Novena kang Sta.

Maria Magdalena

(Iting novenariong daun kang Sta. Maria Magdalena meyangu ya king “Sambuhay
Novena” a nilikas ng Sem. Ervin Ray S. Garcia, OP king amanung Kapampangan)

Imprimatur:

Most Rev. Florentino G. Lavarias, DD

Archbishop of San Fernando, Pampanga

Sta. Maria Magdalena

Kapiyestan: Hulyo 22

Y Sta. Maria Magdalena, a nung kenu no pepalualan Jesus ding pitung demonyu
(Mk. 16:9), kayabe re ding babaying migsilbi king Ginu at ding apostol kabang
maglakbe la at ipanaral ing Mayap a Balita. Y Sta. Maria Magdalena kayabe ne ning
Indu ning Ginu, ing Nuan a Virgen Maria at y San Juan king pun ning krus inyang ding
aliwang apostol tiniplad la. Sinaup yang mengutkut king katawan ning Ginu, at minta ya
ban ikompletu ing pamangutkut kanitang abak ning Pamanyubling Mebie at ya ing
minunang menakit king sinubling mebie Maestro. Ing Liturhiya Byzantiano sasabyan na
king y Jesus gewa ne y Sta. Maria Magdalena “Ing Apostol karing Apostoles.” (Iting
kasalesayan ng Sta. Maria Magdalena meyangu ya king Misal Kapampangan)

Mumunang Aldo

Sta. Maria Magdalena, ikang tubu king Magdala Galilea, ing lugal a nung nukarin
ya naman dinagul ing Ginung Jesus king edad, king sikanan, at king grasya arap ning
Dios at ning tau. Akatabnu me inyang maging yang masampat a talapanaral,
mipapasyag king Mayap a Balita para king Kayarian ning Banwa, king keyang mitmung
upaya a alang ninu man Judiong Talaturu ing malyaring manikwa. King kapamilatan na
ning keyang mitmung katanyagan, iyang meging sangkan ning pamanuki mu king
propetang iti a ibat king Nazareth.
Ipanigapu mi pu keka oh masikanan ming talapanlualu, ing saupan mu kami
naman sanang maging mayap a talatuki na ning Ginung Jesus. Mananu na sanang
ipagkalub mu king ing kekaming kasalpantayanan e ya mu sukat maging pakitang tau,
at eya mu kabud kasalpantayanan a amana mi pauli na ning kultura, nune bagkus
maging tune yang dalan ning pamakitabnu mi king mabie Ginu.

1
 Ngeni, aduan mi pu keka king mitmung kapagpakumbaban ing ipagkalub mu
sana ining kekaming kayaduanan (_______). Ika a meging malapit kang Jesus keti sulip
at ngeni mas lalung makalapit keya king banwang kekayung karinan. Ipamilatan mu
kami pu ngeni at manga man king kapilan. Amen.

3 Ibpa mi, 3 Bapu Maria, 3 Ligaya, at Pamupus a Panalangin king balang aldo

Kaduang Aldo

Sta. Maria Magdalena, ikang dinalan mitmung kasakitan king miyayaliwang

paralan, pisikal, moral at spiritual. Ing kekang kabilyan tutung meging mabayat pauli na
ning mesabing inalipanan daka ding pitung demonyo. Dapot king misan a aldo,
kelunusan naka ning Ginung Jesus at pepalakwan nala deting mesabing demonyo.
Kinayap kang emu nanu. King kapamilatan na niting grasyang tingap mu king Ginu lalu
nakang dininan sikanan lub ban tuki keya anting metung mu naman karing keyang
disipulo.
Ipanigapu mi pu keka oh kaluguran ming santa king ipamilatan mu kami naman
sa pu king Ginu para king grasya ning pangakayap. Lalasa kami karing miyayaliwang
sakit ning kaladwa’t katawan. Ating panaun a maniambitan kami naman kalupa ng Job:
“Ala kaming kapayapan o kaya man kapaldanan, ala kaming kapaynawan pablasang
ing kaligaligan daratang!” Mananu na sanang ing Dios uluan na kami naman, kalupa na
ning pamanulu na keka.
Ngeni, aduan mi pu keka ining grasyang buri ming kamtan kaniting nobena
(_______). Nung iti tutung makakayap para kekami at para karing sabla, ipamilatan mu
kami king Ginung Jesus ban pakiramdaman na ing kekaming kayaduanan. Amen.

