Professional Documents
Culture Documents
MANILA
(Kapag natitipon na ang sambayanan, at nakahanda na rin ang pari at ang iba pang
tagapaglingkod, tatayo ang lahat at pupunta ang pari sa gawi ng tabernakulo at kukunin
ang Banal na Sakramento. Sa pagbukas ng pinto ng tabernakulo, luluhod ang lahat at
sisimulan ang pag-awit ng O Salutaris Hostia. Matapos itanghal ang Banal na Sakramento sa
dambana, luluhod rin ang pari at iinsensuhan ito.)
O SALUTARIS HOSTIA
O salutaris Hostia,
Quae caeli pandis ostium:
Bella premunt hostilia,
Da robur, fer auxilium.
PAMBUNGAD NA PANALANGIN
O Diyos Ama, ibinigay mong huwaran sa amin ang isang babaeng bukod tanging
ipinaglihing alang kasalanan na si Birheng Maria, na hinirang mong maging Ina ng iyong
Bugtong na Anak na si Jesus, at tanging Esposa ng Espiritu Santo. Loobin mong tularan
namin si Maria sa kanyang pagsunod sa Iyo nang buong puso, pagmamahal sa iyo bilang
Ama, pagmamahal kay Jesus bilang Anak, at sa Espiritu Santo bilang Esposo nang habang
buhay. Loobin mong matulad kami sa kanya na namuhay sa mundo ayon sa Iyong
kalooban at hindi ayon sa kanyang nais lamang. Matamo nawa namin ang banal na
pamumuhay upang makamtan namin ang ligaya at gantimpalang walang hanggan sa
langit, sa piling ng Banal na Santatlo at Banal na Mag-anak.
O Maria, lubhang kaibig-ibig kong Reyna at Ina, na ang katamis-tamisang ngalan na aming
sinasambit nang may pagpipitagan ay nakaliligaya sa langit, nakaaaliw sa lupa at
nagpapasindak sa impyerno, dahil ang ngalang iyan ay bigay sa iyo ng Diyos. Buong puso
naming isinasamo na bahaginan mo ang lahat ng iyong mga tinatamasang biyaya: na qng
mga maysakit ay iyong pagalingin, ang mga nalulumbay ay iyong aliwin at ang mga
makasalanan ay iyong patawarin. Ikaw na Anghel na magbibigay ng kaligayahan, at
kaluwalhatian sa Santisima Trinidad, na kinalalagdaan ng Limang titik ng iyong pangalan.
Kawangis ng ngalan mo ay ang katamis-tamisang ngalan ni Jesus.
Iparating mo sa iyong Mahal na Anak si Jesus na aming tagapagligtas ang aming mga
kahilingan at bigyang tugon ang mga ito ayon sa aming ikabubuti. Sapagkat ang iyong
maka-inang habag ay kawangis ng pinagtipun-tipong mga gamot na aking magagamit sa
aking mga pangangailangan. Kung uusalin ko at isasapusong lagi, uulitin ko sa tuwina itong
matamis at mahalagang wika...
Namumuno: Magsitayo ang lahat upang making at magbigay galang sa mabuting balita
-Lucas 1:26-38
Noong panahong iyon, ang anghel Gabriel ay sinugo ng Diyos sa Nazaret, Galilea, sa isang
dalaga na ang pangala’y Maria. Siya’y nakatakdang ikasal kay Jose, isang lalaki buhat sa
lipi ni Haring David. Paglapit ng anghel sa kinaroroonan ng dalaga, binati niya ito. “Matuwa
ka! Ikaw ay kalugud-lugod sa Diyos,” wika niya. “Sumasaiyo ang Panginoon!”
Nagulumihanan si Maria sa gayong pangungusap, at inisip niyang mabuti kung ano ang
kahulugan niyon. Kaya’t sinabi sa kanya ng anghel, “Huwag kang matakot, Maria, sapagkat
kinalulugdan ka ng Diyos. Makinig ka! Ikaw ay maglilihi at manganganak ng isang lalaki, at
siya’y tatawagin mong Hesus. Magiging dakila siya, at tatawaging Anak ng Kataas-taasan.
Ibibigay sa kanya ng Panginoong Diyos ang trono ng kanyang amang si David. Maghahari
siya sa angkan ni Jacob magpakailanman, at ang kanyang paghahari ay walang
hanggan.”
“Paanong mangyayari ito, gayong ako’y dalaga?” tanong ni Maria. Sumagot ang anghel,
“Bababa sa iyo ang Espiritu Santo, at lililiman ka ng kapangyarihan ng Kataas-taasan.
Kaya’t banal ang ipanganganak mo at tatawaging Anak ng Diyos. Natatandaan mo ang
iyong kamag-anak na si Elisabet? Alam ng lahat na siya’y baog, ngunit naglihi siya sa kabila
ng kanyang katandaan. At ngayo’y ikaanim na buwan na ng kanyang pagdadalantao –
sapagkat walang hindi mapangyayari ang Diyos.”
Sumagot si Maria, “Ako’y alipin ng Panginoon. Mangyari sa akin ang iyong sinabi.” At nilisan
siya ng anghel
-Lucas 1:39-45
-Lucas 1:46-56
At sinabi ni Maria,
“Ang puso ko’y nagpupuri sa Panginoon, at nagagalak ang aking espiritu dahil sa Diyos na
aking Tagapagligtas. Sapagkat nilingap niya ang kanyang abang alipin! At mula ngayon,
ako’y tatawaging mapalad ng lahat ng salinlahi, dahil sa mga dakilang bagay na ginawa
sa akin ng Makapangyarihan — Banal ang kanyang pangalan!
