BMA AW

An Official Organ of The Bangalore Mizo Association Registered Under Societies Act of Karnataka No. BLU-S188-2007-08 Date 7 May 2007
Vol. XVIII Issue No.11 Bangalore Mizo Association Pathianni Tin Chhuak Chanchinbu Date: 17th June 2012 Phek Khatna

Tualchhung
Vawiin hi Father's Day a ni a,

Khawpui zin thu - I

Dr. Mahminga Sailo
Thingtlang naupang : Tlangval senior la ni hauh lo mah ila, hun erawh a kal ve ta nual mai. Thingtlanga seilian tih takah, khaw danga zinna hun remchang hi a awm khat hle mai a. Kum 1995, pawl nga ka zir kum khan, ka pa ruahmanna zuiin Leitlangpui zin turin kan inbuatsaih a. Ka thiante, kumtin Krismas kawrmawi leia an kalna khawpui ka zin ve dawn avangin ka phur hle. Hemi hma hian, pawl li kum tawp exam (board exam) kan zawh niin, kan thian-za-ho insawm phur thutin Lunglei kein kan kal thleng tep a. Kawng lakah kan veng mite kan tawh avangin min hruai kir leh si a; vanduaithlak takin Lunglei ka thleng ta lo. Indipenden deis pareit en turin : Thingtlanga chen chuan; doctor inentir lem lovin, nu leh pate Lunglei kalin Pu Tawnga/Pu Zawta a rawn mai thin a. An damdawi chawh kha ei mai thin. Hemi tum hi chuan, chhuanlam remchang takin ka pum tha lo entirna remchang tak a nih bakah, sipai lam (parade) la hmu ngailo ka nih chu ka pan hriain ka nau (hmeichhe naupang) nen Lunglei min zinpui a tum a ni. Furkhaw zinkawng : Vawkhniakzawn thla ral tawh mah se, ruah erawh a sur nitin a. Ruahsur hnuaiah kei ngatin zinkawng kan zawh a. Zo kawng nal leh zim tak, hnim em em kara vangvat han kai te, hriat loh laia min lo zuk thi leh nuai thin te kha keini tan chuan thil thar a ni lem lo. Tin heti hi a ni a, kan khaw thenawm kan thlen meuh chuan, a vawikhat nan bus kan chuang ve ta. Kawng erawh a chhiat namenin a chhe lova. Ke a kal thang tan chuan,bus-a chuan kha a hahthlak fe zawk. Luak chhuak hluiin min sawh hnuah chuan man kan la chawi zui! Leitlangpui kan thleng ta : Thingtlang naupangin khawpui kan han lut chu kan tim dui mai a. Ka patea te inah kan thleng a. Anni chuan meikhu awm miah lovin, engemaw tle virver kha an kap alh pep a, chaw an chhum mai a; an changkang bik khawp. Chaw ei ber kha a van hrehawm tak! Khawpui mi chu an lo changkang si, chaw an heh lo khawp mai a. Keini thingtlang naupang rawp ta chuan, kan khawpui unaute ei let hnih let thum te kan ei ta mai. Inthlahrunawm duh tak a ni. Indipenden deis ni chuan Dhobi mual (Thuamluaia mual an tih tak) kan va kal ve a. Khatiang em em a mipui tam leh lirthei tam kha ka piana hnulamah ka la hmu ngai lo! Khang lirthei zozai, inzui dul dul mai te kha tu ta tak ni ang maw tiin kan thlir zui vawng vawng a. Sipai leh sikul naupang hrang hrang an lam rual thup thup a. An lam laia band party khuangpui an han vaw thum dum dum mai te kha, Tipu Sultan filmkan en laia British sipai-ho laipui ri ang mai niin ka hria a. Hmuhnawm ka ti ta reng reng lo mai. Kawng kan bo tep : Khawpui zin tih takah, ka nu leh pa te erawh chhungkaw mamawh lei turin an kal hran a ngai si. Kan unaute nen kan inkawm a; mahse anni khawpui naupang chuan min kawm rei peih miah lo. Dhobi mual atangin kan thlenna Rahsivenga kan haw a ngai ta. Ka nau nen chuan ti dek chungin zinglam kan kalkawng kha kan chhui zui ta a. Kawng pengthuam in ang tak tak a lo awm si, rilru a va hah duh teh reng em! Ka nauvin kawng a lo vawng hlauh zawk a, kan bo lo hram!
(phek hnihna ah chunnzawmna)

khawvel pum huapa Pa te tana he ni hi serh bik a ni. Bangalore Pa (Father's) awm zawng zawng te he ni chibai bukin, duhsakna sang ber kan hlan e.
Nl. Sawmtei Khawlhring, hun rei

tak BMA Aw Editor lo ni tawh thin chuan thawhtanni hian Hyderabad lamah min pem san dawn a. A kal zelna turah BMA Aw Editorial Board te chuan duhsakna sang ber kan hlan e.
Khatla Branch YMA chuan an