3 Ibpa mi, 3 Bapu Maria, 3 Ligaya, at Pamupus a Panalangin king balang aldo

Katlung Aldo

Sta. Maria Magdalena, ikang mipasyag king Mayap a Balita king kabilugan a
Galilea kambe da ring aliwang babayi a tinuki king Ginu at kambe ra naman ding labing
adwang Apostoles, kambe da ri Juanna, Susanna at ding aliwa pa. Lakwas me pang
aluguran at atuyag ing Ginu king kapayintulutan ng miyabe kayu king kabilangan da.
Pablasang iti eya pangkaraniwan a kaugalian karing aliwang talaturu ning Israel.
Pepatunayan mu king atin kang maragul a alimbag king kabilangan da king kapamilatan
na ning pamidake mu king sarili mung pangabyayan.
O marangal a Santa, aduan mu sa pu king Ginu king dinan na kami namang
pusung byasang kilala king keyang kayapan. King kapamilatan da ring dakal a
grasyang kimtan mi ibat king Ginu, dapot atin panaun a akakalingwan mi la deting

2
mesabing kayapan. Atutuyag mi pa king misan ing Ginu yang sukat mamye kekami king
sabla, dapot akakalingwan mi king ing sabla grasyang manibatan keya. King
kapamilatan na ning pamakiyalintulad mi karing kekang alimbawa, mananu na sanang
pamakitanan mi la namang kayapan ding aliwa king kapamilatan na ning pamidake mi
para karing karelang pamangailangan.
Ngeni, magparalampu kami keka para karing grasyang adwan kaniting nobena
(______). Lalapit kami keka king mitmung sikanan lub at tiwala king ipamilatan mu kami
king Ginung minapse pangaku kekami: “Nanu man ing aduan king Ibpa king lagyu ku, iti
ipagkalub na kekayu.” Amen.

3 Ibpa mi, 3 Bapu Maria, 3 Ligaya, at Pamupus a Panalangin king balang aldo

Kapat a Aldo

Sta. Maria Magdalena, kambe da ring aliwang babayi king Galilea a tinuki king
Ginung Jesus inyang minta ya Jerusalem ban arapan na ing oras ning keyang
kasakitan, kamatayan at pamanyubling mebie. Mekisanmetung kang memag-asa karing
Apostoles king ipasyag na ning Ginung Jesus karing malda ing pamitalaga na king
keyang sarili anting maligayang Mesias. Dapot inyang mayarestu ya at likwan de ring
keyang disipulus, menatili ka pa murin busal na. Menatili ka anggang king talwing
saldak ning keyang pangisnawa king pun ning keyang krus, kambe na ning malugmang
Indu na ing Nuan a Virgen Maria at ning keyang kaluguran a disipulo.
Kaluguran ming Santa, keraklan karing dakal a tau, sasalpantaya la mu king
Ginung Jesus pauli da ring grasyang buri dang kamtan a manibat keya. Dapot,
kadalasan, papante de ing kasalpantayanan da at kapaniwalan king karelang mayap a
kapanandaman. Dapot akakalingwan da na ing esensya na ning Krus atyu king centru
ning karelang kasalpantayanan anting metung a Kristiano. Iti maging tanda ne ning
alang kasimparang lugud ning Ginu para kekatamu---lugud a alang pasubali at alang
kayangganan. Ituru mu sana kekami ing ulaga na ning pamipasakit at ituru mu kami
namang kaulan la deting sarili ming kasakitan. Saupan mu kaming katmuan mi la ding
kekaming katawan nanu man ing kulang kekami karing meging kasakitan na ning
Ginung Jesus, para king ikasaplala na ning keyang mistikong katawan, alang aliwa
nune ing Banal ng Kapulungan.
Ngeni, ipanalangin mi la pu ding taung kakilala mi a tutung dadalan mabayat a
kasakitan (_______). King kapamilatan na pu ning kekayung pamanlualu, mananu na
sanang akamtan da ing kapaldanan a manibat king pacalulu ning Dios at ing saup
karetang magmasabal para karela. Amen.

