“Nëpunësi i Pallatit të Ëndrrave” nga Ismail Kadare, shprehje e
qëndrimit kritik ndaj diktaturës së kuqe - sistemit komunist
Kërkesa për një organizim ideal shoqëror është evidente që nga
parahistoria. Njerëzit e tërë kohërave vazhdimisht kanë provuar mënyra për organizimin e jetës së tyre shoqërore, në tërë botën, edhe në Shqipëri. Socializmi është një prej skemave të propozuara për një ideal të tillë, që me preteks se ofron barazi absolute, se e zhduk korrupcionin që e mbin kapitali mbi ndërgjegjen e njeriut, do të zhduk kapitalin individual në tërësi, dhe kështu, rrjedhimisht do të mbante barazi mes të gjitha shtresave, madje edhe do të fshinte çdo kufi që i ndante shtresat shoqërore. Megjithatë, nga përjetimet e njerëzve dhe në këtë rast, nga ajo që përshkruhet në Pallatin e Ëndrrave, diket sikur kjo skemë nuk përfundoi në gjë tjetër veçse izolimin edhe më tutjeshëm të shtresave, tashmë ato nuk i ndante merita, puna apo kapitali i tyre, por ndarja mes tyre formohej me anë të vetëdijes dhe pavetëdijes ndaj së vërtetës. Kjo ndarje e re ishte edhe më e errët, edhe më e rreptë se ajo e vjetra, meqë te e vjetra kishte lëvizje mes shtresave të ulëta dhe ato të larta, këtu këtë lëvizje e gëzonin shumë pak njerëz, fati i të cilëve e kishte hedhur në mes të njerëzve të fuqishëm. Por ajo që e bënte edhe më të mjerueshëm këtë sistem, ishte një shtresë e re, e ngushtë, e errët që posedonte diçka më shumë se vetëm vetëdija, kishte kontroll mbi definimin e së vërtetës, mbi definimin e vetëdijes, kishin njëfarë mbivetëdije. Kontrolli mbi të vërtetën, ose mbi kuptimin e së vërtetës i bënte shumë më të fuqishëm njerëzit e kësaj shtrese. Mark-Alemi në fillim të veprës sapo ishte kyqur në sistemin e Tabir Sarajit, ishte kyqur në brendi të shtetit dhe kështu e kishte fituar statusin e të vetëdisuarit. Kishte fituar një pozitë prej nga mund të shihte gjithçka që ndodh brenda jetës së njerëzve të rëndomtë, dhe me këtë pozitë kishte edhe një fuqi, një kontroll mbi kuptimin e jetës së njerëzve. Në Seleksionim i ndante ëndrrat në të vlefshme dhe të pavlefshme. Çdo ëndërr që kalonte nga dora e tij mund të ishte mjet për shtetin dhe shtresën më të lartë të ngrit fuqinë edhe më lartë, por edhe kishte potencialin e rrëzimit të fuqisë së dikujt. Megjithë fuqinë që kishte në dorë, Mark-Alemi ishte i Jasir Idriz, Mars 2022 tërhequr nga shfrytëzimi i saj i paprerë. Ai është indiferent ndaj gjithçkaje që është duke ndodhur rreth tij, veprimet e tij duken të rëndomta e të pafajshme. Ky qëndrim indiferent është kritika më e theksuar e tij ndaj këtij sistemi përbindësh. Ai e dinte se çka pësonin njerëzit që mundoheshin të jenë pjesë e shtetit dhe të përfitojnë prej saj, që sa më shumë dikush i afrohej shtetit, aq më shumë kërcënohej me ndëshkim, e aq më rëndë vuante në fund kur ndëshkohej. Mark-Alemi kur ishte në Interpretim pa arkivolin e ëndërrparësit të kryeëndrrës, e pa se si zhgënjehej ai që priste shpërblim nga shteti. Kur zbriti në Arkiv u informua për gjurmimin e thellë që iu bëhej ëndrrave të hershme. As ëndrrat e shumë shekujve më parë nuk shpëtonin nga angazhimi i shtetit, edhe faqet më të vjetra mund të ishin mjet për qëllimet e shtetit. Kjo vërteton se tentakulat e shteti shtriheshin deri në skajin më të largët të shtetit dhe shtetasve, ato arrinin deri te secili individ, prej nëpunësit më të lartë deri te perimeshitësi. Shteti posedonte të kaluarën, të tashmen dhe të ardhmen. Kjo e bënte aq të tmerrshme shtetin, aq shumë e frikësonte Mark-Alemin, saqë ishte në dilemë: të ngritej më lartë në këtë piramidë, të fitonte pozitë edhe më të lartë në këtë mekanizëm, apo të qëndrojë kokulur, ta lëshojë veten në rrjedhën e drejtuar nga më të lartit? Zgjedhja e tij o do ta shpëtonte nga dhëmbët e këtij përbindëshi, o do ta bënte atë vetë një prej dhëmbëve të tij. Përgjigjes iu afrua pas darkës së tmerrshme, pas vrasjes së Kurtit. Vrasja e ungjit të tij e bindi atë që ky sistem vetë nga natyra ishte shkatërrues, nuk kishte se si të ndalje, se si të drejtoje shkatërrimin e pashmangshëm nga ana e tij. Kështuqë e lëshoi veten të rrjedhë, të rrjedhë në lumin e indiferencës, e qetësisë, e shuarjes. Edhe pse arriti të bëhet kryetar i Pallatit, këtë nuk e kishte bërë me dorën e vet, ai vetëm ulte kokën dhe punonte, mundohej të mos ndërhyjë në kërkesat e shtetit dhe familjes, ashtuqë shkatërrimin që do të sjellte puna e tij, nuk do të jetë nga faji i tij, por do të jetë rezultati absolut i sistemit të tillë. Romani në tërësi është metaforë për distopinë totalitare në përgjithësi, jo vetëm të shqiptarëve në kohën e komunizmit. E përshkruan vështirësinë e ndryshimit thelbësor në një sistem të tillë. Evidenton se për ndryshim duhet fuqi edhe më të madhe se ajo që e kishte familja e Qyprillinjve. Jasir Idriz, Mars 2022