Haibang ngaklah ka tun nem tuang hongtung veen
A tongdam leh a banjaal la maimawng e
Na lawmlawm e, tuun ngaih aw, tang laizom aw
Zanchiang zalmang a hiam aw, tak simthu hiam chi jel veng e
Ningtui tulhlouh sakduang lam bang ka vel louh,
A kop a kulsin a zaal lunglai ka sial guabang hin gimnam lou e
Pianna tun leh laizom aw, kong ngaihman in
Daidam kulsin phual giabang hong zuun ung
Na ngai dih ve tun ngaih aw, tang laizom aw
Ngaihkhua hongtuah mi zatam zinbang liing veh e
Hambang na vaihna uh singgam lei ah
Ngaih khua hongtuah melmak lawmgual zatam sang e
Chi bang hawmthoh lungchim a na et ngamlouh
Na sawn mom zong tuun aw leentual tai ta e
Sau daidam leh na sawn mom laukha zuang in
Gamthaang bang nong vil nam maw, tun ngaih aw.

Nu Ningzaman ta leh tu te:

1. Ginglianthang, B.A. (Eco.), B. Lib. Sc.
(Azi Thangnunpar, B.A. - A tapa Mungmuanlian, tanu Mansuanhoih)
2. Kamzalian, Asst. Manager, NABARD
(Azi Chiinngaihlian, Research Officer, RBI)
3. Thangkhanlal, Asst. Comdt., CRPF
4. Ninglunmawi, M.A. (English)
5. (L) Langbiaklian, B.A. (Eco.)
6. Lalbiakthang, B.A. (Reading)

Lungzuan la
Zingkhua zingzin tun nem ngaih aw
Tuang nong tun ding hai bang ngaklah in
Navon teng galkhua dak ung e
Tunngaih tuang hong tung limin dang sang
Kop a kulsin sambang a zaal
Pianna tunnu leh ka laizom aw
Mubang kong ngaih lai ah na sang
Hehnem di’n laukhasiang hong leng in
Ngaihkhua hong tuah siing gamlei ah
Hambang huai lawmgual za in tam sang
Mubang hong ngai mi zatam te
Luankhi toh ziin bang liing uh e

Anbang ka it tun leh laizozm

Ngilhni tuang tung lou ding simlei ah
Ngaihlai puan bang hong thak zel hi
Samtui bang phul e ka dah luankhi

Ngilhmoh ka tun leh laizom aw

Kulsin daidam tangsa phual gia bang
Hong zuun ung e na nuachiang uah
Ngilhmohna lumsuang doh nem bawl ung.