Professional Documents
Culture Documents
Sanaysay
Pero nasunod ang batas ni Murphy. Naganap kung ano ang pinakaiiwasan kong
mangyari.
Kinain ko ang aking salita. Panahon na para suklian ko ang lahat ng ibinigay sa akin ng
mga magulang ko sa paraang ikalulugod nila. Masukal man sa loob, pinili kong maging
praktikal sa unang pagkakataon. Pagkatapos ng ilang linggong pamamahinga, nagsimula akong
mag-opisina sa aming konsignasyon sa punduhan ng Panasahan.
Sa aking bagong trabaho, COO ako sa Central Business District. Iyon nga lamang, ang
COO ay nangangahulugang “child of owner” at ang CBD ay sa nibel ng baranggay. Ang
Panasahan Fish Port ang sentro ng kalakalang pandagat sa Lungsod ng Malolos. Ito ang dahilan
kung bakit isa ang Panasahan sa pinakamaunlad na baranggay sa usapin ng kita at kabuhayan.
Araw-araw, dinadaungan ito ng hindi bababa sa limampung bangkang pangisda ng mga
manunudsod (iyong nangingisda sa ilog at lati), mambabaklad, Norway (malalaking bangkang
nangingisda sa Manila Bay mula Bataan hanggang Bulakan) at mga propitaryong may hawak sa
ekta-ektaryang bangusan, tilapyaan at sugpuan. Ipinupundo sa sampung konsignasyong
nakabahay rito ang mga lamang dagat, na ipapahango naman sa mga tindera na nagbibiyahe ng
kalakal sa mga palengke mula sa maliliit na tianggehan hanggang sa malalaking pamilihan
tulad ng Farmer’s sa Cubao at Nepo Q-Mart sa Lungsod ng Quezon. Nakararating ang isda
mula Aparri hanggang Aurora dahil sa mga biyaherang nagbabagsak sa mga palengke sa
probinsya. Dito rin nagmumula ang lamang dagat na ibinebenta sa malalaking establisyamento
tulad ng Makro pati ang inihahain sa ilang magagarbong restawran ng Rockwell at Manila
Hotel. Pagkatapos maipamudmod ang kalakal sa mga tindera, babayaran ng konsignasyon ang
may dala ng isda. Sa termino na lamang ang pagiging “tagapamagitan” o middle man ng
konsignasyong kumikita sa pamomorsiyento dahil masingil man o hindi ang mga tinderang
nagsihango, kailangang mabayaran ang may-ari ng isda.
Pagpatak ng alas dose, nabuhay ang buong paligid. Simula na ng bilihan ng isda.
Iniakyat ng mga tauhan ang mga isdang laman ng bangka at ibinuhos sa sahig ng talipapa.
Kumulumpon ang mga tindera sa paligid ng tumpok ng isda. May agad nagpakilo ng limang
banyera sa tauhan, may dumampot muna ng tilapya para salatin kung mataba, mayroon namang
parang bubuyog na bumubulong sa tindig na inis na sa walang habas na pambabarat.
Nakangingilo ang ingay ng pagkaskas sa sahig ng banyera ng bangus na hinihila ng talipapa
boy papunta sa sasakyan ng tindera. Sa isang sulok, pinauulanan ng mura ng isang
mamamaklad ang isang lalaking nahuling nagsisilid ng isdang sinipa papuntang gilid, habang
namimili ng huhulugang bra sa katalog ng Avon ang sekretarya sa loob ng opisina.
Inilagay ako ng aking ina sa kaha. Katatanggal lang niya sa dating tagapaningil na
nahuling nangungupit sa mesa. Kailangan niya ng isang taong mapagkakatiwalaan na hahawak
sa singil at titingin sa takbo ng konsignasyon kapag hindi siya makatutugpa ng madaling araw.
Bukas rin kasi ang konsignasyon sa umaga, mula alas siyete hanggang gabi, kaya hindi halos
nakapagpapahinga ang aking ina. Nang magsimula akong tumugpa, nagkaroon siya ng
pagkakataong umidlip ng dalawa o tatlong oras.