Kinahahabagan niya ang mga may takot sa kanya, sa lahat ng sali’t saling lahi. Ipinakita
niya ang lakas ng kanyang mga bisig, pinangalat niya ang mga palalo ang isipan.
Ibinagsak niya ang mga hari mula sa kanilang trono, At itinaas ang mga nasa abang
kalagayan. Binusog niya ng mabubuting bagay ang mga nagugutom, at pinalayas niyang
wala ni anuman ang mayayaman. Tinulungan niya ang kanyang bayang Israel, bilang
pagtupad sa pangako niya sa ating mga magulang, kay Abraham at sa kanyang lahi,
magpakailanman!”
Tumira si Maria kina Elisabet nang may tatlong buwan, at saka umuwi.
-Lucas 8:19-21
Noong panahong iyon, dumating ang ina at mga kapatid ni Hesus, ngunit hindi sila
makalapit dahil sa dami ng tao. May nagsabi sa kanya, “Nasa labas po ang inyong ina at
mga kapatid; ibig nilang makipagkita sa inyo.” Ngunit sinabi ni Hesus, “Ang mga nakikinig ng
salita ng Diyos at tumutupad nito ang siya kong ina at mga kapatid.”
-Lucas 11:27-28
Noong panahong iyon, samantalang nagsasalita si Hesus sa mga tao, may isang babaing
sumigaw mula sa karamihan at nagsabi sa kanya, “Mapalad ang babaing nagdala sa inyo
sa kanyang sinapupunan at nagpasuso sa inyo!” Ngunit sumagot siya, “Higit na mapalad
ang mga nakikinig sa salita ng Diyos at tumutupad nito!”
Napansin ni Hesus na ang pinipili ng mga inanyayahan ay ang mga upuang nakalaan sa
mga piling panauhin. Kaya’t sinabi niya ang talinghagang ito: “Kapag inanyayahan ka
ninuman sa isang kasalan, huwag mong pipiliin ang tanging upuan. Baka may
inanyayahang lalong tanyag kaysa iyo. At lalapit ang nag-anyaya sa inyong dalawa at
sasabihin sa iyo, ‘Maaari bang ibigay ninyo ang upuang iyan sa taong ito?’ Sa gayo’y
mapapahiya ka at doon malalagay sa pinakaabang upuan. Ang mabuti, kapag
naanyayahan ka, doon ka maupo sa pinakaabang upuan, sapagkat paglapit ng nag-
anyaya sa iyo ay kanyang sasabihin, ‘Kaibigan, dini ka sa kabisera.’ Sa gayun, nabigyan ka
ng malaking karangalan sa harapan ng mga panauhin. Sapagkat ang nagpapakataas ay
ibababa, at ang nagpapakababa ay itataas.”
-Mateo 6:19-21
Noong panahong iyon, sinabi ni Jesus sa mga tao: “Huwag kayong mag-impok ng mga
kayamanan dito sa lupa; dito'y may naninirang insekto at kalawang, at may nakakapasok
na magnanakaw. Sa halip, mag-impok kayo ng kayamanan sa langit; doo'y walang
naninirang insekto at kalawang, at walang nakakapasok na magnanakaw. Sapagkat kung
saan naroroon ang iyong kayamanan, naroroon din ang iyong puso.”
-Juan 2:1-11
Noong panahong iyon, may kasalan sa Cana, Galilea, at naroon ang ina ni Hesus. Si Hesus
at ang kanyang mga alagad ay naroon din. Kinapos ng alak kaya’t sinabi ng ina ni Hesus sa
kanya, “Naubusan sila ng alak.” Sinabi ni Hesus, “Huwag ninyo akong pangunahan, Ginang!
Hindi pa ito ang panahon ko.” Sinabi ng kanyang ina sa mga naglilingkod, “Gawin ninyo
ang anumang sabihin niya sa inyo.”
Doo’y may anim na tapayan, ang bawat isa’y naglalaman ng dalawampu hanggang
tatlumpung galon. Nakalaan ang mga ito para sa paglilinis ayon sa tuntuning panrelihiyon
ng mga Judio. Sinabi ni Hesus sa mga katulong, “Punuin ninyo ng tubig ang mga tapayan.”
At pinuno nga nila hanggang sa labi. Pagkatapos, sinabi niya, “Sumalok kayo ngayon at
dalhin ninyo sa namamahala ng handaan.” Dinalhan nga nila ang namamahala ng
handaan. Tinikman naman nito ang tubig na naging alak. Hindi niya alam kung saan
nanggaling iyon, bagamat alam ng mga katulong na sumalok ng tubig, kaya’t tinawag niya
ang lalaking ikinasal. Sinabi niya rito, “Ang una pong inihahain ay ang masarap na alak.
Kapag marami nang nainom ang tao, saka inihahain ang mababang uri. Ngunit
ipinagpahuli ninyo ang masarap na alak.”
Ang nangyaring ito sa Cana, Galilea, ay siyang unang kababalaghang ginawa ni Hesus. Sa
pamamagitan nito’y inihayag niya ang kanyang kadakilaan, at nanalig sa kanya ang mga
alagad.
