KAPRITSOSA

“Nanay, gusto ko po iyong manikang lumalakad. Iyong pong pag hinawakan

sa kamay at bahagyang hinatak ay humahakbang ang mga paa,” ang sabi ng
sampung taong gulang na si Nita.

“Iyon pala ang ibig mo’y bakit hindi iyon ang ipinabili mo noong isang buwan?
Sabo mo noo’y basta pumipikit at dumidilat lamng ay magugustuhan mo na,” ang
sagot ng ama ni Nita.

“Hindi ko po alam na may manika palang lumalakad,” ang pangangatwiran at

masuyong pakiusap ni Nita sa ama naman bumaling.

“ikaw na nga ang bahala! Ngunit sa Sabado tayo bibili dahil sa walang klase,”
ang patapos na yon ng ama.

Iyan si Nita-ang bugtong at kapritsosang anak nina Ginoo at Ginang Flores.

Walang ginustong hindi nakamit, palibhasa’y maykaya sa buhay ang mga magulang.
Tutol si Ginoong Flores sa malabis na pasunod sa anak, ngunit ang puso man
niyang lalaki ay napapasunod din kapag pinaglambingan na siya ng kaisa-isang
anak.

May magandang paraan si Nita upang makamit ang bawat hingin sa

magulang. Magaling siyang mangatwiran. Susundan pa niya ng mga paglalambing
na may pahimas-himas, pahalik-halik at kung minsa’y patampo-tampo. Kung
tutuusing mabuti ay bakit nga ba hindi siya dapat pagbigyan gayong mabait,
magalang at marunong naman siya.

Sa madaling sabi, lumaki sa layaw ang batang si Nita. Kapritsosa ngunit

maganda at kahali-halina.

Natutong umibig si Nita sa isang kamag-aral na may tikas at dunong ngunit sa

kalagayan sa buhay ay langit at lupa ang agwat nila. Katulad ng maaasahan,
nahikayat niyang sumang-ayon ang kanyang mga magulang at sila’y nakasal.

Isang magarang bahay ang handog sa kanila ng mga magulang ni Nita.

Anong ligaya nila!

Lumipas ang isang buwan, dalawang buwan, tatlo, apat at lima. Hindi pa
sumasapit ang isang taon ay waring nagsasawa na si Nita sa buhay may-asawa.
Ibig na niyang umuwi sa kanyang mga magulang. Wala nman siyang sapat na
dahilan upang ayawan ang mabait at masuyong kabiyak. Umiiral lang ang pagiging
kapritsosa niya.

“ Gusto ko sanang umuwi ka na sa inyo at ako man ay uuwi na sa amin,” ang

isang araw ay lakas-loob niyang sabi sa kabiyak. “Wala tayong pinagkakagalitan.
Kung ibig mo’y makakakuha ka ng anumang bagay sa tahanang ito na gustong-
gusto mo at makaliligaya sa iyo.”
 “Ikaw ang masusunod,” ang sang-ayon ng lalaki. “Ngunit ibig kong isulat mo
at lagdaan ang sinabi mong iyon upang makuha ko sa tahanang ito ang isang
gustong-gusto ko.”

Isinulat ni Nita ang kasunduan at kanyang nilagdaan. Nasaktan ang kanyang

damdamin sapagkat hindi tumutol ang kabiyak sa kanilang paghihiwalay. Diyatat
magaan sa kanya ang paghihiwalay na ito?

Magdamag na walang kibo si Nita sapagkat may hinanakit sa asawa.

Hatinggabi na nang siya’y makatulog sa matinding pagdaramdam.

Nang magising si Nita kinabukasan, nasa isang bahay na pawid siya sa

isang lalawigan. Namataan niya ang asawa na nagsusuklay ng buhok sa may
paanan niya.

“Bakit ako naririto?” ang tanong niya sabay balikwas sa papag na kinahihigan.

“Dinala kita rito,” sagot ng asawa.

“Bakit nga?”

“Hindi ba’t sinabi mong madadala ko ang anumang pinakagusto ko sa ating

tahanan na makapagpapaligaya sa akin? Ikaw lamang ang gusto ko, kaya ikaw ang
dinala ko.Lumagda ka sa ganyang kasunduan,” ang sagot ng lalaki.

Napatakbo si Nita sa asawa at niyakap. “Akala ko’y matitiis mong

magkahiwalay tayo,”ang kanyang wikang humihikbi.

Mga Tanong:

1. Ano ang kasingkahulugan ng salitang kapritsosa?

A. Malambing at makatwiran
B. Nasusunod anuman ang naisin
C. Maramdamin at matampuhin
D. May kaya na nabibili ang lahat na gusto

2. Alin sa hanay ng mga sagot ang kahulugan ng bugtong na anak?

A. bunso
B. panganay
C. kaisa-isa
D. mahal na mahal

3. Bakit hindi manikang lumalakad ang unang ipinabili ni Nita?

A. Napakamahal ng manikang lumalakad
B. Walang pang manikang lumalakad noon.
C. Natatakot siya sa manikang lumalakad
D. Hindi niya alam na mayroon ng ganitong klase.
4. Ano ang kalagayan ng kabuhayan nina Nita?
A. hirap na hirap
B. nakasasapat lamang
C. nakaririwasa sa buhay
D. isang kahig, isang tuka

5. Bakit mahal na mahal ng mag-asawa si Nita?

A. Lagi siyang may sakit .
B. Siya ang tanging anak ng mga ito.
C. Mababait silang mga magulang.
D. Suwerte sa kanila ang anak na si Nita.

