Besoj objektivisht në formulën e vullnetit politik, si çelësi
kryesor i mekanizmit te zhvillimit të shtetit. Ne çastin që i tillë kusht plotësohet, prosperiteti dhe triumfi ndaj sfidave të së nesërmes është vetëm çështje kohe. Zgjedhja e formulës politike është përfundim i negociatave të kohës, negociata të cilat braktisin dështimet e sistemve të kaluara dhe përqafojnë pa nguruar sistemet e reja në tërësinë e tyre, pa u thelluar së tepërmi në pozitivitetet dhe negativitet që këto sisteme mbartin. Një pozicionim i tillë, jo selektiv dhe pretendues, por thjesht dashamirës dhe vullnetplotë, ka qenë hapja dhe dashuria e popujve perëndimorë ndaj sistemeve demokratike dhe vetë demokracisë, si filozofi kontemporane e vendimarrjes. Një nga definicionet klasike dhe universale të demokracisë mbetet ai i Schumpeter, sipas së cilit, metoda demokratike e udhëheqjes është instrumenti dhe mjeti institucional për të marrë vendime politike, në bazë të së cilit, nënshtetatsit kanë fuqinë e plotë në vendimarrje dhe kjo fuqi u atribuohet atyre në bazë të një proçesi trasparent qe ka si kryefjalë votën popullore. Proçedurat demokratike nuk nënkuptojnë vetëm zgjedhjet dhe ritualin elektoral, por tërësinë e rregullave, normave dhe mundësive që u lejojnë qytetarëve të një shteti të influencojnë drejtpërdrejt veprimtarinë qeverisëse. Këto te fundit i bashkangjisin demokracisë atributin e përfaqsimit. Demokratizimi si proçes është specifikisht kompleks, për arsyen e thjeshtë se implikon ndryshime që prekin aktorët politikë, insititucionet më të rëndësishme dhe vendimet përfundimtare të tyre. Më shkurtimisht, Dahl, një tjetër politolog emblematik, e ka parë demokratizimin si proçesin që trasformon politikën oligarkike në politikë të masës. Sipas Dahl, nënshtetasit e një vendi përfshihen në vendimarrje përmes dy mekanizmave kryesorë: 1. mekanizmi i liberalizimit dhe konkurrences (rritje e mundësive të kontestimit politik, avancim i të drejtave civile, liri pozitive), si dhe 2. mekanizmi i përfshirjes dhe i zgjerimit të të drejatve politike). Dahl mendonte se ka raste kur perfshirja paraprin lirinë, kur liria paraprin përfshirjen ose kur të dy mekanizmat ecin dhe zhvillohen paralelisht. Pra, demokracia në vetvete pozicionohet si ajo skemë e vendimarjes politike e cila synon delegimin sa më të drejtpërdrejtë dhe të kontrolluar të vendimarrjes, në mënyrë që të evitohen njëherë e përgjithmonë limitet që politikbërja i vendoslirisë individuale, të eleminojë abuzimet në vendimarrje dhe diktaturat politike. Që demokracia të trasferohet nga niveli teorik në atë territorial, kërkon një interval të konsiderueshëm kohe, i cili parashikon themelimin e insitucioneve më të rëndësishme të regjimit të ri demokratik. Samuel Phillips Huntington, i cili ndërroi jetë në vitin 2008, është ndoshta emri më i dëgjuar në katedrën e shkencave politike bashkëkohore në Shtetet e Bashkuara të Amerikës. Si profesor i universitetit të Harvard-it dhe njëkohësisht drejtor i qendrës për marrëdhëniet ndërkombëtare të po këtij universiteti, ka dhënë një nga kontributet më të thelluara