Sa unang sipat, madali lang naman ang aking trabaho. Kailangan ko lang tumanggap ng
bayad ng mga tindera at isulat ang mga ito sa record book. Bibigyan ko rin ng autograph ang
tindera sa kanyang maliit na kuwaderno bilang patunay ng halaga at petsa ng kanyang
pagbabayad. Pagkatapos, mamarkahan ko ang listahang inihahanda ng aming auditor kung saan
nakalagay ang bilang, klase, at halaga ng isdang hinango. Dito malalaman kung tugma ang lista
ng tinderang humahango at ng tindig ng konsignasyon. Makikita rin kung gaano kahaba na ang
lista, na nangangahulugang naiipon ang pautang ng konsignasyon. Madalas at sa hindi, kapag
nalaon na, nauuwi sa kalimutan ang ganoong mga pautang. Kapag baon na sa utang,
maglalahong parang bula ang ilang tindera, at susulpot sa punduhan sa ibang lugar para doon
naman humango ng kalakal.
Hindi uso ang data sheet sa punduhan na may pangalan at tirahan ng mga taong
pinauutang. Dito lang sa buong mundo marahil nakapangungutang nang di nagbibigay ng tunay
na pangalan at tirahan. Nakabatay ang lahat ng transaksyon sa tiwala. Palayaw lamang ang
ginagamit sa lista, na karaniwang ibinabansag ng tindig na nagbenta ng kalakal. May Mariang
Sulok, Mariang Bukid, Maria Dokleng, Maria Daldal at Mariang Hagonoy. Madalas, ni hindi
alam ng tindera na nabinyagan na sila ng pangalan na dadalhin na nila sa buong panahong
humahango sila sa konsignasyon. May mga lista ring Martang Burara, Piring Panghi, Lasing,
Pogi, Apoy at Lastikman. Dahil sa impormal na pagpapangalang ito, napakahirap maghagilap
tuloy kapag biglang nagtago ang isang may utang. Napakahirap ipagtanong sa isang lugar kung
may kilala silang “Lasing” o “Pogi.” Nasisingil lang tuloy ang isang may utang na hindi na
bumalik sa punduhan kapag natiyempuhan sa pinagtitindahang palengke.
Gawain ko ring magpadala ng mga love letters sa mga humahango. Kapag umaabot na
sa ikatlong hango ang lista ng isang tindera, gumagawa ako ng lista sa isang minota na
pinaaabot ko sa tagapaningil bilang paalala na kailangan niyang magbayad. Nakapaghahatol rin
akong huwag bigyan ng kalakal ang isang taong mahaba na ang lista o malaking halaga ang
huling nahango at wala pang naipapasok ni pauna. Dahil rito, ako ang kinukulit ng mga may
utang na gusto pang humirit ng isa pang hango. Noong una, madaling-madali akong pakiusapan
kaya naiinis sa akin ang aking ina. Nang malaunan, natuto na rin akong maging matigas dahil
sa dami ng pagkakataong hindi na nakabayad ang may mahahabang lista hanggang maging
desaperacidos o kaya’y magkaroon ng amnesya.
Sa punduhan kami namulat sa pagnenegosyo ng aking asawa kaya rito namin piniling
buksan ang aming unang pakikipagsapalaran. Nang mabakante ang katabi ng aming
konsignasyon, inawitan namin ang may-ari na ibenta sa amin ang karapatan sa puwesto.
Nagtayo kami ng isang munting tindahan gamit ang natira sa aming ipon at ang kaunting
pakimkim noong kasal namin. Pero maliit man, hindi karaniwan ang tindahan namin. Kami
lang ang may panindang panay imported sa talipapa, kaya’t nabansagan itong Talipapa PX
Shop. May mamahaling shampoo, sabon, lotion at pabango para sa katawan, pati mga de latang
corned beef galing Brazil, tsokolateng Hershey’s, Cadbury at Toblerone, at sitseryang Pringles
at Ruffles. Tama ang aming naging tantiya sa mga mamimili sa punduhan. Iisiping ang babaho
ng mga tinderang amoy-isda, pero huwag ka, malalalim ang bulsa nila. Hindi sila nag-
aatubiling maglabas ng perang may nakadikit na kaliskis para sa mga bagay na wala sa
tindahang sari-sari!
Natuklasan ko ang malakas na purchasing power ng mga tindera noong nauso ang mga
alahas na gawa sa Swarovski crystals. Sinubukan kong magtuhog-tuhog ng ilang beads at
iniwan ko kay Nanay. Kinabukasan lang, ubos na ang isang dosenang pulseras na isang libo
dalawang daan ang pinakamababang halaga, at may mga pasadya pang order ng gusto nilang
disenyo at kulay! Noon ko nalaman na hindi lang halata sa bihis at porma pero may pambili
ang mga tindera. Hindi tulad ng mga nakaposturang window shoppers sa mga malls sa Maynila
na mapoporma pero butas ang bulsa, hindi nawawalan ng laman ang bulsa ng makukulay na
tapadera ng mga bakulera.
