կառուցվածքը /թվական համակարգերի հիմքերը/։ Լեզվի անվանողական միավորների մասին խոսելիս ելնում ենք նրանց նշանային դերակատարությունից, որի տակ հասկանում ենք բառերի դրանց կապակցությունների (signifiant) կապը արտալեզվական բովանդակության հետ (signifie՛): Մարդը փորձում է լսած հնչյունը նույնականացնել առավել հաճախ լսվող միավորի ձևի հետ։ Ուստի խոսքում բառի ընտրության համար հաճախականությունը կարևոր հատկանիշ է։ Պարզվում է, որ լեզվական նշանների հաճախականության և համակարգում նրանց զբաղեցրած տեղի միջև գործում է խիստ համապատասխանություն: Անվանողական նշանները երեք խմբի են պատկանում՝ անվանական, ցուցական և հաշվողական։ Անվանական ամեն մի միավորի հետ խոսողների գիտակցության մեջ պատկերացումներ են ստեղծվում լոզվից դուրս գոյություն ունեցող միանգամայն որոշակի երևույթների մասին և այդ զուգորդությունները նորանոր կապեր ստեղծում բառերի և արտալեզվական բովանդակության միջև: Ցուցական ձևույթները կամ դերանունները, օրինակ՝ ես, դու, նա, տարբեր լեզուներով հաղորդակցման տիպական իրադրությունների շրջանակում ունեն որոշակի ցուցման ուղղվածության մշտական բնույթ՝ ես-ը ցույց է տալիս խոսողին, դու-ն խոսակցին, նա-ն մնացած ամեն ինչին /անգամ անձը նա-ի մեջ իրայնացվում է/: Հաշվողական կամ թվական ձևույթների անփոփոխ բնույթը ոչ երևույթների դաս է, ոչ ցուցման ուղղվածություն, այլ լեզվից դուրս գոյություն ունեցեղ երևույթների շարք և դրանում որոշակի տեղի պատկերացում է, ինչպես, օրինակ «հինգ», որը պատկերացում է տալիս շարք կազմող չորս նշյալի և դրանց հաջորդողի մասին: Հաշվողական բառերը՝ թվականները ամենուրեք կազմում են համարակալման բառերի զուգորդելի շարք, որի կառուցվածքը լեզուներում տարբերվում է: Դա կապված է բնական թվերի հիմքը կազմող պարզ թվականների քանակից: Համակարգի հիմքը տարբեր մեծություններ են, որով ավարտվում է բնական պարզ թվերի հաջորդական շարքը: Համակարգի բազմակիությանը համապատասխանում են համակարգի հետագա պարզ թվականները /տաս, հարյուր, հազար, միլիոն և այլն/: Պարզ թվականների համադրությունները բարդ թվականներ են կազմում, որոնք լրացնում են համակարգի բաց հատվածները: Առավել պարզ հիմքեր են երկակին, որը կազմված է 1 և պարզ թվականներից: 3 = 2+1, 4 = 2+2: Պարզվում է, որ 4 –ը բնական թվերի շարքի վերջին թվականն է, նրան հետևում են «շատ և ավելի շատ» բառերը: Երկակի համակարգերը կապված են մարմնի զույգ մասերի ընկալման հետ՝ ականջ, աչք, հոնք, ձեռք, ոտք և այլն և հատուկ են Ավստրալիայի, Հարավային Աֆրիկայի և Ամերիկայի ժողովուրդներին և զարգացման ցածր աստիճանի վրա գտնվող այլ ենթամշակույթներին: Հնգակի համակարգերը կազմավորվել են ձեռքի հինգ մատների գիտակցման հիման վրա: Այս համակարգը զարգացել է անցումային փուլերով և որոշ ժողովուրդների մոտ հանգեցրել 10, այլ լեզուներում՝ 20 հիմքով թվային համակարգերի: 20 հիմքով թվական համակարգերի ստեղծման հիմք են ծառայել անցումը ոտքի մատերին կամ զրուցակցի ձեռքերին: Օրինակ՝ արևելաավստրալիական նիկումբուլ լեզվում 5-ը նշանակում է մեկ ձեռք, 10-ը՝ երկու ձեռք, իսկ հետո հաշվարկն անցնում է ոտքերի մատներին: Ավստրալիական մի այլ՝ դիերի լեզվում 20 թվականը կոչում են «ձեռքեր և ոտքեր», Աստիճանաբար, 20 հիմքով թվականների դեպքում դադարում է ձեռքերի և ոտքերի հաշվառումը և հետո գալիս են այլ բանաձևեր՝ 30 = 20+10, 40 = 20 x 20, և այլն: Թվականների այս համակարգերը տարածված են Հարավային և Կենտրոնական Ամերիկայում /մայա լեզուն/ և Մեկսիկայում /ացտեկների լեզուն/: 20 հիմքով թվական համակարգի տարածման շրջան է Հարավային Սուդանը ինչպես նաև Միջերկրական ծովի ավազանը, բասկերը Պիրենյան թերակղզում և վրացիները Այսրկովկասում: Այդ ինքնատիպ ազդեցությամբ են պայմանավորված ֆրանսերենի 20 հիմքով