në studimet mbi demokracinë dhe periudhat e themelimit të saj si sistem politik aktual. Sipas Huntington, demokratizimi është një proçes afatgjatë dhe i komplikuar, i cili përfshin katër valë historike. Vala e parë, u përmbyll pas luftës së parë botërore, dhe solli themelimin e demokracisë së masave në asetet kryesore politike. Kjo fazë u shoqërua nga industrializimi dhe u lidh ngushtë me nevojën e shteteve të Perëndimit për të inkorporuar në sistemet politike shtresat e reja shoqërore, mbi te gjitha, punëtorët dhe fshatarët, deri në atë kohë tërësisht të përjashtuar nga mekanizmat e funksionimit të shtetit. Kjo fazë e parë e demokratizimit hyri në krizë pas 1922 deri në 1944 dhe u shoqërua me kaosin e demokracivë të brishta si Italia, Polonia, Gjermania, Spanja e Vendet baltike. Vala e dytë erdhi me përfundimin e luftës së dytë botërore. Fundi i fashizmit, nazizmit, dekolonizimi dhe formimi i shteteve të ashtuquajtura “Bota e tretë”, krijuan kontekstin optimal për zhvillimi e fazës së dytë të demokratizimit, fazë në të cilën u mirëafirmua demokracia sistem politiko-elektoral, u pranua gjerësisht dhe nisi të eksportohej përtej botës perëndimore. Në vitin 1974, “revolucioni i karafilave” në Portugali, hapi të tjera çështje që iu nënshtruan proçesit të demokratizimit. “Revolucioni i karafilave” ishte praktikisht një grusht shteti i militarëve të krahut progresist të forcave të armatosura në Portugali, kundër regjimit autoritar të Antònio Salazar. Rikthimi i demokracisë pas këtij revolucioni, shenjoi një shpërndarjeve të aspiratave për demokratizim në mbarë globin. Pikërisht gjysma e dytë e viteve '70, është faza më e studiuar e afirmimit të demokracive sepse e projekton sistemin demokratik si rezultat i një kalimi tranzitiv të vazhdueshëm nga komunizmi në demokraci. Vala e rrënimit të regjimeve komuniste nis në fillimin e viteve '70 në Evropën jugore, Spanjë, Portugali, Greqi. Pas 1979-ës ishin shtetet e Amerikës latine, Bolivia, Brazili, Ekuadori, Peruja, Uruguai, që përmbysën regjimet ushtarake autoritare. Në vitet '80, pasi në Indi demokratizimi kishte trokitur që prej 1977-ës, është radha e Filipineve, Koreja e Jugut dhe Taivani, duke e listuar Azinë ndër kontinentet mirëpritëse të demokracisë. Evropa i rikthehet vendimit të saj për t'i hapur derën sistemit që kishte përfshirë globin vetëm pasi forca e regjimit sovjetik u dorëzua në fundin e viteve '80, fillimin e viteve '90. Rënia e regjimeve komuniste në Evropën qëndrore dhe atë jugore ndryshoi rrënjësisht fisionominë gjeografike të kontinentit. Nga nëntë shtete, Shqipëria, Bullgaria, Cekosllovakia, Gjermania lindore, Jugosllavia, Polonia, Rumania, Hungaria dhe Bashkimi sovjetik, u kalua në një hartë prej 27 shtetesh pas shpërbërjes së Bashkimit sovjetik, Cekosllovakisë, bashkimit të Gjermanisë lindore me atë jugore dhe ndarjes së Serbisë me Malin e Zi. Vetëm në gjysmën e parë të viteve '90 edhe kontinenti afrikan tentoi demokratizimin, por historitë moderne të diktaturave aty nuk të lënë të mëndosh për një demokraci të suksesshme në èjesën më të madhe të kontinentit.
