Narito ang mga pangkaraniwang mantsa at ang mungkahing paraan ng
pag-aalis ng mga ito.
1. Kalawang – Lagyan katas ng kalamansi at asin o pinitpit na kamyas at ibilad sa araw. Ulitin nang ilang beses kung kinakailangan hanggang maalis ang mantsa . 2. Tinta – Banlawan sa malamig na tubig bago labhan at sabunin. Maaaring lagyan din ng katas ng kalamansi at asin kung di matanggal sa unang paraan. 3. Putik – Gumamit ng brush upang maalis ang mantsa bago labhan tulad ng ibang maruming damit. 4. Pintura – Kuskusin ng bulak na may turpentina bago labhan ang damit. 5. Mantika o langis – Buhusan ng mainit na tubig ang bahaging may mantsa bago ito labhan. 6. Chewing gum – Lagyan ng yelo ang mantsa upang tumigas bago kaskasin ng mapurol na kutsilyo. Kuskusin ang mantsa ng bulak na may gaas upang maalis ang paninikit. 7. Dugo – Ibabad kaagad ang sariwang mantsa sa malamig na tubig bago ito kusutin at sabunin. Ang natuyong mantsa ay kusutin sa tubig na may asin. 8. Tsokolate o Kape – Labhan sa sabon at tubig ang mga mantsa. Kung hindi matanggal ang mantsa,gamitan ng katas ng kalamansi at asin. Labhan at patuyin. 9. Kandila – Kuskusin ng mapurol na kutsilyo. Takpan ng mamasa- masang piraso ng papel at plantsahin ang lugar na may mantsa nang ilang ulit hanggang masipsip ng papel ang natunaw na kandila. 10. Tagulamin – Ibilad sa araw ang mantsang nilagyan ng katas ng kalamansi at asin. Ulitin ito nang ilang beses hanggang matanggal lahat ng mantsa. 11. Prutas – Budburan ng asin ang sariwang mantsa upang huwag kumalat bago banlawan sa kumukulong tubig. 12. Ihi – Sabunin sa tubig na may suka hanggang maalis ang mantsa.