Hindi namin pinalampas pati pagtitinda ng kape, tinapay, mami at samalamig. Sa unang
dalawang buwan, ang asawa ko ang siyang tumatao sa aming tindahan. Wala ni isang tao sa
punduhan ang may alam na nagtapos sa Unibersidad ng Pilipinas ang minamadali nilang
magtimpla ng kape o magsalok ng samalamig. Minsan, napapaisip kami kung ano kaya ang
sasabihin ng mga kaibigan at kakilala namin kung makita nila kami sa punduhan na naniningil
ako ng mga tindera at nagpiprito ng Maling para sa tinapay ang aking asawa. Mababawasan
kaya ang respeto nila sa amin? Iisipin kaya nilang sumadsad na kami kaya pati ganoong
trabaho ay pinatulan namin? May mga ganoong sandaling nagkaroon kami ng pagdududa kung
tama ba ang naging pasya naming iwan ang trabaho namin sa lungsod para magpakahirap sa
talipapa. Pero kapag iniisip namin ang anak na ipinagbubuntis ko noong panahong iyon,
napapalis ang aming mga agam-agam. Alam naming may pinaglalaanan kami ng aming
pagsisikap.
Sa mga araw na kaunti ang dating na kalakal, nagdadala ako ng aklat na mababasa.
Hindi marahil inisip ni Louise Gluck, Octavio Paz o Mike Bigornia na may nagmumuni sa mga
tula nila sa saliw ng tunog ng hinihilang banyera at ginigiling na yelo. Ikalulugod marahil ni
Fyodor Dostoevsky na binasa ko ang Brothers Karamazov sa ikalawang pagkakataon sa
sangsang ng burak at lansa ng isda. Unti-unti kong nabuksan ang mga aklat na pinagbibili ko
na naisantabi lang dahil abala sa trabaho at pag-aaral. Para lamang dito, malaki ang
pasasalamat ko sa aking trabaho.
Halos pinatay ng trabaho ko ang aking pagsusulat. May oras ang pagdalaw ng aking
Musa, laging pasado ala-una ng madaling araw dumarating ang enerhiya para kumatha. Dahil
nasa trabaho ako at hindi ako nakapagsusulat nang may maingay o may ibang tao, tigang ang
panulat ko sa panahon ng aking pagtugpa.
Para lang makapagsulat, gumawa ako ng mga tala tungkol sa mga interesanteng taong
nakakasalimuha ko sa talipapa. Tatlong beses isang linggo, pinupuno ko ang isang pahina ng
aking kuwaderno ng mga impresyon ko sa iba’t ibang tao. Kung mayroong hitik ang punduhan
bukod sa mga lamang-dagat, ito ay mga karakter. Nariyan si Ka Charing, isang maliit at
mabilog na babaeng sabukot ang buhok at nakapulang lipstick na lampas ang pagkakaguhit.
Wala siyang kakeber-keber sa pagkukuwento ng buhay nilang mag-asawa mula lambingan
hanggang umbagan habang inuunat isa-isa ang laman ng kanyang tapadera. Pagkalabas niya ng
opisina, susungaw naman sa bintana si Mareng Tina, ang nagkakaha sa katabing konsignasyon.
Mula sa tsismis sa simbahan hanggang sa isyu sa baranggay, walang maililihim sa aking
tagapagbalita. Espesyalisasyon niya ang mga magkalaguyo sa punduhan, tulad ng isang
enkargado at isang tindig na nahuli ng asawa sa isang atakeng gerilya sa motel, at ng isang
talipapa boy at isang babaeng mangangapa na nahuling nagkakapaan ng “maselang tilapya” sa
likod ng mga cooler sa gilid ng yeluhan. Kung kuwentong beerhouse naman ang gusto, nariyan
si Pido, na magpapatunay na sa halagang dalawang daang piso, guguwapo kahit ang mukhang
tuko sa mata ng babaeng pangromansa sa kambingan. Sa halip na mainis sa mga nambubuska
sa kanyang anghit, ipinagmamalaki niyang iyon ang aromang gayuma niya sa mga kalahi ni
Eba, bagay na ikinasusuka ni Nana Cely na isang sitenta anyos na mestisang tindera na may
kasintahang bente tres anyos lang na binata. Sa lahat, pinakapaborito ko si Kimo, isang
matangkad na lalaking mala-Jimmy Hendrix ang buhok na laging may yakap na manyika.
