Napakagandang balita ang ipinahayag ni Pang. Benigno Aquino III noong nakaraang buwan na napunan na ang lahat ng pagkukulang sa mga silid-aralan sa bansa, kaya’t isa itong kapurihan at katagumpayan sa kasalukuyang panahon. “There is no more classroom shortage in the country.” Sinabi ni PNoy sa kanyang talumpati sa pagpapasinaya sa mga silid- aralan sa Carmona National High School, Cavite na nagpapahiwatig na ng simula ng magandang pag-aaral sa bansa. Ayon kay PNoy, binibigyang papuri niya si Education Secretary Armin Luistro sa pagpapatayo ng 66,813 na silid-aralan na mas mataas sa 66,800 lamang na target kaya’t bagama’t 13 lamang ang labis, malaking karagdagan pa rin ito sa bilang ng mga silid-aralan sa bansa. Gayundin, kasabay ng pagpapatayo ay ang pagsasaayos ng 4,599 na silid-aralan sa Visayas region at 13,021 sa Palawan na nasira ng mga kalamidad na humagupit sa bansa na pinatutunayan lamang ang pagpupuno sa mga kakulangan sa silid- aralan at kagandahang ihahatid ng administrasyong Aquino sa edukasyon ng bansa. Kaugnay nito, ang pondo ng mga ipinapatayong silid-aralan ay nagmula sa national at local government funds at mga donasyon mula sa mga pribadong sector kaya’t masasabing ang bawat mamamayan ay kaisa sa malawakang proyektong ito. Samantala, sinabi ni Luistro na magpapatayo pa ang DepEd ng mas maraming silid-aralan ngayong taon para sa paghahanda sa implementasyon ng senior high school sa 2016 kaya tuluy-tuloy na ang ginagawang aksyon ng pamahalaan upang mas magandang kalidad ng edukasyon ang mapasakamay ng mga kabataan. Sa kabilang banda, maging ang backlog na 62 milyong mga textbooks ay unti-unti na ring mareresolba. Sa katunayan, sinabi ito ni PNoy, at ang mga librong nakuha ay mas mura ng 40 porsyento kumpara noong nakaraang administrasyon. Dagdag pa rito, ang 2.5 milyong kakulangan sa upuan ay naresolba na rin ng kasalukuyang administrasyon sa pamamagitan ng pagrerecycle ng mga troso na ginagawang silya para sa mga mag-aaral. Gayunpaman, nararapat ang tuluy-tuloy na pagpapatayo ng mga silid-aralan gayundin ang pagpupuno ng mga natitirang kakulangan sa pag-aaral ng mga kabataan para sa taun-taong pagtaas ng enrolment rate sa bansa hindi ngayong tila nagpapakitang-gilas ang administrasyon sa kanilang nalalabing dalawang taon sa panunungkulan. Subalit pinatutunayan lamang ng administrasyong Aquino ang kahalagahan ng edukasyon sa pamamagitan ng aksyon upang makamit ang mataas na kalidad nito dahil naniniwala siyang “Education is the central strategy in reducing poverty and building national competitiveness.” Rekomendasyong aprub! Napakagandang ideya ang inirekomenda ng Parish Pastoral Council for Responsible Voting (PPCRV) na maglagay ng satellite voters registration sa mga simbahan at barangay sapagkat makatutulong ito sa mas mabilis na pagrerehistro. Bilang paglilinaw, ang paglalagay ng mga satellite voters registration sa mga simbahan at barangay ay iminungkahi ng PPCRV sa Commssion on Election (COMELEC) para sa mga may malalaking populasyon upang maging mas accessible sa mga botante ang pagpaparehistro. Ayon nga kay PPCRV chief at dating ambassador Henrietta de Villa, naniniwala siyang mas madali para sa mga mamamayan ang makapagparehistro sa ganoong paraan sapagkat kapag araw ng Linggo ay marami ang nagsisimba. Gayundin, sa ganitong paraan, marami ang hindi na tatamarin sa pagpunta sa mga limitadong voters registration na itinalaga ng COMELEC sa kani-kanilang lugar dahil magiging abot- kamay na ang pagpaparehistro bilang botante para sa nalalapit na eleksyon sa 2016. Kaugnay pa sa isyu, iminungkahi rin ng PPCRV sa COMELEC ang pagpapaigting ng information campaign sa pamamagitan ng pag-aanunsyo nito sa mga misa tuwing Linggo kaya’t hindi lang mas mabilis na access sa pagpaparehistro ang maidudulot nito kundi pati na rin ang kaalamang maipapabatid sa mga botante tuwing Sabbath day. Dagdag pa ng PPCRV, makatutulong din ng malaki ang voters education and campaign sa mga paaralan tulad ng pagsasagawa ng seminars at conferences para ipaalam sa mga estudyante ang kahalagahan ng kanilang boto sa pagpili ng karapat-dapat na uupong mga opisyal ng bansa. Sa kabila ng mga rekomendasyon ng