Tanong: Ano ang mga naiaambag ng ekspresyong lokal sa pag-unlad natin sa larangan ng pakikipagtalastasan bilang mga Pilipino?
Sagot:
Ang komunikasyon o pakikipagtalastasan ay isang proseso ng pagpapahayag, pakikipag-
ugnayan, at pagbibigay o pagpapalitan ng impormasyon. Wikang Filipino ang ating pambansang wika na siyang nagbibigay sa atin ng daan upang lahat tayo ay magkaintindihan. Sa Pilipinas, ang bawat rehiyon o lugar ay may kanya-kanyang mga wikain o diyalekto na siyang nakasanayan at nagsisilbing pagkakakilanlan. Mayroon tayong tinatawag na ekspresyong lokal na siyang likas at ordinaryong wika na naiiba sa anyo at gamit sa lohika at iba pang uri ng pilosopiya. Ang ekspresyong lokal ay mga parirala o pangungusap na ginagamit ng mga tao sa pagpapahayag ng damdamin o pakikipag usap na ang kahulugan ay hindi ang literal na kahulugan ng bawat salita at hindi ito maiintindihan ng mga ibang taong hindi bihasa sa lenggwahe. Sa pagkakaroon ng ekspresyong lokal, ang Wikang Filipino ay naging daynamiko. Ang wika natin ay buhay at aktibo na siyang nakakasabay sa pagbabago ng panahon. Sa patuloy na pagdagdag natin ng mga salita o pagbibigay ng bagong kahulugan nito, lalong yamayabong ang wikang Filipino. Yumayaman rin ang ating bokabularyo sa patuloy na pagtuklas ng iba pang mga salita. Ang pagkakaroon ng mga bagong bokabularyo ay nakatutulong para sa bawat tao o grupo ng tao na piliin ang nais nilang gamiting salita. At dahil sa mga bagong ekspresyong lokal,lalong nagaganap ang modernisasyon ng Wikang Filipino.