Nambabae raw ito noong araw kaya iniwan ng asawa at anak. Nawala siya sa kanyang katinuan
dahil sa lungkot. Tangan ang bote ng Pepsi na rhum ang laman, maririnig siyang kinakausap at
kinakantahan ang anak niyang si Jen-Jen, ang kanyang manyika. Klasiko naman si Nana
Barang, ang pulubing sosyal dahil laging may pulbos ang likod, na naglalakad ng walong
baranggay makarating lang ng Panasahan para mamalimos. Sa sipag niyang dumilihensya,
napagtapos niya ang dalawang anak ng kolehiyo, pero wala pa ring balak ipahinga ang mga
matang pinangingilid ang luha sa pagpapaawa.
Hindi mawawala sa bawat talipapa ang mga eksenang eskandalosa, tulad ng pagbabag
ng nagkakainisang tindera. Mahihiya si Dolphy sa eksena ng dalawang nag-aaway na
bakulerang nang magkainisan ay dumampot ng matabang tilapyang Tagalog ang isa at ibinusal
sa bibig ng ginigiyera. Pang-Regal naman ang production number ng mga nagsidayong GRO na
naka-tangga pa nang magsayaw sa gitna ng punduhan sabay pamigay ng discount coupons sa
mga tindero’t kargador para dumayo sa kanilang naghihingalong beer garden. Patok sa takilya
ang suguran ng asawa at kabit na pinalakpakan ng mga tao para lalong ganahan sa
pagsasabunutan at pagpapagulung-gulong sa sahig habang may sumisigaw ng “May shooting!”
May action din kapag may nahuhuling magnanakaw ng pera at isda dahil tulung-tulong ang
mga talipapa boys sa pagbugbog para bigyang-aral ang kawatan. At tuwing may namamatay na
taga-punduhan, gusto kong sumulat kay Tita Charo ng Maalaala Mo Kaya dahil animo isang
kapamilya ang pumanaw dahil sa lungkot ng mga tao, lalo pa’t matagal nang tagaroon ang
namaalam.
Hindi lang ako ang tapos sa pag-aaral sa talipapa. Mayroong mga guro, inhinyero, nars,
arkitekto, medical technician, computer programmer at doktor sa malansang lugar na ito.
Katulad ko, mga anak sila ng tinderang nangarap na huwag matalamsikan ang paa at binti ng
malapot na burak ng madulas na sahig. Nagsumikap rin sila sa kanilang karera para maiahon
ang kanilang magulang sa pagtitinda, para lang matuklasang higit pala iyong kapaki-
pakinabang kaysa sa piniling larangan. Kung sinasabi ng mga may junk shop na may pera sa
basura, sasabihin kong may pera sa lansa. Sa pananatili ko sa punduhan, wala akong nakilalang
tindera na sumala sa pagkain. Maging ang mahihinang magtinda, hindi inaabot ng gutom ang
pamilya. Patunay rin ang daang mga anak na napagtapos ng kanilang mga magulang na taga-
punduhan na pinagtatakpan man ito ng ilong ng mga pustoryosong nagsisidaan, isa itong
masiglang kabuhayan.
Hindi ko sinasabing para sa lahat ang punduhan. Marami ring mapagsamantalang tao sa
larangang ito. Nariyan ang mga maniningil na tumatanggap ng pera mula sa mga tindera pero
hindi ipinapasok sa mesa. Nariyan ang mga tauhan ng bangka na nagpupuslit ng isda at
nagpapatakas ng kalakal. Nariyan na ang mga namamalaisdaang mangungutang ng malaking
halaga sa konsignasyon pagkatapos ay sa ibang mesa ipupundo ang hinuling isda. Nariyan ang
mga tinderang hahango nang hahango at magbibigay ng mga tsekeng post dated na kapag
ipinasok sa bangko ay panay talbog. Nariyan pa ang walang pusong illegal recruiter na
nakabola ng halos isang buong baranggay ng mga magbabaklad at maliliit na mangingisda sa
pangakong madadala ang mga ito sa Amerika. Nariyan ang mga pulis at militar na pag may
natipuhang tumpok ng isda ay obligado kang ibigay ang itinuturo, at ang kalaban nilang NPA
na hindi rin maaring tanggihan kung hindi ka pa sawang mabuhay. Nariyan rin ang mga
konsignitaryong busabos kung ituring ang kanilang mga tauhan, at kalaban ang tingin sa ibang
konsignasyon kahit walang dapat pagtalunan. Siyempre, hindi mawawala ang mga tiktik na
nagbibigay ng tip sa mga holdaper na abangan ang sasakyan ng tinderang may dalang pang-
intrega, pati ang oras ng alis ng konsignitaryong may bitbit ng koleksyon sa magdamag. Ang
mga taong ito ang tunay na nakasusulasok sa punduhan. Hindi natatanggal ng paligo at
pabango ang lansa at baho ng kanilang pagkatao.
