E drejta për të ushtruar të drejtën e zgjedhjes konsiderohet si
një nga fitoret më sublime të shoqërisë botërore dhe njëkohësisht manifestimi më konkret i demokracisë së kohëve moderne. E përkufizuar gjerësisht, ajo njihet si atributi që i jepet qytetarit-elektoral për të ushtruar vullnetin e tij politik dhe ky vullnet politik konsiston në zgjedhjen e një partie ose një individi, në varësi të sistemit elektoral në fuqi. Themeli mbi të cilin ngrihet e drejta e përgjithshme e votës është moskushtëzimi i saj nga faktorë etnikë, racorë, gjinorë, socialë apo politikë. Beteja botërore dhe triumfi global për të drejtën universale të ushtrimit të vullnetit politik, është pa dyshim një nga betejat më të domosdoshme të politikës globale. E drejta për të shprehur vullnetin politik në zgjedhjet elektorale është fitore e shekullit të XX-të dhe shënjon kalimin nga forma e shtetit liberal në formën e demokracisë kushtetuese. Dihet gjerësisht se fitorja mbi të drejtën e votës nuk ka ardhur njëkohësisht për të dyja gjinitë. Ndërkohë që meshkujt e morën atë rreth vitit 1848, u deshën gati njëqind vjet që i njëjti atribut legjitim t'i jepej edhe femrave.
Kur shqiptarët fituan mundësinë të ushtrojnë të drejtën e
zgjedhësve në një kontest politik pluralist, arena botërore kishte avancuar së tepërmi në këtë drejtim dhe sovrani ishte kthyer tashmë në legjitimues të pushtetit. Mënyra se si vendi ynë u përshtat me privilegjet e demokracisë është sa e veçantë aq edhe e pakrahasueshme me vendet e tjera. Në vitet '90 ne votuam për herë të parë partinë që erdhi si alternativa më shpresëdhënëse kundrejt dritës së zezë që kishim lënë pas. Jam e bindur se vota thuajse unanime ndaj Partisë demokratike të atyre viteve nuk duhet të ketë qenë rezultat i mbështetjes së programit të saj politik. Nuk duhet të ketë intriguar programi politik i së djathtës aq sa ka intriguar plani parimor mbi të cilin e djathta u ngrit. Pra, që në mundësinë e parë të pjesëmarrjes në të parat zgjedhje pluraliste dhe të lira, ne kemi qenë tërësisht indiferentë ndaj të ashtuquajturës platformë politike, dhe kemi votuar vrullshëm, në mënyrë pasionante dhe të panegociueshme të kundërtën e asaj që kishim lënë pas. Mesa duket, nga njëra anë ky ka qenë një fillim jo plotësisht premtuës për të ardhmen e zgjedhjeve elektorale në Shqipëri, por nga ana tjëtër një votim i tillë, thuajse unanim dhe i palëkundur është lehtësisht i shpjegueshëm nëse vazhdimisht do të marrim parasysh terrin që kërkonim të shfarrosnim. E parë në këndvështrimin strategjik politik, është mëse normale kur programi dhe platforma politike e një partie ngrihet mbi kundërshtinë e plotë dhe sulmin reciprok ndaj kundërshtarit. Sigurisht që në planin ideal mund të mos duket profesionale dhe e denjë, por realisht racionaliteti shpjegon se pse triumfet absolute ngrihen ndonjëherë mbi evidentimin e pareshtur të defiçiteve të kundërshtarit në garë. Parimisht, një platformë politike duhet të premtojë jo atë që kundërshtari nuk mundi të realizojë, por atë që beson se do të çojë drejt prosperitetit shtetin që pretendon të drejtojë. Kjo nuk do të thotë se do të vazhdojmë të gënjejmë veten duke sublimuar parimin dhe duke mohuar racionalitetin dhe realitetin. Duhet pranuar hapur se politika është fusha e një shahu psikologjik ku lëvizja ime vjen pas studimit të detajuar të lëvizjes tënde, ç'ka nënkupton se në fund të fundit çdo triumf, përpara se të quhet triumf i një gare politike, shoqërore, profesionale apo akademike, është triumf i një loje krejtësisht psikologjike. Sipas këtij rregulli të thjeshtë, mbi të cilin ndërtohen të gjitha marrëdhëniet profesionale ose jo, sulmi ndaj kundërshtarit politik është racional në çfarëdolloj këndvështrimi, i justifikueshëm dhe strategjik në planin drejt fitores.
