Sa isang masaganang bayan, kilala ang isang pamilyang Tusbelyas dahil sa
kanilang taglay na yaman. Mahilig ang pamilyang Tusbelyas sa pangongolekta at pag- aalaga ng mga halaman lalo na ang ina ni Kakte na si Aling Rosa. Si Kakte ay isang spoiled at ayaw nito sa mga halamang inaalaga ng kaniyang ina. Lagi nitong kinukunsinti ng kaniyang tatay ang mga maling gawain nito. Sa paaralan ay maraming gusto makipagkaibigan kay Kakte dahil sa yaman taglay ng pamilya nito. Dahil sa paghanga ng ibang estudyante kay Kakte lumaki ang kaniyang ulo. Mataas ang tingin nniya sa kaniyang sarili at mababa ang tingin nito sa ibang tao. Nasasangkot siya sa mga gulo sa labas ng paaralan dahil sa impluwensiya ng kaniyang mga kaibigan. Nang nalaman ng nanay ni Kakte ang kaniyang ginagawang gulo, nadismaya ito sa ginagawang pag-uugali ni Kakte. Nagsisi ito sa paraan nangpagpalaki nito kay Kakte. Sinisi nito ang kaniyang sarili sa pag-uugaling mayroon si Kakte ngayon. Hinintay ni Aling Rosa ang pag-uwi ni Kakte galing sa paaralan upang makausap niya ito. Pagdating ni Kakte ay naabutan niya ang kaniyang ina na naghihintay sa loob ng kanilang mansiyon. Pinagsabihan siya ng kaniyang ina na siyang ikinagalit ni Kakte. Si Kakte ay galit na galit at napapalibutan ng tinik sa puso. Lumabas si Kakte sa kanilang mansiyon at tumungo sa kanilang hardin upang sirain lahat ng mga halamang inaalagaan ng kaniyang ina. Habang sinisira ni Kakte ang mga halaman ng kaniyang ina, may biglang lumitaw na isang magandang diwata galing sa isang paso. Ito’y galit na galit na nakatitig kay Kakte at tinanong ng diwata si Kakte kung bakit nito sinisira ang kaniyang mga halaman. Nagulat si Kakte sa diwata ngunit binalewala lamang ni Kakte ito at ipinagpatuloy nito ang pagsisira nang mga halaman. Hindi nagdalawang isip ang diwata na parusahan si Kakte. Napahinto at napapikit si Kakte sa liwanag na nanggagaling sa diwata. Pagmulat niya ng kaniyang mga mata ay nagtaka ito kung bakit hindi niya magalaw ang kaniyang mga katawan. Nag-alala si Aling Rosa sapagkat hindi niya nakikita si Kakte oras nang nakalipas, kaya hinanap niya ito nang hinanap sa buong mansiyon hanggang siya ay napadpad sa kanilang hardin, ngunit laking gulat nito na may sumira sa kaniyang mga halaman. May napansin si Aling Rosa at naagaw nito ang kanyang pansin. Ito ay isang misteryosong halaman na kulay berde at napapalibutan ito ng mga tinik. Naalala niya kaagad si Kakte, kaya’t ipinangalan niya itong Kaktus.