Ano Ang Mas Mabisang Plataporma ng Pag-aaral?
Ang Face-to-Face o Ang Online?
Sa Panulat ni Bb.Hannan
Lakandiwa:
Mainit na pagbati, madla kong kasali
Ilaan ang pandinig at pangkalahata’y ibahagi
Alamina Ansari, ang inyong lakandiwang binibini
Akin nang sisimulan ang simunong tayo ang may ani
Kamakailan lang noon pag-aaral ay hinadlangan
Ng isang pandemyang hindi natin inasaahan
COVID-19 ay tuluyang tinuldukan
Ang pangungusap ng karamihan, tila lahat natauhan
Sa pagdalo ng pandemyang di inimbitahan
Sandaang sektor ang lubusang naapektuhan
Ekonomiya, ang hindi kayang ipatahan
Pagkat sangkatauha’y tambay na sa tahanan
Paaralan, ang isa larangang nasaraduhan
Sa panibagong patakarang susunuran
Protokol ang nagsisilbing kaurungan
Kaya’t naiba ang plataporma ng pampaaralan
Ngayon tayo’y nasa entabladong panig ay nahati
Ang mga panauhin ko ay handa ng iwagi
Kani-kanilang ilalahad mga pangyayari
Magsipalakpakan, enerhiya nila’y isauli
Sa gawi kong kanan kanyang di papayagan
Ang pananaw sa online kaya’t face-to-face ang ipaglalaban
Habang sa kaliwa, ang masiyasat na paninidigan
Ang online plataporma hanggang sa digmaan
Atin nang dinggin, kanilang bating panimula
Matatalas na mambabalagtas ating hinuha
Pahangain ang madla sa paksa
Ano ang mas mabisang plataporma ng pag-aaral
Ang face-to-face o ang online?
Ampuan
Face-to-face:
Magarbong araw ang pagbati ko sa tanghal
Ahlam Faisal, sumainyo aking respeto’t dangal
Sa pagkatuto ng husto ay nasa plataporma ng pag-
aaral
Face-to-face ang mabisa, ito’y aking idadaldal
Online:
Pangkalawakang entablado, gusto ko ng ingay sa
hiyaw
Hannan Ampuan, ang sa laban ay hindi aayaw
Kung usapan ay pag-aaral, online ang umaapaw
Yan ang platapormang matunog kong isisigaw
Lakandiwa:
Tila handa na sa matatalinghagang dulas
Ang mga matatalinong mambabalagtas
Kanilang mga pananaw ang ibibigkas
Sila na’y magpapakitang gilas
Face-to-face:
Tila mundo’y nagbabalik
Mula sa seryosong pagkatahimik
Nanunumbalik mga pananabik
Ng ating mga damdamin sa pagkatangkilik
Pampublikong lugar muli nang nagbukas
Ngiti ng mga tao’y sagradong nababakas
Sa pandemyang pilit tayong tumatakas
Ay ngayon dumating na sa wakas
Mall, stores, mga paktorya ay nagdiriwang
Sa paglaya at umpisang punan ang kulang
Nagsihanay pagbabalik eskuwelahan
Kaya’t naiba na naman ang mga kinagawian
Ang pagpasok sa face-to-face ay mas mainam
Direktang diskusyon ang tanging siyang agam
Mga kursong matematika at agham
Ay mas naiintidihan kaysa mala-pagtuturong liham
Pag face-to-face classes ika'y mas determinado
Attendance pa lamang sampung porsyento sa grado
Hindi ba't sa balik face-to-face tayo'y mas ganado
Lalo na't ang crush mo'y makakasama mo ng sagrado
Online:
Pag-aaral ang usapan, hindi ang hinahangaan
Aking angkin ang inyong dinig panandalian
Kaibigan, wag siya tularan
Kumakabilang planeta kanyang pala-isipan
Sa pagbabalik face-to-face
Ramdam niyo rin ba ang tensiyon sa budget?
Mga babayarin tulad ng tuition fees
Aba ika'y mahihingal sa higit limang numerong digit
Hindi tulad sa online
Pwede ka pang makasideline
Kumikita habang nagaaral
Iyan ang kagandahang asal
Sa online upuan ay isahan
Hindi ka papalit palit ng gusaling pupuntahan
Pamasahe, baon ay hindi na kailangan
Gastos talaga'y tuluyang nabawasan
Karamihang estudyante nagkaroon ng bagong pagasa
Sa online natagpuan nila
Ang mas madaling plataporma
Na nagbalik sigla sakanila at gana
Face-to-face:
Sino ba naman kasi mawawalan ng gana?
Eh karamay mo si google sa bawat marka
'Search Google' ang panata
Ng online na sinasabi mong plataporma
Kung karamiha'y tatanungin
Masasagot kaya nila kung wala na si google sa
paningin?
Mga eksams, pagsusulit at takdang aralin
Tila si google ang akdang palaging gagamitin
Sa face-to-face di ka mababahala sa internet
Kung mahina ba para lang makapresent
Kung mas mabisa talaga online
