TIGSIK

Tigsik ko ining samong mga maestro asin maestra

bulan na naman ning Oktubre
girumduma sinda asin ibida;
an saindang dae matatawarang pagtukdo asin pagpasensya.

Tigsik ko an saindang pagkamoot

bako lang sa saindang propesyon
kundi saindang pagtukdo,
dawa yaon sa tahaw kan pandemya
mayong nakapugol sainda,
ta nganing maiheras ang pagklase asin pagkanood ta.

Tigsik ko an saindang sakripisyo

dawa masakit an magtukdo,
gamit sana an telepono o kaya man iba iba pang istilo,
lugod po mapasalamat kami saindo
ta kamo dae nagsuko.

Tigsik ko an saindang dedikasyon

Ibinabalangibog saindang marhay na propesyon
Dae mo lang pag-uyamon ta baka marka mo
kung sain abuton

Tigsik ko ang mga maestro asin maestro

Ta sinda biglang nangangapudan
Nangngaipong tabang
Donasyon sa mga kaakian

Tigsik ko saindang paghagad atensyon

Urop-uropon asin pakaisipon
Mga donasyon dae man buburulsahon
Alagad sa kaakian para sa edukasyon

Tigsik ko an pagduman sa saindang eskwelahan

Ginigibo ang gabos para makatabang
Mayong pakilabot sa pandemyang nakaabang
Mawot sana kuta na makatrabaho lang
Dae ta nyato sinda pagbasulon
Huli ta inatubang an dakulang hamon
Pasalamatan sana asin omawon,
Mga maestro, maestrao pano nin paglaom

Tigsikon ko man ining satong gobyerno

Sige na sana pangako lalangkawan ang sweldo
Mala baga na amo na sa trono
Mga tinaram na, ngunyan paburu-bago

Tigsik ko an saindang propesyon

saru man nanggad na kaipuhan san nasyon
Alagad sana matawan man atensyon
Dagdag benepisyo asin sweldo matawan ki aksyon.

Tigsik ko man ining mga nasa Departamento

Gibon man kutang magaan an buhay san maestra asin maestro
Sinda tawo man sana bako man “superhero”
Dae sana pagpararugangan pa an saindang trabaho

Tigsik ko an samong mga maestro asin maestra

sinda oragon asin matitibay talaga
sakripisyo asin pasensya
halawig asin intirong risa

Kung mayo sinda malamang

dae ko man masusurat ining tugma,
ta sinda an nagtukdo simula kadto
ning pagbasa asin pagsurat
hasta ngunyan gabay ninda risa
asin padagos sana.

O, siya sige na, baya ako mapaaram na

Sarong pagbati sa satung mga maestro asin maestra.
Saindong aldaw maging maugma sana
O sige na daw, ta ako masapna pa.
--------------------------------------------