թվական համակարտի որոշ ձևեր, ինչպես՝ 70 = 60 + 10 /soixamte-dix/, 80 = 4 x 20 /quatre-vingt/, 90 = (4 x 20) + 10 / quatre-vingt- dix: Եվրոպայի և Ասիայի լեզուներում տիրապետում է 10 հիմքով թվային համակարգը, որ ենթադրում է համարողական տեխնիկայի սահմանափակումը երկու ձեռքի մատներով: Այն տարածել են անասնապահական և երկրագործության մշակույթը կրող հնդեվրոպական, փոքրասիական, կովկասյան, սեմական, քամյան և այլ բազմաթիվ ժողովուրդներ: Մաքուր տեսքով 10 հիմքով թվական համակարգ ունեցող ժողովուրդների մոտ 1 – 10 թվերը կազմված են պարզ, արմատական թվականներից, իսկ 10 –ը հանդես է գալիս որպես համակարգի հիմք: Հսկայական մշակույթ է ձևավորված 6 հիմքով թվականների շուրջ: Այս թվային համակարգի շուրջ շատ լեգենդներ են հյուսվել և, քանի որ 6, 12, 24, 36, 60, 360, 600, 3600 և այլ աստղագիտական և տոմարագիտական արժեք ունեցող թվականները կազմված են 6 հիմքով թվականից, իսկ դրա հիմքը հնագիտությունը ոչ մի կերպ չէր կարողանում գտնել։ Մինչդեռ դրա հիմքում ընկած էր մարդկության համար կենսական նշանակություն ունեցող ցորենի կամ գարու հասկի վրա հատիկների դասավորությունը՝ կողք-կողքի 6 և յուրաքանչյուրի վրա 10 հատիկ ուղղահայաց կառուցվածքով: Ընդ որում կենտրոնի շուրջ կլորությամբ դասավորված 6 հատիկի գծագիր պատկերը հիմնարար է հայկական, շումերական, եգիպտական, խեթական, հուրրիական, արարատյան մշակույթի ճարտարապետության համակարգերում: Երկրի վրա կան ուժեր, որոնք, 6 հիմքով թվական համակարգի գաղտնիքը իրական ստեղծողներից պոկելով, համարեցին տիեզերական և այլմոլորակային մշակույթի ազդեցություն երկրի վրա, դրա իրականացման հնարավորությունների պարզաբանումը թողնելով գիտաֆանտաստիկ գրականության ժանրին /Տես Ա.Դավթյանի զրույցները յութուբում շումերական մշակույթի մասին/: Հայկական բարձրավանդակի և Առաջավոր Ասիայի հնամենի ազգաբնակչության մշակույթը ըստ ամենայնի հենված էր 6 հիմքով թվական համակարգի վրա՝ օրվա 24 ժամ տես Միհրի տաճարի սյունաշարի քանակությունը Գառնիում/, այդ ժամերի բաժանում 6-ական ժամերով 4 պահի, շաբաթվա 6 և ամսվա 30 օր, 12 ամիս, 36 համաստեղություն, հայերենի այբուբենի 36 տառ, 360 և 3600 տարեփուլերի հաշվարկներ և բազմաթիվ այլ թվայնացված գիտելիքներ խոսում են 6 հիմքով թվականի գիտամշակութային հսկայական արժեքի մասին և առնվազն ծիծաղելի է դրան արտերկրային ծագում վերագրելը: Այսպիսով՝ 6 հիմքով թվային համակարգի երկրային մեկնաբանությունը միանգամայն հիմնավորված է գարու և ցորենի հասկի կառուցվածքով, որի ընդհանուր տեսքը հազարամյակների ընթացքում դարձել է նաև ազգային ճարտարապետության խորհրդանիշերից մեկը և պահպանվել մինչև մեր օրերը /կարող է զարմանալի թվալ, սակայն նուռը իր պատյանում պարունակում է 12 բաժանմունք, որոնցում անհավասար կերպով բաշխված է 365 հատիկ, որը նույնպես առեղծված է: Ընդ որում, գարու հետ կապված շատ պայմանականություններ կան, որոնցից մեկը գարու հատիկի կշիռն է թանկարժեք մետաղների ոլորտում: Անվանական, ցուցական և համարողական բառերը որոշակի իրադրություններում կարող են նույնական նշանակություն ձեռք բերել: Օրինակ՝ հանդերձարանում դիմելով աշխատակցին, մենք ասում ենք՝ «Վերարկուն, այս, երկրորդը։ Առաջին դեպքում նոր պատկերացումը կապվում է նախօրոք յուրացված պատկերացումների հետ և, նրանց միջոցով՝ անվանական բառի հետ: Դերանունը մեր ուշադրությունը կրկին ուղղում է որոշակի պատկերացման վրա, որի նշանն ինքն է հանդիսանում: Վերջապես, թվականը մեր այդ պատկերացումը զետեղում է բնական շարքի որոշակի հատվածում և դրանով հանդերձ նշանակում այն: Այս երեք խոսքային հնարների համակցումը տարբեր լեզուներում տարբեր հարաբերակցություն ունի և հնարավորություն է տալիս նշանակել մարդուն հասանելի ողջ իրականությունը: