“Ang panahon ay parang pag-ibig, magbabago kapag hindi mo pinangalagaan
nang tama. Masasaktan ka kapag hindi mo inaruga nang wasto. At maaaring ikamatay mo kapag hindi mo kinaya ang resulta.” Ang pahayag na ito ay totoo sa sitwasyon natin ngayon, tayong mga nabubuhay sa mundong kasalukuyan. Ngunit ipagpalagay na lamang natin na kayo ay nasa hinaharap at ako ay nagmula sa nakaraan. Ano ang gagawin nating mga kabataan? Isang magandang umaga ating kaaya-aya at kagalang- galang na gurong nagngangalang Gng. Leah Pestaño at maligayang pagbati sa aking kapwa kamag-aral. Para sa inyong mga tao sa hinaharap. Malayo na ang inyong narating ngunit matagal nang natapos ang pag-usbong at pagkislap ng tinuturing ninyong Perlas ng Silanganan. Lingid sa inyong kaalaman, saklaw ang Pilipinas sa tinatawag na Typhoon Belt o mas kilala bilang Pacific Ring of Fire at alinsunod sa Global Risk Index na inilabas noong Setyembre 2022, itinuring ang Pilipinas na pinakaapektadong bansa dulot ng malubhang epekto ng pagbabago sa ating pandaigdigang klima. Gaya na lamang ng pagtaas ng ating temperatura, pananalanta ng mga kalamidad, paglaganap ng iba’t ibang sakit at ang pagkawala ng buhay at hanap-buhay ng maraming Pilipino. Kaya’t pasensya na kung inuna namin ang paghalal sa mga kurap na politikong nagnanakaw sa kaban ng bayan at inuuna ang pansariling interes kaysa sa pagpaparami ng mga solusyon. Pinaslang ang mga hayop na amin pang nahahawakan noon ngunit nakikita na lamang sa mga libro ngayon. Walang habas na pinutol ang mga puno at kinalbo ang mga kagubatan. Inabuso ang mga likas na yaman na sana’y maari pang mapakinabangan ng mga susunod pang henerasyon. Sinira nang walang pakundangan ang dating luntiang paligid at bughaw na katubigan. Totoo ngang likas sa ating mga tao ang kasakiman. Ngunit matanong ko lang kayo, nariyan pa kaya ang Pilipinas sa tinutukoy kong hinaharap? Ayon sa pag-aaral ng Climate Central, isang siyentipikong organisasyon na nakabatay sa New Jersey, sa loob ng tatlong dekada ay lulubog ang mga mabababang isla ng Pilipinas sa Dagat Pasipiko dahilan ng patuloy na pagtaas ng lebel ng tubig sa ating mga karagatan dala ng pagkatunaw ng yelo sa magkabilang polo ng mundo. At alam niyo ba kung anong pangyayari ang nagbunsod nito? Kung iniisip niyo na climate change ay tumpak ang inyong sagot. Nakakatakot lamang isipin na ang bansang tirahan na tahanan sa halos 117 milyong katao ay ganun nalang na mawawala sa mapa ng daigdig. Ngunit ang kinabukasan ninyo, hindi ko ito matatanggap. Dahil ang pagmamahal sa ating Inang Kalikasan ay pagmamahal sa ating lahat. At ang pagmamahal sa ating lahat ay pagmamahal sa ating Poong Maykapal. Ang inyong hinaharap ay hindi bukas, nagsisimula ito ngayon. Kaya’t kumilos, tumindig, sabay-sabay tayong makialam at maniwala. Batid kong magkaiba tayo ng ipinaglalaban ngayon sapagka’t ako ay hamak na nagmula sa nakaraan lamang. Mawawalan ng bisan ang lahat ng ito kung mawawala ang sangkatauhan. Maraming salamat.