Податок е одреден запис кој претставува формализирана
репрезентација на некој факт или идеја погоден за комуникација.
Информација е протолкуван податок или множество податоци кои имаат некакво значење. Знаењето се состои од податоци или информации кои се организираат и обработуваат за да пренесат разбирање и искуство во примената на актуелен проблем. Мудрост е способност за искористување на знаењето во даден контекст. Обработка на податоци е процес што се состои од низа на дејства што се извршуваат врз податоците за да се добијат информации. Компјутер е електронски уред кој самостојно извршува обработка на податоци, врз основа на соодветна програмска поддршка. Информационен систем е систем кој на влез прима податоци и ги претвора во информации како излез. Информациони технологии се сите методи, техники и средства за чување, обработка и пренос на информации. Информатиката е наука за рационалната обработка на информациите, како носители на човечкото знаење и комуникации во технички, економски и општествен контекст, првенствено користејќи автоматски машини. Денес преовладува трендот според кој под информатика се подразбира: – проучувањето на компјутерите, како современи системи за обработка на информации. Знаењето и способноста за работа со и употреба на компјутер за некои основни потреби се нарекува основна информатичка писменост. Во теоретската информатика спаѓаат математичките и логичките основи на информатикатa. Техничката информатика се бави со техничките основи на информатиката или хардверот. Практичната информатика се бави со решавањето на проблеми со користење на компјутерите. Научната примена на информатиката се бави со примената на информационите и компјутерските технологии за разни научни потреби, кај природните и општествените науки. Броен систем е систем од симболи и правила за нивно комбинирање за симболичко претставување на броевите. Броевите се претставуваат користејќи множество од симболи кои се нарекуваат цифри. Множеството од дозволени цифри се нарекува азбука на бројниот систем. Постојат: позициони и непозициони бројни системи. Кај непозиционите бројни системи, вредноста на цифрата не зависи од нејзината позиција во записот на бројот. Кај позиционите бројни системи, вредноста на цифрата е еднаква на производот од сопствената вредност и вредноста на позицијата на која таа се наоѓа. Секој број се претставува како збир од вредностите на неговите цифри! Компјутерската меморија може да се замисли како низа од бистабилни елементи. Компјутерите се организирани на таков начин што записот на секој податок употребува барем 8 бита. Основна единица за мерење на количината на податоци е бит. Основна единица мерка за количина на податоци во денешните компјутери е бајт. (8 бита) Затоа, во пракса се користат поголеми единици – килобајт (kB) (1 kB = 2^10 бајти (B) = 1024 B) – мегабајт (MB) (1 MB = 2^10 kB) – гигабајт (GB) (1 GB = 2^10 MB) – терабајт (TB) (1 TB = 2^10 GB) Секоја меморија се карактеризира со нејзиниот капацитет. Денес капацитетот се изразува во гигабајти (GB) – Хард дисковите можат да складираат неколку стотици GB – Флеш-мемориите: неколку десетици GB – Картичките на паметните телефони и фотоапаратите: неколку GB – DVD: 4,7 GB; CD: 700 MB. Текст е информација наменета за меѓучовечка комуникација која што може да се прикаже во дводимензионална форма. Текстот се состои од графички елементи како што се знаците, геометриски или фотографски елементи, или нивна комбинација, кои ја сочинуваат содржината на документот. Текстот во компјутерите секогаш е претставен како еднодимензионална низа од знаци. За текстот да се претстави преку броеви, се врши кодирање на знаците: на секој знак му се придружува единствен број – код. Стандардни табели во кои се попишани знаците и нивните кодови се нарекуваат кодни страни. Во една кодна страна, за секој број е назначено кој знак го претставува тој, но не е прецизно дефиниран изгледот на знакот. Нумеричкиот код претставува внатрешна репрезентација на знакот, додека пак она што го гледаме на екранот е негова надворешна репрезентација. Изгледот го одредуваат програмите кои го вчитуваат запишаниот текст и ги прикажуваат знаците. За ова се користат сликички кои се нарекуваат глифови. Поединечните глифови се групираат во групи кои се нарекуваат фонтови. Во почетокот на 1960-тите, во САД е стандардизирана кодната страна наречена ASCII. Таа кодира 128 знаци кои се користат во англиското говорно подрачје – Доволни се 7 бита за запис на секој код. Првите 32 знаци се специјални знацi на кои не им се придружени глифови. Се јавила потреба за креирање на единствен стандард кој би ги опфатил сите знаци од сите јазици, Unicode кој се појавил на почетокот на 1990-тите години. Unicode имал цел да биде: – Универзален – да ги покрива сите современи јазици со нивните писма – Единствен – нема дуплирање на знаци – Униформен – секој знак се кодира со ист број на битови Во својата основна повеќејазична верзија, Unicode содржи 65 536 знаци, кои се доволни за запис на повеќето живи јазици. Кодот на секој знак се запишува со 2 бајти = 16 бита, па овој начин на запишување се нарекува UCS-2. Ако со UCS-2 се кодира текст напишан на англиски јазик (содржи само ASCII знаци), секој втор бајт во записот ќе има вредност 0,затоа наместо UCS-2 често се користи една модификација на Unicode кодирањето која е позната како UTF-8. Идејата е знаците да се кодираат користејќи различен број на бајти. ASCII знаците се кодираат со 1 бајт. Останатите