Child Protection Policy, Ano naman sa Titser?

Maraming guro ang nagugulantang na lamang sa mga napapabalita ngayong pang-aabuso maging ang
pagpatay sa kapwa nila guro sa kamay mismo ng kanilang estudyante. Sa panahon ngayon, tila
nababaliktad na yata ang sitwasyon. Hindi na mga estudyante ang nababalutan ng takot kundi ang mga
guro. Kung may ipinatupad na Child Protection Policy para sa mga estudyante, ano naman kaya ang
nararapat na proteksyon para sa mga guro?

Noong nakaraang 2012 ay ipinatupad ang DepEd Order No. 40 s. 2012 o mas kilala bilang Child
Protection Policy sa ilalim ng pamumuno ng dating kalihim ng DepEd na si Jesli Lapus alinsunod sa utos
ng Dating Pangulong Aquino sa lahat ng antas ng paaralan sa Pilipinas- sekondarya at elementarya.
Layon ng polisiyang ito na pangalagaan ang mag-aaral sa mga pang-aabuso, eksploytasyon,
diskriminasyon, bullying at lahat ng klase ng karahasan sa paaralan.

Nagsilbi itong malaking hamon sa mga gurong mabibigat ang kamay at pahabain pang muli ang kanilang
pasensiya sa kanilang makukulit na mag-aaral. Sa ilang taong pagpapatupad ng polisiyang ito ay naging
malaki at maganda ang naging resulta nito sa bawat paaralan. Hindi na umuuwing mayluha o kaya
nama’y namamantal na kamay ng ilang mag-aaral dahil sa palo ng kanilang titser.

Ngunit hindi na yata talaga mapaghihiwalay ang maganda sa pangit. Kung may positibong resulta ang
pagpapanukala ng polisiyang ito ay may lumabas ding negatibo. Ayon sa opinyon ng ilang mga guro,
nawawalan na raw ng respeto ang ilang mga estudyante sa kanilang mga guro. Minsan pa nga raw ay
binabantaan at hinahamon ng isang magaaral sa elementarya ang kaniyang guro na pagalitan at paluin
sila dahil alam na nila ang tungkol sa Child Protection Policy.

Ang tanging rason lamang ng mga mag-aaral ay wala naman daw magagawa sila Ma’am at Sir dahil
protektado sila ng polisiyang ito. Isa sa malalang naging epekto ng polisiyang ito ay ang kagimbal-gimbal
na pagwawakas ng sa loob mismo ng kanilang paaralan sa Cagayan De Oro City matapos buhay ng isang
guro na si Vilma Cabactulan matapos siyang saksakin ng kaniyang menor de edad na estudyante.
Sinasabing sinita raw umano nito ang kaniyang Grade 9 na estudyante dahil sa paglalaro ng cellphone sa
kaniyang klase at pinagsabihan niya itong huwag ng liliban.

Dahil dito’y sinaksak siya ng tatlong beses. Patunay lamang ito na nawawalan na ng respeto at wala ng
kinatatakutan ang mga mag-aaral sa kanilang mga guro. Batay sa mga ipinakita ng mga estudyante sa
ngayon, ay masasabi kong mahirap ng bigyan sila ng kalayaan.

Bigyan mo lang ng pagkakataong makahinga at luwagan ang pagkakatali sa kanila ay biglang lalaki na
lang ang kanilang ulo. Wala ng sasantuhin kahit na guro ka man nila. Nabubuhay silang may
kagustuhang maging malaya at dahil dito’y wala na silang kinatatakutan. Ang akin lang, sa kapwa ko
estudyante, sana’y pahalagahan at gamitin natin ng tama ang polisiyang ito. Maganda ang pagkakaroon
ng polisiyang ito subalit hindi ito ang dahilan para mawalan tayo ng respeto at paggalang sa ating mga
guro.

Isipin na lamang natin kung gaano kahirap para sa mga guro ang magtimpi at pahabain ang kanilang
pasensya para lamang may mailagay tayo sa ating mga utak. Sa gobyerno naman ay sana’y bigyan niyo
rin ng pansin ang ganitong sitwasyon maging ang karapatan ng mga guro ay naaabuso na rin. Paano na
ang mag-aaral kung wala nang gurong magtuturo? Kung may Child Protection Policy, ano namang
polisiya ang ipapatupad para sa mga titser