Mula po sa Trinity University of Asia at ng opisina para sa
gawaing ekstensyon, Trinitian Community Development
Section, kami po ay nagpapasalamat sa walang sawa ninyong pagsuporta at pagtulong sa amin sa mga gawaing may kaugnay sa pagsasaopisyal ng tuwangan ng pamantasan, lokal na pamahalaan ng Barangay San Rafael, at ng mga mamamayang bumubuo sa Sitio Sapa.
Maaalala po natin noong taong 2018 na una tayong nagkasama
sa gabay ni Konsehal Edgardo Sison, na siyang nagmungkahi sa Trinity University of Asia sa Sitio Sapa upang maging katuwang nito sa gawaing ekstensyon at pagpapaunlad ng pamayanan. Dito, nagkakilanlan tayo at ang mga kasamahan nating lider sa komunidad gaya nina Gng. Eliza Magtibay at G. Eduardo Dellosa.
Nagpatuloy ang ating inisyatiba sa kabila ng pagpalit ng liderato
sa Barangay San Rafael noong 2019. Sa patuloy na pagsuporta ni Kapitan Eron Paul Alvarez, nitong taon din nang mailunsad natin ang mga aktibidad na may kinalaman sa paghahanda sa komunidad (o social preparation) kung saan magkasama nating inalam ang buhay at kalagayan sa Sitio Sapa sa pamamagitan ng patuloy na pakikipagtunguan, pakikipamuhay, at pakikiaralan kasama ang mga lider-residente nito.
Dito, matagumpay nating naisulat at naibahagi ang kuwento ng
Sitio Sapa na magsisilbing inisyal na batayan para sa isasagawang pampamilyang sensus sa taong 2020, at pagbubuo ng mga akmang programa serbisyo na makakatulong sa pagpapaunlad ng komunidad at pag-angat ng kalidad ng buhay ng mga mamamayang naninirahan dito.
Subalit dahil sa pagpasok ng pandemiyang COVID-19 at
pagdeklara ng Enhanced Community Quarantine sa Metro Manila at mga karatig na probinsya noong Marso 2020, ang TCDS ay pansamantalang hininto ang mga gawaing pangkomunidad, partikular ang pampamilyang sensus sa Sitio Sapa, alinsunod sa pinapatupad ng pamahalaan upang sugpuin ang nasabing sakit.
Ngayong unti-unti nang lumuluwag ang sitwasyon sa mga
bayang mababa ang kaso ng COVID-19 at unti-unti na ring bumabalik ang mga mamamayan sa dati nitong mga aktibidades, naghanda ng alternatibong sistema upang ipagpatuloy ang mga gawain sa Sitio Sapa na mahalaga sa pagsasa-opisyal ng tuwangan ng pamantasan at ng komunidad.
Sa basbas ng lokal na pamahalaan ng Barangay San Rafael at
tulong ng mga lider-residente ng Sitio Sapa, ang TCDS ay lumikha ng mga gabay para maisagawa ang pagsesensus sa bawat pamilya (o household profiling) sa nasabing komunidad sa pamamagitan ng pagpapalakas at pagpapakilos sa mga lider- residente na interesadong lumahok bilang mga katuwang sa pangangalap ng datos (o mga taga-tala/ enumerator). Panoorin ang susunod na bidyo para sa pagpapaliwanang ng mga gabay sa pagsasagawa ng pampamilyang sensus.