SINESOSYEDAD/PELIKULANG PANLIPUNAN

FILSOS 1115

PANUNURING PAMPELKULA

GAMIT ANG IBA’T IBANG TEORYANG PAMPANITIKAN

PAGSUSURI SA PELIKULANG

DIE BEAUTIFUL

ni

RONNEL P. MALONG

BSCE 3-1

JACKSON A. PARCHAMENTO

GURO
I. PANIMULA

Hindi maitatangging nabahiran na ng Liberalismo ang kasalukuyang panahon.

Marami nang bagay ang hayagang naipapakita sa lipunan at marami na ring paksang
lantaran nang napag-uusapan. Ilan sa mga ito ay ang hayagang pagladladlad ng mga
taong nasa ikatlong kasarian kasaba’y ang mga mahahalay na salitang kanilang
binibitawan. Gayunpaman, bagama’t nagbago ang antas ng kanilang kumpyansa at
kalayaang ipahayag ang sarili, hindi ganon kaganda ang naging pananaw ng lipunan sa
liberalismong ito. Kabilang sa mga gawi na hindi nagugustuhan ng karamihan ay ang
pagiging garapal ng ilan sa kanila, pagbibitaw ng mga malalaswang pananalita, lantarang
pagsagot sa tawag ng laman, inaakalang maling uri ng relasyon at kagaslawan ng
kanilang mga kilos. Sa kabila nito, hindi nito sinasalamin ang lahat ng kabilang sa
ganitong kasarian at lalong-lalong hindi ito maaaring pagbasehan ng kanilang buong
pagkatao. Marahil na ang pagpapakita ng katotohanang ito ang naging inspirasyon ni Jun
Robles Lana upang buuin ang isang pelikula na sumasalamin sa kapighatian, kabiguan,
pagkakamali, gawi, kaligayahan at tunay na pagkatao ng mga bakla na karaniwang hindi
nalalaman ng mga taong humuhusga sa kanila. Ang pelikulang ‘DIE BEAUTIFUL” ay
mula sa produksyon ng The Idea First Company at Octobertrain Films na naging opisyal
na kalahok sa 2016 Metro Manila Film Festival. Sinasabing isa ang pelikulang ito sa
nagkamit ng tunay na kalayaan na ipahayag ang pang-araw araw na buhay na
nararanasan ng isang bakla mula kanyang pagkabata hanggang kanyang kamatayan.
Ilan sa mga pangunahing aktor at aktres sa pelikula ay ang naggagalingang sina Paolo
Ballesteros (Trisha), Christian Bables (Barbs), Joel Torre (Father of Trisha), Gladys
Reyes (Beth), Adrian Alandy (Jesse), Albie Casiño (Migs), Inah de Belen (Shirley Mae),
IC Mendoza (Paola), Cedrick Juan (Erika), Lou Veloso (Flora), Mimi Juareza (Mother
Celine), Iza Calzado (Iza Calzado) at Eugene Domingo (Mau Mau Zaldriaga).

II. BUOD NG PELIKULA

Nagsimula ang kwento sa burol ng pangunahing tauhan na si Trisha Echevarria

na isang transgender woman na hindi tanggap ng kanyang ama. Agad na mapapansin
ang kakaibang ayos nito na tila hindi pangkaraniwan para sa isang burol. Kasunod nito
ay ang pagdating ng kanyang anak-anakan na si Shirlie Mae na namatayan ng ina sa
ikalawang pagkakataon. Doon bilglang bumalik ang mga alala sa buhay ni Trishia simula
nang ampunin nya ang kanyang anak-anakan na di kalauna’y inilahok nya sa iba’t ibang
beauty contests gaya ng kanyang hanap buhay. Naging payak subalit masaya ang buhay
ng mag-ina kapiling ang matalik na kaibigan ni Trisha na si Barbs. Gayunpaman, sa
paglaki ni Shirlie Mae ay tila lumayo ang loob nito kay Trishia kasabay ang pagtutol sa
pangarap ng inang siya (Shirlie Mae) ay maging beauty queen. Muli nanamang nagbalik
ang kwento sa higit na malayong nakaraan noong mga panahong nag aaral pa lamang
si Trishia sa piling ng kanyang pamilya. Dito naipakita ang lubusang hindi pagtanggap ng
kanyang ama sa kanya na humantong sa pagpapalayas sa kanya sa kanilang bahay.
Doon na nagsimulang makipagsapalaran sa reyalidad si Trisha kapiling ang mapagmahal
niyang kaibigan na si Barbs na tunay namang hindi sya iniwan sa kahit na ano mang
laban. Kabilang sa mga naging karanasan nya ay ang ilang ulit na pagkatalo sa
paligsahan, ang madalas na pagpapakatanga at pagkabigo sa pag-ibig, ang karanasan
nya bilang pagiging ina, at mga tagumpay at karangalan na kanyang nakamit sa buhay.
Isa sa pinakamalaking karangalan na kanyang natamo ay ang pagiging Miss Gay
Philippines na kung saa’y kasabay ng kanyang pagkapanalo ay ang pagkawala ng
kanyang buhay. Gayunpaman, tila naging mailap parin ang loob ng kanyang ama sa
kanya sapagkat maging sa kanyang pagkamatay ay hindi nito natanggap ang kanyang
pagkatao. Sa kabila nito, napawi naman iyon ng labis na pag-aasikaso ni Barbs sa
kanyang kaibigan na sa katunayan ay araw-araw na pinapalitan at inaayusan si Trisha
bilang pagtupad sa huling kahilingan ng kanyang kaibigan. Natapos ang pelikula sa isang
nakabibighaning ayos at makadamdaming mensahe ni Barbs kay Trisha na nagbigay aral
at nagpakilala sa kagandahan ng kanyang anyo at pagkatao na naidala nya hanggang
sa kanyang kamatayan.