Shqipqëria bën pjesë në hartën e vonë të një Evrope
demokratike, praktikisht vitet 1991-1992. Si çdo shtet tjetër nismëtar vullnetar për të pranuar regjimin demokratik, vendit tonë i duhej të superonte katër faza kyçe që kurorëzonin kalimin përfundimtar nga regjimi komunist në atë demokratik: 1. krizën dhe rrenimin e regjimit jo-demokratik; 2. tranzicionin; 3. themelimin e demokracisë; 4. konsolidimin përfundimtar të regjimit politik demokrarik. Pyetja që shtroj natyrshëm si një nënshtetase e lindur në një Shqipëri pretendente si mirëpritëse e demokracisë është: “A e dinin brohoritësit e fillim-viteve '90 se demokracia ishte proçes, jo vendim, ishte impenjim historik, jo reformë provizore, ishte rrugëtim reformues që kërkonte kohë, seriozitet dhe mbi të gjitha pranim absolut të parimeve të saj...?” Klasifikimet botërore e konsiderojnë vendin tonë si shtet semi- demokratik, që e përkthyer nga gjuha teknike do të thotë shtet stacionar në fazen e tranzicionit dhe në hapat prematurë të themelimit të demokracisë. Megjithatë, problemtaikat aktuale, skandalet politike, ekonomia e varfër, aferrat korruptive dhe shtratëzimi i drogës, nuk mund t'i heqin asnje grimcë triumfit të vitit 1991, nismës historike të studentëve dhe natës së errët të atij viti, që solli një mëngjesin më brilant të cilit shqiptarët i kishin uruar ndonjëherë mirëseardhjen.,
“Askush nuk ka lindur hero, thotë Adam Miçnik. Ka rendesi
që në atë moment që duhet, të dish të sillesh si i tillë... Por, heronjtë nuk jane asnjeherë te perjetshëm. Studentët qenë heronj të një kohe. Heronj, të atyre 4 muajve që ndryshuan rrënjësisht jetën e Shqiptarëve dhe historinë thuajse 80-vjecare të popullit shqiptar!” (Blendi Fevziu). Ky eshtë fillimi i epilogut të librit “Piedestale pa statuja” të gazetarit Blendi Fevziu. Bëhet fjale për testamentin e një epoke dy vjecare që ndryshoi drejtimin e erërave, që dogji në flakt e kohës kapitullin e komunizmit dhe shkroi një kapitull të ri, atë të demokracise. Ajo që percepton lexuesi në perkorsin e rreshtave të këtij libri është një reflektim i pastër, i vërtetë, i pançensuruar, i qartë ashtu si entuziazmi i atij brezi studentësh që firmosen deklaratën e lirisë. E parë nga sot, është ndoshta ngjarja më epokale në historinë e shtetit shqiptar, protagonistët e së cilës janë figurat aktuale politike dhe sociale në këtë njëzet e pesë vjecar të të ashtuquajturit shtet demokratik. Ajo që transmetohet në librin e Fevziu-t është një dokumentar emocionues i muajve më dinamikë të ekzistencës shtetërore shqiptare, një film i ditë-netëve pa mbarim që prej 8 dhjetorit 1990 deri më 31 mars 1991, kur demokracia goditi ne ringun politik komunizmin e rrënjosur deri ne deje.