Bakit mga estudyante natutulog habang may klase
sa online?
Online:
Sa online lang ba nakakatulog?
Sa face-to-face din naman muntik pa ngang
mahulog
Sa upuan kasi antok na antok
Walang sapat na pahinga kasi araw-araw may pasok
Sa paggamit ng google
Di yan sapat na batayan para iyong igugol
Na ang mga estudyante sa online ay hindi natututo
Sa pagkat depende yan sa pagkakahusto
Kung sukatan sa pagkatuto'y isang tanong lang
Aba baka lahat ay Jose Rizal nang maturingan
Online Class ay mas mabisang plataporma
Kung saan edukasyon ay hindi na problema sa pera
Lakandiwa:
Samantalahin ko munag itigil
Ang pagtatalong nakakapanggigil
Mga salitang binitawan ay hinggil
Sa makatotohanang pangyayaring di mapipigil
Atin munang ipalathala ang kaalaman
Sa mambabalagtas kung ano-ano ang mga
kalamangan
Ng kani-kanilang panig na ipinaglalaban
Panig ng face-to-face iyo nang unahan
Face-to-face:
Sa pamamaalam ng pandemya
Face-to-face classes ay nagbalik na
Matututo nang direkta
Hindi gamit ay maka-teknolohiya
Pag may klaripikasyon sa bawat diskusyon
Isang kaway lang para magtanong
Di tulad sa online na kailangan camera'y on
Tapos mag unmute kahit mahina internet connection
Mga grupong aktibidad
Madaling naiiunsad
Sa pamamaraang mabilis ilahad
Matatapos lamang sa limang bilang sa palad
Dako naman sa partisipasyon sa klase
Na di kailangan mabahala kapag nakastudy
Sagot mo man ay tama o mali
Mayroon paring puntos dahil sa pagkapursigi
Lamang sa kaalaman pag face-to-face sa paaralan
Tila wala ni isang parirala maiiwan
Pati mga tuldok ay aabangan
Memorisado lahat, hindi man lang nakulangan
Sa face-to-face hindi lang pagkatuto ang batayan
Sa etiko sa paglilinis ay napapatnubayan
Disiplina sa sarili'y nagagabayan
Sa pananamit pa lang ito na'y naoobserbahan
Masukat na nauuna ang face-to-face na plataporma
Numero sa numero ito'y hindi minima
Libo-libong estudyante matataas ang marka
Ngayon muli natin buksan ang tulad niyan na pahina
Online:
Aniya'y mga palatuntuning paanyaya
Aking ipapakita ang kahulugan ng paglaya
Habang aking iniisa-isa
Kalamangan ng pinili kong plataporma
Malaya sa susuotin, kahit ba nakapajama
Sapat nang maghilamos sa mukha
Di kailangan mamahaling brand na porma
Para lang presentableng makita
Malaya sa oras, di na kelangang pumunta
Sa mga group meetings na kunyare may magagawa
Mga aktibidad ay matatapos ng maaga
Pagod at gutom hinding hindi ka maabala
Malaya sa utang, ating mga pamilya
Pamasahe, baon, panglibro di na mabahala
Load lang ang kailangang ipaalala
Problema ng magulang ay di na malala
Malaya sa sakit, sa bahay ay mapprotektahan
Mga hawaan dulot ng pandemya sa bayan
Di na suot ang mask, face shield o anuman
Sa online prayoridad ang kalusugan
Malaya sa kapwa pangungutya
Mga depresyon dulot ng husga
Sa online ay di na yan balita
Kaya't mas mainam itong aking plataporma
Malaya sa mga mapanlinlang na pagpapakilala
Mga kaibigang sa likod ang tira
Sa emosyon, pisikal o pinansyal na problema
Sa online ay di na yan ididipena
Lakandiwa:
Mga palatuntunin ng dalwa
Ay tila tayo'y napasang-ayon sa kanila
Ano pa kayang mga salitang mahika
Ang kani-kanilang maipupunyagi para tayo'y
madala
Akin nang pahihintulutan
Mga panauhing kong magbangayan
Linyang sagutan sa bawat banatan
Online ang mauna s
Sa pagkat ito ati'y nakaraang naranasan
Online:
Sa online di ka na gagastos sa porma
Kaya't sabayan aking platporma
Face-to-face:
Hindi daw gumagastos eh rejuvinating set niyo nga
Aninag sa inyong mga mukha
Online:
Nakikisabay sa trending
Glow up challenge makibonding
Face-to-face:
Paalala, hindi natin usapan ay makisama
Para dito'y magpabida ka!
Ang paksa'y anong plataporma ang mas mabisa
Hindi ang kalagayan ng mukha!
Online:
Oo, pagkatuto ang sentro ng ating usapan
Pero sa ayos mong yang
Hindi ba halatang ika'y pormang porma?
Face-to-face:
Hindi ka ba makaintindi