-Juan 19:25-27
Noong panahong iyon, nakatayo sa tabi ng krus ni Hesus ang kanyang ina at ang kapatid
na babae nitong si Maria, na asawa ni Cleopas. Naroon din si Maria Magdalena. Nang
makita ni Hesus ang kanyang ina, at ang minamahal niyang alagad sa tabi nito, kanyang
sinabi, “Ginang, narito ang iyong anak!” At sinabi sa alagad, “Narito ang iyong ina!” Mula
noon, siya’y pinatira ng alagad na ito sa kanyang bahay.
MGA PAGHIBIK
(Ngayon ay magdasal ng Limang Aba Ginoong Maria atbp. bilang paggalang sa limang
titik na ikinabubuo ng Katamis-tamisang ngalan ni Maria)
I - law na lubhang maliwanag at masintahing anak nina San Joaquin at Santa Ana,
ipanalangin mo ako sa iyong giliw na anak na ako'y pagkalooban ng mga biyayang
kinakailangan ko sa aking kaligtasan
Ikaw na Ina ng mga Dukha, lukuban mo kaming lahat sa manto ng iyong pag-aampon ang
lahat ng naririto sa iyong harapan, ipagsanggalang mo ang iyong mga tapat na lingkod sa
isang natatanging paraan at hirangin silang mga huwaran ng kabanalan sa paglilingkod sa
Diyos, sa iyo at sa aming kapwa. Kalarahin mo ang mga pastol na gumagabay sa aming
kaluluwa tungo sa kaganapan ng buhay, lalo na ang Santo Papa ________________,
________________ na aming Arsobispo, tanang mga Obispo, kaparian, at ang mga
nagtalaga ng kanilang sarili sa Diyos sa relihiyosong bokasyon at samahan sila sa
pagpapalaganap ng Katolikong pananampalataya at maitayo ang kaharian ng Diyos dito
sa lupa. At sa gitna ng pakikibaka sa aming maralitang buhay, nababagabag at nararatay
sa sakit o namimighati sa anumang kasawiang dinaranas ay aming din iniluluhog sa iyong
mga paa, nang aming makamit ang tulong at aliw mula sa Diyos na butihin, dala ng aming
mga pangangailangan, pagkalooban mo rin kami ng lakas at biyaya na kakailanganin
namin upang dalhin ang aming krus nang may pagtitiis at may kagalakan para sa ikabubuti
ng aming mga kaluluwa. Pakamtan mo rin sa mga kaluluwa sa purgatoryo ang iyong
mapagmalasakit na tulong nang sila'y makalaya at makamtan ang walang hanggang
kapahingahan.
O Mahal naming Ina, ikaw na siyang kayamanan ng aming puso, ito ang siyang hangarin
ng iyong mapagmahal na mga anak, na buong pusong nagtitiwala na makakamtan namin
mula kay Kristo na nakakandong sa iyong piling, ang di-matingkalang biyaya ng banal na
buhay, maligayang kamatayan, at walang hanggang kapurihan sa langit na aming tunay
na bayan sa buhay na darating. Amen.
MEMORARE
ANTIPONA
Santa Maria, ampunin mo't tulungan ang mga kahabag-habag, tulungan mo ang mga
mahihinang puso, pasiglahin mo ang mga duwag na loob, ipanalangin mo po ang tanang
kinapal, kalarahin mo ang mga kaparian, saklolohan mo ang mga babaing masintahin sa
iyo. Maipadama mo nawa ang iyong pagtulong sa lahat ng nagpupuri sa iyo sa pag-alaala
sa iyong kamahal-mahalang ngalan.
MANALANGIN TAYO
Kasama ni Maria, sumasamba kami sa Iyo, O Jesus, Diyos na totoo at taong totoo, na nasa
kabanal-banalang sakramento sa altar, naninikluhod at ipinagkakaisa ang aming diwa, sa
kasamahan ng mga mananampalataya sa buong mundo at ang lahat ng mga banal sa
langit. Wagas ang aming pasasalamat sa lahat ng mga biyayang aming natamo, buong
puso naming ika’y iniibig, karapat-dapat kang tunay na purihin at sambahin ng buong
santinakpan. Panginoong Jesucristo, sa kabila ng aming mga kakulangan, huwag nawa
namin hayaang masaktan ang iyong maawaing damdamin. Nawa ang Iyong presensya sa
Banal na Eukaristiya ang siyang makapagpawi sa aming napapagal na diwa at katawan.
Mahal na Ina ng Penafrancia de Manila, Ina ng mga dukha, Ina ng Panginoong nasa Banal
na Sakramento, kami’y iyong idalangin, at pakamtan mo sa amin na wagas at tunay na
pagmamahal kay Kristo na aming Panginoon. Amen
Namumuno: Sa nakagagaling na utos, upang gawin nating ganap ang ating mga
panalangin. Siya ang bukal ng tanang kagalingan. Tanging Siya ang pinagmumulan ng
lahat ng biyaya't kabutihan, na niloob niyang ipamahagi sa pamamagitan ni Maria na ating
Ina, buong tiwala nating dasalin ang panalanging itinuro sa atin ni Jesus.