III. MGA TEORYANG PAMPANITIKAN NA MAKIKITA SA PELIKULA

• Trisha Echevarria
a. Eksena/Sitwasyon: Pagdedesisyon nyang lumayas sa bahay, pagsuway
nya sa kanyang ama na huwag sumali sa beauty pageant, pagdedesisyong
ampunin si Shirlie Mae at ang pagkikipagrelasyon nya sa iba’t ibang lalaki
b. Running time: 00:00 – 1:55:39
 c. Teoryang Ginamit: Eksistensyalismo
d. Pagtalakay/Paliwanag: Sa mga eksenang ito, iisa ang nais ipahiwatig ng
may- akda ukol sa pangunahing tauhan ng pelikula. Ito ay ang kakayahan
niyang magdesisyon para sa kanyang sarili sa kabila ng mga maaaring
sabihin o isipin ng ibang tao. Ipinapakita rito ang kanyang kalayaang
patakbuhin ang sariling buhay kabilang na ang pagsasakatuparan ng
kanyang mga personal na kagustuhan ng walang pag-aalinlangan. Sa
kabila nito, sa kabuuan ng kwento ay makikita ang kanyang paninindigan
at pagtupad sa responsibilidad na kaakibat ng kanyang mga aksyon. Sa
pangkalahatan, ito ay nauugnay sa Teoryang Eksistensyalismo sapagkat
ipinapahayag ng pelikula na “ang pag-iral ay laging partikukar at indibidwal,
nakatuon sa mga pagsubok ng buhay mismo o ng pagiging nilalalang,
maging ang patuloy na pagsusuri na mayroong iba’t ibang posibilidad na
patunay na ang buhay ng tao ay itinakda ng kaniyang mga desisyon”.

• Tatay ni Trisha Echevarria

a. Eksena/Sitwasyon: Pagtatakwil kay Patrick (Trisha) bilang anak dahil sa
pagiging bakla nito, pagbabawal kay Patrick na sumali sa mga beauty
contests dahil sa kahihiyang isinudulot nito sa kanilang pamilya,
pagpapalayas kay Patrick dahil sa mga pinaggagagawa nito at hindi
pagtanggap sa katauhan ng kanyang anak magpahanggang sa kamatayan
nito
b. Running time: 00:00 – 1:55:39
c. Teoryang Ginamit: Realismo
d. Pagtalakay/Paliwanag: Ang kabuuan ng kwento ay malinaw na nakatuon
sa buhay ni Trisha bilang taong maihahanay sa ikatlong kasarian,
gayunpaman hindi ito naging madamot sa pagtalakay sa mga mga isyung
panlipunan gaya na lamang ng diskriminasyon at mababang pagtingin ng
lipunan sa mga bakla. Sa kadahilanang ito, maiuugnay ang mga nailahad
na mga eksena sa Teoryang Realismo sapagkat pinilit nitong takasan ang
mga mabababaw na paksa sa halip ay gumamit ng mga makatotohanan at
 liberal na pananalita upang higit na maging makatotohanan ang pagtalakay
saisyung panlipunan.
• Barbs
a. Eksena/Sitwasyon: Pagtanggap nya kay Trisha nang sya ay palayasin ng
kanyang ama, pagiging binabae ni Barbs, pagsuporta nya kay Trisha sa
lahat ng ginagawa nito at pag tupad nya sa huling kahilingan ng kanyang
kaibigan bago ito mamatay
b. Running time: 00:00 – 1:55:39
c. Teoryang Ginamit: Queer
d. Pagtalakay/Paliwanag: Malaki ang gampanin ni Barbs sa kabuang daloy
ng kwento, sya ay nagpakita hindi lamang nang pagiging binabae bagkus
ay inihayag nya sa kanyang mga kilos ang matatag na relasyon ng mga
taong nasa ikatlong kasarian. Dito niya inilarawan ang isa sa mga
pinakamagandang katangian ng mga taong katulad nila. Ito ang siyang
naging dahilan kung bakit nauugnay ang Teoryang Queer sa kanyang
katauhan.

IV. PANGKALAHATANG TEORYA

• QUEER
Mailalapat sa buong istorya ang Teoryang Queer dahil sa mga sumusunod na mga
eksena:
1. Pagsali ni Trisha sa iba’t ibang beauty pageant
2. Pakikipagrelasyon ni Trisha sa kapwa lalaki
3. Mga eksenang sekswal sa pagitan ng mga lalaki
4. Pagiging ina ni Trisha kahit wala syang matres
5. Uri ng pananamit ni Barbs at Trisha sa kanilang pang araw-araw na buhay sa
kabila ng kanilang tunay na kasarian

Malinaw na nakatuon ang Teoryang Queer sa mga uri ng panitikan na eksklusibo

para sa mga taong nasa ikatlong kasarian. Ang mga eksenang nabanggit ay ilan sa mga
patunay na tinataglay ng pelikulang ito ang uri ng pagkataong hindi tanggap ng
karamihan. Gayunpaman, mapapansin sa kabuuan ng istorya ang naghuhumiyaw na
pag-asam ng mga taong nasa ganitong kalagayan sa isang karapat-dapat, makatarungan
at pantay na pagtingin sa kanila bilang taong mayroong kalayaan. Bukod pa rito, makikita
sa eksenang ito ang iba’t ibang kahali-halinang katangian ng mga bakla na karaniwang
hindi na pinapansin sa lipunan bunsod ng agarang panghuhusga.