Најчести симптоми на болестите на респираторен систем
Кашлица (tussis) – Знак или симптом на повеќето горни и долни респираторни
заболувања, но и симптом на срцево заболување. Може да биде: - Сува (непродуктивна) без искашлок, карактеристична за горно респираторни заболувања и плеврит, - Влажна (продуктивна) со искашлок, карактеристична за бронхитис, бронхиектазии , апсцес и сл. - Во напади – карактеристична за Астма - Засипната - карактеристична за ларингит - Утринска - карактеристична за пушачи и хроничен бронхитис - Или преку цел ден - карактеристична за инфекции на дишни патишта. Крвав искашлок (Хемоптоја) – поголема количина на крв во плунка, односно искашлување на чиста крв. Се среќава кај туберкулоза, карцином на бронх и сл. Нишки крв во искашлок (Хемоптизис) – Искашлување на крв во вид на црвени нишки – конци. Отежнато дишење (Диспнеа) – Субјективно чувство на отежнато дишење, следено со забрзано дишење (тахипнеа), различен степен на кашлица со или без искашлок. Истата може да биде како : - Физиолошка диспнеа која се среќава при зголемена физичка активност , - Белодробна диспнеа – кај белодробни заболувања , - Кардијална диспнеа – се среќава кај срцева слабост , - Ортопнеа – диспнеа при лежење, - Психогена диспнеа – се среќава кај психогени пореметувања, хистерија - Централна диспнеа - при пореметувања на ЦНС Свирење во гради (Wheezing) – Чујно свирливо дишење кое секогаш значи опструкција на дишните патишта. Клучен симптом е на ХОББ и може да биде еднострана (страно тело, Карцином на бронх) или двострана (астма, ХОББ). Болка во гради – Кај респираторните заболувања најчесто потекнува од болести на плевра, и истата е остра, кратка и се зголемува со вдишување и искашлување.