Por, në kundërshtim me këtë rregull të artë të politikës, fitorja
e partisë demokratike në të parat zgjedhje pluraliste në Shqipëri ka qenë e vetmja herë kur unanimiteti elektoral u reflektua në triumfin e vlerave demokratike. Njëkohësisht, hera e parë kur gjuha politike e fushatës u kthye në inspiruesen e dëshirës së pashtershme për ndryshim. Hera e parë dhe e vetme, kur lufta për pushtet nuk ngrihej mbi përdhosjen e figurës së kundërshtarit për vetë faktin se kundërshtari ishte imazhi më i përdhosur i një monstre të pajetë. Skepticizmi im qëndron ne faktin se kur Partia demokratike korri suksesin më absolut në historinë e saj (vitet 1991- 1996), nuk besoj se kanë qenë të shumtë ata që e kanë ditur se po votonin një parti të konservatorizmit liberal, apo të filozofisë politike europeiste. Natyrshëm shtrohet pyetja: shqiptarët votuan një parti ndryshe nga ajo komuniste, cilado të ishte, votuan ndryshimin e papërcaktuar mirë apo votuan unanimisht të djathtën? Do të thoja se dy opsionet e para shpjegojnë më së miri fitoren absolute të PD-së në ato vite dhe fitoret e vështira në zgjedhjet e mëpasme. Themeluesit e së djathtës adhuronin të djathtën dhe vizionin që ajo mishëron, privilegjet individuale që sjell në një shoqëri e djathta, por edhe vështirësinë që këto privilegje mbartin me vete si rezultat i një meritokracie radikale dhe të pamanipulueshme. Megjithatë, të jesh strateg politik, do të thotë të negociosh deri diku parimet e tua si politikan profesionist, të lëshosh aty ku nuk humb në këmbim të një probabiliteti më të lartë drejt fitores. Këtë bënë të djathtët në Shqipëri, instaurimin e një partie të bazuar mbi kushtetutat perëndimore, por jo mbi distancimin absolut të shtetit nga ekonomia, për vetë faktin se një shoqëri në varfëri ekstreme nuk do të mund të mbijetonte kurrë në një ambjent ku triumfi i rezervon gjithçka më të mirit, ku zotësia është virtyt dhe gara është filtër seleksionimi. Ekonomia keinziane, parimi më bazik në ekonominë amerikane, nuk mund të aplikohej plotësisht në Shqipëri, për arsyen kryesore se një treg që vetë-rregullohet është i rezervuar ekskluzivisht për këdo që përballon zotësisht konkurrencën e ashpër dhe të pastër, ç'ka do të ishte fatale për mënyrën me të cilën janë mësuar të jetojnë e punojnë shqiptarët. Si rrjedhojë, në fushatat elektorale në Shqipëri ndodh të dëgjojmë edhe çudira të tipit: një e djathtë që sulmon teorikisht sipërmarrësit, që kundërshton deri diku privatizimet apo që e bazon programin e saj mbi premtimet e asistencave sociale. Sigurisht, të gjithë këta elementë janë pjesë e pandashme e planit qeverisës, por jo reflektim i pastër i vizionit të djathtë. Megjithatë, përpos vështirësisë së triumfit në një shoqëri post-komuniste e djathta ia ka dalë t'i afrohet sikur edhe pak vizioneve perëndimore, herë në mënyrë eksplicite, e herë tërthorazi, në heshtje, duke premtuar atë ç'ka një shoqërie post-komuniste i pëlqen të dëgjojë, por duke aplikuar atë çfarë një e djathtë pritet të aplikojë. Kjo reflekton dy anë të kundërta: fleksibilitet politik, por jo besnikëri të pastër ndaj vlerave të programit politik. Do të doja të kisha qenë votuese në të parat zgjedhje pluraliste në Shqipëri. Të kisha qenë votuese me njohuritë e sotme, dhe si pjesë e një rinie që komunizmit ia ka parë hijen vetëm nëpër kapitujt e pambyllur të debateve, dokumentarëve, apo rrëfimeve të familjarëve të goditur nga meskiniteti fatal i pushtetit të asaj kohe. Do të doja të kisha votuar si dikush që nuk e kishte prekur për asnje sekond epokën e rrënimit progresiv. Në këtë mënyrë do të kisha votuar e bindur dhe me zgjedhje të arsyetuar të djathtën, jo si alternativë e padeshifrueshme që kundërshtonte komunizmin, por si pozicionim politik që përputhej me vizionin tim mbi individin dhe shoqërinë. Do të doja të kisha shprehur votën time për një vizion politik që besoj se i ka falur zhvillimin sipëror Shteteve të Bashkuara të Amerikës apo të tjera shteteve ku kapitalizmi ka qenë motorri i ecurisë progresive. Të shumtë janë skeptikët dhe pretendentët për analistë që nuk bien dakort me paralelizmin midis kapitalizmit dhe të djathtës. Argumenti im ndaj një kundërshtimi të tillë hipotetik do të ishte: “50% e studiuesve politikë e kanë definuar kapitalizmin si kushti primar për zhvillimin e demokracisë. Demokracia në vetvete ngrihet mbi lirinë e individit, mbi te drejtën e lirisë së veprimit, fjalës, kundërshtisë, mbi të drejtën e suksesit të pandalshëm në një shoqëri ku i vetmi rregullator është meritokracia. Kam bindjen se mbi të tilla parime ngrihet edhe e djathta, kështu që me një rregull fare të thjeshtë matematikor, duket se vetia e kalueshmërisë funksionon.” Një ndërhyrje logjike ndaj asaj që shpreha më sipër do të ishte: përse kjo dëshirë për të votuar në vitin 1991, kur në fakt mundësia për të votuar është konkrete edhe sot? Sepse mes dy votave, asaj të viti '90 dhe asaj sot, ka një frakturë evidente. Së pari, sot më duhet të votoj mes një të majte që e konsideron shqiptarin si invalid të gradës së fundit, dhe një të djathte që ka frikë ta aplikojë rigorozisht politikën e saj, për vetë faktin se natyra e elektoratit shqiptar do ta linte me nje numër minimal votash. Së dyti, më duhet të zgjedh mes një të majte që pretendon shtetëzim në demokraci, por aplikon privatizimin selektiv, dhe një të djathte që padashur, duke i nxjerrë në pah të majtës se si po devijon nga premtimet e saj, sulmon privatizimin, ç'ka është e pafalshme për kushtetutën e vizionit të djathtë në botë. Së treti, më duhet të zgjedh mes një të majte që fillimisht propagandon taksën progresive, dhe me kalimin e kohës fatkeqësisht kupton se presioni dhe interesat vetjakë nuk ia lejojnë të jetë kaq rigoroze në progresivitetin e taksimit. Në krahun tjetër, kam një të djathtë që pafajësisht, për të kundërshtuar të majtën, i duhet të premtojë taksë progresive, të cilën e majta nuk po e aplikon. Dhe aryseja për këtë devijim është e njëjta: fleksibiliteti ndaj fizionomisë së shoqërisë shqiptare. Në fakt, të dyja palët e dinë mirë se në këtë aspekt gabojnë, pasi modeli i taksimit varet drejtpërdrejt nga situata ekonomike aktuale. Inflacioni kërkon detyrimisht taksë të sheshtë minimale, ndërsa deflacioni kërkon taksë progresive të lartë. Në një gjendje ekonomike normale, personalisht, njohuritë ekonomike dhe politike më shtyjnë të preferoj taksimin e sheshtë, për të vetmen arsye se taksimi progresiv e shoh si një nga arsyet që e shtyjnë një sipërmarrës të mos synojë maksimizimin e fitimit apo e stimulojnë t'i drejtohet evazionit fiskal. Taksën progresive do ta quaja gjobitje ndaj aftësisë sipërmarrëse. Midis dy individëve me të njëjtat mundësi biznesi, me të njëtët numër të punësuarish dhe me të njëjtin aktivitet, shteti preferon të taksojë aftësinë e njërit prej tyre për të kryesuar garën, për të qenë i sukseshëm dhe për të marrë në fund të ditës surplusin shtesë të aftësive të tij sipërmarrëse. Taksën progresive e konsideroj jo si praktikë për të shehsuar hendekun mes të pasurve dhe të varfërve, por si praktikë meskine e injektimit të dembelizmit. Më thjeshtë, do të thoja se progresi nxitet duke e stimuluar, jo duke taksuar aftësinë progresive dhe triumfuese. Gjithsesi, debati mes taksës progresive dhe asaj të sheshtë nuk mund të ezaurohet në pak reshta, por qëllimi përse e përmenda konsiston në evidentimin e disa elementëve që e largojnë kampin e djathtë në Shqipëri nga programet klasike të së djathtës.