Rebelizmi i studentëve të atij viti ishte refleks i lirimit nga një
mugëtirë e errët shpirtërore. Ishte një energji e shfrenuar drejt gjithçkaje që do të shfarroste hijen e komunizmit, shtypjen, internimet, vuajtjet dhe ëndrrat e ndrydhura. Idealet e dhjetëra të rinjve ishin kundërpërgjigja më rebele ndaj një sistemi që i mohonte shqiptarit edhe frymën. Ishin ulërimat e tejskamjes ekonomike, e analfabetizmit shoqëror dhe intelektual që diktatura më e ashpër e Evropës la në sofrën e shqiptarit. Uria per pluralizëm, e cila gërryente në menyrë obsesive mendjet, ëndrrat dhe vizionin e “Qytetit Studenti” të vitit '90, e shpërtheu skizofreninë e saj dobiprurëse në protesta e lëvizje studentore, në fjalime entuziaste dhe nxitëse, në artikuj godites që pas gati shtatëdhjetë vitesh thyenin hekurat e burgut të mendimit dhe fjalës së lirë. Por, prova më evidente e dëshirës dhe urisë për liri ishte greva e famshme që ç'ideologjizoi Universitetin qëndror. Sado informacione, dokumentarë, filma, shkrime, artikuj dhe dëshmi të kemi, nuk besoj të mundemi dot të kuptojmë realisht atë që ai brez ka përjetuar. Ndoshta ka qenë kënaqsia më unike që mund të përjetojë nje i ri. Të kontribuosh denjësisht për lirinë e vendit tënd dhe të luftosh me shpirt për lirinë e ëndrrave të tua është ndoshta vepra më epike që një individ i zhveshur nga çdo grimcë pushteti mund të realizojë. Kemi parasysh që studentët e atyre dy viteve kishin në dorë vetëm fjalën, rebelizmin dhe dëshirën e pashtershme për të mos jetuar errësirën e prindërve të tyre. Brohorimat, kërkesat, shkrimet, gjithçka që ata bënë për të përmbysur njëherë e përgjithmonë regjimin anti njerëzor, mishëronte urrejtjen e panegociueshme ndaj gjithçkaje që komunizmi përfaqsonte, dhe dashurinë platonike ndaj një sistemi të cilin kurrë nuk e kishin jetuar, por çuditërisht e donin me gjithë qëninen e tyre. Doni gjithçka që demokracia premtonte. Dashuronin detin e lirisë në të cilin do të mund të lundronin, i joshte çmendurisht hapja ndaj botës, integrimi në shoqërinë e mundësive, dhe premtimi se liria do të ishte thjesht liri, vetëm kaq, pa kushte, pa kritere seleksionimi, thjesht liri në multidimensionalizmin e saj. Nuk mendoj se thirrjet e tyre për liri kanë qenë rezultat dhe bindje pas studimeve të thella politike se ç'ishte esencialisht demokracia. Nuk besoj kurrsesi që ata studentë të kenë qenë thjesht artikulues të definicioneve shkencore të demokracisë. Ata dinin thjesht dhe vetëm një detaj: ishin në errësirë, Shqipëria ishte në errësire, djalli i komunizmit u kishte marrë jetën gjyshërve dhe prindërve të tyre, dhe kufoma e tij ne gjysmë jetë kërcënonte dhe të ardhmen e tyre. Ata dinin mirë vetem një detaj: demokracia mund të ishte gjithçka, më pozitive ose më negative, por nuk ishte kurrsesi komunizëm. Ç'farëdolloj sistemi që regjimi demokratik do të sillte ishte e sigurt se nuk i ngjante në asnjë aspket asaj që ata donin me çdo kusht të shfarrosnin. Përpos protagonizmit dhe meritave të padiskutueshme të studentëve, kam përshtypjen se duhet përmendur një tjetër dimension i atyre viteve. Dinamikat politike jashtë kufijve kishin përgatitur terrenin për trokitjen e demokracisë kështu që, detyra e shteteve nën regjimet diktatoriale ishte të dirigjonin sipas dinamikave të tyre të brendshme rrugën drejt demokracisë dhe rrënimit të diktaturave. Vala e lirisë, e preku Shqipërinë paksa vonë në krahasim me atë çka kishte ndodhur në nivel kontinental dhe global. Beteja e Luftës së ftohtë dhe simboli i saj, “perdja e hekurt”, kishin marrë fund që prej vitit 1989. Rënia e murit të Berlinit dhe bashkimi i Gjermanisë ishte kurorëzimi i triumfit të demokracisë moderne kundrejt pretendimeve radikale të komunizmit primitiv. Shtete të tjera fqinje kishin nisur të shijonin