SOLEMNE SEPTENARIO NG PITONG HAPIS

UNANG ARAW
Pagsamo sa Mahal na Birhen Dolorosa
Oh maawaing María, Inang kalinislinisan ng Poong Divino Verbo, Birheng natigib nang lumbay at
kapighatian, nagpapakababa kami ngayon sa aming pagkakaluhod dito sa harap mo, at isinasamo namin
sa iyo na kami ay tulungan mo, at iyong papanglumuhin tuwina ang aming mga puso, nang matutuhan
naming alalahanin at kahabagan ang tanang hirap na tiniis nang Anak mong si Jesucristo, at ang hapis na
dinalita mo, sapagkat dinamayan mo siya sa kaniyang mahal na Pasion at yamang isinakop niya sa amin
ang kaniyang dugo, at ikaw naman ay lumuha dahilan sa amin, hingin mo sa kaniya na kami ay mabuhay
at mamatay sa kabanalan, at gayon din naman ang biyayang bukod, na ninanasa namin, kung ikapupuri
ninyong mag Ina, ikagagaling ng mga kaluluwa namin. Amen.
+ Rosario ng Hapis

Pagninilay ng Pitong Hapis

ANG UNANG HAPIS:
Ang Propesiya ni Simeon tungkol sa Sanggol na Hesus
(Lucas 2:34-35)

Napakasakit para kay Maria ang mga sinabi ni Simeon tungkol kay Hesus. Noong sinabi ni Simeon ang
mga salitang "Ang iyong puso ay para na ring tinarakan ng isang balaraw," ang ibig sabihin noon ang
misyon ni Kristo dito sa lupa ay magdadala ng sakit sa puso ng Mahal na Ina.
Hindi lamang sakit sa puso ni Maria ang dulot ng mga salita ni Simeon. Nag-alala siya para sa Panginoon.
Sino bang ina ang hindi mag-aalala para sa kanyang anak? Ganun din si Maria. Nag-aalala para sa
kapakanan ng kanyang anak. Kahit ang kanyang anak ang Tagapagligtas ng sanlibutan, bilang ina, siya'y
nag-aalala para sa kanya.

Pero, dahil sa pagiging masunurin ni Maria, naghahanda siya at naghihintay para sa pagdating ng araw na
iyon. Ang araw kung saan ang kanyang anak - ang Tagapagligtas ng sangkatauhan, ay mag-aalay ng
kanyang sarili sa krus para sa kaligtasan ng marami. Kung kalooban ng Diyos ay mamatay ang kanyang
anak, hindi siya haharang, bagkus, makikiisa sa paghihirap ng kanyang anak.

DALIT
Sa paa ng Krus, nakatindig ang Ina, Mata ay nagbabatis sa Anak na Sinta.
Idalangin kami Birhen Sa Anak Mong ginigiliw.
Puso Mo ay pinag-ulapan ng sakit at kapaitan, Ikaw ang siyang karamay, ni Hesus sa kahirapan.
Sa loob Mo at panimdim, kalumbayan ay sapin-sapin.
Idalangin kami Birhen Sa Anak Mong ginigiliw."

Dalamhati
Panalangin kay Maria, Birhen Dolorosa
Kabanal-banalang Birhen, Ina ng aming Panginoong Jesucristo: sa iyong matinding paghihirap at
pagdadalamhati, nang iyong masaksihan ang pagdurusa, pagkapako at kamatayan sa Krus ng iyong
dakilang Anak, ipahintulot mong mapasaakin ang iyong tiyaga at lakas ng loob; ang pagtanggap sa
kalooban ng Ama ng may buong pagtitiwala at pag-asa.
Pukawin mo ang aking puso na maramdaman ko ang pakikiisa sa iyong tiniis na pasakit bilang isang ina
at sa pagpapahirap na dinanas ng iyong Anak sa Kanyang pagiging isang martir para sa aking kaligtasan.
Masabi ko man lamang sa aking sarili, na ako ay sumunod sa inyong dalawa sa matinik na kalbaryo ng
aking buhay.
Itulot mong magkaroon ako ng tunay na pagkamuhi at pagtalikod sa kasalanan, nang sa ganon, hangarin
ko ang walang hanggang kaligayahan sa Langit. Ipinanalangin ko, na simula ngayon, ang lahat ng aking
isip at gawa, ay matuon sa pagiging tapat sa iyong Dakilang Anak.
Ipamagitan mo ako sa ating Ama, na makamtan ko ang katuparan ng aking hinihiling, kung ito ay
makapagbibigay ng higit na papuri at luwalhati sa Diyos at makakabuti sa aking kaluluwa. Siya Nawa.
Papuri, luwalhati at pag-ibig para sa ating Banal na Panginoong Jesucristo, at sa dakila at kalinis-linisang
Ina ng Diyos!

Birhen Dolorosa, ipanalangin mo kami!

IKALAWANG ARAW
Pagsamo ... pg 1
Rosario ng Hapis
Pagninilay ng Pitong Hapis …pg1
ANG IKALAWANG HAPIS:
Ang Pagtakas patungo sa Ehipto
(Mateo 2:13)

Noong dumating ang Tatlong Pantas sa Betlehem, tinanong nila kay Herodes kung nasaan ang lugar ng
kapanganakan ng Mesiyas. Si Herodes ay natakot. Siya ay natakot na maagawan ng kapangyarihan mula
sa bagong Haring ito. Gusto niyang manatili sa kanyang posisyon at ayaw niyang maagaw ito. Kaya, bago
umalis ang Tatlong Haring Mago, inutusan sila ni Herodes na sabihin sa kanya kung saan ang lugar ng
kapanganakan ng Mesiyas.

Pero, noong hindi bumalik ang Tatlong Pantas, nagalit si Herodes at pinag-utusan niyang patayin ang mga
sanggol o batang lalaki na may gulang na dalawang taon o pabababa. Doon, makatitiyak siya na walang
sanggol na lalaki ang aagaw sa kanyang pwesto bilang Hari. Pero, hindi niya pinatay ang Mesiyas, ang
kanyang kinatatakutan.

Bilang ina ni Kristo, si Maria'y natakot na. Takot na takot si Maria nang malaman niyang ipapapatay ang
Sanggol na Hesus ni Haring Herodes. Ibinalita ito sa kanyang esposo na si San Jose ng anghel ng
Panginoon. Nang malaman na nila iyon, tumakas sila sa isang bayang hindi nila alam. Napakahirap para
kina Jose, Maria at Sanggol na Hesus na pumunta sa Ehipto pansamantala.

Plano ba ng Diyos na ipapatay ang Mesiyas kahit sanggol pa lang? Hindi. Hindi hinayaan ng Diyos na
mamatay si Hesus nang Siya'y sanggol pa lang. Kaya, iniligtas ng Diyos ang Banal na Pamilya - Hesus,
Maria at Jose mula kay Herodes. Pumunta sila sa Ehipto na walang nakakaalam. Kahit mahirap para kina
Maria at Jose, ginawa nila iyon alang-alang sa kaligtasan ng Sanggol na Hesus, ang pinangakong Mesiyas
at Tagapagligtas.

DALIT… pg2
Dalamhati, Panalangin kay Maria, Birhen Dolorosa … pg2