Të duash ndryshimin do të thotë t'i jepesh atij shpirtërisht
dhe mendërisht, do të thiotë të jetosh dhe punosh për progresin, të mendosh gjithmonë në përspëktivë dhe të përkrahësh marrëzisht iniciativën dhe sfidën. Këtë pretendonte të sillte Partia demokratike e vitit 1991, një Shqipëri që mund t'i ngjasonte çdolloj modeli, por kurrsesi atij paraardhës. Diskutimi lind kur mendoj se sa të gatshëm janë shqiptarët për t'u dashuruar pas ndryshimit, për ta pranuar atë me gjithë dinamikat e tij dhe për te ecur me hapat e sfidave bashkëkohore. Noshta dëshira ëahtë e pamatshme në dimensionin teorik dhe parimor, por e vakët, skeptike dhe tmerrësisht e rezervuar në planin praktik. Edhe në këtë pikë, do të doja ta kundërhtoja veten, duke thënë se dëshira e shqiptarëve për emigrim është ndoshta në një farë mënyre edhe pranim dhe përballje me ndryshimin, me sfidën, me kostot e një jete më të mirë, por fatkeqësisht ikjen e shumicës së shqiptarëve unë nuk e emërtoj si emigrim. Fillimisht ndoshta i tillë ishte, por sot për sot, ikja e shqiptarëve më sjell ndër mend vetëm një term: arratisjen. Dhe arratisja, duam apo s'duam ne është indiferentizëm, është egoizëm e deri diku pse jo edhe braktisje e fatit. Detyra e ardhjes së të djathtës në Shqipëri më shumë se thjesht detyrë politike, duhej të ishte mision shoqëror dhe politik. Dhe suksesi i saj do të ishte i padiskutuar nëse radhët e projekteve do të kishin qenë më ndryshe. Elektorati duhej edukuar fillimisht me frymën e besimit në ndryshim dhe me idenë se e nesërmja do të jetë ndoshta më e ashpër, më garuese se e djeshmja, por gjithsesi mendimi dhe puna progresive e bëjnë më pozitive se të djeshmen. Vetëm kur shqiptarët të kuptonin se nuk mund të propagandohet më e ardhmja duke e tradhëtuar me të shkuarën, atëhere e djathta do të ishte instauruar shumë më fuqishëm në këtë vend. Vetëm nëse shqiptarët do të kishin kuptuar se hija e së shkuarës së errët nuk duhej të qarkullonte më në korridoret e akullta të pushtetit të post '90-ës, atëherë ndryshimi do të kishte qenë shumë më produktiv. Përsa kohë e djeshmja dhemb, lëngon, rrjedh gjak, por njëkohësisht të lehtëson frikën ndaj së ardhmes, ndryshimi, progresi dhe demokratizimi nuk do të jetë kurrë një betejë e fituar. Do t-i referohesha pë një çast një fraye të lexuar së fundmi me të cilën shkrimtari Ben Blushi mbyll librin e tij “Kandidati”: “ ...shqiptarët ishin një popull me fat. Ata e kishin shpikur të parët ilaçin kundër mendimit. Unë kisha bërë një eksperiment duke i nxitur të votonin për një të vdekur. Dhe ata më kishin ndjekur. Pa menduar.” Ka disa cështje për të cilat bie dakort me Blush-in, e konkretisht një prej këtyre është edhe konkluzioni i kësaj fraze. Se ne shqiptarët ndjekim, instruktohemi, vetëofrohemi për të na drejtuar dhe misionarët e pushtetit e kanë tmerrësisht të lehtë, përsa kohë ne jemi nxënës inertë, të paaftë për të menduar thellë, të bindur deri në acarim, të heshtur për çështje që kërkojnë ulërimë, të papërmbajtur për çështje që lypin qetësi. Kemi një besim kaq të brishtë ndaj potencialit që na kanë falur dhimbjet e së shkuarës, ndaj vlerave që na ka