PANGWAKAS NA PANALANGIN
O Inang Birheng Maria, Mahal na Birhen ng Peñafrancia ng Maynila, ikaw na tunay na Ina
ng sangkatauhan. Iniluluhog namin sa iyo na ibulong mo kay Hesus na nasa iyong
kandungan na kami ay pagkalooban ng malawak na kaisipan upang maunawaan namin
ang mga bagay-bagay sa aming kapaligiran. Pagkalooban din kami ng pusong puno ng
pag-ibig upang mahalin namin ang aming kapwa at tibayan ang aming
pananampalataya na siya naming gabay sa aming kaligtasan.
O Inang Birhen Maria huwag mong ipagwalang bahala itong pagluhog namin sa iyo
sapagkat kami ay umaasa na ang lahat ng dumudulog sa iyong paanan ay binibigyan mo
ng kalinga at pagmamahal. Idulot mo ang iyong awa at bendisyon sa amin. Ipagkaloob mo
rin itong aming pansariling pangangailangan.
Dasalin ang isang Ama Namin, Aba Ginoong Maria at Luwalhati para sa mga intension ng
Santo Papa.
Mahal na Birhen ng Peñafrancia, Inang Mahal ng mga Dukha, ipanalangin mo kami.
PAGBABASBAS NG SANTISIMO SAKRAMENTO
Genitori genitoque
laus et jubilatio,
Salus, honor, virtus quoque
sit et benedictio!
Procedenti ab utroque
compar sit laudatio!
Amen.
Magsusuot ang pari ng humeral veil, itatanghal ang Banal na Sakramento sa kanyang
kamay at babasbasan sa pamamagitan nito ang sambayanan. Matapos ay babalik siya sa
kanyang lugar sa harap ng dambana at aanyayahan ang sambayanan sa pagpupuri sa
Diyos.
(Tatayo ang pari. Ilalagay uli ang Banal na Sakramento sa siboryo at isasauli iyon sa
tabernakulo, habang inaawit ng sambayanan ang sumusunod)
O SAKRAMENTONG MAHAL
O Sakramentong mahal
Nasa langit buhat
Ang puri ng kinapal
Iyong iyo lahat
Iyong iyo lahat
O Sakramentong mahal
Hiwagang dalisay
Kami iyong bendisyunan
At laging ingatan
At laging ingatan
AWIT SA PAG-IINSENSO SA MAHAL NA BIRHEN NG PENAFRANCIA DE MANILA
(Tatayo na ang lahat matapos isara ang pinto ng tabernakulo. Maaaring umawit ng isang
awit patungkol kay Maria, at iinsensuhan ang mapaghimalang larawan)
REGINA COELI
(Mula sa gabi ng Sabado de Gloria hanggang sa Linggo ng Pentecostes)
SALVE REGINA
(Mula sa Lunes pagkatapos ng Linggo ng Pentecostes hanggang sa katapusan ng taong
liturhiko)
Pari: Nagkakatipon tayo upang ialay ang marapat nating pagsamba sa Banal na Sakripisyo
ng Misang ito, sa pasasalamat natin sa Diyos, sa karangalan ng Mahal na Birhen ng
Penafrancia de Manila, ang Ina at Reina ng mga Dukha, na sa lahat ng panahon ay
walang hinahangad kundi ang tayo ay matulungan at tugunin sa mga kahilingan at
pangangailangan tungo sa ating kaligtasan.
Pari: Panginoong Jesus, anak ni Maria, kaming naririto sa iyong harap na nagpupuri sa iyong
kadakilaan. Ikaw na nagsabi: “Mapalad ang mga dukha sa Espiritu, sapagkat sumasakanila
ang kaharian ng langit.” Tulad ni Maria na nagpakadukha sa espiritu, nawa’y matularan
namin ang kanyang kabanalan, at magpalakas nawa sa amin tungo sa mas matatag na
pananalig sa Iyong makalangit na pag-ibig at sa walang sawang paglilingkod sa Iyong
Mahal na Anak.
Priest: Panginoong Jesus, anak ni Maria, ikaw na nagsabi; “Higit na mapalad ang mga
nakikinig sa salita ng Diyos at tumutupad nito!" Tulad ni Maria na handang tumugon ng oo
sa kalooban ng Diyos, tulungan mo kami sa aming pagsisikap na maging mabubuting mga
Kristyano, anuman ang hamon sa aming buhay ang aming masagupa.
Priest: Panginoong Jesus, anak ni Maria, ikaw na nagsabi; “Kung saan naroroon ang iyong
kayamanan, naroroon din ang iyong puso.” Kaagapay si Maria, na dumadalangin para sa
Simbahang naglalakbay, kami’y dumudulog sa iyong puno ng pagtitiwala sa Iyong
maawaing pag-ibig na punuin mo ang aming puso ng iyong biyaya at pasiglahin ang
aming nanlulupaypay na damdamin.
Daloy ng Panalangin:
-Rosaryo (luhod)
-Pambungad na awit (tatayo)
-Pagsisisi (luluhod)
-Pambungad na Panalangin (luluhod)
-Mga Paghibik sa Katamis-tamisang Ngalan ni Maria (luluhod)
-Pagbasa sa bawat araw (tatayo)
-Sandaling Pagninilay (uupo)
-Panalangin sa bawat araw (luluhod)
-Litanya (luluhod)
-Pangwakas na Panalangin (tatayo)
Lumapit ang anghel sa dalaga at binati ito, “Magalak ka! Ikaw ay lubos na kinalulugdan ng
Diyos. Sumasaiyo ang Panginoon!” Naguluhan si Maria at inisip niyang mabuti kung ano ang
kahulugan ng ganoong pangungusap. Sinabi sa kanya ng anghel, “Huwag kang matakot,
Maria, sapagkat naging kalugud-lugod ka sa Diyos. Makinig ka! Ikaw ay maglilihi at
manganganak ng isang sanggol na lalaki, at siya'y papangalanan mong Jesus. Siya'y
magiging dakila at tatawaging Anak ng Kataas-taasang Diyos. Ibibigay sa kanya ng
Panginoong Diyos ang trono ng kanyang amang si David upang maghari sa angkan ni
Jacob magpakailanman. Ang kanyang paghahari ay pangwalang hanggan.”
Makalipas ang ilang araw, gumayak si Maria at nagmamadaling pumunta sa isang bayang
bulubundukin sa Judea, sa bahay ni Zacarias. Pagdating doon ay binati niya si Elisabet.
Nang marinig ni Elisabet ang pagbati ni Maria, biglang gumalaw ang sanggol sa kanyang
sinapupunan at siya ay napuspos ng Espiritu Santo. Napasigaw siya sa galak, “Pinagpala ka
sa mga babae, at pinagpala rin ang dinadala mo sa iyong sinapupunan! Sino ako upang
dalawin ng ina ng aking Panginoon? Sapagkat pagkarinig ko ng iyong pagbati ay gumalaw
sa tuwa ang sanggol sa aking sinapupunan. Mapalad ka, sapagkat sumampalataya kang
matutupad ang sinabi sa iyo ng Panginoon!”
At sinabi ni Maria, “Ang puso ko'y nagpupuri sa Panginoon, at ang aking espiritu'y
nagagalak sa Diyos na aking Tagapagligtas, sapagkat nilingap niya akong kanyang abang
alipin! Mula ngayon, ang lahat ng tao'y tatawagin akong mapalad; dahil sa mga dakilang
bagay na ginawa sa akin ng Makapangyarihan. Siya'y banal! Ang kanyang kahabagan ay
para sa mga tao at sa lahat ng salinlahing may takot sa kanya. Ipinakita niya ang lakas ng
kanyang mga bisig, nilito niya ang mga may palalong isip. Tinanggal sa kanilang luklukan
ang mga may kapangyarihan, at itinaas ang mga nasa abang kalagayan. Pinasagana niya
sa mabubuting bagay ang mga kapus-palad, at pinaalis nang walang dalang anuman ang
mga mayayaman. Tinulungan niya ang kanyang bayang Israel, at naalala ito upang
kanyang kahabagan. Tinupad niya ang kanyang pangako sa ating mga ninuno,
kay Abraham at sa kanyang lahi, magpakailanman!”
Inang Maria, kung papaanong nasambit mo sa Diyos Ama ang nilalaman ng iyong puso’t
diwa sa pamamagitan ng awit, ay turuan mo rin akong masambit sa Diyos Ama at sa Anak
ang nasa sa puso, kaluluwa at Espiritu ko. Nawa’y ang kagalakang nagmula sa Espiritu
Santo ay magpapanatili ng aking buong pusong paglilingkod. Hilingin mo kay Hesus na
pagkalooban ako ng mga sangkap na magpapalakas at magpapatatag sa aking layuning
maglingkod sa Inang Simbahan, lalo’t higit dito sa Dambana at Parokya ng Nuestra Senora
de Penafrancia. Ina ng Diyos, tulungan mo akong maging tapat, totoo at matatag sa aking
paglilingkod. Siya nawa.
Nang makaalis na ang mga anghel pabalik sa langit, ang mga pastol ay nag-usap-usap,
“Tayo na sa Bethlehem! Tingnan natin ang pangyayaring ito na ibinalita sa atin ng
Panginoon.” Nagmamadali silang pumaroon at natagpuan nila sina Maria at Jose, at ang
sanggol na nakahiga sa sabsaban. Isinalaysay ng mga pastol ang sinabi ng anghel tungkol
sa sanggol. Namangha ang lahat ng nakarinig sa sinabi ng mga pastol. Tinandaan ni Maria
ang mga bagay na ito, at ito'y kanyang pinagbulay-bulayan. Umalis ang mga pastol na
nagpupuri sa Diyos at nagpapahayag ng kanyang kadakilaan dahil sa lahat ng narinig nila
at nakita, ayon sa sinabi sa kanila ng anghel.
Inang Maria, kung papaanong iningatan at minahal mo ang anak mong si Hesus kasama ni
Poong San Jose dito sa mundo sa gitna ng kahirapan ay turuan mo akong ingatan at
mahalin ang mga taong ipadadala ng iyong anak na si Hesus, upang kalingain ko, maging
kaibig-ibig man o hindi ang mga ito. tulungan mo akong maunawaan ang mga
pagkakaiba at pagkakatulad ng aming mga pag-uugali upang tunay kong maipadama
ang pagmamahal at pagkalinga ni Hesus sa mga taong nangangailangan. bahaginan mo
ako ng pag-ibig at agapayan mo ako sa aking mga gawain para sa kapatiran. Siya nawa.
