Ang paglaganap ng isang sakit na kalauna’y tuluyan ng naging isang pandemya ay
lubusang nakabahala at nagbigay ng takot at panganib sa buong sanlibutan. Sa
bawat araw na dumaraan libo libo ang patuloy na nahahawaan at nakikipaglaban sa kalaban na hindi makita at mahawakan. Alang-alang sa kaligtasan ng lahat at upang maiwasan na rin ang paglaganap ng sakit na nakahahawa ay nagpatupad ang pamahalaan ng mga protokol o mga pag iingat na dapat sundin. Bilang isang kabataan sa aming komunidad, nasaksihan ko ang lahat ng mga pangyayari. Nakabilang ang aming komunidad sa mga nagpatupad ng enhanced community quarantine (ECQ) upang maiwasan ang paghahawaan ng sakit. Ang dating kalsadang puno ng mga maiingay na batang naglalaro at mga matatandang nag uusap ay tuluyan ng naglaho. Mahigpit na pinagbawal ang paglabas o pag punta sa ibang lugar. Parang mga naging isa na tayong mga ibon na nakakulong sa isang hawla. Kung lalabas man ay madami pang prosesong pagdadaanan at dapat ay laging nakasuot ng pang protekta laban sa sakit katulad ng face mask at face shield. Naapektuhan na rin maging ang trabaho ng ilang mga mamamayan na natigil at ang edukasyon naming mga mag aaral. Ngunit nasaksihan ko din ang pagtutulungan ng bawat mamamayan. Nasaksihan ko kung paano nila ipinaramdam ang pagmamalasakit sa kapwa sa kahit simpleng paraan lang ng pagtulong. Nagkaroon ng food pantry sa aming lugar sa tulong na din ng mga taong nagnanais makatulong kung kaya’t nagkaisa silang lahat. May mga nagbigay ng ayuda at maging ang gobyerno ay naglunsad ng isang programa na nagbibigay ng kaunting tulong sa bawat pamilya sa kanilang pang araw araw. Bilang isang tao na humaharap din sa hamon ng buhay, madami man tayong nagiging problema pero lagi nating tatandaan na malalagpasan natin ito kaya bilang isang estudyante katulad ko kailangan natin magpatuloy sa buhay kahit mahirap.