"Ang laki sa layaw karaniwa’y hubad sa bait at muni’t sa hatol ay
salat; masaklap na bunga ng maling paglingap, habag ng magulang sa irog na anak.” Ang saknong na ito na hango sa Florante at Laura ay naging panuntunan ng ating mga ninuno tungkol sa wastong pagpapalaki sa mga kanilang mga anak.
Hangarin ng bawat magulang na mapalaki ang kanilang mga anak
sa tamang pamamaraan. Di nga ba at ang unang paaralan ay ang ating tahanan at ang unang mga guro ay ang kanilang mga magulang, Dahil dito ang ating pag-uugali ay unang nahuhubog sa ating tahanan.
Dahil sa labis na pagmamahal ng ating mga magulang ay sinisikap
nila na maibigay sa atin ang lahat ng ating pangangailangan. Ngunit may pagkakataon na dahil sa sobrang “pagmamahal” ay hindi na rin matuwid ang pagpapalaki sa mga anak. Ang pagsunod sa kanilang layaw o luho at masanay sila na makuha ang lahat ng kanilang hilingin o hingin ay nagbubunga ng hindi mabuting pag-uugali na kanilang dadalhin sa kanilang paglaki. Sa kalaunan ang mga batang lumaki sa layaw ay nagiging pasananin ng mga magulang dahil hindi nila kayang tumayo sa sariling mga paa at lumaban sa hamon ng buhay.
Mahalaga na mapalaki ang mga anak sa matuwid na paraan at
lumaki na may mabuting pag-uugali. Tandaan natin na ang batang lumaki sa layaw ay sakit ng ulo ng magulang, at ang mabuting mamamayan ay kapaki-pakinabang sa lipunan.