Ang papel pananaliksik na ito ay nakatuon sa iba’t ibang pananaw ng

mga mag-aaral mula sa ika-11 at ika-12 baitang (Senior High School) sa

pagpapalawak ng pagpipilian ng kanilang mga club. Layunin nitong

makatulong sa pagpapasiya kung kailangan bang palawakin pa ang

pagpipilian ng mga club sa Senior High School. Sa pamamagitan ng pag-

aaral na ito, malalaman din kung paano nakaaapekto ang mga club sa

pagpapalawak ng multiple intelligences ng mga mag-aaral. Ang resulta ng

pananaliksik ay maaaring makatulong sa mga mag-aaral sa Senior High

School at mga tagapangasiwa ng kurikulum para sa lalo pang malawak na

pag-unawa ukol sa paksa ng pag-aaral.

Ang pananaliksik na ito ay isang kwalitatibong pag-aaral na ginamitan

ng purposive sampling kung saan ang mga tagatugon ay pinili ng mga

mananaliksik batay sa kanilang kakayahang makasagot. Sa kabuuan, walo

(8) ang naging tagatugon, isa (1) mula sa bawat larangan ng Senior High

School sa St. Mary’s College, Quezon City. Pakikipanayam ang paraan na

ginamit ng mga mananaliksik upang makakuha ng deskriptibong kasagutan.

Gumamit din ng voice recorder ang mga mananaliksik upang maitala ng

maayos ang mga impormasyon.

Lumabas sa pag-aaral na interes at hilig ang kadalasang tinitignan ng

mga mag-aaral sa pagpili ng kanilang club. Malaki naman ang naitutulong ng

mga club para mapalawak pa ang kanilang multiple intelligences ayon sa

mga mag-aaral. Lumabas din sa resulta ng pananaliksik na hindi sapat ang

mga kasalukuyang club at nalilimitahan ang kanilang mga kakayahan. Dahil

dito, nais pang madagdagan at mapalawak ng mga mag-aaral ang mga club

sa Senior High School.