produktet e para të radikalizimit të lirisë dhe aspiratat e tyre ishin shkruar në kushtetutën e së ardhmes falë mundësive që përmbysja e diktaturave do të sillte. Pra, në njëfarë mënyre, tek ne po ndodhte ajo që kishte nisur botërisht, vendimarrja për të mos humbur më kohë nën frymën e së shkuarës. Nisma e studentëve dhe këmbëngulja e tyre rrezikonte gjithsesi të mbetej një rebelizëm i moshës, të cilin Ramiz Alia, ashtu si vetë Fatos Nano pohon, mund ta kishte shtypur me çdo kusht, edhe sikur rrugët e Tiraëns te gdhiheshin nën gjak. Kësaj teze i kundërvihet ajo që përmenda më sipër, se gjithsesi përmbysja e diktaturës ishte diçka e pashmangshme e favorizuar nga dinamizamt politikë jashtë kufijve. Megjithatë, të dyja tezat i bashkon i njëjti arsyetim logjik. Studenëtë kishin nevojë për një dirigjent që të drejtonte turmën, të moderonte radikalizmin e protestave dhe të uniformonte saktë kërkesat e tyre. Turmës i duhej dhënë drejtim dhe takimet me protagonistët e pushteti të atyre viteve duheshin moderuar. E ksuh më mirë se nje pedagog mund të kuptojë kërkesat deh pretendimet e studentëve, duke ditur saktësisht probabilitetin që kërkesat dhe pretendimet e tyre të plotësoheshin. Kush më mire se një pedagog, do të dinte të dirigjonte një turmë deri diku oa drejtim, që thërriste pa reshtur për nje sistem politik të cilin nuk e njihnin në asnjë aspekt të tij. Ata kishin vetëm një bindje: liri, ç'ideologjizim, grisje e çdo flete të dikaturës. Ky pedagog, që së bashku me studentët do të luante rolin kryesor në takimet dhe negociatat me Ramiz Alinë, do të kthehej në liderin më protagoniste të politiës shqiptare post- komuniste. Ishte Sali Berisha, doktori kardiolog, absolutisht lideri më influent i luftës për themelimin e demokracisë. Prania e Berishës në takimet e përfaqsisë së studentëve, me protagonistë Azem Hajdarin, Arben Imamin e te tjerë studentë që udhëhoqën protestat, është diskutuar gjerësisht nga kritikë dhe analistë politikë. Të shumtë kanë qenë ata që e kanë konsideruar Sali Berishën si shkaktari kryesor i një revolucioni të kadifenjtë, i cili solli si pasojë një demokraci të çalë dhe jo tërësisht të liruar nga prapaskenat e ambicies për pushtet. Përpos zërave kritikë, i bashkangjitem mendimi të atyre analistëve, të cilët e konsiderojnë rolin e Berishës ne ato muaj deçizivë si një nga aspektet e shumta pozitivë të asaj ngjarjeje. Imagjinoni për një çast një turmë që vetëm brohoret për liri, imagjinoni një turmë plot me të rinj që ekstazia e moshës u fshin çdo lloj freni të mundshëm, imagjinoni një turmë në të cilën vetëm një përqindje e vogël e kanë të qartë se çfarë po kërkojnë, përse po thërrasin, përse kanë dalë në rrugë, ndërkohë që pjesa më e madhe tyre janë thjesht të rrëmbyerit e momentit, ulërasin prej instiktit, nuk njohin abolutisht termin bisedim, negociatë, parashtrim kërkesash apo te tjera aspekte që e ulin protestën në tryezën e zgjidhjes. Një turmë e tillë ka nevojë në mënyrë të padiskutuar për një lider dhe i tillë lider duhet të përmbushë disa kritere esenciale për të qenë i sukseshëm në nismën që turma ka ndërrmarrë: i ditur, gjakftohtë, njohës i mirë i së djeshmes dhe studiues i thellë i së nesërmes, vendimarrës, iniciator, të ushqejë besim, të vërtetojë besnikëri ndaj misionit të përbashkët, te jetë induktiv, por mbi të gjitha të tregojë se e dëshiron atë fitore më shumë se vetë turma. Se sa Berisha i mishëronte të tilla cilësi kjo ka qenë dhe mbetet subjektive, objekt diskutimi dhe shpesh herë thjesht argument i trajtuar sipas këndvështrimit dhe pozicionimit politik. Një gjë mbetet e padiskutueshme, prania e tij ishte esenciale në shumë aspekte, dhe figura e tij do të mbetet përgjithmonë në fletët e historisë si udhëheqësi kryesor i triumfit të lirisë në Shqipëri.