3 Ibpa mi, 3 Bapu Maria, 3 Ligaya, at Pamupus a Panalangin king balang aldo

3
 Kalimang Aldo

Sta. Maria Magdalena, a inyang muna yang sumlag ing aldo kaybat ning
Sabbath, minta ka kambe da ring aliwang babayi king kutkutan ban kuskusan pabanglu
ing bangke na ning Ginu. Dapot apagumasdan yu king makalako ne ing maragul a
batung takap a makasalabat king kutkutan. Inisip yu king ating kinangwa king bangke
na ning Ginung Jesus inya malagwa yung belita iti karing keyang alagad. Dapot ila man
mismu era balu nung nukarin ya miras ing bangke, pablasang e da pa lubus ayntindyan
ing kabaldugan na ning pamanyubling mebie.
Malugud ming santa, ipanalangin mi pu keka, potang dadatangan na kami ning
mitmung karalumduman, ipaganaka mu kekami ing sala na ning pamanyubling mebie.
Mananu na sanang ing sulu na ning kekaming kasalpantayanan ipawi na ing biga ning
pamikakunu at kalungkutan a papanpan karing pusu mi at kaisipan. Saupan mu kaming
lubus manalig king ing Ginung Dios ya mu kabud ing makapibalik karing mangayap a
bage para karing ikakayap da ring keyang kaluguran.
Ngeni, aduan mi pu keka king aduan mu naman sanang manibat king Ginu ing
grasyang pagnasan ming kamtan kaniting novena (________). Mananu na sanang ining
kekaming kayaduanan makaibye yang kapuryan king Dios, makasaplala karing
maldang kaladua at makapagpalaganap king debosyon keka. Amen.

3 Ibpa mi, 3 Bapu Maria, 3 Ligaya, at Pamupus a Panalangin king balang aldo

Kanam a Aldo

Sta. Maria Magdalena, tinangis kang e mu nanu inyang balamu kinwa de ring
aliwang tau ing bangke na ning kekang Maestro, at e mu balu nung nukarin de binili. Ing
katutuwan kayarap mu ne ing mismung sinubling mebie Ginu, dapot e me pa rin
akikilala pablasang makapanpan ya pa karing mata mung tatangis ing mabayat a
kalungkutan. Pepaintulut nang akilala me inyang awsan naka king kekang lagyu. Misna
ka king tula inyang akilala mu ne ing kekang Rabbouni. Ing bosis na anting Mayap a
Pastul ing tune mamaus king kekang lagyu. Alub mu namu king sarili mu ing ene
mabating king kekang panimanman.
King keyang pamanyubling mebie, mika pamanaliwa na keya at e na anti king
sadya. Ing keyang mipaligayan a katawan at kabilyan, maka-ukul na king ligaya ning
Dios Ibpa, ing ligaya anti ya kanitang bayu ya pa melalang ing meto sikluban, at bayu
ya pa mikatawan tau. Oh kaluguran ming santa, saupan mu kaming itingid mi la ding
kekaming panlalawe payinturu king banwa, a nung nukarin sidya na ning Ginu ing lugar
para kekami. Paganaka mu sana kekaming parati king metung kami mung dayuhan
king yatung iti, at ing tune ming parasan alang aliwa nune ing banwang kekayung
karinan.

4
 Ngeni, king mitmung kalausan a lub, adwan mi ing grasyang buri ming kamtan
kaniting novena (_________). Saupan mu kami sanang mabiyasang manyawad para
karing tune ming pamangailangan, at magtiwala king mitmung pakalulu na ning Dios at
king masikanan mung pamamilatan. Amen.

3 Ibpa mi, 3 Bapu Maria, 3 Ligaya, at Pamupus a Panalangin king balang aldo

Kapitung Aldo

Sta. Maria Magdalena, ikang inatasan na ning sinubling mebie Ginu ban munta
karing alagad na at ipabalu king iya mibangun yang ibat king kamatayan. Pauli na niti,
kararampatan mu ing mibansagan kang “Apostol karing Apostoles.” At karela
pematutuanan mu ing “Ikit ke ing Ginu.” Ing manakit king sinubling mebie talapanatbus
metung yang pribilehiyu a mipagkalub mu karing e kekaldan, antimo karing labing
adwa, kang Santiago, kang San Pablo at keka. Iting pamipatilip pasiknangan nala ding
menakit ban talakaran ing karelang obra anting Apostoles, talapaulat ning Ginu at saksi
king matagumpe ng pamanalakad ibat king kamatayan.
Kaluguran ming patulunan, tutu ka ping mapalad. Nu ya man mipanaral ing
Mayap a Balita, ing kekang kasalesayan manatili yang e kukupas. Ipanalangin mu kami
king Ginu ban dinan na kaming sikanan kumawat karing turu da ring Apostol, pablasang
ila mismu, pepakit da ing karelang katapatan king Ginung Jesukristo. Ipanalangin mu
kami naman pu, ban ngening kasalukuyan maging talaulat na kami naman karing dakal
a amun na ning maka-bayung panaun.
Ngeni, ipanalangin mi la ding taung ating katungkulan karing miyayaliwang dapat
apostolado (________). Mananu na sanang akatabnu mi ya naman ing mabie Ginu
busal mi. Mananu na sanang emi ya mu kabud akit karing mata mi nune lalu mi ya pang
aluguran karing pusu mi at salpantayanan king kaba ning bie mi. Amen.

