SH1903

Group Members: Section:

Date:
Score:

Identifying Literary Devices

Introduction to 21st Century Literature

Directions: Identify the literary devices used in the piece below. Write your answer on a separate
sheet of paper.

"Ang Nag-iisa"
ni Juan Miguel Severo

Noong unang panahon, noong ang mga bituin ay alitaptap pa lang sa bukid, ang araw ay
namumuhay sa pagitan ng mga bundok, at ang buwan ay dalagang lagalag sa gubat; minsang
tumingala ang Nag-iisa sa langit, umawit ng isang hiling kay Bathala: Baguhin Ninyo ako.
Tanggalin ang kadena sa aking mga kamay, bato sa aking mga paa; bigyan Ninyo ako ng gabing
hindi kasing dilim, ng umagang hindi kasing ginaw.
At sinagot siya ni Bathala: Ibibigay ko sa'yo ang iyong hiling kung tatanggapin mo ang alok
kong sugal.
Kailangan mong languyin ang pinakamalalim na Ilog ng Lungkot, kalaban ang pinakamatinding
Alon ng Pighati at hindi ka dapat lumubog.
Kaya't ang Nag-iisa ay lumusong sa tubig.
Sinanay ang sarili sa hirap ng paghinga.
Lumangoy patungo sa Dalampasigan ng Saya.
At nang umahon siya mula sa kanyang sugal, kasama niyang umahon ang Pag-ibig - ang
pagmamahal.
Sa unang pagkakataon, ang Nag-iisa ay naging Nagmamahal.
Magkasama nilang nilakbay ang bawat burol, parang at kapatagan; maligaya at may pangako ng
walang hanggan…
Pero nagbago ang anyo ng Pag-ibig,
Naging pagod, galit, sinungaling, at mapagkimkim.
Muling bumigat ang kamay at paa ng nagmamahal.
Kasabay nito ay ang pagdating ng isang malaking unos na nilunod ang lupa sa baha.
At sa gitna ng malakas na ulan ay hindi na matukoy ang mga nasira at nawala.
Nang humupa na ang sigwa, kabilang ang puso sa nasalanta, kasama ang Pag-ibig sa nawala.
Ang Nagmamahal ay muling Nag-iisa.
Pero pagkatapos ng maraming gabing kay dilim at umagang kay ginaw, sa wakas, muling
napangiti siya!
Tinawag muli si Bathala, lulusong muli sa tubig, susugal at susugal pa!
Dahil hindi ba't sapat na kabayaran ang sakit para sa pagmamahal?
Hindi ba't mas tinataya natin ang lahat kapag hindi tayo sumugal?

Reference:
Severo, J. (2016). Habang wala pa sila: Mga tula ng pag-ibig. Quezon City: ABS-CBN Publishing, Inc.

01 Activity 1 *Property of STI

Page 1 of 1