6. Paano ang paraan ni Nita upang makamit ang kanyang mga kahilingan?
A. nag-iiiyak
B. naglalayas
C. nagbabantang magpapakamatay
D. nangangatwiran at naglalambing

7. Anong uri ng lalaki ang inibig ni Nita?

A. mayaman at magalang ngunit pangit
B. mabait at marunong subalit dukha
C. masungit at matapang ngunit mayaman
D. mayabang at bastos ngunit magandang lalaki

8. Ano ang iniregalo ng mga magulang ni Nita nang sila’y ikasal?

A. kotse
B. bukid na masasaka
C. magandang bahay
D. sapat na perang mapupuhunan

9. Bakit ibig umuwi ni Nita sa kanyang mga magulang?

A. Nagkasakit si Nita.
B. Nagkagalit silang mag-asawa.
C. Nagsasawa na siya sa buhay may asawa.
D. Pinauuwi na siya ng kanyang mga magulang.

10. Bakit nagdaramdam si Nita sa asawa?

A. Hindi na siya mahal nito.
B. Hindi ito magiliw sa kanya.
C. Hindi nasusunod ang kanyang gusto.
D. Hindi ito tumutol sa kanilang paghihiwalay.

11. Ano ang kasunduang nilagdaan ni Nita?

A. Maghihiwalay sila at hindi na muling magsasama pa.
B. Malaya ang bawat isa na muling umibig sa iba.
C. Maghihiwalay sila sa loob ng isang taon lamang.
D. Maaaring kumuha ang asawa ng anumang gusto niyang dalhin.
12. Ano ang pinakagusto ng asawa ni Nita na kanyang dinala?
A. mamahaling alahas
B. libreta sa bangko
C. mismong si Nita
D. mahahalagang gamit

13. Alin sa sumusunod ang nagsasaad ng positibong pahayag?

A. Makukuha mo sa tahanang ito ang anumang gusto mo.
B. Mag-uumaga na akong nakatulog sa matinding pagdaramdam.
C. Ikaw ang gusto ko, kaya ikaw ang dinala ko sa pag-alis.
D. Tila magaang pa sa kanya na kami’y magkahiwalay.

14. Ano ang napatunayan ng lalaki nang dalhin niya sa pag-alis ang asawa?
A. Tunay na mahal niya ang asawa.
B. Kapwa nila mahal ang isa’t isa.
C. Nagtatampo lamang ang asawa.
D. May paninindigan siya sa buhay.

15. Ano ang karaniwan nating madarama sa huling ginawa ng lalaki sa asawa?
A. pagkatuwa
B. paghanga
C.pagtataka
D.pag-ibig

16. Ano ang damdaming ipinahiwatig ni Nita nang siya’y yumapos at umiyak sa
huling ginawa ng asawa?
A. Pagkatuwa at siya pa rin ang nasunod sa mga pangyayari.
B. Pagmamahal sa asawa at di pala niya kayang sila’y magkahiwalay.
C. Pagdaramdam dahil hindi ito tumutol sa kanilang kasunduan.
D. Pagtatampo sapagkat inisip niyang kaya nitong makipaghiwlay

17. Ano ang ginagawa ng magulang para sa anak maging sa kasalukuyan?

A. ibinibigay ang lahat
B. mahigpit na dinidisiplina
C. pinaghahandaan ang kinabukasan
D. hinayaang maging malaya kahit bata

18. Alin sa sumusunod ang mahalagang maghari sa mag-asawa upang hindi

magkahiwalay?
A. pagkakaroon ng mga anak
B. pag-unawa at pagmamahal
C. pera at maayos na trabaho
D. labis na pagtitiwala sa bawat isa

19. Ano ang tiyak na kaisipan na ipinahahatid ng kuwento?

A. Mahiwaga ang pag-ibig
B. Mahirap man ay wagas magmahal
C. Napagbabago ng pag-ibig ang lahat
D. Makapangyarihan ang pag-ibig
20. Alin ang mahihinuhang wakas ng binasang kuwento?
A. Hindi na pagbibigyan ng lalaki ang kapritso ni Nita .
B. Higit na magiging kapritsosa si Nita dahil alam niyang mahal siya ng asawa
C. Magsasama nang masaya ang mag-asawa na puno ng pag-uunawaan at
pagmamahalan.
D. Ganap na makikilala nila ang maganda at di –maganda nilang pag-uugali.

SUSING SAGOT SA PAGBASA –FILIPINO 8

1. B 11. D

2. C 12. C

3. D 13. C

4. C 14. B

5. B 15. B

6. D 16. B

7. B 17. C

8. C 18. B

9. C 19. C

10. D 20. C