Golden Jubilee lawmnan phai lama Mizo Association te tanpui a, keini BMA te pawh Rs. 2000 min pe. NECLPF Football tournament August thlaa lo awm turah BMA team te tel ve dawn a. Team huikhawma hma lo la turin BMA Executive Committee Vawi-2 na chuan BMA Football committee te a ruat a. Convener: Tv.Emanuel Lawmkima Secy: Tv. Lalhriatkima Chenkual
BMA Executive Committee Vawi-2

na chuan chanvo hranghrang chang turin mi a ruat thar a. Chungte chu : Cultural Secy i/c : Pu Joel Sailo Academic Secy i/c : Tv. Muanzuala Rokunga Section Secy : Tv. Lalhruaitluanga Sailo Vankhama Section Leader : Tv. L.H. Thatha
BMA Directory a hming chuang

duh tan membership form theh luh hun hnuhnung ber chu 26th Aug 2012 a ni a. Member hlui zawng zawng te pawhin form hi submit leh vek turin kanin ngen e
Chhinlung Magazine pawh hralh a

kal hle a, thahnem ngai taka zuartu te hnenah lawmthu kan sawi mawlh mawlh e.

Vol. XVIII Issue No. 11 Bangalore Mizo Association Pathianni Tin Chhuak Chanchinbu Date: 17th June 2012 Phek Hnihna
Editor Lalhruaitluanga Sailo Joint Editors Lalmuanzuala Zaithanmawii Hnamte Contributor Benjamin Rualthanzauva Dr. Lalhmingmuana Sailo Circulation Managers Diki Hnamte Hmingthana Ralte BMA AW lak man: Thla khat Rs.20 Thla thum Rs.50 Thla ruk Rs.90 Thla sawmpahnih Rs.180

(phek khatna chhunzawmna..)

Ka pa rualawhna : Thingtlang pa, zo hnathawk ni mah se, ka pa hian zirna hi a ngaisang a. Ka pin (ka pa nu) a boralsan hma avangin lehkha a zir chhunzawm thei lova. A fate zirna erawh a theih bakin min buaipui thung. Sum nei lo chung chungin ningkhawng kan hriat theih nan tiin Lungleia Independence Day hman dan pawh hmu turin min hruai reng a ni. Thiam leh tihtheih nei tlem mah se, kan zirna chungchangah kan zirtirtute a rawn peih a. Lehkhabu kan mamawh pawn a ngaipawimawh em em thin. Hei hi tudang hnena ka hriat ni lovin, kan zirtirtu ngeiin min hrilh. Nia, ka pa hian khawvel teha zahawmna reng a nei lo, mahse a fate lehkhazirna zela Pathian ring leh tawngtai uar tak chunga a inhlanna hi, a fate tan hian hlu tak a ni. A tawngtai chhanna avanga aman a tih theih miah loh, midangte kal tlanga Pathian malsawmna, tanpuina sum leh pai leh duhsakna kan dawn zawng zawng hi chhiarsen rual a ni lo. Banglore Mizo Pa zawng zawng, Pa-te Ni chibai ka buk che u. In nupui fanau te tan chhenfakawm leh belhfakawm, chhungkaw PA niin, Kohhran leh khawtlang tan malsawmna lo ni zel ang che u. Pa-te Ni hman nuam vek ule.
****************************************************************

E-mail: bmanews@gmail.com Website: www.bangaloremizo.info

Editorial
Thiamlo leh tlinglo tak chungin, thla hnih zen zawn chu BMA Aw enkawl hna chu Pathian zarah leh hruaitute duhsakna zarah kan lo thawk ve ta reng mai a. Tih ngai loh ti kan nih avangin mahni leh mahni insit a na a, duhthusam lohna tam tak a awm tih chu sawi ngailoh a ni a. Amaherawhchu, mi tlawmngai leh thahnem ngai taka article rawn thawhtute, news update rawn petute zarah heti hian kan kal chho ve bek bek zel chu a ni a. Hetiang mi thahnem ngai tak te avang chauhva mualpho lo kan ni tak meuh meuh a, an chungah hian BMA Aw Editorial board chuan lawmthu a sawi tak meuh meuh a ni. ****************************

