DISIFIL - MODULE 4 ACTIVITIES

4. 2.1 | Salok-Dunong
Ngayong nabasa mo na ang artikulo "Kulay ng balat: Katutubong Pananaw ukol sa kagandahan
ng balat ng mga taga El Nido Palawan", sagutin mo naman ang katanungang ito:
1. Ano ang tinalakay ng mga mananaliksik sa kaugnay na literatura?
Mula sa binasang artikulo na pinamagatang "Kulay ng balat: Katutubong Pananaw ukol
sa kagandahan ng balat ng mga taga El Nido Palawan", tinalakay ng mga mananaliksik sa
kaugnay na literatura ang mga naging pag-aaral ng ibang mananaliksik patungkol sa paksa.
Binanggit dito ang iba’t ibang pananaw ukol sa kulay ng balat na nagiging batayan ng
kagandahan partikular na sa mga kababaihan. Bukod pa rito, sinabi rin ang nagiging epektong
paggamit ng midya sa pagbabago ng persepyon ng mga tao patungkol sa basehan ng
kagandahan at ang mga kaakibat na literatura na magpapatunay dito.
2. Angkop ba sa paksa ng pag-aaral ang mga paksang pagtalakay na ginawa?
Batay sa paksa ng pag-aaral, masasabing naging angkop ang mga paksang tinalakay
sa kaugnay na literatura bilang pagpapakilala kung bakit ba nagkakaroon ng iba’t ibang
pananaw ang mga tao patungkol sa basehan ng kagandahan lalo na sa kulay ng balat. Ngunit,
hindi gaanong nabigyang pansin ang pananaw ng mga katutubo patungkol sa kulay ng balat na
siyang pangunahing paksa ng pag-aaral.
3. Gumamit ba ng sapat na mga sanggunian sa mga paksang tinalakay?
Batay sa mga binanggit at inilahad na mga sanggunian patungkol sa paksa, gumamit
ang mananaliksik ng sapat na mga literatura upang mas malapawak at mapatunayan ang
inilihad niyang eksplanasyon sa bawat paksa. Dahil dito, mas naging kapani-paniwala ang
bawat detalye na binaggit. Subalit, dapat ding pinagtuunan ng pansin ng mananaliksik ang
pagbibigay ng mga kaugnay na literatura patungkol sa pananaw ng mga katutubo hinggil sa
paksa upang magkaroon ng mas malalim na batayan ang paksang pinag-aralan.

4.3.1 | Salok- Dunong

Ngayong nabasa mo na ang artikulo " Kulay ng balat: Katutubong Pananaw ukol sa
kagandahan ng balat ng mga taga El Nido Palawan", sagutin mo naman ang katanungang ito:
1. Ano ang disenyo ng pag-aaral?
Batay sa artikulong pinamagatang “Kulay ng balat: Katutubong Pananaw ukol sa
kagandahan ng balat ng mga taga El Nido, Palawan”, gumamit ito ng kwalitatibong disenyo na
kung saan mas binibigyang halaga ang mga dahilan at opinyon ng mga kalahok. Upang
maisakatuparan ito, ginamit ang Indigenous Method o pang-katutubong pamamaraan ng
pananaliksik na kung saan malinaw at malayang maipapahayag ng mga napiling kalahok ang
kanilang mga saloobin patungkol sa paksang pinag-aralan.
2. Sino ang mga kalahok? Paano pinili ang mga kalahok sa pag-aaral? Ano ang kraytiryang
ginamit sa pamimili?
 Sa isinagawang pag-aaral ng mga mananaliksik, gumamit sila ng purposive random
sampling sa pagtukoy kung sino ang kanilang magiging respondente sa kanilang pananaliksik.
Mula rito, pumili sila ng sampung katao na nasa edad na 15-20 taong gulang na kung saan lima
ang babae at lima rin ang lalaki. Bukod pa rito, kinakailangan din na ang mga kalahok ay hindi
pa naiimpluwensyahan ng kahit anong uri ng midya kagaya ng radyo, telebisyon at internet.
Kinakailangan din na ang mga kalahok ay kahit papaano ay mayroong trabaho o pinag-aralan
upang mas madaling magkaintindihan ang respondente at mananaliksik.
3. Ano ang instrumento sa pangangalap ng datos? Paano naman sinuri ang mga datos na
nakalap?
Ayon sa pananaliksik, nagmasid ang mga mananaliksik upang makita kung ang mga
napili ba nilang kalahok ay angkop sa kanilang inilahad na batayan. Bukod pa rito,
makikipagkwentuhan rin ang mga mananaliksik upang makuha ang sariling pananaw ng bawat
kalahok sa naturang paksang pinag-aaralan. Gumamit rin ng rekorder ang mga mananaliksik
upang makuha ang eksaktong sagot ng mga respondente sa kanilang mga katanungan. Higit
pa rito, gumamit rin ng mga larawan ang mga mananaliksik upang maipakita sa mga kalahok na
magsisilbing batayan ng kanilang pananaw patungkol sa paksa.

Module 4 | Layag Diwa

1. Paano makatutulong sa iyo bilang mag-aaral ang kaalaman sa tamang pagbanggit o citation
ng mga sangguniang ginamit sa pag-aaral o anumang akademikong sulatin?
Bilang isang mag-aaral, ang pagkakaroon ng kaalaman sa tamang pagbanggit ng mga
ginamit kong sanggunian sa anumang akademikong sulatin ay makakatulong sakin upang
maiwasan ko ang pagkakasangkot sa plagiarismo. Bukod pa rito, maingat at tama ko ring
maipapakilala kung saan ko nakuha ang isang impormasyon at ideya na aking ginamit sa
sulatin.
2. Bukod sa pananaliksik, saan mo pa magagamit ang kaalaman mo sa gamit ng talang
-parentetikal?
Magagamit ko ang kaalaman ko sa paggamit ng talang parentitikal upang maturuan din
ang ibang mag-aaral ang kahalagahan nito sa lalo na sa mga akademikong sulatin na
kadalasang ginagawa bilang bahagi ng pag-aaral. Sa pamamagitan nito, maiiwasan ng mga
mag-aaral na masangkot sa plagiarismo at malalaman nila ang kahalagahan ng pagkakaroon
ng sariling ideya sa kanilang mga sulatin.
3. Ano naman ang tinatalakay sa rebyu ng kaugnay na pag-aaral at literatura?
Sa rebyu ng kaugnay na pag-aaral at literatura, tinatalakay dito ang kaugnayan ng
paksang pinag-aaralan at suliraning nais bigyan ng solusyon sa iba pang mga akda na
naisagawa na ng ibang mananaliksik. Bukod pa rito, tinutukoy dito ang mga bagong paraan ng
pagbibigay ng interpretasyon at maipakita ang mga dapat pang suriin ayon sa mga literaturang
binasa.
4. Ano ang mahalagang papel na ginagampanan ng metodolohiya sa pananaliksik?
 Isa sa mga mahahalagang papel na ginagampanan ng metodolohiya sa pananaliksik ay
ito ang magsisilbing daan upang maayos at malinaw na masagot ang mga katanungan at
suliranin na natukoy sa gagawing pag-aaral. Dito nakasalalay ang kawastuhan ng magiging
resulta ng pananaliksik na kung saan dapat na matukoy kung paano makukuha ang mga
kakailanganin datos at impormasyon na siyang sasagot sa mga katanungan sa pananaliksik.