Sot, e parë nga një këndvështrim tërësisht i ftohtë, trokitja e
demokracisë në Shqipëri do të mund të cilësohej si një dhuratë e kohës, duke mos i hequr asnjë presje përkushtimit dhe iniciativës studentore të fillim viteve ’90. Pyetja që do të shtroja është: përse jo pak më herët, përse ne të fundit në valën rajonale dhe kontinentale të demokracisë? Kur flet për kombe të pozicionuara në piedestalet politike, jemi të ndërgjgjshëm se nuk është një klasifikim që mund të ketë ndonjë sens lidhjeje me Shqipërine, kjo e parë në aspektin e suksesit të sistemeve demokratike. Ama kur bëhet fjalë për forcën e radikalizimit të një sistemi totalitar, historia e Shqipërisë pas luftës së dytë botërore mund të merret si leksion i forcës së palëkundur të një diktature. Kjo është njëra anë e medaljes, e cila ia atribuon vonesën e përmbysjejs së regjimit diktatorial forcës së hekurt të regjimit komunist ende gjallë në fundin e viteve ’80, edhe pse diktatori kishte vite që kishte vdekur mendërisht dhe ishte shndërruar në palaço të sëmurë që zgërdhinte së qeshuri rojet e rezidencës. Këndvështrimi tjetër, që sipas meje shpjegon ardhjen e demokracisë në Shqipëri më vonë sesa në vende të tjera të rajonit, nis nga sensi kundërshtues, sensibiliteti shoqëror dhe ndërgjegjia politike e shoqërisë shqiptare. Më lejoni të shtoj këtu, se të paktën në respekt të asaj çfarë vizionet demokratike pëfaqsojnë do të doja ta eleminonim njëherë e përgjithmonë termin “popull”, duke e zëvendësuar me terma politikisht më bashkëkohorë, më korrektë dhe më respektues kundrejt indivdit si: shoqëri, nënshtetats apo thjesht qytetarë. Duke iu rikthyer arsyetimit të mësiperm, në opinionin tim shoqëria jonë nuk është e karakterizuar nga një sens evident i pretendimit të panegociueshëm të të drejtave civile dhe qytetare. Që e shpjeguar më thjesht, do të thotë se nuk kemi fort dëshirë për të kundërhstuar, për të përbuzur atë që vërtet na dëmton dhe për të kërkuar me ngul pozitivizmin dhe përmirësimin e vendit ku jetojmë. Nëse do të bëja një ndërthurje të fjalorit politik me atë ekononomik, do të thoja se jemi konsumatorë lehtësisht të manipulueshëm, pa shumë pretendime. Jemi ai lloj konsumatori që nuk i ngjason shumë individit ekonomik racional, e si të tillë jo rrallë herë biem prè e mashtrimeve për çudi jo shumë të sofistikuara. Kemi një ndërgjegje shoqërore me të vërtete infantile dhe jemi thellësisht indiferentë ndaj dinamikave që rrezikojnë seriozisht cilësinë e shoqërisë ku jetojmë. Kjo ndodh për arsyen e thjeshtë se problematikat i shohim të largëta përsa kohë nuk prekin drejtpërdrejt secilin prej nesh, duke harruar se e sotmja ndërtohet mbi marrëdhëniet me ata që na rrethojne ndërsa e ardhmja projektohet në një ambjent të ndërtuar nga politikat e së tashmes. Do të ishte një fat i madh sikur ndërgjegja kombëtare të ishte në sinkronë të plotë me ndërgjegjen shoqërore dhe politike. Do të ishim arkitektët më të aftë të fatit tonë dhe themeluesit e një Shqipërie më të denjë për të ardhmen e brezave, më krenare në sytë e botës. Gjithçka ka një tjetër shpjegim sa intuitiv aq edhe