Napakinabangan ko rin naman ang aking edukasyon sa punduhan. Hindi ko man
tahasang nagamit ang mga degree mula sa pamantasan, nakatulong ang mga natutunan ko sa
paaralan para magsulong ng ilang mahahalagang pagbabago sa sistema ng pamamalakad ng
aming negosyo. Una na rito ang pagbibigay ng benepisyo sa aming mga tauhan. Bukod tanging
ang konsignasyon namin ang nagbabayad ng buong kontribusyon sa SSS at Philhealth para sa
aming mga regular na empleyado. Tuwing bayaran ng matrikula, naglalaan na kami ng sampu
hanggang labinglimang libong pisong tulong pinansyal para sa bawat tauhan kaya
napagpapaaral ng mga ito ang kanilang mga anak sa magaganda at pribadong paaralan. Ilang
taon mula ngayon, balak naming ilunsad ang isang kooperatiba para sa mga tauhan ng
konsignasyon upang magkaroon ng mekanismong higit na magpapaluwag at magpapabuti sa
kanilang buhay. Sumali rin kami sa credit ng baranggay para sakaling may mangailangang
tauhan, may mahihiram na halaga sa panahon ng kakapusan. Nakalulugod makitang
nakapagpupundar ang mga tauhan namin: traysikel na pamasada, side car na kumikita ng
boundary, maliit na bangkang panudsod, segunda manong dyip na pambiyahe ng isda, o kahit
isang videokeng ipinaaarkila. Mayroon ring nakaipon ng pang-placement fee sa Israel at Japan
kaya doon na nakipagsapalaran. Kapag iniisip ko, sa ganitong paraan ko daig ang mga
kasabayan ko sa mga kumpanyang multinasyunal. Pinayayaman nila ang kanilang dayuhang
amo, samantalang nabibigyan ko ng pagkakakitaan ang kababayan ko.
Inakala kong tatanda na ako sa piling ng mga banyera at bilao katulad ng aking ina.
Dumating ang araw na nagpatung-patong ang mga kasong isinampa namin laban sa mga
estapador na nagbaon sa amin sa utang. Isang matagal nang biyahero ang nagpatalbog ng mga
tsekeng nagkahalagang labingdalawang milyong piso. Dumami ang mga taong hindi takot
magpatalbog ng kanilang tseke, dahil alam nilang kung hindi abot ng milyon ang kanilang
pagkakautang, hindi namin sila pag-aaksayahan. Huling bagsak nang subain kaming mag-asawa
ng mismong kapatid ng aking ina at ng isang propitaryong kumpare pa man din ng aking mga
magulang. Itinakbo ang tatlong milyong hindi pa man din namin kinikita. “Bakit hindi ka mag-
abogasya?” himok ng aking ina. “Kung magiging abogada ka, mas mapangangalagaan mo ang
interes ng ating konsignasyon at pamilya. Hindi na tayo manghihinayang sa acceptance fee,
appearance fee at iba pang bayaring legal sa pagsasampa ng kaso. Sa dami ng problema ng
mga konsignasyon sa punduhan, hindi ka mauubusan ng kaso.”
Ipinaubaya ko ang trono ko sa talipapa sa isang bagong kahera, pero nananatili pa rin
akong tagapamahala. Umalis ako pero hindi lubos, dahil kahit nasa pamantasan ako, naguguni-
guni ko palagi ang amoy ng isda at ang ingay ng ginigiling na yelo at kinakaladkad na banyera.
Kapag naging abogado ako, tiyak kong hindi ako mabibilang sa mga kamag-aral kong
magsisiksikan sa prestihiyosong law firm o mga kagawaran sa pamahalaan. Mag-aaral ako para
tiyaking hindi mamatay ang aming konsignasyon para sa aking pagbabalik, may nakaukit pa rin
ang pangalan ko sa daan-daang berdeng banyerang nagkalat sa madulas at malansang sahig ng
talipapa.