Sa ilalim ng pamumuno ni General Santos City Police Director Police Colonel
Gilbert Tuzon, OIC, ay iba’t ibang mga programa ang matagumpay na naisakatuparan ng mga kapulisan sa lungsod at may mga kasalukuyan pa silang ginagawang hakbang upang mas maayos na maipatupad ang katiwasayan at kaayusan sa siyudad ng Heneral Santos.
Sa laban ng bansa sa COVID-19, buong tapang na nagsagawa ng kanilang
mga tungkulin ang mga kapulisan sa lungsod. Sa kabila ng banta ng nasabing virus sa kanilang mga kalusugan at maging sa kanilang mga buhay ay buong puso pa rin nilang ginampanan ang kanilang mga trabaho.
Ayon kay P/Col Tuzon, kasalukuyang naka-isolate at nasasailalim sa tamang
proseso ng quarantine ang mga kapulisan sa Police Station 3 at Police Station 8 nang mayroong mga kapulisang nakadestino sa nasabing estasyon ang nagpositibo sa virus. Ito ay naging dahilan ng temporaryong pagka-lockdown ng mga estasyon upang mapigilan ang pagkalat ng nakahahawang sakit. Sa kabila nito, ipinahayag ng direktor ng siyudad na mayroon silang itinatag na Contingency Plan nang sa gayon ay maresolba ang kakulangan ng puwersa ng mga kapulisan sa apektadong estasyon. Magtutulungan ang lahat ng estasyon sa lungsod sa pagbibigay-solusyon sa kasalukuyang hinaharap na krisis ng mga pulis sa Heneral Santos.
Sa kabilang dako, mas paiigtingin pa ang pagsunod sa Health Protocols para
sa mga kapulisan. Sinisiguro nila na ang lahat ng mga pulis ay nakasuot ng tamang PPE sa tuwing sila ay nasa trabaho. Nagkakaroon rin sila ng regular na Information Dissemination upang mabigyang-kaalaman ang mga kapulisan sa mga mahahalagang mensahe partikular na sa laban kontra Covid-19. Sa tuwing sila ay nagsasagawa ng Flag Ceromony sa araw ng Lunes, sila ay parating pinapaalalahanan na dapat ay magig maingat at siguraduhin ang kaligtasan ng sarili habang ginagampanan nila ang bawat trabaho. Bunga ng papalapit na ang buwan ng Nobyembre, malaki ang paghahanda ng GSCPO sa undas ngayong taong ito. Bagama’t may inisyal na impormasyong inilabas ang Lokal na Gobyerno ng Heneral Santos tungkol sa pagsasara ng lahat ng pampubliko at pribadong sementeryo sa lungsod mula ika-29 ng Oktubre hanggang ika-4 ng Nobyembre ay naghanda pa rin ng mga estratihiya ang mga kapulisan sa ilalim ng pamumuno ng direktor ng siyudad sapagkat alam nilang mayroon pa ring mga mamamayang dadalaw sa mga lugar na ito. Sila ay magdedestino ng mga kapulisan sa mga lugar na maaaring dagsaan ng mga tao. Samantala, may mga kapulisan pa ring nakadestino sa Border Checkpoint upang masiguro at mamonitor ang pagpasok ng mga indibidwal sa lungsod. Isang pagpupulong ang isasagawa bilang parte ng preparasyon sa nalalapit na undas.
Binigyang-linaw ni P/Col Tuzon na mayroon ng mga suspek sa Shooting
Incidents sa lungsod at ilan sa kanila ay nahuli na. Ang mga kaso ay umakyat na sa korte at hinihintay na lamang ang paglalabas ng mga Warrant of Arrest nito. Ang mga kasong ito ay napasasailalim sa Oplan KABALIKAT ng mga kapulisan.
Ang Oplan KABALIKAT ay nangangahulugang Kapulisan at Barangay Laban sa
Ilegal na Droga, Kriminalidad at Terorismo. Sa ilalim ng estratihiyang ito ay nakumpiska nila ang mga gramong Shabu na nagkakahalaga ng P309,140.00 sa 46 na Anti-Illegal Drugs Operations na kanilang isinagawa. Maliban dito ay narekober rin nila ang 15 Loss Firearms, nakapag-aresto ng 48 na indibidwal na lumabag sa batas, at 19 na indibidwal ang nahuli sa Anti-Illegal Gambling Operations, at nakapagsilbi ng 31 Warrants of Arrest. Isa din sila sa tumulong sa malawakang pagpapatibay ng Quarantine Protocols kung saan mahigit sa 18,233 mga indibidwal ang nahuli dahil sa hindi pagsuot ng face shield, face mask, paglabag sa Back-riding policy, Social Distancing, Odd Even Schemes, No Plate No Travel Policy, No Installed Barriers, at ang hindi pagrerepresenta ng mga Quarantine Pass. Sa tulong rin ng Oplan na ito ay nasolusyonan ang mga banta ng Terorismo sa lungsod sa pamamagitan ng Intensified Police Feasibility, Patrolling, at Persistent Law Enforcement Operation. Buong pusong nagpapasalamat si P/Col Tuzon sa Lokal na Gobyerno ng Heneral Santos sa malaking suportang ipinagkaloob nito sa mga kapulisan sa pangunguna ni Hon. Mayor Ronnel C. Rivera at maging sa mga stakeholder na naging parte ng tagumpay na nakamit ng GSCPO. Binigyang-diin niya ang kahalagahan ng pagkakaisa sa pagkamit ng mga hangarin para sa nasasakupan sa kabila ng kinakaharap na krisis ng buong bansa. Tunay ngang ang pagtutulungan ng bawat isa ang susi sa katagumpayan ng isang lungsod.
Isa Sa Pinakamahalagang Gawain NG Ating Pamahalaan Upang Mapanatili Ang Kapayapaan Sa Bansa Ay Ang Pagtitiyak NG Ating Kalayaan Mula Sa Pananakop NG Ibang Bansa