3 Ibpa mi, 3 Bapu Maria, 3 Ligaya, at Pamupus a Panalangin king balang aldo

Kawalung Aldo

Sta. Maria Magdalena, bayu ya pepaitas banua, ing sinubling mebie Ginu
inatasan nala ding keyang Apostoles na munta king mabilug a yatu at ipanaral ing
Mayap a Balita karing sabla. E ka mu kabud “Apostol karing Apostol,” nune bagkus
Apostol ka naman para karing sablang lalaki at babayi, karing Judio at Hentil a
manenayang makaramdam king Mayap a Balita ning Kaligtasan. Inya pematutuan mu
nung nanu ing ikit at dimdam mu kang Jesus ning Nazareth a Talapanatbus at Anak
ning Dios. Metung ka karing mumunang diling alagad a babayi king minunang
kapulungan a masampat megobra para king ikalaganap na ning kasalpantayanan.

5
 Ing obra ning pamipasyag king Mayap a Balita manatili king balang panaun.
Kaluguran ming santa, idake mu kami naman sana king kekang lugud king Divinong
Maestro, at dakayanan mu kami naman king kekang sipagan king pamipasyag king
evangelio. Ipagkalub mu ing maging alagad na kami naman king balang metung at
metung kekami king kapamilatan na ning pamamye ming sikanan karing kapatad mi
king kasalpantayanan.
Ngeni aduan mi king Ginu iting makapasubaling kapagnasan (_______). Saupan
mu kami king kapamilatan na ning masikanan mung pamagampun. Amen.

3 Ibpa mi, 3 Bapu Maria, 3 Ligaya, at Pamupus a Panalangin king balang aldo

Kasiam a Aldo

Sta. Maria Magdalena, ing kekang tapat a lugud yang pepanatili king
pangamalapit mu king Ginung Jesus inyang panaun a manaral ya pa, at inyang panaun
a mipasakitan ya, mate ya at subli yang mie. Ngening kasalukuyan keng banwang
kekang karinan, masikan ing kekang pamamilatan para kekami king Mayupayang Dios.
Ing kekang lagyu pagmasusian mi ya ngeni keti sulip, dapot para karing aliwang e
makaintindi, manatiling makatatak karing karelang kaisipan ing e kanais-nais a
pamangilala da keka anting babaying makasalanan at iti babye matuling a kule king
kekang mayap a lagyu.
Kaluguran ming santa, saupan mu kami pung apakilala daka king makatuliran a
paralan. Saupan mu kami, ban apakit mi karing dakal a tau ing katutuan dikil keka.
Mananu na sanang dinan ming maragul a pansin ing pamipatutu na ning Banal a
Kasulatan dikil king tune mung panga-tau.
Kaniting tauli ng aldo ning kekaming pamagnovena keka, aduan mi pu iting
makapasubaling grasya a buri ming kamtan (______). Mananu na sanang ipanlualu mu
kami king Ginu at mananu na sanang iting debosyon mi keka mamunga yang dakal at
malalam. Amen.

3 Ibpa mi, 3 Bapu Maria, 3 Ligaya, at Pamupus a Panalangin king balang aldo

Pangwakas a Panalangin king Balang Aldo na ning Novena

M: Ipanalangin mu kami oh maligayang Sta. Maria Magdalena.

P: Ban ming apangaintuliran nabangnan ing pengaku na ning Ginu tamung Jesukristo.

Manalangin tamu:

6
 O Dios a Ibpa mi, pigkatiwala ne ning kekang bugtung a Anak ing Ginu ming
Jesukristo, ing masayang balita ning pamanyubli ng mebie kang Sta. Maria Magdalena.
King kapamilatan da ring panalangin at alimbawa na niting santa, mananu na sanang
ipasyag mi ya naman y Kristo ing kekaming mabie Ginu karing sablang tau, at king
misan a aldo akit mi ya king ligaya banwa, iyang mabibie at magari kambe mu at ning
Banal a Espiritu, metung mu king panga Dios manga man king alang angga. Amen.

Dalit kang Sta. Maria Magdalena

By: Jarren Pangilinan

Ika oh Magdalena alipan ning Guinu

Ikeng makasalanan ,mau king lugud mu

Refrain:

Maria Magdalena, makiramdam ka kareng panalangin mi
 Maria Magdalena malunus

ka kekeng makakutkut king kasalanan
Lalapit kami keka oh Magdalena
Pakit me ing dalan papunta king Guinu
Tayran mu ke king dalan kayabe ng Hesus
Ban lalung Tumibe ing Kasalpantayanan
Metung kang salamin na ning tune lugud
Saupan mu kaming mibalik a lub
Keka pepakit yang sinubling mebie
Mipnung tula mung belita ing mipalyari