logjik. Shkalla e arsimimit dhe intelektualizmit shoqëror. Dituria është arma nukleare në duart e individit, e cila shfarros rrezikun dhe skamjen që buron nga injoranca dhe kontribuon fuqishëm në prosperitetin dhe progresin shoqëror. Pas luftës së dytë botërore, 90% e shoqërisë shqiptare ishte e përqëndruar në fshatra dhe përqindja e analfabetëve kapte shifra në 85% për meshkujt dhe 90% për femrat. Po ju lë të imagjinoni se ç’progres bëri në këtë drejtim ardhja e regjimit Hoxha në Shqipëri, që e serviri kovaçin si gjykatës, zdrukthëtarin si anëtar komiteti, ktheu avokaten në fshirëse rrugësh, internoi poetin, burgosi shkrimtarin dhe e varrosi vendin në skëterrën më të pa rekuperueshme, në skëterrën e injorancës dhe paditurisë. Cdo pjesë e trupit ka nevojën fiziologjike të ushqyerjes për të jetuar, por uria për dije nuk paralelizohet me asnjë lloj tjetër nevoje fiziologjike. Një mendje e lënë në errësirë është si një kafshë e aftë vetëm për të marrë frymë. Dhe ky është kushti numër një i suksesit absolut dhe afatgjatë të regjimeve si autoritare ashtu edhe totalitare. Nuk ka strategji më të dobishme për themelimin absolut të pushtetit sesa ajo e eleminimit të të diturve, të atyre që kanë aftësinë të mendojnë në perspektivë, të asaj pjese të shoqërisë që kurrsesi nuk do gabonte në aftësinë për të zgjedhur rrugën më pozitive dhe më progresive për shtetin e vet. Në vitet ’90 studentët ishin drita e shpresës për atë pjesë të shoqërisë që në mënyrë të pashmangshme ishte bërë viktimë e paditurisë. Me aktivizimin e tyre, sensibiliteti shoqëror dukej se u zgjua, prindër, të afërm, miq të tyre dhe shqiptarët pa dallim kuptuan se studentët mund të ishin të flijuarit e një interesi të përbashkët. Ata u mobilizuan për të korrigjuar të ardhmen e tyre, por rrjedhimisht dhanë edhe kontributin më esencial në fundin e makthit shoqëror dhe politik të Shqipërisë. Preferoj ta përmbyll këtë pjesë duke mos harruar të përmend se është prezent një hendek i thellë mes luftës për themelimin e demokracisë dhe suksesit konkret të këtij misioni. Në këtë aspekt, nëse do të guzoja të përmblidhja në vetëm një frazë çdo dimension që lidhet me karakterin demokratik të sistemit politik të pas viteve '90, do ta quaja thjesht dhe shkurt “demokracia ne Shqipëri, një pelegrin i vonuar”. Një pelegrin me krahë të thyer që ende nuk ka vendosur të stacionohet përgjithmonë në këtë shtet. Demokracia jonë reflekton imazhin e një neonati me dëmtim të lindur gjenetik, fryt i një lindjeje jo natyrale. Nëse protagonistët e librit të viteve '90 ishin lajmëtarët e një demokracie të ngortur mbi aspiratën e panegociueshme të dëshirës për liri, ne, protagonistët e këtyre viteve jemi viktima dhe njëkohësisht fajtorë inertë të një zhgënjimi gati shkurajues. Jemi pengje të së nesërmes së painvestuar dhe aktorë irrilevantë të një sistemi skajshmërisht defiçent. Megjithatë, të paktën njëherë le të nisim të arsyetojmë jo në rolin e viktimës, por në rolin e fajtorit, në rolin e atij që lirinë nuk e ka edhe aq të panegociueshmë dhe ndërgjegjen qytetare jo gjithmonë të pastër e të pafajshme.