латинични знаци, грчките и кириличните букви се кодираат со 2 бајти. Кинеските знаци се кодираат со 3 бајти. Дигитален запис подразбира дека сите податоци се запишани во облик на броеви. Пред да почнат податоците да се запишуваат дигитално, се користел аналоген запис. Звукот аналогно се запишувал на грамофонски плочи или касети што содржат магнетна лента. Просторот на фотографијата се дискретизира и се дели на квадратчиња кои се нарекуваат пиксели. Бројот на пиксели по единица површина се нарекува резолуција на сликата. Сликата се разгледува како низа од пиксели, секој пиксел се претставува со броеви, целата слика е претставена како низа од броеви! Податоците се запишани дигитално ако се запишани користејќи низа од броеви. Податоците се запишани аналогно ако континуираните промени на некој сигнал се запишуваат на соодветни континуирани медиуми. Поделбата на компјутерите според големината и можностите се дели на: суперкомпјутери, големи компјутери, миникомпјутери, микрокомпјутери. Суперкомпјутерите се најбрзи, најмоќни и најскапи компјутери. Имаат голем број процесори, огромен капацитет на хард дисковите. Се применуваат во воени цели, научноистражувачки цели, симулирање на земјотреси, урагани, суши и следење на глобална клима, тестирање на нови модели на авиони и автомобили под различни услови. Големи компјутери се моќни, големи и скапи машини кои се користат во големи организации. Се применуваат за обработка на масовни податоци, често се користат како сервери. Разликата меѓу суперкомпјутерите и големите компјутери е тоа што првите извршуваат мал број на задачи што е можно побрзо, додека вторите опслужуваат голем број корисници и извршуваат голем број задачи истовремено. Корисниците до централен компјутер пристапуваат преку терминали поврзани со него Миникомпјутери се многу помали и поевтини од големите компјутери. Тоа се компјутери кои извршуваат многу задачи кои не побаруваат користење на големи скапи компјутери, но не можат да бидат извршени од помалите поевтини компјутери. Работат со неколку процесори и можат да подржат 4-200 корисници истовремено. Се применуваат за апликации во реално време. Персоналните компјутери се мали, релативно евтини компјутери наменети за работа на еден корисник. Имаат многу поограничени можности од другите класи на компјутери бидејќи имаат само еден процесор (микропроцесор од каде доаѓа името микрокомпјутер). Можат да опслужат само еден корисник во дадено време, многу се побавни и можат да чуваат и обработуваат многу помало количество податоци. Се применуваат за обработка на тектс, сметководство, графички дизајн, пресметки, програмирање, забава. Персоналните компјутери можат да бидат статични или преносливи. Компјутери кои се вградуваат во други машини или во нивни делови се викаат вгнездени машини, имаат програма која не може да се менува и е наменета да се извршува само една работа. (дигитални фотоапарати, мобилни телефони, машини за перење итн.). Секој функционален компјутерски систем се состои од хардвер и софтвер. Сите физички делови на компјутерот, кои се изработени од тврда материја, се нарекуваат хардвер. Програма е низа од инструкции со кои на компјутерот му се соопштува начинот на решавање на одредена задача. Множество од програми кои обавуваат најразлични функции со цел да ја овозможат работата на компјутерот и обработката на податоци се нарекува софтвер. Составните делови на компјутерот и нивната меѓусебна поврзаност во функционална целина ја сочинуваат компјутерската архитектура. Теоретските основи на компјутерската архитектура ги поставил унгарско-американскиот математичар Џон фон Нојман. Компјутерот мора да има способност да меморира инструкции; инструкциите и податоците се меморираат на ист начин во иста единица наречена меморија. Основни делови на компјутерот се: -Централна процесорска единица – која што ги обработува податоците -Главна меморија – во која што истовремено се чуваат и податоците што моментално се обработуваат, како и моментално активните програми -Различни периферни уреди познати и како влезно-излезни уреди – кои што служат за комуникација на корисникот со системот, со други уреди и компјутери, како и за трајно зачувување на податоците и програмите Врската помеѓу компонентите се воспоставува со помош на уреди кои се нарекуваат магистрали. Периферните уреди се поврзуваат со меморијата, процесорот и магистралите користејќи хардверски склопови кои се нарекуваат контролери. Процесорот содржи: -Одреден број на регистри – група од мемориски ќелии во кои може да се чува мала количина на податоци -Аритметичко-логичка единица – која што изведува математички операции над податоците кои се наоѓаат во регистрите -Контролна единица – која управува со работата на процесорот Главната меморија е организирана како низа од бајти, во која секој бајт има свој единствен реден број т.н. адреса. Секој податок во меморијата може да се пристапи само врз основа на адресата на која што е запишан и ваквите мемории се нарекуваат мемории со слободен пристап. Во програмите, податоците се зачувуваат во променливи. Секоја елементарна операција која што може да ја изврши процесорот во рамките на програмата се задава со процесорска инструкција. Секој процесор поддржува однапред фиксирано, конечно множество од инструкции, односно операции придружени на нив. Сите операции процесорот ги врши исклучиво над податоци кои се наоѓаат во регистрите, па неопходно е да му се задаваат инструкции за пренос на податоци.