DAY 1
QUEST 1
(Ang Pagsisikap para sa Karangalan)
Narrator : Ang kuwentong ito ay galing sa Biblia.
Mababasa ninyo ito sa 2 Hari 5.
Noong unang panahon, sa kaharian ng Israel,
may isang propeta na ang pangalan ay Eliseo.
Nakapagpapagaling siya ng mga maysakit at nakakakita
o nakaririnig ng mga bagay na nangyayari sa ibang
lugar.
Isang araw, isang grupo ng mga lalaking
nakasakay sa mga kabayo at karwahe ang dumating sa
Israel at huminto sa labas ng bahay ni Eliseo. Ang lider
ng mga kalalakihang ito ay si Naaman, isang magaling
na pinuno ng hukbo mula sa kaharian ng Siria. Si
Naaman ay maysakit na ketong. Nang malaman niyang
may propeta sa Israel na may kapangyarihang
magpagaling ng mga sakit, hiniling niya sa kanyang
hari na payagan siyang bisitahin ang propetang ito at
pinayagan naman siya ng hari. Kaya pumunta si
Naaman sa Israel kasama ang kanyang mga sundalo at
katulong, at dala ang 350 kilong pilak, 6,000 pirasong
ginto at sampung magagarang kasuotan.
Pagdating nila ng Israel, alam ni Propeta Eliseo
kung ano ang gusto ni Naaman kaya pinalabas niya ang
kanyang katulong para kausapin si Naaman. Ipinasabi
ni Eliseo kay Naaman….
Gehazi (katulong ni Eliseo) : Ang sabi po ni Propeta
Eliseo ay pumunta ka ng Ilog Jordan. Lumubog ka nang
pitong beses at mananauli sa dati ang iyong katawan.
Gagaling ang iyong ketong.
Narrator : Nainsulto si Naaman! Umalis siyang galit na
galit!
Naaman : Akala ko pa nama’y sasalubungin ako ng
propeta, tatayo sa harap ko, tatawagan ang Diyos
niyang si Yahweh, at ikukumpas kanyang mga kamay
sa tapat ng aking ketong upang ako’y gumaling. Hindi
ba’t mas malinis naman ang mga ilog ng Damasco,
tulad ng Abana at Farfar, kaysa anumang ilog sa Israel?
Hindi ba pwedeng doon na lang ako maligo para
gumaling?
Katulong ni Naaman : Ginoo, hindi ba’t gagwin ninyo
kahit mahirap pa riyan ang ipagawa sa inyo ng propeta?
Gaano pa iyang pinaghuhugas lang kayo para luminis?
Narrator : Kaya nagbago ang isip ni Naaman, Sa halip
na umuwi sa kanila, nagpunta siya sa Ilog Jordan at
lumubog doon ng pitong beses, kagaya ng sinabi sa
kanya ng propeta ng Diyos. At tulad ng sinabi ni Eliseo
nanauli sa dati ang kanyang katawan at kuminis ang
kanyang balat, tulad ng balat ng sanggol!
Naaman : Ngayo’y alam ko nang walang ibang Diyos
sa ibabaw ng lupa kundi ang Diyos ng Israel. Tanggapin
ninyo ang regalo ko sa inyo.
Eliseo : Hindi ako tatanggap ng anumang regalo,
habang nabubuhay si Yahweh, ang Panginoong aking
pinaglilingkuran.
Narrator : Pinilit siya Naaman ngunit hindi tinanggap ni
Eliseo ang mga regalo. Nang umalis na si Naaman at
ang kanyang mga kasama, sinabi ng katulong ni Eliseo
na si Gehazi sa kanyang sarili.
Gehazi : Bakit hinayaan ng amo kong makaalis si
Naaman nang walang ibinabayad? Hahabulin ko siya at
hihingan ng kahit ano.
Narrator : Sinundan nga ni Gehazi si Naaman.
Gehazi : Naaman!!
Naaman : May problem ba?
Gehazi : Wala naman po. Pinasunod lang ako ng aking
amo para sabihing may dumating na dalawang mahirap
na propeta mula sa Efraim. Kung maaari raw ay bigyan
mo ng 35 kilong pilak at dalawang damit.
Naaman : Pitumpung kilong pilak na ang kunin mo!
Gehazi : Ay huwag po! 35 kilong pilak lang po!
Naaman : Sige na kunin mo na iyan pati itong 2 damit.
Papatulungan na lang kita sa pagdadala sa dalawa kong
utusan.
Narrator : Pagdating sa burol na kinatatayuan ng bahay
ni Eliseo, kinuha ni Gehazi ang dalawang supot ng pilak
at dalawang magagarang damit at itinago ito sa loob ng
bahay. Pinabalik na niya ang mga utusan ni Naaman.
Pagkatapos bumalik siya sa kanyang amo na parang
walang nangyari.
Eliseo : Saan ka galing, Gehazi?
Gehazi : Hindi po ako umalis sagot ni Gehazi.
Eliseo : Hindi mo ba alam na kasama mo ang aking
Espiritu nang bumaba sa karwahe si Naaman para
salubungin ka? Ito ba ang panahon para tumanggap ng
mga salapi at damit, ng pambili ng ubasan at taniman
ng olibo, ng mga tupa, baka at mga alipin? Dahil sa
ginawa mo, ang ketong ni Naaman ay malilipat sa iyo at
sa iyong magiging lahi.
Narrator : Noon din ay namuti sa ketong, at siya’y
umalis…. Inakala ni Gehazi na hindi malalaman ang
pandarayang ginawa niya dahil wala naman doon si
Eliseo nang habulin niya si Naaman. Hindi niya alam na
binigyan ng Diyos si Eliseo ang kapangyarihang makita
o marinig ang mga bagay na nangyayari sa ibang lugar.
Nagsinungaling siya para pagtakpan ang kasalanan
niya, pero huli na siya. Naranasan niya ang kakila-
kilabot na parusa.