PPCRV, marahil ay makadaragdag lamang ito sa gawain ng simbahan at sa ngayo’y nararapat munang resolbahin ang hindi pa rin naipapatupad na “biometrics” o finger printing process na tutugon sa problema sa halalan tulad ng flying voter, na ipinagtataka ng PPCRV. Samakatuwid naman, malaki ang maitutulong ng magandang ideya ng PPCRV na paglalagay ng voters registration sa mga simbahan at barangay gayundin ang pagbibigay ng voters education and campaign para sa mga botante. Maling aksyon Hindi tama ang ginawang pagbomba ng water cannon ng Chinese Coast Guard sa mga mangingisdang Pinoy sa Scarborough Shoal sapagkat makadaragdag lamang ito sa lumalalang alitan sa pagitan ng Pilipinas at China. Ayon kay AFP Chief of Staff General Emmanuel Bautista, ang insidente ay nangyari noong Enero 27, sa may 124 nawtikal na milya ang layo sa Masinloc, Zambales, base sa patuloy na monitoring sa pinagtatalunang teritoryo. Sinabi ni Bautista na intension lamang ng mga Tsino na paalisin ang mga Pinoy sa Scarborough Shoal na bukod sa Spratly Islands sa Palawan ay kabilang rin sa kanilang inaangking mga isla na higit naming mas malapit sa bansa kaya’t anupaman ang kanilang naging intensyon sa pambobomba, hindi makatarungan ito lalo pa’t hindi pa nakukumpirma kung sino ang nagmamay-ari ng nasabing isla. Bilang aksyon ng Pilipinas sa insidente, nagprotesta ang bansa sa pangunguna ng Department of Foreign Affairs (DFA) at ipinagpapaliwanag ang China, sapagkat wala silang karapatang ipagtabuyan ang mga mangingisdang Pinoy dahil ang Bajo de Masinloc na pinangyarihan ng insidente ay nasa hurisdiksyon n gating bansa kaya’t malaya at may karapatan ang mga naging biktima sa naturang lugar. Gayundin, napakasama ng ipinakitang pakikitungo ng mga Chinese troops sa mga mangingisdang Pinoy na naghahanap lamang ng ligtas na lugar upang makublihan sa kabila ng masungit na lagay ng panahon sa nasabing lugar. Kaugnay nito, nakatanggap din ang DFA ng siyam pang kahalintulad na insidente ng pangha-harass sa pagitan ng Chinese vessels at ng mga nabibiktimang mangingisdang Pilipino sa nakalipas na taon, na nagpapakita lamang ng hindi magandang pakikisama ng China sa mga Pinoy at lalong umiigting dahil sa alitan sa teritoryo. Sa kasalukuyan, humihingi ng paliwanag ang gobyerno ng Pilipinas sa China kung bakit nagawa ng mga Tsino ang pambobomba sa mga mangingisdang Pilipino, na nararapat lamang upang hindi na sumiklab ang away at magkaintindihan na lamang ang bansa at ang China. Samantala, marahil ay iisa lamang ang intensyon nila sa insidente, ang paalisin ang mga mangingisdang Pinoy sa kanilang lugar at parte lamang iyon ng kanilang operating security system, tulad ng paunang paliwanag ng mga Tsino. Samakatuwid, nararapat ay gumawa na lamang ang Chinese Coast Guard ng aksyon sa mas magandang paraan dahil ang ginawa nilang pambobomba ng water cannon ay nagbigay ng posibilidad na makapagpalala ng alitan dahil sa mga islang pinag-aagawan. Agarang modernisasyon ng PNR Kasalukuyang bumibigat ang daloy ng trapiko dahil sa mga ipinapagawang imprastruktura ng gobyerno kaya’t makatutulong ang hinihikayat ng isang mambabatas sa pamahalaan na madaliin na ang modernisasyon ng Philippine National Railway (PNR) sa pag- iibsan nito. Ayon kay Buhay Partylist Rep. Lito Atienza, dapat tutukan ng pamahalaan ang modernisasyon ng PNR upang magsilbing alternatibong transportasyon ng publiko. Sa pamamagitan nito, mababawasan ang pagsikip ng daloy ng trapiko sa kalsada bunsod ng mga ipinapatayong imprasktruktura ng pamahalaan. Gayundin, magsisilbing kapakipakinabang ang PNR na ngayo’y nakadidismaya dahil sa lagay ng mga tren, na hindi nalilinis at lumang luma n, maging ang mga riles. Kaugnay pa nito, makikita ang pangangailangan ng rehabilitasyon ng PNR dahil sa tila napababayaang lagay nito. Samantala, dahil sa dami ng mga rekomendasyon at paraan kung paano magagawan ng solusyon ang kasalukuyang pagbagal ng daloy ng trapiko sa Metro Manila na dulot ng konstruksyon ng mga proyektong imprastruktura ng pamahalaan sa alternatibong paraan. Gayunpaman, marapat na ang pagmamadali ng modernisasyon ng PNR ay bigyang pansin upang ang kasalukuyang suliranin sa daloy ng trapiko ay maibsan.