Sa patnubay ng Espiritu, si Simeon ay pumasok sa Templo. At nang dalhin doon nina Jose at
Maria ang sanggol na si Jesus upang tuparin ang ayon sa hinihingi ng Kautusan, kinarga ni
Simeon ang sanggol. Pagkatapos, nagpuri siya sa Diyos, “Ngayon, Panginoon, maaari na
pong yumaong mapayapa ang inyong abang alipin ayon sa inyong pangako. Yamang
nakita na po ng aking mga mata ang inyong pagliligtas, na inyong inihanda sa harapan ng
lahat ng bansa. Ito po ay liwanag na tatanglaw sa mga Hentil magbibigay-dangal sa
inyong bansang Israel.”
Namangha ang mga magulang ng sanggol dahil sa sinabi ni Simeon tungkol sa
bata. Binasbasan sila ni Simeon, at sinabi kay Maria, “Tandaan mo, ang batang ito'y
nakatalaga sa ikapapahamak o ikaliligtas ng marami sa Israel. Siya ang magiging tanda
mula sa Diyos ngunit tutuligsain siya ng marami, kaya't mahahayag ang kanilang iniisip. Dahil
dito, magdaranas ka ng matinding kapighatiang parang isang patalim na itinarak sa iyong
puso.”
Inang Maria, kung papaanong natanggap mo ang punyal na itinarak sa iyong puso dahil sa
pagliligtas ng iyong anak na si Hesus sa sanlibutan, ay turuan mo akong tanggapin ang
mga pasakit na haharapin ko sa mundo habang ako’y nasa hiram na buhay patungo sa
buhay na walang hanggan kapiling ni Hesus na kasama mo. Turuan mo akong tanggaping
biyaya ang mga pagsubok at problema sa buhay, lalo’t higit ang mga pagsubok sa
pakikipag-ugnayan sa kapwa tao. Ina ng Diyos, ipadama mo ang kalinga mo sa tuwing ako
ay nasa gitna ng pagsubok sa pakikisama at pakikiisa sa kapatiran. Siya nawa.
Noong panahong iyon, dumating ang ina at mga kapatid ni Hesus, ngunit hindi sila
makalapit dahil sa dami ng tao. May nagsabi sa kanya, “Nasa labas po ang inyong ina at
mga kapatid; ibig nilang makipagkita sa inyo.” Ngunit sinabi ni Hesus, “Ang mga nakikinig ng
salita ng Diyos at tumutupad nito ang siya kong ina at mga kapatid.”
Inang Maria, kung papaanong natanggap mo ang katotohanang ang iyong anak na s
Hesus ay hindi para sa iyo lamang kundi sa pangkalahatan ay turuan mo akong matutong
iangat ang pakikipag-ugnayan ko sa tao na di ako maghahanap ng atensiyon, manapa’y
maunawaan ko ang kalooban ng Diyos sa pamamagitan ng mga taong maghahanap ng
pag-alo kundi ako ang mag-aalo, di na ako maghahanap na ako ay paglingkuran kundi
ako ang maglilingkod, di na ako maghahanap na ako ay mahalin kundi ako ang
magmamahal katulad ni Hesus na nagmahal nang labis upang ako’y mabuhay. Ina ng
Diyos, turuan mo akong palaging makinig sa Salita ng Diyos. Siya nawa.
Noong panahong iyon, may kasalan sa Cana, Galilea, at naroon ang ina ni Hesus. Si Hesus
at ang kanyang mga alagad ay naroon din. Kinapos ng alak kaya’t sinabi ng ina ni Hesus sa
kanya, “Naubusan sila ng alak.” Sinabi ni Hesus, “Huwag ninyo akong pangunahan, Ginang!
Hindi pa ito ang panahon ko.” Sinabi ng kanyang ina sa mga naglilingkod, “Gawin ninyo
ang anumang sabihin niya sa inyo.”
Inang Maria, kung papaano mong naaarok ang kapangyarihan ng iyong anak na si Hesus
at kung papaano mo nagawang ganap ang pananampalatay sa kanya, ay mangyaring
ituro mo sa akin. Nais kong tumulad sa iyo na nakababatid ng pangangailangan ng mga
kapatiran sa kapaligiran. Kung ano mang balakid ang haharapin ko, kung ikaliligtas ng
kapwa ko, ay susuungin ko na si Hesus ang tagumpay ng lahat kong hangarin at gawain.
Ina ng Diyos, dalangin kong lagi kitang kapiling sa habang buhay. Siya nawa.
Noong panahong iyon, nakatayo sa tabi ng krus ni Hesus ang kanyang ina at ang kapatid
na babae nitong si Maria, na asawa ni Cleopas. Naroon din si Maria Magdalena. Nang
makita ni Hesus ang kanyang ina, at ang minamahal niyang alagad sa tabi nito, kanyang
sinabi, “Ginang, narito ang iyong anak!” At sinabi sa alagad, “Narito ang iyong ina!” Mula
noon, siya’y pinatira ng alagad na ito sa kanyang bahay.
Inang Maria, kung papaanong natanggap mo ang paghihirap sa krus ng iyong mahal na
anak na si Hesus, at ang habilin niyang akong nilalang ng Diyos ay anak mo na rin, at kung
papaano mo akong minahal at pinagdasal upan ako'y mapatawad sa aking mga
kasalanan ng iyong anak na si hesus na aking kapatid at Panginoon, ay turuan mo akong
tanggapin ang bawat nilalang na aking kapatid tulad ni Hesus at anak mo ring tulad ko.
