Tigsik

By: Geraldine Enriquez

Sa paglibot sa harong, dakol akong nariparo

Mga sadit na bagay, nakua an atensyon ko
Dara gayod ini kan sakong kabublayan
Kaya napunan an tirigsikan

Tigsik ko ining samuyang istaran

Dakula, halangkaw, asin sementado man
Dangan sabi kang iba garu haunted house daa
Alagad an nakaistar magagayon man na daraga

Tigsik ko man an natad na pano nin masitas

Dai ka nanggad igdi makakapitas
Ta an samuyang ina malupit pa sa batas
Parani ka pa sana may nakahanda nang pambadas

Tigsik ko an salog kaning samong sala

Alaga sa kuskos asin floor wax pa
Kundi nagkakadararinas baga an mga kaakian
Kaya lugod minsan habo ko nang linigan

Tigsik ko man ang hugasan igdi sa kusina

Ta pirming nagdadakol pag ako nakatoka na
Makangalas kay bunso ta pirang pidaso sana
Kaya palan ta winawalat sako an hugasan niya
Tigsik ko an banyo na duwa pating gayo
Kaya lang mayong takop an mga inidoro
Pero dai ka ta bakong mabata an alisngaw kainiyo
Baka ngani mahamot pa ni kaysa sa bata mo

Tigsik ko man an kwarto na samong turugan

May halakbang asin malumhok na higdaan
Kaya ngani sa pagturog nagkakasiriraman
Mala ta sa pagmata nagkaka urudtuhan

Tigsik ko man an kalunggay igdi sa libod

Ini daa binabantayan kan tawong lipod
Kaya palan dai ini inuulod
Kundi si kapitbahay an nakapudpod