растителниот и животинскиот свет и сл., во Република Северна Македонија се формирале различни почви. Најзастапени се: алувијални, делувијални, смолници, црвеници, кафеави, песокливо-глинени, солени почви и други. Алувијални почви се формираат со таложење на ситен речен нанос околу речните корита во рамничарските простори. Богати се со хумус, хранливи материи и се мошне плодни. Најмногу ги има покрај поголемите реки: Вардар, Пчиња, Крива Река, Брегалница.. Погодни се за одгледување на разни земјоделски култури. Во Република Северна Македонија се најраспространети во рамниците на: Скопската, Гевгелиско-валандовската, Кочанската, Пелагониската, Струмичко-радовишката, Охридско-струшката и Преспанската Котлина. Алувијални почви ги има и во Кумановската Котлина. Делувијалните почви се формираат кај контактот на рамниците и планинските страни, како акумулативни ерозивни наноси. Настануваат под дејство на ерозија. Поради слабата застапеност на хумус, тие се помалку плодни. Погодни се за овоштарство и за лозови насади. Најзастапени се по рамките на котлините: Полог, Пелагонија, Преспа, Кичевската, Кочанската, Струмичко- радовишката, Гевгелиско-валандовската, Охридско-струшката и други котлини Смолници се почви кои имаат езерско потекло и затоа располагаат со големо количество глина и се мошне плодни. Таа е богата со глина и е леплива. При поголема влажност се лепливи. Кога времето е суво во летнитот период таа пука. Погодни се за одгледување житни и индустриски култури, а со соодветно наводнување и за градинарски и за овошни култури. Најзастапени се во Овче Поле, во Скопската и во Кумановската Котлина, а нешто помалку во Пелагонија, во Тиквеш, во Славишко Поле и на други места. Црвеници се почви кои се формираат во простори со присуство на варовник. Се сметаат за средно плодни почви. Погодни се за одгледување на тутун, винова лоза и житни растенија. Најраспространети се во: Пелагонија, Полог, Скопската Котлина,Тиквеш, Преспа и други места. Кафеавите почви се формираат под влијание на шумската и на тревната вегетација. Во нив влегуваат гањачи, подзол и кисели кафеави почви. За одгледување на култивирани растенија не се доволно плодни. Распространети се меѓу 700 и 2000 м надморска височина и тоа во Средно Повардарје, во Пелагониската Котлина, во Кумановската Котлина, во Славишкото Поле и на Скопска Црна Гора, Шар Планина, Осоговските Планини, Малешевските Планини, Селечка Планина итн. Солените почви се почви кои настанале во предели каде што има подземни води и во места на кои има повисока температура. Се формираат со евапоризација на влажноста во земјата во сушни предели. Сиромашни се со хумус. Најзастапени се во Овче Поле.