O baka pandinig mo'y tuluyang nabingi
Dulot ng online na wala kang naririnig
Sa diskusyong tunog lang ay 'ingg, ingg, eng'
Online:
Eh ikaw nga tong natutulog mahimbing
Sa loob ng klase na parang may tilileng
Face-to-face:
Kayo nga tong may problema sa pag iisip
Pati 'what you have learned' sa google sinisipsip
Lakandiwa:
Katahimikan! Masyado nang nagkakapersonalan
Tila usapa'y magkakainitan
Delubyong hindi inaasahan
Aking madla, sarili'y ihanda sa matunog nilang
bangayan
Online:
Google? Nagmamalinis parang di mo rin
pinakinabangan
Nakasurvive ka nga, google din may kinalaman
Face-to-face:
Panig ko'y tila iyong pinapaunlakan
Na mas mabisa ang face-o-face kasi may
natututunan
Online:
Kung sa face-to-face kelangan pa mag print
Sa online sapat na notebook at ballpen
Face-to-face:
May notebook at ballpen nga
Ang tanong may natututunan ba?
Online:
Di mo pa ba talaga nadama
Sa nakaraang taon, LAUDEs sa karamihang may
diploma
Face-to-face:
Kaya nga nakakapagtaka
Tila mas epektibo ang google sa kaysa mga
gurong nagtyatyaga
Online:
Iyo bang sinasabi na gumraduate lang sila
Dahil google ay karama'y at don sila nagmula?
Iyan talaga pag may inggit sa baga
Tila di matanggap tagumpay ng iba!
Face-to-face:
Huwag ka nga munang mangsalita
Bawat bara mo’y naamoy ko iyong hininga
Ganyan ba kabisa
Ang online na sinusulong mo pahinga ng pahinga?
Online:
Wala na akong paki
Sa pananamit ko ba’y may mali
Ikaw nga itong kung manamit estitik ang pili
Pag pinaoral naman, ayun natatameme
Face-to-face:
Ikaw nga itong kunyare nag-aaral
Aba’y control F lang pala pinagdarasal
Online:
Ikaw nga rin itong habang nagsususulit
Aba! Sa kudigo’y nakasilip!
Face-to-face:
Sabihin mo na ang gusto mong ilathala!
Ebaluwasyon ay higit na mas mahalaga
Sa pagsusulit sa klase nga nitong simula
Medya sa estudyante lahat zero ang marka
Online:
Bakit isisisi sa online kanilang mga marka?
Kasali ka lang doon, kaya ka dada ng dada!
Face-to-face:
Nasanay na sila na sa bawat sagot sa pahina
Click the search button ang napupuna
Online:
Ano't kay laki ng problema mo sa google?
Kaalaman sa edukasyon ang kanilang ginugugol
Face-to-face:
Ang punto ko, estudyante'y di na natututo
Ang google ang tila kanila'y sinasaludo
Online:
Sa google kahit scrolling lang ika'y natututo
Anong problema, hindi ka ba marunong gumamit
nito?
Face-to-face:
Abah! Bakit ako'y iyong tinatanong?
Isearch mo sa google, magaling ka naman don!
Online:
Abay sumusubra ka na!
Face-to-face:
Sinampal ka ng reyalidad o ano pa?!
Lakandiwa:
Puwersahang itigil ang sandaling pangigigil
Baka sumabog sa mga di pa mabibitawang hinggil
Maangahang ang mga katagang inyong kinitil
Nakakatawa't nakakatuwa, ang hinantunga'y ibang
lebel
Huminahon muna aking mga kalahok
Sa pag ngayo’y bagong pasok
Talino’t talento ng bawat isa’y mahihimok
Di sukatan ang grado para isa’y magmukmok
Sa pagaaral, madami talagang hadlang
Ngunit hindi sapat na batayan
Na ating husgahan na ang mga gumraduate
kamakailan
Ay dahil sa google ang kanilang sinandalan
Sila pari'y nagpursige at nagaral mabuti
Kaya't dapat sila'y pinupuri
Na kahit sa kalagitnaan ng pandemya
Nakayanan nilang mag-aral at hustong pumasa
Hindi masama ang paggamit ng google
Kung sa mabuting pag aaral ito'y igugugol
Ito'y may serbisyong tayong lahat ay nakinabang
Google ay pasalamatan, wag to ipangalandakan
Sa di matuwid na pamamaraan

Ika nga ng ating Miss Universe

Catriona Gray sa kanyang popolar na verse
'Everything is good but in moderation'
Tama nga naman, depende pa din sa paggamit at pagtuon

Kaya't akin nang sasarudahan

Ang tanghalan ng madamdaming tagisan
Mambabalagtas, hiling kong kayo’y magkamayan
Magpasalat sa isa’t isa pananaw ay nakamulatan

Aking madla, inyo nang husgahan

Sa pamamagitan ng palakpakan
Ano nga ba ang mas mabisang plataporma ng pag aaral?
Ang face-to-face o ang online?