Tulungan mo akong magmahal na tunay sa aking kapatiran katulad ng ipinadama mong
pagmamahal sa akin. huwag mong hahayaang humiwalay ako sa iyo, lagi mo akong
yayakapin nang mahigpit at huwag mong pahihintulutang makalimot ako na laging aasa
at magtitiwala sa pagmamahal ni Hesus. Siya Nawa.
3. Regina Coeli
4. Salve Regina
ANG SANTO ROSARIO
(Pamamaraang Dominikano)
(sa Krusipiho)
Ama namin, sumasa-langit Ka. Sambahin ang ngalan Mo. Mapasa amin ang Kaharian Mo.
Sundin ang loob Mo dito sa lupa para nang sa langit. Bigyan Mo kami ngayon ng aming
kakanin sa araw-araw. At patawarin Mo kami ng aming mga sala, para nang
pagpapatawad namin sa mg nagkakasala sa amin. At huwag Mo kaming ipahintulot sa
tukso, at iadya Mo kami sa lahat ng masama. Amen
(sa tatlong maliliit na butil, na inihihiling ang paglago ng Pananampalataya, Pagibig at Pag-
asa)
Aba Ginoong Maria, napupuno ka ng grasya, ang Panginoong Diyos ay sumasaiyo, bukod
kang pinagpala sa babaeng lahat at pinagpala naman ang iyong Anak na si Jesus.
Santa Maria, Ina ng Diyos, ipanalangin mo kaming makasalanan, ngayon at kung kami'y
mamamatay. Amen
O Jesus ko, patawarin mo kami sa aming mga sala, iligtas mo kami sa apoy na impyerno,
hanguin mo ang mga kaluluwa sa Purgatoryo, lalong lalo yaong mga nangangailangan ng
iyong awa.
-V. Ang Pagpuputong ng Korona sa Mahal na Birhen bilang Reyna ng Langit at ang
kaluwalhatian ng mga Banal
(Beatæ Mariæ Virginis coronatio itemque Angelorum et Sanctorum Gloria)
MGA PANGWAKAS NA PANALANGIN
Aba Po Santa Mariang Hari, Ina ng Awa. Ikaw ang kabuhayan at katamisan; Aba
pinananaligan ka namin. Ikaw nga ang tinatawagan namin, pinapanaw na taong anak ni
Eva. Ikaw rin ang pinagbunbuntuhang hininga namin ng aming pagtangis dini sa lupang
bayang kahapis-hapis. Ay aba, pintakasi ka namin, ilingon mo sa amin, ipakita mo sa amin
ang iyong Anak na si Hesus. Santa Maria, Ina ng Diyos, maawain, maalam at matamis na
Birhen.
Manalangin tayo:
Pagpalain nawa tayo ng Panginoon, iligtas tayo mula sa lahat ng kasamaan, at akayin tayo
sa buhay na walang hanggan. Amen
PABATID UKOL SA LUWALHATI MATAPOS ANG ISANG DEKADA NG PAGNINILAY SA SANTO ROSARIO:
Sa Biyernes Santo, ang Gloria Patri ay papalitan ng:
Ako man din ang nagiging dahilan ng iyong pagkahapis, o kabanal-banalang Birhen, sa
pagsiphayo sa iyong Banal na Anak, na minahal mo nang lubusang higit pa sa iyong sarili,
inulos ng isang matalim na balaraw ang iyong puso ng aking pagkakasala. Ano ang mga
ganti na aking naibigay, gaano ko naipapakita ang aking utang na loob sa iyong mga
kabutihang ipinagkaloob mo sa akin, pinakamamahal kong Ina? Sinubukan ko bang
tumulad sa iyo o gaano ako kasigasig sa tungkuling paglilingkod sa iyo?
O Ina ng Awa, hindi man ako nangangahas na tignan ka ng aking mga mata, kung di ikaw
ang sakdalan ng mga makasalanang nasisiil sa bigat ng aking mga kasalanan, ako'y
nagpapatirapa sa iyong paanan, upang ihiling ang kapatawaran sa aking kawalan ng
utang na loob, gayundin ng buong mundo. O Ina ng Hapis, ikaw na hinirang bilang maging
Ina namin sa Bundok ng Kalbaryo, isinasamo ko na iyo na pong kalimutan ang aking mga
nakaraang gawi, na siyang nais kong pagbayaran hangga't maari. Iniaalay ko sa iyo ang
aking pagpupuri't paggalang at buong lakas kong ipapahayag na ang iyong kaluwalhatian
ay higit pa sa lahat ng nilalang. Kaisa ng Simbahan, iipinagpipitagan ko ang iyong Kalinis-
linisang Paglilihi at ang iyong Maluwalhating Pag-aakyat sa Langit. Ako'y sumasampalataya
na ang iyong pagiging ganap at kapangyarihan ay nababagay sa iyong karangalan
bilang Ina ng Diyos. Nagagalak akong kilalanin ka bilang aking Ina, Tagatangkilik at
Sakdalan, at sa habang panahong ako'y nabubuhay, na magiging isa sa mga mairugin
mong anak, at aking pagsusumikapang iakay ang mga kaluluwa sa iyong pag-ibig.