ILLUMINATI
Tunlai hian, Illuminati hi eng tihna nge? tiin kan inzawt ta zeuh zeuh a. Latin tawnga illuminatus tih chu, chhungrila thil hriatthiamtir / varpawhtir (enlightened) tihna a ni a, a plural chu illuminati a ni. Zabi 18-naa Europe leh America rama, mihring ngaihtuahna thawveng diptu: khawtlang leh sakhaw serh le sanga puithuna thilte chika, hriatna leh finna hmanga thil atthlak umbova, khawtlang siamthatna, cultural movements thlen hun lai, Age of Enlightenment-ah khan, chu hna chu thawkzui zel turin, Bavarian Illuminati tih hming puin, 1776 May ni 1-ah, Adam Weishaupt-a'n a din a. He pawl hi a ruk a din (secret society) a ni a. Tunlaia Illuminati titi an vawrh hi hemi chhunzawm zelna anga sawi an awm a, pawl thar anga sawi an awm bawk. Bavarian Illuminati hi kum 10 chhungin Europe-ah branch neiin a taidarh a, mi thiltithei leh ropui 2,000 zet telna nia sawi a ni. 1777-ah Karl Theodor-a chu Bavaria (tunah German) roreltu a lo nih khan, chutiang secret society zawng zawng chu dan kalha puangin a titawp vek a. Mahse tunlai thleng hian, chu Illuminati secret society chu a ruka lianpuia la awm reng angin titi-ah sawi chhunzawm a ni ta a ni. Tichuan, tunlai hian, Illuminati secret society chuan khawvela ro an rel theihna turin, a ruka tum nei-in khawvel politics, economics, communication leh tlangau (media) hi an khalh a. An thiltum hlawhtlinna atan khawvel ram hruaitu an tlintirin an laktir a, economic sanctions lian zawng zawngah an inrawlh a, mihring pung chak lutuk tur hi HIV/AIDS hmangin a rukin Illumniti pawl chuan an thunun mek a. Africa rama ralthuam leka insamna leh tampui mitthi leh hripui thleng thinte hi mihring pung chak lutuk tur venna atana a fing zawkin a mawl zawk chunga a ruka thil an thlentir niah mi thenkhatin an ngai. Hollywood leh pop music khawvelah phei chuan an han vawrh nasa tawh khawp a, Illuminati thu zawm lo Tupac Shakur, Michael Jackson leh Whitney Houston chu an that a, Lady Gaga chu Illuminati ambassador a ni a, Rihanna chu zahmawh rawngkai album an chhuahtir a, Beyonce naute hming phuah thlengin an inrawlh niin chhuidawntute chuan an sawi ta a ni. Heti khawpa zaithiamte khawvela an inrawlh avang hian Illuminati chuan khawvel an hnehna chhan tur a awm lo. Hetiang titi an siam loh chuan Hollywood-a tiitzuar(gossipmonger) te eizawnna a tawp dawn tlat a ni. (Source : lengzem)

Dawn ve teh
Ruih chilh atan chuan eng mah hi a tha lo va, a tha lo zingah chuan zu ruih hi a tha lo ber a ni. Hriselna a tichhia a, rilru a pawt hniam a, mihring khawsak dan phak lova min siamtu a ni. Thuruk a puangzar a, buaina a thlen thin a; hurna leh zah theih lohna a ken tel avangin a hlauhawm a ni. Zu rui buk buk chu mi fing hmuha hmuh tur an awm ngai loh avangin i ruih cuan mi fing tak I ni lo a ni mai. Zu rui chu mihring ena en chi an ni lo; a chhia leh a tha te, a mawi leh mawi lo te thliar hran nachang hre lo ramsa nen an inang chiah a ni. - Penn *****************************
Chutichuan nangni mi sual mahin in fate thil tha pek nachang in hriat chuan, in Pa vana mi chuan a diltute chu Thlarau Thianghlim a pe ve dawn em! A ti a. Luka 11:13