dhuruar historia, ndaj aftësive individuale që secili zotëron në heshtje, pa shumë zhurmë, pa shumë publicitet. Për këto arsye mendoj se e djathta gaboi strategjinë e saj, kur kërkoi të ndiqte politikën standarde të alternativës. E djathta duhej të pozicionohej jo si alternativë, por si forcë e konsoliduar politike, programi i së cilës nuk ishte plotësues i defiçiteve të së majtës. E djathta duhej ta niste nga një instruktim masiv i filozofisë amerikane në shoqërinë shqiptare. Të votosh për të ardhmen tënde si qytetar, nuk do të thotë të kërkosh strategjinë që të kthen në rob inert të dembelizmit, por platformën politike që të premton sfidë, garë, potencial dhe meritokraci. Duhej të ishte një e djathtë që i shkundte nga ëndrra e frikës kronike, nga stepja kundrejt dinamizmit së aktualitetit. Duhej të ishte një e djathtë që i bënte të kuptonin se liria ishte vërtet ëndrra e dëshiruar dëshpërimisht, por në fund të fundit, ishte një atribut i lindur, i dhuruar nga koha dhe i marrë nga meskinët, i dhuruar nga lindja dhe i çensuruar nga barbarët e shqiptarizmit. Mbi gjithçka shqiptarëve u duhej përsëritur vazhdimisht se ajo çka do të ulte këmbëkryq progresin dhe lirinë në çdo dimension, mirëqënien, pozitivizmin dhe frymën e prosperitetit, ishte uria për dinjitet, për barazi, uria për t'u vlerësuar të paktën njëherë denjësisht, pa keqardhje, pa mëshirë, pa u trajtuar si dele të urta të një bariu delirant. E djathta duhej ta kishte nisur projektin e saj politik duke u thënë shqiptarëve se kulmi i suksesit të një shoqërie arrihet kur qytetarët e saj shihen si individë potencialë, të denjë për të bashkëpunuar në një qeverisje të dobishme, atdhedashëse, korrekte dhe frutdhënëse. Zhvillimi nuk kërkon barinj, zhvillimi kërkon bashkëpunëtorë të aftë, negociatorë të përulur, strategë të niveleve supreme. Dhe juria ideale për përzgjedhjen e kandidatëve që ofrojnë këto profile është një shoqëri me autostimë maksimale, një shoqëri që beson se meriton më të mirën, që adhuron sfidën dhe përkrah diferencat e ardhura nga dija dhe puna. Juria ideale është një shoqëri që urren lëmoshën, që përçmon premtimet që e bëjnë të ndihet invalide, platformat politike që zëvendësojnë punën me asistencë, garën me afera farefisnore, sfidën me teatro solidarizimi. E djathta duhej t'ia kishte nisur nga kushti numër një: t'i ndihmonte shqiptarët të kuptonin pse u duhej e djathta, t'i zgjonte nga inercia e injektuar artificialisht, t'u shkundte fort besimin në virtytet si individë, si komb, si shtet. Në vend të kësaj, ajo zgjodhi të ishte fleksibël, t'i nënshtrohej frikës dhe stepjes konstante të shqiptarëve duke e ngritur programin dhe vizionin politik si një e djathtë tmerrësisht e moderuar, skajshmërisht e lëkundur. E si rrejdhojë, fitorja nuk mundi më kurrë të merrte një dimension absolut. Rezultati është ai që jetohet sot, një e djeshme e paharruar. Ka vetëm një rrugë drejt suksesit politik: të besosh me çdo kusht se alternativa që po ofron është ajo çka i duhet shoqërisë në të cilën projekton të ardhmen tënde, të besosh se vizioni yt politik është zgjedhja ideale drejt prosperitetit të kombit.