የመዝሙረ ዳዊት መግቢያ

ነዓ ሀቤየ አምላከ ዳዊት ንጉሠ ፳ኤል በዓለ መዝሙር ሰናይ ወጥዑመ ቃል

ታለብውኒ ነገረ ወፍካሬ ኩሉ አምሳል ከመ እወድሳ ለማርያም ድንግል እንዘ
እጸርህ ወእብል መዝሙረ ዳዊትሰ ትመስል ገነተ እንተ ትጸግህ ጽጌያተ ወታፈርህ
ፍሬያተ ወታመጽህ በረከተ ወትሰድድ አጋንንተ ለዓለም ወለዓለመ ዓለም አሜን።
(መዝሙረ ዳዊት ከመደገሙ በፊት የሚባል።)

የመዝሙረ ዳዊት መዝጊያ

ስብሐት ለአብ ወወልድ ወመንፈስ ቅዱስ ለዓለም ወለዓለመ ዓለም። ሰአሊ ለነ

ቅድስት ማርያም ምሕረተ ወልድኪ ሐወጸነ ማርያም። ሰአል ለነ ዳዊት ኦ አምላከ
ዳዊት አድኅነነ እምእለት እኪት ወባልሐነ እምኲሎ መንሱት። ለእለ ወለዱነ በሥጋ
ወለሐጸኑነ በጸጋ ወለአስተመሀሩነ ቃለ ሀይማኖት ኅቡር ይምሐሮሙ እግዚአብሔር
በመንግሥተ ሰማያት ፤ ወዕቀብ ሕይወተነ ወሥረይ ኃጢአተነ ወአድኅነነ እምእለት
እኪት ወእምሰአታተ መንሱት ወእምኲሎ መቅሰፍት ለኃጥእ ገብርከ እገሌ
ወለዓመትከ እገሊት። (መዝሙረ ዳዊት ከተደገመ የሚባል።)

አአትብ ገጽየ ወኲለታየ በትእምርተ መስቀል በስመ ስላሴ እቀጠቀጥ ከይሴ (ከበስመ
አብ በፊት የሚባል።)

ኦ እግዚእትየ ፍትሕኒ እማእሰሩ ለሰይጣን እሙ ለመድኅን ወለተ ብርሃን ባርክኒ

ቀድስኒ ወአንጽሕኒ በከመ ባርኪዮ ለቅዱስ ኤፍሬም ፍቁርኪ በረከተ ፍቁር
ወልድኪ ወአቡሁ ወመንፈስ ቅዱስ ይኅድር በላዕሌየ... እገሌ ወእገሊት። (ውዳሴ
ማርያም ከመደገሙ በፊት የሚባል።)

ክርስቶስ አምላክነ ረስየነ ድልዋነ። (ከቅዱስ ቅዱስ ቅዱስ በፊት የሚባል።)

ሃሌ ሉያ ስቡህ ወውዱስ ወእኩት ዘሣረረ ኲሎ ዓለመ በአሐቲ ቃል (ከስብሐት ለአብ
ቀጥሎ የሚባል።)

ጸሎታ ለማርያም ወስእለታ ያድኅነነ እመዓተ ወልዳ። ጸሎታ ለማርያም ወስእለታ

ለርእሰ ሊቃነ ጳጳሳት ዘኢትዮጵያ አባ ማትያስ ወአባ መርቆሬዎስ ይዕቀቦሙ እመዓተ
ወልዳ። ጸሎታ ለማርያም ወስእለታ ለሊቀ ጳጳስነ አባ እገሌ ይዕቀቦ እመዓተ
ወልዳ። ጸሎታ ለማርያም ወስእለታ ለመምህርነ እገሌ...። ጸሎታ ለማርያም
ወስእለታ ለማኅበርነ ማህበረ ቅዱሳን ይዕቀባ እመዓተ ወልዳ። ጸሎታ ለማርያም
ወስእለታ ለሕዝበ ክርስቲያን ይዕቀቦሙ እመዓተ ወልዳ። ጸሎታ ለማርያም
ወስእለታ ለሀገሪትነ ኢትዮጵያ ይዕቀባ እመዓተ ወልዳ። ጸሎታ ለማርያም ወስእለታ
ለመካንነ/ደብርነ ደብረ እገሌ ይዕቀባ እመዓተ ወልዳ። ጸሎታ ለማርያም ወስእለታ
ለነፍሳተ ሙታን ያድኅነነ እመዓተ ወልዳ። ጸሎታ ለማርያም ወስእለታ ለገብርከ
እገሌ ወለዓመትከ/ወለወለትከ እገሊት። ኦ ማርያም አዕርጊ ጸሎተነ ቅድመ መንበሩ
ለእግዚእነ፡፡