Madaliin mo, O Mahal na Birhen, ang pagbabalik-loob ng mga makasalanan nang kanilang
mahalin si Jesus, at huwag nang magpasama ng loob ng Panginoon, na lubha nang hindi
iginalang, at nang hindi sila mahulog sa impiyerno. Ilingon mo sa amin ang iyong mga
matang maawain, nang aming mahalin ang Diyos nang buong puso dito sa lupa, at upang
maging maligaya sa kanyang piling sa langit, magpakailanman. Amen
Akong si __(banggitin ang iyong pangalan)__at narito po ang aking mga kahilingan na
aking isinasamo....
O aming Ina, Birhen ng Peñafrancia de Manila, Ina ng Salitang nagkatawang tao, sakdalan
ng mga makasalanan at tagapamagitan para sa aming mga pangangailangan. Ako po'y
dumudulong ngayon, nang may buhay na pananampalataya, sa iyong maka-inang
pagkalinga, at isinasamo ko ito na ipagkaloob ang mga ito sa akin, kung ito ay
nararapat sa kalooban ng Diyos. Sa iyong mga mapagpalang kamay, isinasailalim ko sa iyo,
sa kaibuturan ng aking puso, na aking hinihiling ang mabuting kalusugan ng kaluluwa't
katawan ng aming mahal sa buhay na maysakit;
O kalinis-linisa't kabanal-banalang Birheng Maria aking Ina, sa iyo na ikaw ang Ina ng aking
Panginoon, ang reyna ng santinakpan, ang tagapagtaguyod, ang pag-asa't kanlungan ng
mga makasalanan, akong kahabag-habag sa lahat ng mga makasalanan ay dumudulog
ngayon sa iyo.
Mahal kong Ina, dala ng iyong pag-ibig sa Diyos na iyong tinaglay, idinadalangin ko sa iyo
na samahan mo po ako sa bawat sandali, at higit sa lahat, sa mga huling sandali ng aking
buhay. Huwag mo po akong pabayaan, hanggang sa ako'y makita mong sumapit nang
ligtas sa kalangitan, nang ako'y makapagpuri't umawit ng iyong mga awang walang maliw,
na siyang aking inaasahan. Amen
Ako'y lubos na nagtitiwala, sapagkat ikaw ang Ina ng aking Manunubos, ikaw nawa'y
maging Ina ng aking kaligtasan. Kung hindi mo ako mapagkakalooban ng sinag mula sa
Araw na Mabathala, anong liwanag ang tatanglaw sa akin? Sino ang magiging kaagapay,
o Ina ng Walang Hanggang Karunungang, kung iyo pong sisiphayuin.
Pakinggan mo po itong aking abang dalanging hain, nang huwag ako maligaw sa aking
pagkalito at; bagkus ako'y iyong dalhin sa matuwid na landas patungo sa buhay na walang
hanggan, ikaw lamang ang aking inaasahan, at sa iyong mga kamay ay napupuno ng
kayamanan ng kabutihan at ng buhay, at iyong ibinabahagi ang mga bunga ng
kamahalan at ng kabanalan. Siya Nawa
PANALANGIN NG PASASALAMAT
O Birhen ng Peñafrancia de Manila, Reina at Ina ng mga Pamilya. Itinatalaga namin sa iyo
ang aming buhay, nang aming maganap ang iyong marubdob na nais na sundin namin
ang kalooban ng iyong Anak, ang ating Panginoong Jesucristo. Isinasamo namin sa iyo na
maghari ka sa aming pamilya at sa aming abang tahanan. Maghari ka sa bawat isa sa
amin, at tulungan mo kami sa aming pagsisikap na maghari nang matagumpay sa aming
piling ang iyong Anak, tulad ng kanyang paghahari at pagtatagumpay sa iyo.
Samahan mo kami, O aming pinakamamahal na Ina, upang maging kami'y iyong iyo tunay
sa panahon ng kasaganahan at kasalatan, sa panahon ng tuwa at kalungkutan, sa
kalusugan at kasakitan, sa kapanahunan at sa oras ng pagpanaw. Iligtas mo ang aming
tahanan laban sa anumang kapahamakan: sa bawat nakapipinsalang sunog, baha, kidlat
at lindol, gayundin sa mga magnanakaw, masasamang loob at mga kalamidad na gawa
ng tao.
O lubhang maawaing Maria, aming Ina, tanuran mo ang aming mga puso't kaluluwa at
iligtas sa mapaminsalang baha ng kapalaluan, kahalayan, kawalang-bahala at hilig-
makalupa, na siyang kapait-paitang idinaraing ng iyong puso. Nais naming magbayad-puri
sa mga nagawa naming pagkakasala laban sa iyong anak na si Jesus at sa iyo. Papaghariin
mo sa aming mga tahanan, ng ating bansa at ng buong mundo ang kapayapaan ni Kristo
sa katarungan at pag-ibig sa Diyos at sa kapwa. Papag-alabin mo rin ang aming mga puso
at aming mga tahanan, at ipakamtan mo sa amin ang pagmamahal sa kalinisan, ang
maalab na adhika para sa kaligtasan ng mga kaluluwa at ang pagnanais para sa
kabanalan ng aming buhay mag-anak. Kami’y iyong iyo, o aming Ina, ingatan mo kaming,
sapagkat ikaw ang Ina at Reyna ng aming tahanan, magmula ngayon at magpasawalang
hangan.
Iniluluhog namin ito sa pamamahitan ni Kristo na iyong Anak, na aming Panginoon. Amen